Ge go tla be go se sa Hlwa go E-na le Motho yo a Lewago ke Bodutu

PEGO e lego go Genesi 2:18 e bolela gore ge batho ba pele ba be ba bopša, “Morêna Modimo a re: Xa xo botse xe motho a le nnoši; ke tlo mo dirêla modiriši e a mo lebanexo.” Batho ba bopilwe gore ba be le ba bangwe le go ithekga ka bona.

Mogwera yo a phalago bohle yo re ka bago le yena ke Jehofa Modimo. Moapostola Paulo o bolela ka Jehofa e le “Radikxauxêlô, Modimo wa khomotšô yohle, E a re homotšaxo mahlokong a rena ohle.” (2 Ba-Korinthe 1:3, 4) Jehofa ka boyena o bontšha gore o nyamišwa ke ge mohlanka le ge e le ofe wa bahlanka ba gagwe a tlaišega. Ke Modimo wa kwelobohloko. “Yena ó tseba lebopô le re lexo ka lôna, xa a lebale xe re le lerole.” (Psalme 103:14) Na ga o ikwe o gogelwa go Jehofa Modimo le go leboga tlhokomelo ya gagwe e lerato, e botho le ya kwešišo?

Jehofa o Thekga Bao ba Lewago ke Bodutu

Nakong e fetilego, bontši bja bahlanka ba Modimo ba ile ba lebeletšana le maemo ao go ona ba bego ba lewa ke bodutu. Jehofa e bile mothopo wa bona wa thekgo le khomotšo. Tšea ka mohlala, Jeremia, yo a ilego a biletšwa go ba moporofeta ge e be e sa le lesogana. Gare ga bangwadi ba 40 ba Mangwalo, mohlomongwe Jeremia e bile yena yo a ilego a bolela kudu ka maikwelo a gagwe ka noši. O ile a ikwa a boifa le go se swanelege ge a be a hwetša kabelo ya gagwe ya mathomo e tšwago go Modimo. (Jeremia 1:6) E le gore  a e phethagatše, o be a swanetše go ithekga ka Jehofa ka mo go feletšego. Ka kgonthe, Jehofa o be a e-na le yena e le “Yêna Moxale yo matla.”—Jeremia 1:18, 19; 20:11.

Nywaga e ka bago 300 pele ga Jeremia, Kgoši-gadi Isebele o ile a ena gore Eliya a bolawe nakong ya ge a be a e-kwa ka lehu la baporofeta ba gagwe ba Baali. Eliya o ile a tšhabela Horebe ye e ka bago bokgole bja dikhilomithara tše 450 Pheninsuleng ya Sinai. Ge a le moo, o ile a tsena ka leweng ke moka a robala moo, gomme Jehofa Modimo o ile a mmotšiša potšišo ye: “Eliya, O nyaka’ng fá?” Eliya o ile a hlalosa gore o be a nagana gore ke yena feela morapedi wa Jehofa Isiraeleng ka moka, moporofeta a nnoši yo a bego a šetše le yo a hufegelago tirelo ya Modimo. Jehofa o ile a mo kgonthišetša gore o be a se noši. Jehofa o be a e-na le yena, le gona ba-Isiraele-gotee le Eliya ba 7 000 le bona ba be ba e-na le yena gaešita le ge Eliya a be a sa tsebe. Jehofa o ile a homotša Eliya gomme a matlafatša tumelo ya gagwe. O ile a kgoma pelo ya Eliya, a kgothaletša moporofeta gore a se kgaotše kabelo ya gagwe. (1 Dikxoši 19:4, 9-12, 15-18) Ge e ba ka go swana le Eliya re fela re ikwa re lewa ke bodutu goba re se na mohola, le rena re ka rapela Jehofa gore a re matlafatše. Le gona, ka go diriša temogo, bagolo ba Bakriste ba ka bolela ka tsela e homotšago le bao ba botegago, ba ba thuša go bona tema yeo ba e kgathago go phethagaleng ga morero wa Modimo.—1 Ba-Thesalonika 5:14.

Go tšwa mehlaleng ye le e mengwe, re ka kgona go lemoga go rata ga Jehofa go nea thekgo le khomotšo e lerato go bao ba lewago ke bodutu. Ee, “Morêna ké Yêna sebô sa bahlaki, sebô mohla wa tlalêlô.”—Psalme 9:9; 46:1; Nahume 1:7.

Motho yo a Nago le Maikwelo a Tseneletšego le Kwelobohloko

Jesu Kriste ke mohlala wa motho yo a ka tšeelwago godimo ka baka la maikwelo a gagwe ao a leka-lekanego ka mo go phethagetšego go ekišeng Jehofa. Luka o hlalosa tsela yeo Jesu a ilego a itshwara ka yona ge a be a kopana le molokeloke wo o bego o e-ya polokong kua motseng wa Naini: “A hwetša bà e-tšwa bà rwele mohu, ngwana à nnoši wa mm’axwe. . . . Morêna, xe a  mmôna, a mo kwêla bohloko, a bolêla naê’ a re: Se llê! A batamêla a kxwatha leakô, barwadi ba lôna ba êma. Jesu a re: Lesoxana, ke ra wene xe ke re: Tsoxa! Mohu a tsoxa a dula, a thôma xo bolêla. Yêna a mo iša xo mm’axwe.” (Luka 7:12-15) Jesu o be a kgomegile kudu. E be e le monna yo a nago le kwelobohloko. Anke o nagane ka lethabo leo Jesu a ilego a le tlišetša mohlologadi yo a bego a lewa ke bodutu ge a be a mo tsošetša morwa wa gagwe! O be a ka se sa hlwa a lewa ke bodutu.

