Thabela Segwera le Diphoofolo ka mo go sa Felego

A MEHUTA e mentši e fapa-fapanego gakaakaa ya diphoofolo yeo e lego gona, go bonagala e nngwe le e nngwe e-na le semelo le mekgwa ya yona e fapanego! Go di rata le go di bontšha maikwelo a borutho e ka ba selo seo se ka dirago gore motho a batamele kgaufsi le Mmopi wa tšona. Se se ile sa bontšhwa tabeng ya Maria.

Mo e ka bago nywageng e meraro e fetilego, ge Maria a be a dula kua Lisbon, Portugal, mpša ya gagwe e rategago e ile ya lahlega gomme o ile a tsebiša ka se radiong. Yo mongwe wa Dihlatse tša Jehofa yo a bego a kgodišegile gore o bone  mpša yeo e hlalositšwego o ile a ikgokaganya le Maria. Ka morago ga ge ba kopane, ba ile ba hwetša mpša, gomme Hlatse ya bolela gore ka ge Maria e be e le morati wa diphoofolo gakaakaa, ka kgonthe o be a ka thabela go phela lefaseng le lefsa leo Modimo a le holofeditšego. Hlatse e ile ya hlalosa gore ka nako yeo batho ba tla ba khutšong le diphoofolo ka moka.

Maria o ile a amogela taletšo ya go ba gona sebokeng sa Dihlatse. Seo a ilego a se kwa le go se bona moo se ile sa godiša kgahlego ya gagwe go fihla bokgoleng bjo a ilego a rata go ba le thuto ya motho ka noši ya Beibele. Ge thuto e dutše e tšwela pele, Maria o ile a kgongwa ka mo go tseneletšego ke seo a bego a ithuta sona ka Jehofa Modimo le ka kholofetšo ya gagwe ya bophelo bjo bo sa felego lefaseng le lefsa la go loka. (Psalme 37:29; Johane 17:3) Mafelelong, ka February 16, 2002, o ile a bonagatša boineelo bja gagwe go Jehofa ka go kolobetšwa meetseng.

Morero wa Modimo wa Mathomong

Go swana le Maria, batho ba bantši ba ile ba thabišwa ke bohlatse bja gore morero wa Modimo wa mathomong wa gore batho ba phele ka mo go sa felego lefaseng la paradeise le go hlokomela diphoofolo tša lona ka moka o tla phethagatšwa mafelelong. (Genesi 1:28) Beibele e bolela gore Modimo “a se le bope [lefase] ya ba la lefêla” eupša “a le dirêla xo dulwa ke batho.” Go ya ka kholofetšo ye, batho ba be ba tla thabela lefase le diphoofolo tša lona ka mo go sa felego.—Jesaya 45:18.

Beibele e gatelela ka mo go tšwelago pele maikemišetšo a Modimo a go phethagatša morero wa gagwe wa mathomong wa go dira lefase paradeise. O tsebatša ka gore: “Ke boletše,” gomme o oketša ka gore: “Ke tlo dira.” Jehofa gape o laela gore: “Lentšu la-ka le le tšwaxo molomong wa-ka, le ka se boêle xo Nna lè le fêla; le tlo dira se nkxahlaxo, le tlo phêtha se ke le rometšexo sôna.”—Jesaya 46:11; 55:11.

Go molaleng gore morero wa Modimo wa mathomong e be e le gore batho ba thabele paradeise ya mo lefaseng ka mo go sa felego. Re ka kgodišega ka mo go feletšego gore morero woo o tla phethagatšwa mafelelong. Anke re hlahlobeng tlhaloso e kopana ye e neilwego ka Beibeleng mabapi le kamoo bophelo bo tlago go ba ka gona lefaseng le lefsa la Modimo. Re tla bona gore ka kgonthe diphoofolo ka moka, tša ka gae le tša lešoka, di tla ba le khutšo magareng ga tšona gotee le batho.—Jesaya 65:17, 21-25; 2 Petro 3:13.

Diruiwa Lefaseng le Lefsa la Modimo

Lefaseng le lefsa la Jehofa, batho ba tla kgona go swara-swara mariri a tau, go phophola mabala a nkwe gaešita le go robala lešokeng ka ntle le go boifa phoofolo le ge e le efe yeo e ka ba gobatšago. Ela hloko kholofetšo ye ya Modimo: “Ka fediša dibata tše šoro mo naxeng; le lešokeng ba tlo dula bà iketlile, ba rôbala le sekxweng.”—Hesekiele 34:25; Hosea 2:18.

Ka kgonthe, ka nako yeo diphoofolo tša lešoka di tla ikokobeletša gaešita le bana ba banyenyane! Beibele e re: “Phiri e tlo dula le kwanyana; nkwê e tlo hutama le putšanyana; namane le tau le pholo di tlo dula felô xotee, di xapye ke mošemanyana.”

Eupša ga go felele moo! Lengwalo le tšwela pele ka gore: “Namaxadi le tau-thsadi di tlo fula xotee, bana ba tšôna ba hutame mmôxô; ’me tau e fula bya’ng bo-ka kxomo. Ngwana e monyenyane ó tlo bapala moleteng wa marabê; wa xo thswa letswêlê ó tlo kxwathiša ’ihlô la mokôpa ka seatla. Xo ka se hlwê xo dirwa dibe, xo ka se hlwê xo senywa mo xo fêla dithabeng tše kxêthwa tša-ka, xobane xo tseba Morêna xo tlo tlala ’fase lohle bo-ka meetse xe a nabile lewatleng.”—Jesaya 11:6-9.

Lefaseng le lefsa la Jehofa, go ka se be le bothata bja batho bao ba kgobokanego gotee metseng e megolo yeo bona gotee le diruiwa tša bona ba sa iketlago go yona. Ke therešo gore gaešita le lehono batho ba bantši ba thabela diphoofolo tša bona gomme ba bantši ba bonagatša teka-tekano tseleng yeo ba di lebelelago ka yona le go di hlokomeleng. Eupša anke o nagane ka tebelelo e kgahlišago ya go thabela diruiwa ka mo go sa felego lefaseng le lefsa la go loka! Tlhokomelo e lerato yeo di e newago e tla tumiša e le ka kgonthe Mmopi yo Mogolo wa dilo tšohle tše di phelago.

Ge e ba o se wa hlwa o ithuta ka merero ya Modimo e kgahlišago—go etša ge morati wa diphoofolo e lego Maria a be a se a ka a dira bjalo go ba go fihla morago bjale—re go laletša ka borutho gore o ikgokaganye le bagatiši ba makasine wo goba yo mongwe wa Dihlatse tša Jehofa yo a tlago go thabela go go thuša go ithuta ka merero ya Modimo.

[Seswantšho go letlakala 18]

Lefaseng le lefsa la Modimo, diphoofolo di tla thabelwa ka mo go sa felego