Pono ya Beibele

Na go nwa ka mo go Feteletšego e Tloga e le mo go Fošagetšego Gakaalo?

MOTHO yo a tagilwego e bile e le yo a rategago, yo karolo ya gagwe e lego go dira gore batho ba sege, karolo ya gagwe e be e dutše e le gona dipapading tša sethaleng le tša dipaesekopong ka nywaga e mentši. Gaešita le ge bao ba thabišago batho ba ka fo ba ba diragatša, mokgwa wa bona wa go segiša batho o bonagatša go se kgonthišege ga ba bantši mabapi le taba ya go nwa kudu, ba tšea go nwa kudu e le bofokodi eupša ge e le gabotse go se kotsi.

Therešo ke gore taba ye ga e segiše. Mokgatlo wa Lefase wa tša Maphelo o bontšha gore go dirišwa gampe ga bjala ke e nngwe ya dilo tše kotsi kudu go tša maphelo lefaseng ka bophara. Go bolelwa gore ntle le go ba lekgoba la go kgoga motšoko, go dirišwa gampe ga bjala go baka mahu le malwetši a mantši go feta go dirišwa gampe ga setšweletšwa le ge e le sefe seo se lemalelwago, e bile go gamola boemo bja tša boiphedišo bja Amerika e nnoši diranta tše dibilione tše 1,3 ka ngwaga.

Go sa šetšwe dintlha tše, ba bantši ba tšwela pele go tšeela fase taba ya go nwa kudu. Gaešita le ge ba ka lemoga ditla-morago tše gobatšago tša go diriša bjala gampe ka nako e telele, ga ba bone e le phošo ge ka dinako tše dingwe ba e-nwa kudu. Gare ga bafsa ba bantši dikarolong tše dingwe tša lefase, go tagwa go lebelelwa e le tiragalo e bohlokwa ya go bontšha go gola ga motho. Le gona, go sa šetšwe ditemošo tše matla tšeo di newago ke mekgatlo ya tša maphelo, go nwa kudu mo go hlaloswago e le go nwa dino tše hlano feela goba go feta moo ka nako e tee, go oketšega ka lebelo le le makatšago go batho ba nywaga ka moka. Ka gona, ke mo go kwagalago ge batho ba bantši ba ipotšiša ge e ba go nwa kudu e le selo se sebe gakaalo. Beibele e re’ng?

Beine le Sedila—Dimpho tše di Tšwago go Modimo

Beibele e rwele ditšhupetšo tše dintši mabapi le beine le sedila. Kgoši Salomo o ile a ngwala gore:  “Sepela, o je bogobe bja gago ka go thaba; o nwe beine ya gago ka pelo e welego, gobane Modimo o šetše a kgahlilwe ke mediro ya gago.” (Mmoledi 9:7, PK) Mopsalme o ile a dumela gore Jehofa Modimo ke Monei wa “beine [bakeng sa] gore e thabiše pelo ya motho.” (Psalme 104:14, 15, PK) Go molaleng gore beine ke e nngwe ya dimpho tšeo di akaretšwago dilong tšeo Jehofa a šegofaditšego batho ka tšona.

Go molaleng gore go nwa beine e be e le selo se se amogelegago go Jesu. Ge e le gabotse, mohlolo wa gagwe wa pele o ile wa akaretša go fetoša meetse gore e be beine ya maemo a godimo monyanyeng wa lenyalo. (Johane 2:3-10) Gape o ile a diriša beine e le seswantšhetšo se se swanetšego sa madi a gagwe ge a be a thea Sejo sa Morena sa Mantšiboa. (Mateo 26:27-29) Beibele e bile e bolela ka mohola wa beine tabeng ya go alafa, ka gobane moapostola Paulo o ile a kgothaletša Timotheo gore ‘a nwe beinenyana ka baka la mala a gagwe.’—1 Timotheo 5:23; Luka 10:34.

Go Lekanyetša ke Senotlelo

Ela hloko gore Paulo o ile a kgothaletša go nwa feela “beinenyana.” Beibele e sola ka go lebanya ditsela ka moka tša go diriša bjala ka mo go feteletšego. Baperisita ba ba-Juda ba be ba lokologile go nwa ka go lekanyetša ge ba be ba se modirong. Lega go le bjalo, ba be ba sa dumelelwa go nwa dino le ge e le dife tšeo di tagago ge ba be ba le medirong ya bona ya boperisita. (Lefitiko 10:8-11) Nywaga e mentši ka morago, Bakriste ba lekgolong la pele la nywaga ba ile ba lemošwa gore matagwa a “ka se bê le kabêlô mmušong wa Modimo.”—1 Ba-Korinthe 6:9, 10.

Go oketša moo, Paulo ge a be a nea Timotheo ditaelo o ile a mmotša gore bao ba etelelago pele ka phuthegong e se be ba “lešata la botagwa” goba “ba ineela beineng e ntši.” * (1 Timotheo 3:3, 8, NW) Ge e le gabotse, Beibele e nea taelo ya gore matagwa ao a sa sokologego a rakwe phuthegong ya Bokriste. (1 Ba-Korinthe 5:11-13) Go etša ge Mangwalo a bea taba ka tsela e kwagalago, “beine ke mokweri.” (Diema 20:1) Go ineela kudu bjaleng go ka palediša motho yo a nwago go itaola gomme gwa mo palediša go dira kahlolo e botse.

Lebaka Leo ka Lona Lentšu la Modimo le Solago go Nwa Kudu

Jehofa, ‘Yo a re rutago tšeo di re holago,’ o a tseba gore ge re diriša selo le ge e le sefe gampe, mafelelong re a ikgobatša gomme re gobatša le ba bangwe. (Jesaya 48:17, 18) Se ke therešo ge go tliwa tabeng ya go nwa dino tše di tagago. Lentšu la Modimo le botšiša gore: “Yo madi-mabe ké mang?—Mahlomola a xo mang?—Dikxang di xo mang?—Manyami a xo mang?—Dinthô tša lefêla di xo mang?—Mahlô-mahwibidu a xo mang?” E a araba: “Ké tša bao ba tsêtsaxo mabyalweng, ba xo y’o leka setswaka sa sebelá.”—Diema 23:29, 30.

Batho ba dirile dilo tša go se bontšhe tlhaologanyo le tše kotsi ka baka la go nwa kudu: ba otlela ba fahlilwe ke madila gomme ba ipea kotsing le go bea ba bangwe kotsing, ba bontšha lerato ka mo go feteletšego go molekane wa motho yo mongwe gomme ba senya ditswalano o šoro, ba bolela le go dira tša bošilo goba gaešita le go di dira ka manganga. (Diema 23:33) Go dirišwa gampe ga bjala go bitšwa gabotse gore ke bjo bongwe bja mathata ao a senyago ka go fetišiša mathateng ka moka a setšhaba ao a hlasetšego batho lehono. Ga go makatše ge Modimo a kgothaletša gore: “O se kê wa tlwaêlana le dihori tša sebelá.”—Diema 23:20.

Paulo go Ba-Galatia 5:19-21 o lokeletša dikgobokano tša botagwa le menyanya ya mašata e le “medirô ya nama” yeo e sa dumelelanego le dienywa tša moya wa Modimo. Go nwa bjala kudu go tla senya tswalano ya motho le Modimo. Ka gona, go molaleng gore Bakriste ba swanetše go phema go diriša bjala ka tsela le ge e le efe yeo e feteletšego.

[Mongwalo wa ka tlase]