Bafsa ba a Botšiša . . .

Ke’ng se se Tlogago se Fošagetše ka go Tsoša Kganyogo ya Dikopano tša Botona le Botshadi Mogaleng?

GO YA ka makasine o mongwe wa ma-Amerika woo o tsebjago kudu, “go tsoša kganyogo ya dikopano tša botona le botshadi mogaleng go tšeetše lengwalo la ditaba tša lerato legato gomme go fetogile mokgwa wo o thabelwago ke baratani bao ba dulago kgole le kgole wa go boledišana ka tša lerato.”

Go tsoša kganyogo ya dikopano tša botona le botshadi mogaleng ke eng? Go akaretša go bolela phaa! ka ditaba tšeo di tsošago kganyogo ya tša botona le botshadi mogaleng goba go di theetša. * Bao ba nweletšego mokgweng wo, gantši ba tsoša ditho tša pelego bakeng sa go kgotsofatša kganyogo ya bona ya tša botona le botshadi. Go sa šetšwe gore batho bao ba boledišanago ka dilo tše di gobogilego ba lefereyong goba ke batho bao ba sa tsebanego, go tsoša kganyogo ya dikopano tša botona le botshadi mogaleng go atile ka tsela e hlobaetšago. Ge e le gabotse, ba bangwe ba thekga mokgwa wo pepeneneng.

Mosadi yo mongwe o re: “Ke tsela e šireletšegilego ka go fetišiša ya dikopano tša botona le botshadi yeo motho a ka e dirišago.” Go bonagala batho ba bantši ba dumelelana le yena. Ka mohlala, ka October 2000, sehlopha sa ditsebi tša tša kalafo sa ma-Russia se ile sa diriša dikwalakwatšo tša dikuranta bakeng sa go kgothaletša go tsoša kganyogo ya dikopano tša botona le botshadi mogaleng, e le ge se arabela tabeng ya go ata ga go fetelwa ga batho ke HIV.

Lega go le bjalo, batho ba bangwe ba kgothaletša go tsoša kganyogo ya dikopano tša botona le botshadi mogaleng e le feela bakeng sa go dira tšhelete. Ditirelo tšeo go tšona go tsošwago kganyogo ya tša botona le botshadi mogaleng—moo batho ba lefelelago go kwa dipolelo tše di gobogilego—di fetogile dikgwebo tše di dirago ditolara tše dimilione tše dikete kua United States feela.

Ge e le gabotse, ke ka baka la’ng mokgwa wo o atile gakaakaa? Puku ya The Fantasy Factory e o hlalosa ka tsela ye: “Go kgomana mo go tseneletšego mmeleng le maikwelong go kotsi. Go na le dikotsi tša go tsenwa ke bolwetši bjo bo fetelago ka dikopano tša botona le botshadi, dikotsi tša go itheoša seriti/go itshenyetša seriti mošomong ge e ba dikgokagano tše di tseneletšego tša tša botona le botshadi di utollwa, go boifa go ahlolwa  ke ba bangwe le ditla-morago tša kganyogo yeo go thwego ke e sa tlwaelegago. Go tsoša kganyogo ya tša botona le botshadi mogaleng go fokotša kotsi yeo.”

Ke therešo gore go boledišana ka tša botona le botshadi mogaleng ga go akaretše go kgomana le motho yo mongwe ka mmele. Eupša na se se bolela gore ga go phošo goba ga go kotsi le gatee?

Na go Tsoša Kganyogo ya Dikopano tša Botona le Botshadi Mogaleng ga go Kotsi?

Kganyogo ya tša botona le botshadi e matla kudu nakong ya bofsa. Beibele e bitša nako ye yeo go yona dikganyogo tša tša botona le botshadi di lego seremong sa tšona gore ke “lebaka la bofsa.” (1 Ba-Korinthe 7:36) Nakong ye ya bohlokwa bophelong, mofsa wa Mokriste o swanetše go ithuta go “ithuela sebja sa gagwe go kgethweng le tumišong.” (1 Ba-Thesalonika 4:4, PK) Se se bolela gore o swanetše go ithuta kamoo o ka swaraganago le maikwelo a gago a tša botona le botshadi le kamoo o ka a laolago ka gona. Se se bohlokwa bakeng sa go ba le pono e botse le e leka-lekanego mabapi le dikopano tša botona le botshadi.

