Pono ya Beibele

Ke ka Baka La’ng Lenyalo le Swanetše go Tšewa e le le Lekgethwa?

BATHO ba bantši lehono mohlomongwe ba ka bolela gore ba a dumela gore lenyalo ke le lekgethwa. Ka gona, ke ka baka la’ng manyalo a mantši gakaakaa a feleletša ka tlhalo? Go batho ba bangwe lenyalo e fo ba kholofetšano ya go bontšhana lerato gotee le tumelelano ya molao. Eupša dikholofetšo di ka robja. Batho bao ba tšeago lenyalo ka tsela ye ba hwetša go le bonolo kudu go fediša lenyalo la bona ge dilo di sa ba sepelele gabotse.

Modimo o lebelela bjang tokišetšo ya lenyalo? Karabo e hwetšwa ka Lentšung la gagwe e lego Beibele, go Ba-Hebere 13:4 e rego: “Xo tšeana a xo xodišwê.” Lentšu la Segerika leo le fetoletšwego e le ‘godiša’ le na le kgopolo ya selo se bohlokwa le seo se tšeelwago godimo kudu. Ge re tšeela selo se itšego godimo, re a se hlokomela e le gore se dule se šireletšegile le gore se se ke sa re lahlegela gaešita le ge go ka direga phošo. Tokišetšo ya lenyalo le yona e swanetše go ba bjalo. Bakriste ba swanetše go le tšea e le le le godišwago—e le selo se bohlokwa kudu seo ba ratago go se šireletša.

Go molaleng gore Jehofa Modimo o hlomile lenyalo e le tokišetšo e kgethwa magareng ga monna le mosadi. Eupša re ka bontšha bjang gore re na le pono e swanago le ya gagwe tabeng ya lenyalo?

Lerato le Tlhompho

Go hlompha tokišetšo ya lenyalo go nyaka gore banyalani ba godišane. (Ba-Roma 12:10) Moapostola Paulo o ile a ngwalela Bakriste ba lekgolong la pele la nywaga gore: “Mang le mang a ratê mosadi wa xaxwe ka mokxwa wo a ithataxo ka wôna; xore mosadi yêna a [be le tlhompho e tseneletšego go, NW] monna.”—Ba-Efeso 5:33.

 Ke therešo gore ka dinako tše dingwe yo mongwe wa banyalani a ka no se dire dilo ka tsela e bontšhago lerato goba ka tsela ya tlhompho. Lega go le bjalo, Bakriste ba swanetše go bontšha lerato le le bjalo gotee le tlhompho. Paulo o ngwadile gore: “Le fêlê Lè rwalana; Le lebalêlanê xe xo na le e a naxo le taba le e mongwê; bo-ka Kriste xe a Le lebaletše, le lena Le dirê ka mokxwa woo.”—Ba-Kolose 3:13.

Nako le go Šetšana

Banyalani bao ba tšeago lenyalo la bona e le le lekgethwa ba ipha nako ya go kgotsofatšana dinyakweng tša bona tša nama le tša maikwelo. Se se akaretša dikopano tša botona le botshadi. Beibele e re: “Monna a neê mosadi tše di mo swanetšexo ka thokô ya leratô; le mosadi a dirê monna wa xaxwe ka mokxwa woo.”—1 Ba-Korinthe 7:3.

Lega go le bjalo, banyalani ba bangwe ba ile ba bona go le bohlokwa gore monna a hudugele lefelong le lengwe ka nakwana bakeng sa go hwetša mogolo o oketšegilego. Ka dinako tše dingwe, go arogana mo go bjalo ga nakwana go ile gwa tšea nako e telele kudu go feta kamoo go bego go letetšwe. Gantši go arogana mo go bjalo go ile gwa bea lenyalo boemong bjo thata kudu, ka dinako tše dingwe gwa lebiša bohlotlolong le tlhalong. (1 Ba-Korinthe 7:2, 5) Ka baka leo, banyalani ba bantši ba Bakriste ba ile ba phetha ka go phela ka ntle le mehola ya dilo tše di bonagalago go e na le go bea lenyalo la bona kotsing leo ba le tšeago e le le lekgethwa.

