Go Phegelela Khutšo Mošomong

KE KA baka la’ng batho ba bangwe ba tlaiša ba bangwe? Beibele e re thuša go kwešiša taba. E hlalosa gore re phela “mehleng ya bofêlô” ya tshepedišo ya dilo le gore ke lebaka leo ka lona re bago le “dinako tše hlobaetšago tšeo go lego thata go lebeletšana le tšona.” (NW) Batho ba bantši ke “ba xo ithata, ba mexabaru, ba lenyatšô le baikxoxomoši, le ba maroxa, le ba xo se kwe batswadi, ba xo se leboxe, ba xo se ile selô. [Ke] ba-hlala-leratô, babata-sekxoro, [ke] dihwirihwiri, le ba ba sa tsebexo xo ithswara, manaba a tše boló; [ke] baeki, baipuši, baikxanthši.” (2 Timotheo 3:1-5) Mehleng ye ya khuduego, boitshwaro bjo bo bjalo bo atile gohle, gomme go thika ke e nngwe ya ditla-morago tše di sa kgahlišego. Ka gona, ke bjang o ka phegelelago khutšo mošomong?

Go Rarolla Dikgohlano

Gantši tlaišo e thoma ka dikgohlano tšeo di sa rarollwago magareng ga bašomi-gotee. Ka gona, ka ntle le go tsena-tsenana le ditaba tša ba bangwe, akgofela go rarolla dikgohlano tšeo wena ka noši o akaretšwago go tšona. Kokobetša pelo e bohloko ka tsela e bohlale le e nago le tlhompho. Phedišana le bašomi-gotee le wena e le motho ka o tee ka o tee, e sego bjalo ka sehlopha. Ge e ba go bonagala motho yo mongwe a e-na le sekgopi le wena, leka go lokiša ditaba. Dula o gopola keletšo ya Jesu e rego: “O tsomê ka pele xo kwana le e a sekišanaxo le wene.”—Mateo 5:25.

Go feta moo, motho yo mongwe le yo mongwe o a holega ge go e-na le poledišano e botse. Ke moka, leka go boledišana gabotse le molaodi wa gago ka ntle le go mo dira gore a nagane gore o upša o leka go hwetša kamogelo ya gagwe. Gopola gape gore go boledišana gabotse le bao ba lego maemong a swanago le a gago le bao ba lego ka tlase ga gago go tla šoma e le sehlare se sebotse bakeng sa kgateletšego. Kgoši Salomo o ile a ngwala gore: “Maanô a padile, xò se keletšanô; a tlo kxônêxa xe baeletši ba ka ata.”—Diema 15:22

 Ka baka leo, iteke ka gohle go bontšha bogwera go bašomi-gotee le wena. Se ga se bolele gore o be “mo-kgahliša-batho,” le gore o dumele selo se sengwe le se sengwe seo o botšwago gore o se dire o sa ikemišetša gomme o kwanantšhe seo o lego sona ka baka la go fo nyaka go kgomarela khutšo. Eupša tsela e borutho le ya bogwera e ka lokiša boemo bjo bo sa kgahlišego. O se ke wa šetša feela seo o se bolelago go ba bangwe eupša ela hloko le kamoo o se bolelago ka gona. Gape, Beibele e re nea keletšo e kwagalago e rego: “Phetolô e bolêta e phohliša dipêfêlô.” (Diema 15:1) “Bolêta bya leleme ké sehlare sa bophelô.” (Diema 15:4) “Wa xo se fele pelo, le babuši ó a fenya.” (Diema 25:15) “Polêlô ya lena a e bê ya botho ka mehla, e bê e nokilwexo letswai; Le tsebê xo fetola mang le mang ka mo xo Le swanetšexo.”—Ba-Kolose 4:6.

“Bolêta bya Lena a bo Tsebyê”

Moapostola Paulo o ile a eletša Bakriste ba kua Filipi ka gore: “Bolêta bya lena a bo tsebyê bathong bohle.” (Ba-Filipi 4:5) Ka go latela molao wo wa motheo, ipeele ditekanyetšo tša boitshwaro tše di leka-lekanego. Phema go ikholofela kudu goba go ba le dihlong kudu. Ge e ba bašomi-gotee ba go kwera, o se ke wa leka go swana le bona ka gore le wena o ba kwere. O ka se holege ka selo ge o tswaka boitshwaro bjo bobe le bjo bobotse. Swara ba bangwe ka tlhompho le ka seriti, gomme ka go dira bjalo go na le kgonagalo e kgolo ya gore le bona ba go sware ka tsela e bjalo.

