Pono ya Beibele

Na go Tshwenyega go Bontšha go Hloka Tumelo?

“GO TSHWENYEGA GO ILEDITŠWE.” Moruti wa mathomong a lekgolo la bo-20 la nywaga o ile a ngwala ka tlase ga sehlogo se gore go tshwenyega ka dilo tše di bonagalago ga se feela gore ke phošo eupša “ke sebe se segolo kudu.” Morago-rago bjale, mohlalosi yo mongwe ge a ngwala ka taba ya go fenya go tshwenyega o itše: “Go tshwenyega ke pontšho ya gore ga re bote Modimo.”

Mabakeng ka bobedi, bangwadi ba ile ba thea diphetho tša bona Thutong ya Jesu ya Thabeng, yeo go yona a itšego: ‘Le se ke la tshwenyega.’ (Mateo 6:25) Ka ge go tshwenyega go kgoma batho ba bantši lehono, re ka no botšiša gore: Na Mokriste o swanetše go ikwa a le molato ka baka la go tshwenyega? Na maikwelo a go tshwenyega a bontšha gore motho o hloka tumelo?

Modimo o Kwešiša Mafokodi a Rena

Beibele ga e rute gore matshwenyego ka moka a bakwa ke go hloka tumelo. Ka ge re phela ‘dinakong tše hlobaetšago tšeo go lego thata go lebeletšana le tšona,’ go bonagala go sa kgonege gore motho a phele ntle le go tshwenyega ka tekano e itšego. (2 Timotheo 3:1; bapiša le NW) Bakriste bao ba botegago ba lebeletšana ka katlego le matshwenyego a letšatši le letšatši ao a bakwago ke boemo bjo bo fokolago bja tša maphelo, botšofadi, dikgatelelo tša tša boiphedišo, dikgohlano tša ka lapeng, bosenyi le mathata a mangwe. Gaešita le mehleng ya kgale, bahlanka ba Modimo ba ile ba lebeletšana le dipoifo le matshwenyego.

Ela hloko pego ya Beibele ya Lota. Modimo o ile a mo laela gore a tšhabele dithabeng gore a efoge go fedišwa phedišong ya Sodoma le Gomora. Lega go le bjalo, Lota o ile a thoma go tshwenyega. O itše: “Aowa hlê, Mong’aka!” Ka go  dika-dika, o ile a tšwela pele ka gore: “Xa ke kxône xo thšabêla kwa dithabeng; thsenyêxo e ka ntshwara, ka hwa.” Ke ka baka la’ng Lota a be a boifa go ya dithabeng? Beibele ga e hlalose. Lota o ile a ikwa a boifa go sa šetšwe gore lebaka e be e le lefe. Modimo o ile a arabela bjang? Na Lota o ile a kgalemelelwa go hloka tumelo go Modimo? Aowa. Go fapana le seo, Jehofa o ile a bontšha go mo naganela, a dumelela Lota go tšhabela motseng wa kgaufsi.—Genesi 19:18-22.

Go na le mehlala e mengwe ya ka Beibeleng ya barapedi ba botegago bao ba ilego ba tshwenyega ka dinako tše dingwe. Ka morago ga go tšhošetšwa ka go bolawa, moporofeta Eliya o ile a tlelwa ke poifo gomme a tšhaba. (1 Dikxoši 19:1-4) Moše, Hanna, Dafida, Habakuku, Paulo gotee le banna le basadi ba bangwe bao ba nago le tumelo e matla, le bona ba ile ba bontšha go tshwenyega. (Ekisodo 4:10; 1 Samuele 1:6; Psalme 55:5; Habakuku 1:2, 3; 2 Ba-Korinthe 11:28) Lega go le bjalo, Modimo o ile a bontšha kgaugelo gomme a tšwela pele a ba diriša tirelong ya gagwe, ka go dira bjalo a bontšha go kwešiša e le ka kgonthe batho bao ba sa phethagalago.

“Sebe se se re Rarêlaxo”

Lega go le bjalo, go tshwenyega mo go phegelelago go ka fokodiša tumelo ya rena gomme gwa dira gore re se hlwe re bota Modimo. Moapostola Paulo o ile a bolela ka go hloka tumelo e le “sebe se se re rarêlaxo.” (Ba-Hebere 12:1) Ka go ikakaretša, go ka direga gore Paulo o be a dumela gore o na le tshekamelo ya go ‘rarelwa’ dinakong tša go fela a fokolelwa ke tumelo.