Re ka hwetša kgonthišetšo go Jesu yo a “se a kaxo [a] šitwa xo re kwêla bohloko xe re fôkôla.” Ruri o kwela bohloko bao ba lewago ke bodutu eupša e le bao ba botegago. Ka kgonthe, ka yena ‘re ka amogela tšhokelo, ra hwetša kgaugelo ya go hlakodišwa lebakeng la gona.’ (Ba-Hebere 4:15, 16) Ka go ekiša Jesu, re ka bontšha kwelobohloko go bao ba nyamilego, bao ba tlaišwago le bao ba lewago ke bodutu. Ka go thuša ba bangwe, ke ka sewelo rena ka noši re ka lewago ke bodutu. Eupša go sa dutše go e-na le tsela e nngwe yeo ka yona re ka hwetšago thušo mabapi le go fenya maikwelo a fošagetšego a go lewa ke bodutu.

Lentšu la Jehofa le ka re Thuša go Fenya go Lewa ke Bodutu

Batho ba bantši ba hweditše gore “re [hwetša] kholofêlô . . . ka xo homotšwa ka ôna mangwalô.” Lentšu la Modimo le tletše ka keletšo e šomago yeo e ka re thušago go fenya go lewa ke bodutu. (Ba-Roma 15:4; Psalme 32:8) Ka mohlala, Lentšu la Modimo le re kgothaletša gore ‘re se ke ra ikgopola go fetiša ka mo re swanetšego go ikgopola ka gona.’ (Ba-Roma 12:3, PK) Gore re diriše keletšo ye, go ka nyakega gore re dire peakanyo tseleng ya rena ya go nagana. Boikokobetšo le boipoetšo—go ba le pono ya kgonthe ka mafokodi a rena—di tla re thuša e le ka kgonthe gore re hlagolele ditebelelo tše di leka-lekanego le tše di kwagalago. Lentšu la Modimo gape le re eletša gore re hlagolele kgahlego ya kgonthe ya motho ka noši go ba bangwe. (Ba-Filipi 2:4) Se ke go bontšha gore diatla di a hlatswana. Ge o dutše o kgahlegela ba bangwe, le wena o tla kgahlegelwa ke ba bangwe. Bogwera bjo bjo bobotse bo thuša go fediša go lewa ke bodutu gomme bo dira gore maphelo a rena a be le morero.

Beibele e kgothaletša rena re le Bakriste gore “re se ngalê phuthêxô ya xešo.” (Ba-Hebere 10:24, 25) Ka baka leo, swarega ka mediro ye e nago le mohola, e bjalo ka go ba gona dibokeng tša Dihlatse tša Jehofa ka mehla. Ka ntle le pelaelo, diboka tša Bokriste di ka tlaleletša bophelong bja rena bjo bobotse bja moya, bja maikwelo le bja mmele. Go bolela le ba bangwe ka ditaba tše dibotse tša Mmušo wa Modimo ke tsela e kgahlišago ya go tlatša maphelo a rena ka mediro e mebotse. Go boloka menagano ya rena e tsepame boemong bjo bo nepagetšego, go matlafatša tumelo ya rena le go šireletša kholofelo ya rena.—Ba-Efeso 6:14-17.

Batamela kgaufsi le Jehofa ka thapelo. Dafida o ile a kgothaletša gore: “Lahlêla Morêna morwalô wa xaxo; Yêna ó tlo Xo babalêla.” (Psalme 55:22) Ka go ithuta Lentšu la Modimo, o tla ikwa o thabile. (Psalme 1:1-3) Ge e ba maikwelo a go lewa ke bodutu a go aparela, naganišiša ka tlhokomelo e lerato ya Jehofa go etša ge e utolotšwe ka Lentšu la Gagwe. Mopsalme o ngwadile gore: “Môya wa-ka o xomaretše leroleng; mphedišê ka Lentšu la xaxo.”—Psalme 119:25.

Ge go tla be go se na Motho yo a Rego “ke Lewa ke Bodutu”

Jehofa Modimo o re holofeditše lefase le lefsa leo le se nago matshwenyego, dikgakanego le maikwelo a fošagetšego. Beibele e re: “Ó tlo phomola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna; xobane tša pele di fetile.” (Kutollo 21:4) Ee, gare ga dilo tšeo tša pele tše di tlago go feta go tla ba le bohloko bja mmele, go lewa ke letswalo, go kwa bohloko monaganong le maikwelong mo re go kwago lehono.

Lefase le tla tlala ka batho bao ba nago le bogwera, bao ba tlago go humiša maphelo a rena. Jehofa ka Mmušo wa gagwe wa legodimong wo o lego ka diatleng tša Jesu Kriste o tla re alafela malwetši ka moka a rena sa ruri. Ka kgonthe o tla re tlišetša dilo tše difsa le tše di kgahlišago tšeo re tlago go di dira lefaseng la paradeise. Kgaufsinyane go tla tla letšatši leo re ka se sa hlwago re re, “Ke lewa ke bodutu.”

[Seswantšho go letlakala 9]

Ka thekgo ya Jehofa, re ka se ke ra lewa ke bodutu, gaešita le ge re le noši

[Diswantšho go letlakala 10]

Dipego tša Beibele tša Jeremia le Eliya di re ruta’ng?