O se ke wa nagana feela ka tsela yeo o itshwarago ka yona eupša o nagane le ka tsela yeo o aparago ka yona. Ipotšiše gore: ‘Tsela yeo ke aparago ka yona e dira gore batho ba ntebelele bjang? Na tsela yeo ke aparago ka yona e tsoša kganyogo? Na ke apara bošaedi? Na ke tla ba ke dira gabotse ge ke ipeela tsela e swanetšego ya go apara ge ke e-ya mošomong?’

Ditšhabeng tše dintši, bašomi bao ba šomago ka mafolofolo e bile ba dira mošomo wa bona ka šedi e kgolo ba a hlompšha gomme ba tšeelwa godimo kudu. Ka baka leo, leka go hwetša tlhompho ka go dira mošomo ka tsela ya maemo a godimo. E-ba motho yo go ka ithekgwago ka yena le yo a ka botwago. Se ga se bolele gore o leke go dira mošomo o mongwe le o mongwe ka tsela e phethagetšego. Mosadi yo mongwe yo e bego e le mohlaselwa wa go tlaišwa o ile a dumela ka morago ga nako e itšego gore le yena o ile a ikokeletša mathata. O re: “Ke be ke nyaka go dira dilo ka tsela e phethagetšego.” Mosadi yo o ile a thoma go lemoga gore pakane ya go nyaka go dira dilo ka tsela e phethagetšego e ka se fihlelelwe, a re: “Ke motho wa go dira mošomo gabotse, eupša ga se gore ke swanetše go dira selo se sengwe le se sengwe ka tsela e phethagetšego.”

O se ke wa tshwenywa kudu ke dipolelo tše di hlabago. Se ga se bolele gore ditsela ka moka tša go swaya diphošo ka mo go sa swanelago di swana le go tlaišwa. Ka Beibeleng, Kgoši Salomo o ile a ngwala gore: “Se phakê xo selekêxa ka pelong . . . Le xôna O se kê wa ya le mantšu ka moka a batho ba a bolêlaxo, . . . xobane pelo ya xaxo e tseba xobane ké xa-ntši le wêna Ò roxa ba bangwê.”—Mmoledi 7:9, 21, 22.

 Ke therešo gore go latela melao ya motheo e bjalo e kwagalago ga go kgonthišetše gore o ka se tsoge o bile mohlaselwa wa go tlaišwa. Go sa šetšwe maiteko a gago a mabotse kudu, bašomi-gotee le wena ba bangwe ba ka no dula ba go tlaiša. Gona o swanetše go dira’ng?

Tsoma Thekgo

Gregory o dumela ka gore: “Ge ke be ke hlokomologwa ka dikgwedi tše mmalwa, ke ile ka tlaišega kudu maikwelong.” Phihlelo ya gagwe e swana le ya bahlaselwa bao ba ilego ba kgotlelela mehuta e fapa-fapanego ya maikwelo a bohloko—go galefa, go ikwa o le molato, go swaba, go gakanega gotee le maikwelo a go ikwa o se na mohola. Kgateletšego ya go tlaišwa e ka ba ya nyamiša le motho yo a tsepamego maikwelong. Ka kgonthe, Beibele e bolela gore “pateletšo e ka gafiša le yo bohlale.” (Mmoledi 7:7, PK) Ka gona, go ka dirwa’ng?

