Ba Ile ba Phologa Lefula!

Ka mongwadi wa Phafoga! kua SWITZERLAND

KA October 2000, go ile gwa amogelwa dipego tša mafula go tšwa dikarolong tše fapa-fapanego tša lefase. Dipula tše dikgolo di be di khupeditše mahlakore a dithaba, tša baka go kgerega ga mobu wo o bego o gogola mehuta ka moka ya ditlakala gaešita le dihlare tšeo di tumotšwego!

Tikologo ya Valais ka borwa bja Switzerland e be e le le lengwe la mafelo ao dikotsi tše di diregilego go ona. Karolo ye ya naga e arotšwe ka botelele ke noka ya Rhône, yeo e elelelago ka thoko ya bodikela go tloga go moela-kgapetla wa Rhône dithabeng tša Central Alps go ya Letsheng la Geneva—bokgole bja dikhilomithara tše ka bago 170. Thaba e fara-farile noka ka mahlakoreng ka bobedi gomme e dira gore meetse a mantši a elelele ka nokeng a sepela ka melatswana e mentši yeo e fetanago ka bogolo. Ka tlwaelo, go elela mo go sepela ka thelelo. Eupša ge dipula tše matla di aparela tikologo ka moka, gantši go latela mathata.

Se ke seo se diregilego kua Gondo, mollwaneng wa Italy. Motse wo wa dithabeng woo o nago le badudi ba 150 o ile wa welwa ke seretse se sentši seo se hlakanego le mafsika seo se ilego sa senya karolo e kgolo ya motse. Go se go ye kae, dikarolo tše dingwe tša Valais di ile tša nelwa ke dipula tša matlakadibe. Ditsela le diporo di ile tša thibega gomme dintlo tša thoma go tlala seretse le mafsika. Dikarolong tše dingwe go ile gwa ba le mokgobo wa seretse sa bophagamo bja mo e ka bago dimithara tše nne. Mosadi yo mongwe o ile a bogela ge seretse se sentši sa bophagamo bja dimithara tše 30 seo se nago le mafsika a magolo le dihlare tšeo di emego se be se lebile motseng wa gabo ka go lebanya!

Banyalani bao e lego Markus le Tabitha, ba be ba dula kua Mörel nakong ya kotsi ye. Markus o gopola gore: “Re ile ra tsošwa ka pela ka morago ga 6:00 mesong ke modumo o mogolo le go šišinyega. Ke ile ka tšwela ka ntle ke swere thotšhi go yo lekola gore bothata ke eng gomme ke ile ka tšhošwa ke seo ke se bonego. Dintlo le maporogo di be di sentšwe ke mafsika a magolo gomme koloi e be e bethantšhitšwe le ntlo ya moagišani. Kua fase, moagišani le mosadi wa gagwe ba be ba kgakgetšwe ka ntlong ya bona. Ke ile ka ba thuša go tšwa ka lefasetere. Ge ke boela gae, nna le Tabitha re be re e-na le nako e lekanego ya go kgoboketša dilo tša rena tše mmalwa.”

Markus le Tabitha ke Dihlatse tša Jehofa gomme ba ile ba hwetša botšhabelo go badumedi-gotee le bona ka ntle ga tikologo e kotsi. Markus o re: “Gaešita le ge re ile ra phologa, Tabitha o ile a ba le kgateletšego ya tiragalo yeo ka matšatši a mmalwa.” Ke’ng seo se mo thušitšego go kgotlelela phihlelo e tšhošago? Tabitha o araba ka gore: “Ke bogwera bja bana bešo le dikgaetšedi tumelong,” gomme o oketša ka gore: “Le kgahlego yeo e bontšhitšwego ke bontši bja baagišani ba rena.”

Boemo bjo bo ile bja gopotša Markus le Tabitha Diema 18:24 yeo e bolelago gore go na le “moratwa-mmotexi mo-phala-ngwana weno.” Dinakong tša dikotsi, bagwera ba bjalo ba itlhatsela e le ba bohlokwa gakaakaang!

[Mmapa go letlakala 18]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

Tikologo yeo e hlasetšwego

Gondo

[Seswantšho go letlakala 18]

Markus le Tabitha

[Mothopo wa Seswantšho go letlakala 18]

Mise à disposition par www.crealp.ch