Ge Ngwana wa Gago a sa Kgaotše go Lla

KA MONGWADI WA PHAFOGA! KUA CANADA

NGAKA e kgonthišeditše seo mma a bego a šetše a se belaela. Ngwana wa gagwe o be a e-na le bolwetši bjo bo tlwaelegilego bja go longwa ke mala o šoro (colic). Kuranta ya Canada ya Globe and Mail e bolela gore bolwetši bjo bo swara “bontši bja bana ba ka bago o tee go ba bane.” Maswao a bolwetši bjo a akaretša go lla ka diiri tše mmalwa mo go ka tšeago bonyenyane matšatši a mararo ka beke. Motswadi yo a tshwenyegilego a ka dira’ng? Dingaka tša bana di bolela gore maemong a mantši batswadi—le ngwana—ba ka fo swanelwa ke go letela gore bo fole. Eupša ba ka leta ka nako e kaaka’ng?

Nyakišišo ya morago bjale ya kua Canada ya bo-mmago bana bao ba swerwego ke bolwetši bja go longwa ke mala o šoro e utolla gore bana ba ka godimo ga 85 lekgolong bao ba swerwego ke bolwetši bja go longwa ke mala o šoro, ba ile ba fola nakong ya ge ba e-na le dikgwedi tše tharo. Nyakišišo yeo e thomilwego ke Dr. Tammy Clifford, e lego molaodi wa lefapha la tša kalafo leo le nyakišišago kamoo malwetši a thomago ka gona wa Sepetleleng sa Bana sa Lefelong la Nyakišišo la ka Bohlabela bja Ontario, le yena o ile a utolla gore go ba le ngwana yo a swerwego ke bolwetši bja go longwa ke mala o šoro ga go be le mafelelo a swarelelago bophelong bjo bobotse bja monagano wa bo-mma. Dr. Clifford o re: “Dikgweding tše tshela ka morago ga pelego, bo-mma ba ba swana tlwaa le bo-mma ba bana bao ba sego ba swarwa ke bolwetši bja go longwa ke mala o šoro. Go nyakile go le bjalo ka ge eka ba lebetše ka bjona ka morago ga ge ngwana a kgaoditše go lla.”

Globe e bolela gore nyakišišo ye e mpsha yeo e gatišitšwego ke Dr. Clifford le bašomi-gotee le yena “e oketša go dintlha tša bohlokwa tsebong ya tša thutamahlale mabapi le bolwetši bja go longwa ke mala o šoro ka gobane e bontšha gore go na le mehuta e meraro e sa swanego ya bana bao ba nago le bolwetši bja go longwa ke mala o šoro: bao ba swarwago ke bolwetši gomme bja fola dikgweding tše tharo tša mathomo; bao ba nago le bolwetši bja go longwa ke mala o šoro bjo bo sa kgaotšego bjoo bo tšeago dikgwedi tše mmalwa bo sa fole; le sehlopha se senyenyane sa bao ba swarwago ke bolwetši bja go longwa ke mala o šoro ka morago ga nako e telele, e lego dikgweding tše sego kae ka morago ga go belegwa.” Go dirwa nyakišišo e nngwe ya go lota mohlala wa go bona kamoo bolwetši bja go longwa ke mala o šoro bo golago ka gona ge bana ba dutše ba gola, gomme sehlopha sa mafelelo ke sona se se gogago tlhokomelo ka mo go kgethegilego.

Go dumelwa gore go lla ga ngwana ka go se kgaotše go bakwa ke bolwetši bjo bo bakwago ke go šikinywa kudu. Go etša ge go begilwe ka go Globe, “go lla ka bogona go ka se kweše ngwana bohloko, eupša go šikinya ngwana kudu, gaešita le ka nako e kopana, go ka dira gore megalatšhika e senyegele sa ruri gaešita le go baka lehu.”

Ka lehlakoreng le lengwe, go lla ga ngwana go ka ba go e-na le mohola, gaešita le ge go sa kgaotše. Globe e re: “Nyakišišo e bontšhitše gore bana bao ba llago kudu ge e le gabotse ba hwetša tlhokomelo e oketšegilego kudu go bahlokomedi ba bona, [yeo e akaretšago] go swarwa-swarwa, go myemyelelwa kudu, go boledišwa gantši le go gokarelwa kudu.”