Dinyakišišo di bontšha gore go kaone kudu gore o se leke go lebeletšana le tlaišo o nnoši. Mohlaselwa a ka hwetša thekgo kae? Dikhamphani tše dingwe tše dikgolo di hlomile tsela ya go thuša bašomedi ba tšona bao ba naganago gore ba a tlaišwa. Dikhamphani tše bjalo di a tseba gore di a holega ka noši ka go tumola tlaišego. Go ya ka kakanyetšo e nngwe, bašomi bao ba tlaišago mohlaselwa ba šitišega ka go senya tekanyo e fihlago go 10 lekgolong ya nako ya bona ya go šoma. Mohlaselwa a ka tsoma thušo lefelong le ge e le lefe leo go lona go nago le tokišetšo e bjalo. Moeletši yo a sa tšeego lehlakore—e ka ba yo a tšwago mokgatlong wa moo mošomi a šomago gona goba mokgatlong wa ka ntle—a ka dira gore bohle bao ba akaretšwago tlaišong ba hlalose boemo le go hloma melao ya boitshwaro mošomong.

Ga go na Tharollo e Kgonthišeditšwego

Go ba gona, go swanetše go dumelwa gore ga go na tharollo e kgonthišeditšwego ya go fediša tlaišego. Gaešita le bao ba dirišago melao ya motheo ya Beibele yeo go boletšwego ka yona sehlogong se, ba ka hwetša gore go swarwa gampe mošomong go sa dutše go tšwela pele. Batho ba bjalo ba ka kgodišega gore kgotlelelo ya bona le maiteko a bona a go bontšha dika tša go boifa Modimo ge ba le mathateng, di lemogwa ke Jehofa Modimo.—2 Koronika 16:9; Jeremia 17:10.

Go ithekgilwe ka tsela yeo go swarwa gampe go tseneletšego ka yona le kamoo go dirwago leboelela ka gona, batho ba bangwe ba lego boemong bjo ba kgetha go nyaka mošomo o mongwe. Ba bangwe ba na le dibaka tše dinyenyane feela tša go hwetša mošomo o mongwe ka ge mešomo e ka ba e se gona gomme go na le methopo e mmalwa yeo motho a ka hwetšago thušo go yona. Monika yoo go boletšwego ka yena sehlogong se se fetilego, ge nako e dutše e tšwela pele o ile a hwetša gore bothata bo ile bja rarollwa ka morago ga ge yo mongwe wa batlaiši ba bagolo a rotše modiro. Ka baka leo, moya wa mošomong e ile ya ba wo o fodilego, gomme o ile a kgona go fetša tlwaetšo ya gagwe pele a ka tšea phetho ya go hwetša mošomo o mongwe lefelong le lengwe.

Mabapi le Peter yoo go boletšwego ka yena sehlogong sa pele, o ile a khutša ka mo go feletšego tlaišegong ka gore a role modiro pele ga nako. Lega go le bjalo, gaešita le ge Peter a be a kgotleletše tlaišego, o ile a holwa ke thekgo ya mosadi wa gagwe. O re: “O be a tseba kamoo ke bego ke tlaišega ka gona, gomme o be a nthekga kudu.” Ge Monika le Peter ba dutše ba kgotleletše diteko tša bona, ba ile ba hwetša khomotšo e kgethegilego tumelong ya bona bjalo ka Dihlatse tša Jehofa. Go kopanela bodireding bja phatlalatša go ile gwa matlafatša maikwelo a bona a go itlhompha, mola go gwerana le badumedi-gotee le bona go ile gwa matlafatša lefsa bogwera bja bona bjo bo tsepamego.

Go sa šetšwe gore boemo bja gago ke bofe, dira sohle seo o ka se kgonago go phegelela ditswalano tše dibotse mošomong. Ge e ba o tlaišwa, katanela go latela keletšo ya moapostola Paulo e rego: “Le se kê la lefetša motho bobe ka bobe. . . . Xe xo kxônêxa ka thokô ya lena, Le phedišanê xa-botse le batho ka moka. . . . Se fenywê ke bobe; bobe bo fenyê ka boló.”—Ba-Roma 12:17-21.

[Ntlhakgolo go letlakala 8]

Tsela e borutho le ya bogwera e ka lokiša boemo bjo bo sa kgahlišego

[Ntlhakgolo go letlakala 9]

“Xe xo kxônêxa ka thokô ya lena, Le phedišanê xa-botse le batho ka moka.”—BA-ROMA 12:18

[Seswantšho go letlakala 8, 9]

Akgofela go rarolla dikgohlano tšeo wena ka noši o akaretšwago go tšona