Bošego bjo bo Swanetšego go Gopolwa—Sontaga, April 4, 2004

BOŠEGONG bja pele ga ge a e-hwa, Jesu Kriste o ile a thea Segopotšo sa lehu la gagwe. Ge a be a e-na le barutiwa ba gagwe ba le dijong moo a ilego a diriša beine le senkgwa se se sa omelwago e le diswantšhetšo, Jesu o ile a laela gore: “Dirang byalo xore e bê xo nkxopola.”—Luka 22:19.

Dihlatse tša Jehofa di go laletša ka borutho gore o be le tšona ge di gopola Segopotšo se sa ngwaga le ngwaga. Lenyaga se tla swarwa ka morago ga ge letšatši le sobetše ka Sontaga, April 4, e lego letšatši leo le sepedišanago le Nisani 14 almanakeng ya Beibele. Hle botšiša Dihlatse tša Jehofa tša lefelong la geno mabapi le lefelo le le nepagetšego le nako bakeng sa seboka.