Bafsa ba a Botšiša . . . 

Go Thwe’ng ka Mafelo a Ditantshi tša Bafsa?

“Ke be ke e-na le morero ge ke be ke e-ya gona—e be e le go yo ipshina e le ka kgonthe.”—Shawn.

“Go bolela therešo, go be go kgahliša—go be go kgahliša ka tsela e makatšago! Go tantsha kudu bošego ka moka.”—Ernest.

NYWAGENG ya morago bjale, mafelo a ditantshi tša bafsa a thomile go tuma kudu. Bafsa ba bantši bao ba tsomago go ithabiša ba hwetšagala ka mehla mafelong a swanago le a.

Ke therešo gore bohle re rata go ithabiša. Le gona, Beibele e bolela gore “xo sêxa xo na le mohla wa xôna” gomme “xo bina xo na le mohla wa xôna.” (Mmoledi 3:4) Lega go le bjalo, na lefelo la ditantshi tša bafsa le nea boitapološo bjo bo hlwekilego? Goba na go na le lebaka le lebotse la go nagana gabedi pele o e-ya lefelong le bjalo?

“Meletlo Yeo e sa Laolegego”

Gaešita le ge Beibele e sa gane dipokano tša bogwera tšeo di leka-lekanego, fela e lemoša malebana le ‘meletlo ya botagwa’ goba “meletlo yeo e sa laolegego.” (Ba-Galatia 5:19-21; Byington) Mehleng ya Beibele, meletlo ya botagwa gantši e be e feleletša ka boitshwaro bjo bo sa laolegego. Moporofeta Jesaya o ngwadile gore: “Kotsi e tlo wêla ba xo tsoxêla xo y’o nyaka byalwa, ba bo dulêla la bá la dikêla bà taxilwe. Menyanyeng ya bôná ba swere diletšô le makope, le meropa le dinaka; ’me ’tirô tša Morêna xa ba di šetše selô.”—Jesaya 5:11, 12.

Meletlong ye go be go e-na le “byalwa” le mmino wo o sa laolegego. E be e thoma e sa le kapela gomme e fela bošego kudu. Le gona, ela hloko boemo bja kgopolo bja bao ba bego ba e-ba gona meletlong ye e sa laolegego—ba be ba itshwara bjalo ka ge e ka Modimo ga a gona! Ka gona, ga go makatše ge Modimo a ile a iletša dipokano tše bjalo ka tše. Lega go le bjalo, Modimo o ikwa bjang ka seo se diregago mafelong a mantši a ditantshi tša bafsa lehono?

Ela hloko dilo tšeo di diregago. E nngwe ya tšona ke gore mafelong a mangwe a ditantshi tša bafsa go dula go e-na le metantsho e šoro. Puku e nngwe e hlalosa gore metantsho e šoro “e thomile bogareng bja nywaga ya [bo-1980], ka morago ga mehla ya dihlopha tša ma-punk kua United States. E ile ya gola . . . go tloga go ‘motantsho wa go thulana’ wo go wona batho ba bego ba thulana.” Mohuta wo wa  motantsho gantši o akaretša go fofa-fofa, go šikinya hlogo o šoro, go thulana ka dihlogo go etša diphoofolo gotee le go thulana le batantshi ba bangwe ka mebele. Go tlwaelegile gore ba bangwe ba robege matsogo le maoto, e bile gape go bile le dikgobalo tša mokokotlo le hlogo. Ba bangwe ba feleleditše ba hwile. Go oketša moo, mafelong a mangwe a ditantshi tša bafsa batho ba kukelwa godimo ke mašaba a batho gomme ba ba sepediša godimo ga matsogo a bona ao ba a phagamišeditšego godimo go le bjalo ka ge eka ba phaphametše ka godimo ga maphoto a lewatle. Batho ba bantši bao ba dirago se ba ile ba wišetšwa fase gomme ba feleletša ba gobetše. Go tlwaelegile gore banenyana ba swarwa-swarwe ditho tša bosadi ka ntle le tumelelo ya bona.

Ka ntle le pelaelo, Modimo ga a amogele boitshwaro bjo bo swanago le bjo. Go feta moo, Lentšu la gagwe le laela Bakriste “xo lahla xo nyatša Modimo, xo lahla dikxanyoxô tša lefase; xore mehleng yeno [ba] phelê [ba] eletšexile.”—Tito 2:12.

