Tumelo ya Lapa e Bothateng

INDIA, mosetsana yo a kgahlišago wa nywaga e senyane wa kua Wisconsin, U.S.A., o lwetše kudu. Ge e le gabotse, o šetše a fetile megatong e megolo e meraro ya go buiwa, a ba a alafša ka mekgwa e mentši ya kalafo yeo e sego kotsi kudu. Mmagwe e lego Lori o re: “Ka nywaga e tshelelago bophelo bja India e be e le bja go phela a tsena diphapošing tša balwetši ba tšhoganyetšo, a robala sepetlele le go dula a išwa ngakeng.”

India o thomile go babja ge a be a e-na le dikgwedi tše 18. O ile a thoma go ba le ditšhupo tša malwetši a sa tlwaelegago ao a akaretšago letšhollo leo le sa kgaotšego, phišo ya mmele e phagamego, go tlala moya ka mpeng le go ota ka tsela e sa tlwaelegago. Gape o be a e-kwa bohloko le ka mpeng. Bošegong bjo bongwe le bjo bongwe ka nywaga e mebedi, ngwana yo wa batho e lego India o be a phafoga leboelela a lla, a bobola gomme ka dinako tše dingwe a bile a hlaba mokgoši ka baka la go kwa dihlabi.

Ge dingaka di be di dutše di leka go hwetša seo se mo swerego, India o ile a tšwela pele a tlaišega o šoro. Lori o re: “Ngwana wa rena o be a swarwa ke tlala wa go hwa.” Mark, e lego tatago India o oketša ka gore: “Lebakeng la go feta ngwaga, re be re dutše re lebeletše mosetsana wa rena a otela pele e bile a fokola gomme re sa tsebe gore re ka mo thuša bjang. Ke sa gopola bošegong bjo bongwe ke ikwa ke feletšwe ke maano ge nna le Lori re dutše re boledišana ka tša poloko ya India, yeo ka nako yeo re bego re nagana gore e ka se thibelwe.”

Mafelelong, go ile gwa hwetšwa gore India o na le ulcerative colitis—e lego bolwetši bjo bo hlaselago letlalo la ka gare la lela le legolo. O be a swerwe gape le ke primary sclerosing cholangitis, e lego bolwetši bjo bo hlaselago ditšhika tšeo di sepedišago nyooko tšeo di lego ka sebeteng. Malwetši a a be a alafega. Lega go le bjalo, go be go tla nyakega go buiwa, gomme bakeng sa bolwetši bja ulcerative colitis, go be go tla nyakega kalafo ya dihlare-tagi. Maemong a ka bobedi go be go nyakega gore India a hlokomelwe gomme a šetšwe nakong ya ge a dutše a kaonefala.

Bjale e šetše e le nywaga e ka godimo ga e šupa go tloga mola India a thomago go babja. Ka thušo ya tlhokomelo ya dingaka tšeo di dirago mošomo wa tšona ka šedi e kgolo, o tšwela pele go kaonefala.  E le Dihlatse tša Jehofa, Mark le Lori ba dumela gore tumelo ya bona Lentšung la Modimo—kudu-kudu seo le se bolelago ka bolwetši, lehu le kholofelo ya go tsošwa ga bahu nakong e tlago—e ba thušitše go kgotlelela. E ile ya thuša le India ka mo go swanago. Lori o re: “Ka mehla India o be a dutše a bolela ka bolokologi ka kholofelo ya go tsošwa ga bahu go etša ge e hlaloswa ka Beibeleng. E tloga e phela go yena.”

Lebakeng le lengwe ge India a be a le ka phapošing ya go bapalela kua sepetlele, o ile a kopana le mosetsana yo mongwe yo ngwanabo a bego a e-na le kankere ya madi (leukemia). Lori o anega seo se ilego sa latela: “Mosetsana o ile a botša India gore o tšhoga gore ngwanabo a ka hwa. Gomme India o ile a mmotša ka seo lehu e lego sona go ya ka Beibele le gore yena o be a sa boife go hwa. Letšatšing le le latelago, mmago mosetsana o ile a tla go nna a mpotšiša dipotšišo. O be a makaditšwe ke gore India o be a kgona go bolela ka bolokologi ka tsela ye e bile a sa boife dilo tše bjalo.”

Mark le Lori ba lemogile gore dithapelo tša badumedi-gotee le bona di ba thekgile kudu. Mark o re: “Nakong e fetilego ge ke be ke botša batho gore ke tla ba rapelela goba ge ke be ke rapela le bona, ka mehla ke be ke duma eka nkabe go ka ba le se sengwe gape seo nka ba direlago sona. Bjale ke lemoga kamoo go rapela le ba bangwe ka tsela e bjalo le go ba rapelela go lego bohlokwa ka gona. Thapelo e be e le yona feela selo sa bohlokwa ka go fetišiša seo re bego re ka se direlwa dinakong tša rena tše thata. A borwarre bjo lerato gakaakang bjo re nago le bjona!”

Mark e bile o nagana gore go babja ga India go ba thušitše go hlahloba dilo tšeo di tlago pele bophelong bja bona. O re: “Pono ya rena ka dilo tše di bonagalago e tloga e fetogile kudu. Ruri di bonagala di se na mohola ge ngwana wa gago a babja! Dilo tše bohlokwa bophelong e be e le—e bile e sa dutše e le—tswalano ya rena le Jehofa Modimo gotee le barwarre ba rena ba lerato.”

Mark, Lori le India gotee le bana babo ba lebeletše pele nakong yeo go boletšwego ka yona e sa le pele ke moporofeta Jesaya ya ge go ka “se bê le e a rexo: Ke a babya!”—Jesaya 33:24; Kutollo 21:4.

[Seswantšho go letlakala 30]

India Erickson

[Seswantšho go letlakala 31]

Sepetlele sa Bana sa San Diego

[Seswantšho go letlakala 31]

India a e-na le lapa labo