Selo se Sekaone go Feta Mpshafatšo

GE E ba sehlare se tšweletša dienywa tše di se nago mohola, go sega makala a mmalwa go ka se lokiše bothata. Sehlare se swanetše go rengwa ka moka gomme se tumolwe ka medu. Ke moka sehlare se sengwe seo se tšweletšago dienywa tše dibotse se swanetše go bjalwa.—Mateo 7:16-20.

Ka mo go swanago, gaešita le bampshafatši bao ba nago le dipakane tše di hlomphegago ba leka go rarolla feela ditšhupo tša mathata a lekoko la batho—kgobogo, go hlokega ga toka, go diila le bohlakodi. Lega go le bjalo, modu wo o bakago dilo tše o letše ka gare-gare. Seo se swanetšego go fetolwa ke tshepedišo ye ka moka ga yona. Se ke seo Beibele e se holofetšago.

Mmušo wa Modimo ke mmušo wa legodimong woo o tlago go dira mo gontši—mo gontši kudu—go feta go fo rulaganya lefsa, go bopa lefsa, go beakanya goba go hlama lekoko la batho lefsa. Mmušo woo o tla tliša tsela e mpsha ka mo go feletšego ya go laola ditaba tša batho, wa kopanya batho ka moka ka tlase ga pušo ya wona. Mmušo wo o tla hlokomela ditaba tše swanago le tša thuto, mošomo, madulo, phepo, maphelo le tikologo.

Psalme 72:12-14 e hlalosa ka tsela ya boporofeta seo Kgoši yeo e lego Mesia e tlago go se direla batho: “Xobane ó tlo hlakodiša modiitšana xe a lla, le mohlaki xe a hlôka monamodi. Ó tlo xauxêla mosenyi le mohloki; meôya ya bahumanexi ó tlo e phološa. Meôya ya bôná ó tlo e lokolla mohlakong, bošorong.”

Eupša ge e ba e le gore batho ba tlo lokologa ka mo go feletšego kgobogong, go hlokegeng ga toka le bodiiding, ka kgonthe ga se mmušo feela wo o tlago go swanelwa ke go fetoga eupša batho le bona ba tla swanelwa ke go fetoga. Ka gona, Mmušo o tla nea yo mongwe le yo mongwe tlhahlo ya motho ka noši ya kamoo go ka phelwago bophelo bjo bo thabišago, bjo bo nago le morero le bjo bo putsago. Beibele e holofetša gore Mmušo wa Modimo o tla thuša balata ba wona ba lefaseng go iphetola. Bjang?

Mmušo o tla ruta balata ba wona ka ditsela tša Jehofa Modimo, ka baka leo wa ba thuša go godiša tumelo le lerato. (Jesaya 11:9) Lerato la go rata Modimo le tutueletša pelo go gata mogato. Ka mohlala, lekgolong la pele la nywaga Jesu o ile a gahlana le Sakeo, moetapele wa ba lekgetho yo a bego a tlatša dipotla tša gagwe ka go rotoša metšhelo yeo e bego e lefišwa batho. Jesu ga se a ka a gatelela mohlankedi yo yo a gobogilego bakeng sa go mo hlabiša dihlong e le gore a fetole ditsela tša gagwe. Go e na le moo, Jesu o ile a thuša Sakeo go lemoga phošo ya gagwe le gore a sokologe. Sakeo o ile a tutuetšwa ke tsebo e nepagetšego ya melao ya motheo ya Modimo le ke lerato la go rata Modimo. O ile a dira diphetogo tše di makatšago.—Luka 19:1-10.

Na yeo ga se yona tharollo e di fetago tšohle ya mafokodi a batho? Mmušo wo o phethagetšego le o lokilego bakeng sa go hlokomela ditaba tša batho gotee le go tutueletšega ga motho ka noši go fetola ditsela tša gagwe. Na ka nako yeo re tla be re nyaka mpshafatšo? Le gatee, ka ge Modimo a tla be a mpshafaditše dilo tšohle. Dilo tša pele di tla be di fetile.—Kutollo 21:4, 5.

 [Diswantšho go letlakala 10]

Mmušo wa Modimo o tla tliša phetogo e feletšego e sego mpshafatšo

[Seswantšho go letlakala 11]

Ge a be a sa le mo lefaseng, Jesu o ile a thuša batho ka o tee ka o tee go dira diphetogo tša motho ka noši