Mmino le Dihlare-tagi

Le gona, ela hloko mohuta wa mmino woo o letšwago mafelong a mantši a ditantshi. A mangwe ka mo go kgethegilego a letša mohuta wa mmino wa rock wa morethetho o matla goba wa heavy metal, wo o hlaolwago ka morethetho o matla le mantšu a maroga. Eupša mafelong a mantši a ditantshi tša mmino wa rap goba hip-hop, mmino wo o ratwa kudu. Ke mmino wo o hlaolwago ka dikopano tša botona le botshadi, bošoro le borabele. Na o ka kgongwa ke go theeletša mmino wo o swanago le wo tikologong yeo e sa hlwekago? David Hollingworth, e lego moeletši go tša di-nightclub, o itše: “Mmino o tutuetša monagano wa batho ka tsela e matla kudu. Ge o bokanya batho gotee ka bontši, mmino o ka ba kgothaletša go ba le boemo bja kgopolo bjo šoro.” Ga go makatše ge go bile le go phulega ga bošoro mafelong a ditantshi metseng e mentši ya United States. Batho ba bantši ba dumela gore ke ditla-morago tše di lebanyago tša mmino woo o kgothaletšago ditiro tše di gobogilego le boitshwaro bjo šoro. *

Nywageng ya morago bjale go dirišwa ga dihlare-tagi e bile go fetogile karolo ya boemo bjo bo apareditšego mafelong a ditantshi. Monyakišiši yo mongwe o boletše gore “go ba gona ga dihlare tagi tša mehuta-huta tšeo di sego molaong le go dirišwa ga tšona . . . go ile gwa dira gore mafelo a ditantshi a tume kudu.” Ge e le gabotse, go na le dihlare-tagi tšeo di bitšwago gohle e le dihlare-tagi tša go tantsha. Ba bangwe bao ba yago mafelong a ditantshi ka mehla, ba bile ba diriša dihlare-tagi tšeo di tswakanego le tše dingwe. Gare ga dihlare-tagi tšeo ka tlwaelo di tswakwago le tše dingwe go na le ketamine (yeo gape e bitšwago special K), yeo e ka bakago go arogana ga maikwelo, go šarakana, go hema ka thata le go senyega ga megala-tšhika. Methamphetamine e ka baka go lebala, go galefa, bošoro le kgonagalo ya go senyega ga pelo le megala-tšhika. Sehlare-tagi seo se tsebegago kudu seo se dirilwego ka amphetamine, ke ecstasy. Se ka baka tšharakano, pelaelo, go thebethela godimo ga pelo, kgatelelo ya madi a magolo le phišo e phagamego ya mmele. Batho ba bangwe bao ba dirišago ecstasy ba feleleditše ba hwile.

Go dirišwa ga dihlare-tagi tšeo di sego molaong go thulana le taelo ya Beibele ya gore “a re hlapeng re tšwê thšila tšohle tša nama le tša môya.” (2 Ba-Korinthe 7:1) Ka gona, na ke ga bohlale go ba tikologong yeo go yona go dirišwa ga dihlare-tagi go atilego kudu?

Ditlwaelano tše Mpe

Gopola temošo yeo e tsopolwago gantši: “Ditlwaelano tše mpe di senya mekgwa e mebotse.”  (1 Ba-Korinthe 15:33, NW) Go swana le batho bao ba bego ba e-ya meletlong ya botagwa mehleng ya Beibele, bafsa ba bantši bao ba yago mafelong a ditantshi ka mehla ga ba bonagale ba tshwenyegile ka go kgahliša Modimo. Ge e le gabotse, ba bantši ba ka hlaloswa e le batho “ba xo iphsina ba lahlile Modimo.” (2 Timotheo 3:4) Na ruri o nyaka go ba le segwera sa kgaufsi le batho ba swanago le ba?

Ba bangwe ba ka bolela gore go ya mafelong a ditantshi le bafsa ba bangwe ba Bakriste go fokotša dikotsi. Lega go le bjalo, bafsa ba Bakriste bao ka kgonthe e lego ‘baetapele ba badumedi mekgweng’ ba ka se ke ba rata go ya. (1 Timotheo 4:12) Gaešita le ge e ba sehlopha sa bafsa ba Bakriste se be se ka ya mafelong a ditantshi gomme sa kgona go dula se le gotee, mmino o sa hlwekago le boemo bja gona bjo bo sa hlwekago di tla no dula di le gona. Ba ka ikhwetša ba lebeletšane le boemo bjo thata ge e ba batho ba bangwe ba ba laletša go yo bina le bona. Bafsa ba bangwe ba ile ba ba ba ikhwetša ba akaretšwa dintweng! Ka gona, mantšu a Beibele a itlhatsela e le a therešo ge a re: “Šika le bahlale O hlalefê; mokxônana-le-masilo ó tlo thsereana.”—Diema 13:20.