Lega go le bjalo, go tsoša kganyogo ya dikopano tša botona le botshadi mogaleng go ruta motho go kgotsofatša dikganyogo tša gagwe tša tša botona le botshadi go e na le gore a di laole. Go feta moo, go dira gore motho a nyatše le go lebelela motho wa bong bjo bo fapanego ka tsela e kgopamego. Beibele e ruta gore dikopano tša botona le botshadi di swanetše go thabelwa ke bao ba lego lenyalong feela. (Ba-Hebere 13:4) Eupša go tsoša kganyogo ya dikopano tša botona le botshadi mogaleng go kgothaletša bafsa go ipshina ka tša botona le botshadi ba se ba nyalana. Beibele e ruta gore lethabo la kgonthe le tlišwa ke go nea—e sego go amogela. (Ditiro 20:35) Eupša go tsoša kganyogo ya dikopano tša botona le botshadi mogaleng go ruta motho gore a diriše batho ba bangwe bakeng sa go ikgotsofatša ka tsela ya boithati. Beibele e ruta banyalani go ba le tswalano ya kgonthe le ya kgaufsi ka go hlagolela go ratana le go botana. (Ba-Efeso 5:22, 33) Lega go le bjalo, go tsoša kganyogo ya dikopano tša botona le botshadi mogaleng ga go dire bogwera gomme go dira gore batho ba se tsebane.

Temalelo e Lego Kotsi

Korinthe ya bogologolo e be e tumile ka gore ke motse wo o gobogilego boitshwarong. Ka gona, moapostola Paulo o be a e-na le lebaka le le kwagalago ge a be a ngwalela Bakriste ba moo gore: “Se ke se boifaxo, ké xore Le ka senywa mexopolô, la timêlwa ke therešô ye e išaxo xo Kriste, la etša Efa xe a forwa ke nôxa ka maanô a yôna.” (2 Ba-Korinthe 11:3) Go tsoša kganyogo ya dikopano tša botona le botshadi mogaleng ke tsela e nngwe yeo Sathane Diabolo a e dirišago bakeng sa go senya bafsa lehono.

Go bafsa ba bangwe, go leletša mafelo a go boledišana ka tša botona le botshadi mogaleng go šetše go ba tsene mading mo e lego gore ga ba sa kgona go go laola. Lesogana le lengwe leo re tla le bitšago Jim, le bontšha gabotse kamoo ba bangwe ba ka “nwelelago” ka gona. Jim o ile a bona dinomoro tša mogala tša go boledišana ka tša botona le botshadi mogaleng letlapeng le legolo la kwalakwatšo. O ile a swara nomoro yeo ka hlogo gomme ka morago a leletša moo ka baka la go rata go tseba. O ile a thoma go leletša moo kgafetša-kgafetša. Go se go ye kae, ke ge a setše a sentše R4 300 mogaleng!

Go fehla dikganyogo tša botona le botshadi o se lenyalong go thulana le keletšo ya Lentšu la Modimo. Le kgothaletša gore: “Bolayang-xê tše dithong tša lena e lexo tša lefase, e lexo bootswa, le dithšila, le tumô, le kxanyoxô e mpe.”—Ba-Kolose 3:5.

Dikotsi Nakong ya Lefereyo

Go thwe’ng ka bafsa bao ba lego mahlalagading bao ba fereyanago ka maikemišetšo? Ke therešo gore ke ga tlhago bakeng sa batho bao ba ratanago go nyaka go bontšhana maikwelo a kamoo ba ratanago ka gona. Morago kua mehleng ya Beibele, kgarebe e nngwe yeo e boifago Modimo e ile ya bolela se ka moratiwa wa yona: “Nna mong wa-ka ké moratwa wa-ka, le yêna ó [“a nkganyoga,” NW].” (Sefela sa Difela 7:11) Ga se phošo e bile go swanetše gore baratani bao ba beeletšanego ba boledišane ka ditaba tše itšego tše di tseneletšego ge letšatši la lenyalo le dutše le batamela. Lega go le bjalo, na go tsoša kganyogo ya dikopano tša botona le botshadi mogaleng ke tsela e šireletšegilego ya go bontšhana maikwelo a lerato?

Aowa. Gaešita le baratani bao ba beeletšanego ba swanetše go latela keletšo ya moapostola Paulo e rego: “Xe e le bootswa, le dithšila ka moka, le mexabaru, tše byalo le xo bolêla di se kê tša bolêlwa mo xo lena; ké sôna se se swanetšexo bakxêthwa. Le tša dihlong di se kê tša ba xôna, le dipolêlô tša bošilo, le metlaê e sa lokaxo. A xo atišê xo kwala teboxô. Le fêlê Le tseba xore, e ka ba seotswa, le xe e le wa dithšila, xoba wa mexabaru—xobane wa mexabaru ó dirêla medimo e šele—bohle bao  xa ba na kabêlô mmušong wa Kriste le wa Modimo.”—Ba-Efeso 5:3-5; Ba-Kolose 3:8.

