Bafsa ba a Botšiša . . .

Ke ka Baka La’ng Modimo a Dumelela Gore re Tlaišege?

“Modimo o kua legodimong moo dilo ka moka di thabišago, mola rena re le mo lefaseng re tlaišega.”—Mary. *

BAFSA ba lehono ba belegelwa lefaseng le šoro. Ditšhišinyego tša lefase tša masetla-pelo le dikotsi tša tlhago tšeo di fetago ka maphelo a dikete di bonagala e le tše tlwaelegilego. Dintwa le ditlhaselo tša botšhošetši ke dilo tšeo go bolelwago ka tšona kudu ditabeng. Go babja, bolwetši, bosenyi le dikotsi di re amoga baratiwa ba rena. Go Mary yo a tsopotšwego ka mo godimo, manyami a mo kgomile ka mo go tseneletšego maikwelong. O ile a bolela mantšu a gagwe ao a bontšhago go kwa bohloko ka morago ga lehu la tatagwe.

Ge manyami a re kgoma ka noši, e fo ba ga tlhago go ikwa o gakanegile, o lahlegetšwe goba gaešita le go befelwa. O ka ipotšiša gore: ‘Ke ka baka la’ng se se be se swanetše go direga?,’ ‘Ke ka baka la’ng se diragaletše nna?’ goba ‘Ke ka baka la’ng se diregile gona bjale?’ Dipotšišo tše bjalo di nyaka dikarabo tše di kgotsofatšago. Eupša gore re hwetše dikarabo tše di nepagetšego, re swanetše go ya mothopong o swanetšego. Ke therešo gore bjalo ka ge mofsa yo a bitšwago Turrell a ile a lemoga, ka dinako tše dingwe batho ba “kwa bohloko kudu mo e lego gore ga ba naganišiše ka taba.” Ka gona o ka nyaka go hwetša tsela ya gore o okobatše maikwelo a gago ganyenyane e le gore o kgone go nagana—ka tsela e nago le tlhaologanyo le kwešišo.

 Go Lebeletšana le Dilo tša Kgonthe tše di sa Thabišego

Go ka no se thabiše go nagana ka tšona, eupša lehu le tlaišego ke ditherešo tša bophelo. Jobo o ile a bea taba gabotse ge a be a re: “Motho e a belexwexo ke mosadi, matšatši a xaxwe xa se a makae, ’me ó hoše tapišexo.”—Jobo 14:1.

Beibele e holofetša lefase le lefsa leo go lona “xo axilexo tokô.” (2 Petro 3:13; Kutollo 21:3, 4) Lega go le bjalo, pele ga ge maemo ao a lokilego a ka phethagatšwa, batho ba swanetše gore ba lebeletšane le nako ya bobe bjo bo sa hlalosegego. Beibele e re: “Eupša tseba se, gore mehleng ya bofelo go tla tla dinako tše hlobaetšago tšeo go lego thata go lebeletšana le tšona.”—2 Timotheo 3:1, NW.

Na dinako tše tše hlobaetšago di tla ba gona ka nako e kaaka’ng? Barutiwa ba Jesu ba ile ba botšiša potšišo e nyakilego e swana le ye. Eupša Jesu ga se a ka a ba nea letšatši le le lebanyago goba iri yeo ka yona tshepedišo ye ya dilo yeo e tletšego manyami e bego e tla fela. Go e na le moo, Jesu o itše: “E a tl’o xo tiišetša xo fihla bofelong, ké yêna a tl’o xo phološwa.” (Mateo 24:3, 13) Mantšu a Jesu a re kgothaletša go lebelela ka kua ga dilo. Re swanetše go itokišeletša go kgotlelela maemo a mantši a sa thabišego pele bofelo bo ka tla mafelelong.

Na Modimo o Swanetše go Bewa Molato?

Ka gona, na ke mo go kwagalago go befelela Modimo ka baka la gore o dumelela tlaišego? E sego ge o nagana gore Modimo o holofeditše go fediša tlaišego ka moka. E bile ga se mo go kwagalago go nagana gore Modimo o baka dilo tše mpe. Masetlapelo a mantši ao a diregago ke feela mafelelo a ditiragalo tše di sa letelwago. Ka mohlala, akanya moya o wiša mohlare gomme o gobatša motho-tsoko. Batho ba ka re ye ke tiragalo yeo e bakilwego ke Modimo. Eupša Modimo ga se a dira gore mohlare woo o wele fase. Beibele e re thuša go kwešiša gore dilo tše bjalo ke feela ditla-morago tše bohloko tša “nako le ditiragalo tše di sa letelwago.”—Mmoledi 9:11, NW.

