Pono ya Beibele

Go ba Hlogo ya Lapa go Bolela’ng?

GO YA ka Beibele, “hlôxô ya mosadi ké monna.” (1 Ba-Korinthe 11:3; Ba-Efeso 5:23) Eupša batho ba bantši bao ba ipolelago gore ba hlompha Beibele ba nagana gore taba ye ya gore monna ke hlogo e feletšwe ke nako e bile e kotsi. Banyalani ba bangwe ba hlalositše gore: “Thuto ya gore basadi ba swanetše ‘go ikokobeletša [banna ba bona] ka go rata,’ ge e dirišwa ka tsela e feteletšego e ka feleletša e bakile tshwaro e mpe mmeleng le maikwelong.” Se se nyamišago ke gore tirišo e mpe ya bohlogo e atile e bile e gohle. Mongwadi yo mongwe o re: “Dinageng tše dintši go bethwa ga basadi go tšewa e le mokgwa wo o tlwaelegilego wa bophelo—matla a bonna a retwa dikošeng, diemeng le menyanyeng ya manyalo.”

Ba bangwe ba bolela gore molao wa motheo wa Beibele mabapi le bohlogo ke wona wo o bakilego ditiro tše tše šoro. Na thuto ya Beibele ka bohlogo e tšeela basadi fase gomme ya kgothaletša bošoro bja ka gae? Ge e le gabotse go ba hlogo ya lapa go bolela’ng? *

Bohlogo ga se Pušo ya Bogateledi

Bohlogo bjoo go bolelwago ka bjona ka Beibeleng ke thulaganyo e lerato gomme ga bo swane le gatee le pušo ya bogateledi. Go se kwe Modimo ke gona go baketšego taba ya gore gantši banna ba sware basadi ka tsela e šoro. (Genesi 3:16) Ga e sa le go  tloga ka morago ga tšhemo ya Edene, gantši banna ba ile ba diriša matla a bona gampe, ba diriša batho ba bangwe o šoro ka tsela ya go ikhola, bao ba bego ba akaretša basadi le bana.

Lega go le bjalo, mokgwa woo le ka mohla ga se wa ka wa ba karolo ya morero wa Modimo. Jehofa o hloile bao ba dirišago matla a bona a taolo gampe. O ile a sola banna ba ba-Isiraele bao ba bego ba “lahla” goba ba radia basadi ba bona. (Maleaki 2:13-16) Go feta moo, Modimo o re “ó hloile ba ba rataxo bosenyi.” (Psalme 11:5) Ka gona banna bao ba bethago basadi ba bona le bao ba swarago basadi ba bona gampe, ga go ka tsela yeo ka yona ba ka dirišago Beibele go lokafatša ditiro tša bona tše šoro.

Bohlogo bjo Swanetšego bo Akaretša’ng?

Bohlogo ke thulaganyo ya motheo yeo Modimo a e dirišago gore dilo di sepele gabotse ka thulaganyo legohleng. Batho bohle ba ka tlase ga motho yo a itšego, ntle le Modimo. Banna ba tlase ga Kriste, bana ba tlase ga batswadi ba bona gomme Bakriste bohle ba ka tlase ga mebušo. Jesu le yena o ka tlase ga Modimo.—Ba-Roma 13:1; 1 Ba-Korinthe 11:3; 15:28; Ba-Efeso 6:1.

Go ikokobeletša boetapele go bohlokwa bakeng sa gore go be le setšhaba seo se sepelago ka thulaganyo le seo se tsepamego. Ka mo go swanago, go ikokobeletša hlogo ya lapa go bohlokwa bakeng sa go aga lapa le le tsepamego, le le thabilego le leo le nago le khutšo. Go sa dutše go le bjalo le ka lapeng leo le se nago monna goba tate. Malapeng a bjalo mma e ba hlogo ya lapa. Ge batswadi ka bobedi ba se gona, ngwana yo mogolo goba motho yo mongwe wa leloko e ka ba hlogo ya lapa. Ditho tša lapa di holega maemong ka moka ge di hlompha ka tsela e swanetšego yoo a neilwego matla a go etelela pele.