Go molaleng gore poledišano yeo e tseneletšego yeo ka boomo e fehlago dikgopolo tše di gobogilego goba yeo e hlohleletšago go tsoša ditho tša pelego ga se ya hlweka mahlong a Jehofa. E bile e ka lebiša sebeng se segolo sa go tshela melao ya motheo ya Modimo. Ka mohlala, baratani ba bangwe ba be ba thabela go tšwela pele ka go fereyana ba le kgole le kgole. Mathomong ba be ba diriša dipoledišano tša ka mehla mogaleng e le mokgwa wa go tsebana gabotse. Lega go le bjalo, go se go ye kae, ke ge ba thoma go boledišana ka dilo tše di gobogilego. Dipoledišano tša bona di ile tša ba matla kudu. Ka gona, ga go makatše ge mafelelong ba ile ba re go hwetša sebaka sa go ba gotee, ba napa ba wela boitshwarong bjo bo gobogilego.

Ka kgonthe, rena bao re nyakago go kgahliša Modimo re tla dira seo se lego matleng a rena gore re se ke ra wela moreong wa go tsoša kganyogo ya dikopano tša botona le botshadi mogaleng. Re ka atlega bjang go direng bjalo?

‘Otlaka Mmele wa Gago’

Go tsoša kganyogo ya dikopano tša botona le botshadi mogaleng go ka tsena mading. Re swanetše go ‘otlaka mebele ya rena gore re e thapiše’ bakeng sa gore re amogelwe ke Jehofa. (1 Ba-Korinthe 9:27) Ge e ba mo nakong ye o nweletše mokgweng wa go tsoša kganyogo ya dikopano tša botona le botshadi mogaleng, ke ka baka la’ng o sa kgopele thušo? Go botša batswadi ba gago ba Bakriste e tla ba mathomo-mayo a mabotse. Ee, gona ba ka no go befelela. Eupša gape ba ka ba boemong bjo bokaone kudu bja go go thuša go bea boitshwaro bja gago leihlo e le gore o se ke wa boeletša phošo yeo. Bagolo ba phuthegong ya geno ya Dihlatse tša Jehofa le bona ba tla thabela go go thuša gomme ba tla kgona go thuša.

Ge e ba le fereyana, ikemišetšeng go dula le hlwekile, gaešita le ge le bolela mogaleng. Mosadi wa Mokriste yoo a beeleditšwego yo leina la gagwe e lego Leticia o re: “Nna le moratiwa wa-ka re badile gotee dihlogo tšeo di theilwego Beibeleng tše di lego mabapi le kamoo motho a ka dulago a hlwekile. Re thabela ka tsela yeo di re thušitšego ka yona go dula re e-na le letswalo le le hlwekilego.” E-ba le sebete sa go fetoša poledišano ya lena ge e ba e thoma go tšwa tseleng. Boledišanang ka bohlokwa bja gore poledišano ya lena e dule e le e hlwekilego.

Dinageng tše dingwe dipapatšo tša mabapi le go tsoša kganyogo ya dikopano tša botona le botshadi mogaleng di bontšhwa thelebišeneng bošego kudu. Mohlomongwe go tla ba kaone kudu gore o fo phema go bogela TV bošego kudu. Ka ge go tsoša ditho tša pelego le gona go ka fehla dikgopolo tše di gobogilego go e na le go di ganetša, go bohlokwa gore o pheme mokgwa wo woo o gobogilego. * O ka atlega go tloša dikgopolo tše di gobogilego monaganong wa gago ka go nagana ka dilo tše di lokilego. (Ba-Filipi 4:8) Gwerana le bagwera bao ba bolelago polelo e hlwekilego gomme o bale Lentšu la Modimo le dikgatišo tša Bokriste letšatši le letšatši bakeng sa go matlafatša boikemišetšo bja gago. Ka tsela ye, o ka se nee dikgopolo tše di gobogilego sebaka sa go tsena ka monaganong wa gago gomme tša o senya. Sa bohlokwa kudu, rapela Modimo gore a go thuše. Moapostola Petro o ile a ngwala gore: “Dipelaêlô tša lena ka moka di lahleleng xodimo xa xaxwe, xobane ké Yêna a Le belaêlêlaxo.”—1 Petro 5:6, 7.

Ngwanenyana yo monyenyane wa Mokriste wa Brazil o re: “Kgateletšo yeo bafsa ba lebeletšanego le yona ya go ba le dikopano tša botona le botshadi tše gobogilego ke e matla kudu.” Lega go le bjalo, Jehofa o tseba mathata ao o lebeletšanego le ona. Kgonthišega gore o tla go nea thušo yohle yeo o e nyakago bakeng sa go dula o hlwekile mahlong a gagwe.—Ba-Efeso 6:14-18.

[Mengwalo ya ka tlase]

[Diswantšho go letlakala 20, 21]

Go tsoša kganyogo ya dikopano tša botona le botshadi mogaleng gotee le go fehla kganyogo ya tša botona le botshadi ka “computer” go a ata

[Diswantšho go letlakala 20, 21]

Baratani bao ba lego lefereyong ba swanetše go ba šedi gore poledišano ya bona ga e šilafale

[Seswantšho go letlakala 22]

Go bala Lentšu la Modimo gotee le dikgatišo tša Bokriste go ka matlafatša boikemišetšo bja gago bja go dula o hlwekile