Tlaišego gape e ka tšwelela ka baka la go hloka kahlolo e botse. A re re sehlopha sa bafsa se ithabiša ka go nwa dino-tagi gomme ka morago se otlela koloi. Ka morago go ba le kotsi e kgolo. Ke mang yo a swanetšwego ke go bewa molato? Na ke Modimo? Aowa, ba bunne ditla-morago tša go hloka ga bona kahlolo e botse.—Ba-Galatia 6:7.

Mo gongwe o ka ipotšiša gore: ‘Eupša na Modimo ga a na matla a lekanego a go fediša tlaišego gona bjale?’ Banna ba bangwe ba botegago mehleng ya Beibele ba ile ba ipotšiša ka seo. Moporofeta Habakuku o ile a botšiša Modimo gore: “O re’ng Ò bôna dihlôlá, wa homola xe yo mobe à fo metša ba ba mo phalaxo ka xo loka?” Lega go le bjalo, Habakuku ga se a akgofela go dira diphetho. O ile a re: “[Ke tla] hlapetša, ke tlê ke bônê se Morêna a tl’o xo ntsebiša sôna.” Ka morago, Modimo o ile a mo kgonthišetša gore ka “lebaka la [gona]” O tla fediša tlaišego. (Habakuku 1:13; 2:1-3) Ka gona, re swanetše go se fele pelo, re emele Modimo gore a fediše bobe ka nako ya gagwe yeo a e beilego.

Phema go akgofela go tšea phetho ya gore Modimo ka tsela e itšego o nyaka gore re tlaišege goba gore yena ka noši o a re leka. Ke therešo gore tlaišego e ka utolla dika tše kaone tša rena le gore Beibele e bolela gore diteko tšeo Modimo a di dumelelago di ka sekiša tumelo ya rena. (Ba-Hebere 5:8; 1 Petro 1:7) Ka kgonthe, batho ba bantši bao ba bago le diphihlelo tša go lekwa goba tše bohloko ba fetoga bao ba sa felego pelo kudu goba ba nago le kwelobohloko. Eupša ga se ra swanela go phetha ka gore go tlaišega ga bona go be go bakwa ke Modimo. Kgopolo e bjalo ga e bontšhe go ela hloko lerato la Modimo le bohlale bja gagwe. Beibele e bolela ka mo go kwagalago gore: “Xo se kê xwa ba le e a rexo xe a lekwa, a re: ke lekwa ke Modimo; xobane Modimo xa a lekwe ke bobe; ’me le Yêna xa a leke motho.” Go fapana le seo, “’neô tšohle tše botse, le ’mphô tšôhle di tletšexo” di tšwa go Modimo! (Mongwalo o sekamego ke wa rena.)—Jakobo 1:13, 17.

Lebaka Leo ka Lona Modimo a Dumelelago Bobe

Ka gona, bobe bo tšwa kae? Gopola gore Modimo o na le baganetši—kudu-kudu yo “ba rexo ké Diabolo le Sathane, motimetši wa lefase ka moka la batho.” (Kutollo 12:9) Modimo o ile a bea batswadi ba rena ba pele e lego Adama le Efa lefaseng leo le se nago mathata. Eupša Sathane o ile a kgodiša Efa gore o be a tla phela gabotse kudu ka ntle le go bušwa ke Modimo. (Genesi 3:1-5) Ka manyami, Efa o ile a dumela maaka a Sathane gomme a se kwe Modimo. Adama o ile a mo tlatša borabeleng bjo. Mafelelo e bile afe? Beibele e re: “Lehu le aparetše batho bohle.”—Ba-Roma 5:12.