Mohlomongwe se ke seo se diragaletšego Sakaria ge a be a sa dumele morongwa yo a ilego a mo tsebiša gore mosadi wa gagwe e tla ba moimana. Nakong e nngwe baapostola ba Jesu ba ile ba palelwa ke go fodiša motho ka baka la “xo hlaêla tumêlô.” Lega go le bjalo, batho ba ba ile ba tšwela pele ba thabela go amogelwa ke Modimo.—Mateo 17:18-20; Luka 1:18, 20, 67; Johane 17:26.

Ka lehlakoreng le lengwe, Beibele gape e na le mehlala ya batho bao ba ilego ba lahlegelwa ke go bota ga bona Modimo gomme ba lebeletšana le ditla-morago tše šoro. Ka mohlala, ba-Isiraele ba bantši bao ba ilego ba tloga Egipita ba ile ba thibelwa go tsena Nageng ya Kholofetšo ka baka la go hloka tumelo. Tiragalong e nngwe ba ile ba ba ba ganetša le Modimo ka go lebanya, ba re: “Ké ka ’baka la’ng xe Le re nthšitše naxeng ya Egipita? A e be e le xore re hwêlê fá xare xa naxa?” Ka xobane mó xa xo meetse.” E le go bontšha go se thabe ga Modimo, go ile gwa romelwa dinoga tšeo di nago le mpholo gore di ba otle.—Numeri 21:5, 6.

Badudi ba motseng wa gabo Jesu wa Natsaretha ba ile ba lahlegelwa ke tokelo ya go bona mehlolo e mentši e dirwa tikologong ya bona ka baka la go hloka tumelo. Go oketša moo, moloko o kgopo wa nakong yeo o ile wa hwetša kahlolo e bohloko e tšwago go Jesu ka baka la go hloka tumelo. (Mateo 13:58; 17:17; Ba-Hebere 3:19) Moapostola Paulo o ile a lemoša ka mo go swanetšego gore: “Lebêlêlang-xê, lena Bana bešo, xore mo xo lena xo se kê xwa ba wa pelo e mpe ya xo se dumêle, e a kaxo hlanôxêla Modimo e a phelaxo.”—Ba-Hebere 3:12.

Ee, maemong a feteletšego go hloka tumelo go ka bakwa ke pelo e kgopo. Eupša go be go se bjalo ka Sakaria le baapostola ba Jesu mehlaleng yeo go boletšwego ka yona ka mo godimo. Go hloka tumelo ga bona e be e le ka baka la bofokodi bja nakwana. Tsela ya bona ya go phela ka kakaretšo e ile ya bontšha gore ba be ba le “pelo-thsekexi.”—Mateo 5:8.

Modimo o Tseba Dinyakwa tša Rena

Mangwalo a re thuša go kgethologanya magareng ga matshwenyego ao a tlwaelegilego le sebe sa go hloka tumelo. Go tshwenyega ga letšatši le letšatši goba go hloka tumelo ga nakwana ka baka la mafokodi a batho ga se gwa swanelwa go gakantšhwa le go se bote Modimo ka mo go feletšego moo go bakwago ke pelo e kgopo le yeo e sa arabelego. Ka gona, Bakriste ga ba swanela go tshwenywa ka mo go tšwelago pele ke go ikwa ba le molato ka baka la go tshwenyega leboelela.

Lega go le bjalo, go bohlokwa go ba šedi e le gore matshwenyego a se ke a re fenya gomme a laola maphelo a rena. Ka gona, re bona bohlale bja mantšu a Jesu ge a be a re: “Le se kê la belaêlêla bophelô bya lena la re: Re tlo ja’ng? Re tlo nwa’ng? Le mmele Le se kê la o belaêlêla la re: Re tlo apara’ng?” O ile a oketša ka mantšu a kgothatšago a rego: “Xe e le Tataweno wa maxodimong ó tseba xobane le lena tšeo ka moka Le phela ka tšôna. Sa pele Le tsomê mmušô wa Modimo le tokô ya wôna; ké mo Le tl’o xo ekeletšwa ka tšeo ka moka.”—Mateo 6:25-33.

[Seswantšho go letlakala 16]

Moapostola Paulo o ile a welwa ke matshwenyego