Metantsho Yeo e Tsošago Kganyogo

Ntlha e nngwe yeo e swanetšego go elwa hloko ke motantsho ka bowona. Kua United States mokgwa o makatšago kudu wa go tantsha o tlwaelegile kudu, kudu-kudu gare ga bafsa ba lego mahlalagading. Ka tlwaelo, mokgwa wo wa go tantsha o dirišwa mminong wa hip-hop le mantšung a ona ao a hlalosago mehuta ya dikopano tša botona le botshadi ka mo go kwagalago. Go feta moo, motantsho ka bowona o ekišetša dikopano tša botona le botshadi. Ka gona, mekgwa ya go tantsha ya mohuta wo e ile ya hlaloswa e le ‘go ba le dikopano tša botona le botshadi o apere.’

Na mofsa wa Mokriste o be a ka rata go akaretšwa motantshong wa mohuta wo? A ka se dire bjalo ge e ba a nyaka go kgahliša Modimo yo a re laelago gore ‘re tšhabe bootswa.’ (1 Ba-Korinthe 6:18) Ba bangwe ba ka bolela gore, ‘Ge e ba motho yo mongwe le yo mongwe a dira se, gona e ka no ba e se selo se sebe gakaalo.’ Lega go le bjalo, batho ba bantši ba ka dira phošo. (Ekisodo 23:2) E ba le sebete sa go emeletšana le dithaka tša gago gomme o dule o e-na le letswalo le lebotse pele ga Modimo!—1 Petro 4:3, 4.

Go Dira Phetho

Se ga se bolele gore metantsho ka moka e fošagetše. Beibele e re botša gore Kgoši Dafida o ile a aparelwa ke lethabo leo ka morago ga go bušetša areka e kgethwa ya kgwerano kua Jerusalema a ilego “a tšama à bina ka matla a xaxwe ka moka.” (2 Samuele 6:14) Seswantšhong sa Jesu sa morwa wa lehlaswa, lethabo leo le ilego la ba gona ge morwa a boetše gae le be le akaretša “diletšô le dikoša.”—Luka 15:25.

Mekgwa e mengwe ya go tantsha e ka amogelwa ke Bakriste ka mo go swanago tikologong ya geno. Gaešita le maemong a bjalo, teka-tekano le kahlolo e botse ke tša bohlokwa. Go šireletšegile kudu go thabela mmino le motantsho dipokanong tša Bakriste moo go nago le taolo e lekanego le tlhokomelo go phala mafelong a ditantshi tša bafsa. Dipokanong tšeo di hlokometšwego gabotse tša Bakriste, bafsa ga ba ikarole go batho ba bangwe eupša ba thabela bogwera bjo bo agago le Bakriste ba nywaga ka moka.

Ke therešo gore go ka no ba go e-na le mabenkele a mangwe a go jela tikologong ya geno moo go bapalwago mmino e bile go tantshwa ka tsela e amogelegago. Eupša pele ga ge o ka amogela taletšo ya go ya lefelong le ge e le lefe le bjalo, o tla dira gabotse go ipotšiša dipotšišo tše swanago le tše: Lefelo le le na le botumo bja mohuta ofe? Na ke la bafsa feela? Ge e ba go le bjalo, go na le kgonagalo efe ya gore boemo bjo bo lego moo e be bjo bobotse? Ke mmino wa mohuta ofe wo o tlago go bapalwa? Ke motantsho wa mohuta mang wo o tantshwago moo? Batswadi ba-ka ba ikwa bjang ge ke e-ya moo? Go ipotšiša dipotšišo tše swanago le tše go ka go efoša kotsi.

Shawn yo a tsopotšwego mathomong, o akaretša taba ye gabotse. Pele ga ge e e-ba Mokriste o be a tlwaetše go ya mafelong a ditantshi ka mehla. O gopola se: “Go tletše boitshwaro bjo bo gobogilego mafelong a di-nightclub. Gantši mmino wa gona ke wo o gobošago, motantsho wa gona ke wa boitshwaro bjo bo gobogilego ka tekanyo e phagamego gomme batho ba bantši bao ba yago moo ba na le morero—ba nyaka go tloga mafelong a le motho yo mongwe yo ba tlago go ba le dikopano tša botona le botshadi le yena.” Shawn o ile a kgaotša go ya mafelong a ditantshi ka morago ga go ithuta Beibele le Dihlatse tša Jehofa. O nea pono ya gagwe yeo e theilwego phihlelong e kwešago bohloko ge a re: “Mafelo ao a ditantshi ga se mafelo ao Bakriste ba ka yago go ona.”

[Mongwalo wa ka tlase]

[Seswantšho go letlakala 26]

Bafsa ba bangwe ba ile ba ikhwetša ba le maemong a thata mafelong a ditantshi