Go e na le gore a senye borabele bjo le semeetseng ka go fediša Sathane le balatedi ba gagwe, Modimo o ile a bona go swanelega gore a fetiše  nako. Na seo se be se tla tšweletša’ng? Selo se sengwe seo se bego se tla phethagatšwa e be le gore Sathane a pepentšhwe e le wa maaka! Se be se tla dumelela gore go be le bohlatse bja go bontšha gore go se ithekge ka Modimo ga go tliše selo ge e se tshenyego feela. Na seo ga se sona ge e le gabotse se diregilego? “Lefase ka moka le rapaletše matleng a yo mobe.” (1 Johane 5:19, NW) Go oketša moo, “motho [o] buša motho xore a mo senyê.” (Mmoledi 8:9) Madumedi a batho ke tlhakantswiki ya dithuto tšeo di ganetšanago. Ditekanyetšo tša boitshwaro di theogile go feta le ge e le neng pele. Mebušo ya batho e lekile tsela e nngwe le e nngwe ya go buša yeo e ka naganwago. Mebušo e saenela ditumelelano le go amogela melao, eupša dinyakwa tša batho ba tlwaelegilego ga di phethagatšwe go ba go fihla mo nakong ye. Dintwa di e nametša thaba mola e hlotša.

Go molaleng gore re nyaka gore Modimo a tsene ditaba gare gomme a fediše bobe! Eupša se se tla direga feela ka nako yeo Modimo a e beilego. Go ba go fihla ka nako yeo, ke tokelo ya rena go thekga pušo ya Modimo ka go kwa melao le melao ya motheo ya gagwe bjalo ka ge e hwetšwa ka Beibeleng. Ge dilo tše mpe di direga, re ka hwetša khomotšo kholofelong e tiišeditšwego ya bophelo lefaseng leo le se nago mathata.

Ga o Noši

Lega go le bjalo, ge tlaišego e re kgoma ka noši, re ka ikhwetša re botšiša gore ‘Ke ka baka la’ng se se diragalela nna?’ Lega go le bjalo, moapostola Paulo o re gopotša gore ga re noši go tlaišweng ke bobe. Paulo o bolela gore “dibopya ka moka le tšôna di sa fêxêlwa, le tšôna di sa šôkwa.” (Ba-Roma 8:22, mongwalo o sekamego ke wa rena) Go tseba taba ye go ka go thuša gore o lebeletšane le tlaišego. Ka mohlala, Nicole o be a kwešitšwe bohloko maikwelong ke ditlhaselo tša botšhošetši tša September 11, 2001, kua New York City le Washington, D.C. O dumela ka gore: “Ke be ke tšhogile e bile ke boifa.” Eupša ge a bala dipego tša kamoo Bakriste-gotee le yena ba ilego ba lebeletšana le masetlapelo ao, pono ya gagwe e ile ya fetoga. * “Ke lemogile gore ga ke noši le gatee. Ganyenyane-ganyenyane bohloko le manyami di ile tša thoma go fokotšega.”

Mabakeng a mangwe, ke gabohlale go tsoma yo mongwe yo o ka bolelago le yena—motswadi, mogwera yo a godilego tsebong goba mogolo wa Mokriste. Go ntšhetša motho yo o mmotago sa mafahleng go tla go dira gore o amogele “lentšu [le] botho” la kgothatšo. (Diema 12:25) Mokriste yo mongwe yo mofsa wa mo-Brazil o gopola gore: “Ke hwetšwe ke tate nywageng e senyane e fetilego, gomme ke a tseba gore Jehofa o tla mo tsoša ka letšatši le lengwe. Eupša selo se sengwe seo se nthušitšego ke go ngwala ka maikwelo a-ka. Gape, ke be ke bolela ka maikwelo a-ka le bagwera ba-ka ba Bakriste.” Na o na le ‘bagwera ba therešo’ le ge e le bafe bao o ka ba ntšhetšago sa mafahleng? (Diema 17:17) Ka gona holwa ke thušo ya bona e lerato! O se ke wa tšhaba go lla goba go bolela ka maikwelo a gago. Go ba gona, Jesu le yena o ile “a tšwa mexôkxô” ka baka la manyami a go loba mogwera!—Johane 11:35.

Beibele e re kgonthišetša gore nakong e tlago re tla “hunollwa bohlankeng bya thsenyêxô” gomme ra thabela “tokoloxô ya xe bana ba Modimo bà e-ya letaxong.” (Ba-Roma 8:21) Go ba go fihla ka nako yeo, batho ba bantši ba lokilego ba ka tlaišega. Homotšwa ke go tseba lebaka leo ka lona tlaišego e bjalo e lego gona—le gore e ka se be gona ka nako e telele.

[Mengwalo ya ka tlase]

[Seswantšho go letlakala 14]

E ka ba mo go holago gore o bolele ka manyami a gago