Ka gona, ntlha-kgolo ga se go gana molao wa motheo wa mabapi le bohlogo, eupša go e na le moo ke go ithuta go diriša bohlogo gabotse le go bo kwešiša. Moapostola Paulo o kgothaletša banna ba Bakriste go ba dihlogo tša malapa a bona “byalo ka xe Kriste è le Yêna hlôxô ya phuthêxô.” (Ba-Efeso 5:21-23) Ka morago ga moo Paulo o bolela ka tsela yeo Kriste a ilego a swara phuthego ka yona e le yona motheo o phethagetšego wa bohlogo. Kriste o ile a bea mohlala ofe?

Gaešita le ge Jesu e le Mesia le Kgoši ya nakong e tlago, o hweditše matla a taolo go Modimo ka boyena gomme o be a le bohlale kudu e bile a e-na le phihlelo bophelong go feta barutiwa ba gagwe, o be a e-na le lerato, a le borutho gomme a e-na le kwelobohloko. Le ka mohla o be a se bogale, a se thata goba go nyaka mo gontši ka mo go feteletšego. O be a sa diriše matla a gagwe ka tsela ya go gatelela e bile a sa dule a gopotša batho gore yena ke Morwa wa Modimo. Jesu o be a ikokobeditše gomme a e-na le pelo e bolo. Ka baka leo, ‘joko ya gagwe e be e sa robe gomme morwalo wa gagwe o le bohwefo.’ (Mateo 11:28-30) Ka gona o be a batamelega gomme a swara batho ka tsela e nago le teka-tekano. Ge e le gabotse, Paulo o bolela gore Jesu o be a rata phuthego kudu moo e lego gore o ile a “ikxafa ka ’baka la yôna.”—Ba-Efeso 5:25.

Motho a ka Ekiša Bohlogo bja Jesu Bjang?

Dihlogo tša malapa di ka ekiša dika tša Kriste ka tsela efe? Hlogo ya lapa e bontšha go kgomega ka bophelo bjo bobotse bja lapa la yona dinyakweng tša mmele le tša moya. Hlogo ya lapa e ikgafa ka go ipha nako e lekanego le go šetša bakeng sa dinyakwa tša setho se sengwe le se sengwe sa lapa le tša bona ba le ka moka. Dikgahlego tša molekane wa gagwe le tša bana ba gagwe di tla pele go tša gagwe. * (1 Ba-Korinthe 10:24; Ba-Filipi 2:4) Ge monna a diriša melao ya motheo ya Beibele gotee le dithuto tša yona bophelong bja gagwe bja letšatši le letšatši, o tla hlompšha a be a thekgwe ke mosadi wa gagwe le bana. Ka tlase ga bohlogo bja gagwe bjo lerato, maiteko a bona ao a kopanetšwego a go lebeletšana le mathata le ge e le afe a ka atlega. Ka gona, ge monna a diriša bohlogo bja gagwe ka tsela ya Mangwalo, o aga lapa le le thabilego leo le šomelago go tagafatša Modimo le go mo reta.

Hlogo e lego bohlale e ikokobeditše. Ge go nyakega, e tla kgopela tshwarelo ka bolokologi gaešita le ge e thatafalelwa ke go amogela gore e be e fošitše. Beibele e bolela gore motho o phologa ge ‘baeletši ba atile.’ (Diema 24:6) Ee, boikokobetšo bo tla tutueletša hlogo ya lapa go theetša ditšhišinyo tša mosadi wa yona le bana le go ba kgopela ditšhišinyo ge go swanetše. Ka go ekiša Jesu, hlogo ya lapa yeo e lego Mokriste e tla kgonthišetša gore bohlogo bja yona ga bo tliše lethabo le tšhireletšego feela ka lapeng la yona eupša le gore bo tliša theto go Mothomi wa malapa, Jehofa Modimo, le go mo tagafatša.—Ba-Efeso 3:14, 15.

[Mengwalo ya ka tlase]

[Seswantšho go letlakala 26]

Monna yo a šomišanago le lapa gabotse o theetša ditšhišinyo tša mosadi wa gagwe gotee le bana