Lebaka Leo ka Lona ke sa Nyakego go Kgoga!

SEHLOGO seo se ile sa newa barutwana ba dikolo ba makgolo-kgolo bao ba bego ba tšea karolo phadišanong ya naga ka moka yeo e bego e thekgwa ke Missouri State Medical Association (MSMA) kua United States. Mo e ka bago barutwana ba 675 go tšwa dikolong tše 42 ba ile ba tšea karolo phadišanong. Breanna wa nywaga e 12 o ile a thopa sefoka gomme sereto sa gagwe seo se thopilego sefoka se ile sa gatišwa ka makasineng wa MSMA woo o bitšwago Missouri Medicine. Gape Breanna o ile a ba le sebaka sa go balela baemedi bao ba bego ba le gona kopanong yeo e swarwago ngwaga le ngwaga ya MSMA sereto sa gagwe. Pele ga ge a ka se bala, Breanna o ile a botša batheetši gore:

“Ke yo mongwe wa Dihlatse tša Jehofa gomme dintlha ka moka tšeo di lego seretong se di tšwa ka makasineng wa Phafoga! Ge e le gabotse, kgopolo ya karolo e nngwe ya sereto se yeo ke e ratago kudu ke e hweditše letlakaleng la ka ntle la tokollo ye. E bontšha legata leo le hupilego sekerete molomong wa lona gomme e na le sehlogo seo se rego: ‘Lehu le a Rekišwa’ (ka Seisemane). Go theoša le nywaga, makasine wa Phafoga! o ile wa gatiša dihlogo tše dintši tšeo di bolelago ka dikotsi tša go kgoga.”

Dihlatse tša Jehofa di phema go diriša motšoko. Di dumela gore go diriša ka boomo setšweletšwa le ge e le sefe seo se šilafatšago mmele go bontšha go se hlomphe mpho ya bophelo gotee le Mmopi. (Ditiro 17:24, 25) Ka gona, di latela keletšo ya Mangwalo e rego: “A re hlapeng re tšwê thšila tšohle tša nama le tša môya.”—2 Ba-Korinthe 7:1.

Go swana le bafsa ba bangwe bao e lego Dihlatse, Breanna o katanela go phela ka go dumelelana le melao ya motheo ya Beibele. Ka ntle le pelaelo, bafsa ba swanago le ba ba thabiša pelo ya Mmopi wa bona.—Diema 27:11.

[Seswantšho go letlakala 10]

Breanna (ga bjale o na le nywaga e 14) a swere sereto sa gagwe