Ge Mathata a Tšwelela

Ge mathata a tšwelela, Bakriste bao ba hlomphago lenyalo la bona ga ba akgofele go arogana goba go hlalana. (Maleaki 2:16; 1 Ba-Korinthe 7:10, 11) Jesu o itše: “E a hlalaxo mosadi wa xaxwe, xe e se ka ’baka la bootswa, ó a mo otswiša; xomme e a tšeaxo mohlalwa, ó a otswa.” (Mateo 5:32) Ge banyalani ba kgetha go hlalana goba go arogana ka mabaka ao a sa thekgwego ke Mangwalo, ba hlompholla lenyalo.

Tsela ya rena yeo re tšeago lenyalo ka yona e bontšhwa gape ke kamoo re eletšago bao ba nago le mathata a magolo a lenyalo. Na re akgofela go kgothaletša karogano goba tlhalo? Ke therešo gore go ka ba le dinako tšeo ka tšona go kwagalago gore go be le karogano, bjalo ka maemong ao yo mongwe wa banyalani a tlaišago molekane wa gagwe ka mo go feteletšego mmeleng goba a sa nyake go hlokomela lapa ka boomo. * Le gona, go etša ge go bontšhitšwe ka mo godimo, Beibele e dumelela tlhalo ge feela yo mongwe wa banyalani a dirile bootswa. Go sa dutše go le bjalo, Bakriste ga se ba swanela go tutueletša ba bangwe ka tsela e sa swanelago gore ba dire diphetho tše bjalo ge maemo ao a tšwelela. Go ba gona, motho yo a tlago go lebeletšana le mafelelo a phetho ke yoo a nago le mathata a lenyalo, e sego moeletši.—Ba-Galatia 6:5, 7.

Phema go Tšea Lenyalo ga Bohwefo

Mafelong a mangwe go šetše go tlwaelegile gore batho ba diriše lenyalo bakeng sa go swanelegela go ba badudi ba dumeletšwego ka molao nageng e nngwe. Gantši batho ba bjalo ba dira tumelelano ya go lefa modudi wa nageng yeo e le gore ba nyalane. Gaešita le ge ba nyalane, gantši yo mongwe le yo mongwe wa banyalani ba o dula lefelong la gagwe, mohlomongwe e bile le go gwerana ba sa gwerane. Kapejana ka morago ga go hwetša tumelelo ya go dula nageng ka molao, ba a hlalana. Lenyalo la bona ba le tšea e le feela tumelelano ya tša kgwebo.

Beibele ga e thekge mokgwa o bjalo wa go tšea lenyalo ga bohwefo. Go sa šetšwe maikemišetšo a bona, batho bao ba tsenago lenyalong ba tsena tokišetšong e kgethwa yeo Modimo a e tšeago e le tlemo ya bophelo ka moka. Batho bao ba akaretšwago ditumelelanong tše bjalo ba dula ba le batee e le monna le mosadi gomme ditaelo tša Beibele tša go hlalana ka molao ka kgonagalo ya go nyalana le motho yo mongwe di a šoma.—Mateo 19:5, 6, 9.

Go etša ge e le therešo le ka modiro le ge e le ofe o mobotse, lenyalo le le atlegago le nyaka boiteko le kgotlelelo. Bao ba palelwago ke go amogela bokgethwa bja lenyalo ba hwa matwa ga bonolo. Goba ba ka no ineela go phela lenyalong leo le se nago lethabo. Ka lehlakoreng le lengwe, bao ba dumelago gore lenyalo ke le lekgethwa ba a tseba gore Modimo o nyaka gore ba dule gotee. (Genesi 2:24) E bile ba lemoga gore ka go dira gore lenyalo la bona le atlege ka go dumelelana, ba a mo godiša bjalo ka Mohlami wa tokišetšo ya lenyalo. (1 Ba-Korinthe 10:31) Go ba le pono ye go ba tutueletša go kgotlelela lenyalong le go šomela tabeng ya gore le atlege.

[Mongwalo wa ka tlase]