‘Gopola Mmopi wa Gago’

“Xopola Mmopi wa xaxo Ò sa le yo mofsa, xò sešo xwa fihla matšatši a mabe, xò sešo xwa tla nywaxa ye O tl’o xo re: Xa e na tše di nthabišaxo!”—Mmoledi 12:1.

MANTŠU a lego ka mo godimo a tšwago ka Beibeleng a dira gore motho a nagane. O ba mofsa gatee feela bophelong bja gago. Ka morago, o tla lebelela morago nywageng ya gago ya mahlalagading, gomme o tla dira bjalo ka kgotsofalo e thabišago goba ka go itshola mo go kwešago bohloko. Wena o tla ba boemong bofe? O ka dira bjang gore o be le mafelelo a mabotse?

Go etša ge e tsopotšwe ka mo godimo, Beibele e kgothaletša gore: “Xopola Mmopi wa xaxo.” O ka dira seo bjang? Ka go kgomarela melao le melao ya motheo ya Modimo, yeo e begilwego ka Lentšung la gagwe, Beibele. Ge e le gabotse, se ga se bolele gore o swanetše go phela bophelo bja go itima dilo bja go fišegela thoko ka tsela ya bodumedi, gomme o itima lethabo ka moka. Go fapana le seo, go gopola Mmopi wa gago go tla feleletša ka gore o be le lethabo le legolo kudu leo o ka bago le lona. Seo e ka ba sa therešo bjang?

Ka mohlala, akanya o neilwe koloi le lengwalo la go otlela. O na le tokologo e mpsha le e kgahlišago, yeo e ka go tlišetšago lethabo le legolo. Anke o nagane ka mafelo ao o ka yago go ona! Lega go le bjalo, tokologo e mpsha ye o e hweditšego e akaretša boikarabelo bjo bogolo. Ge o dutše o otlela, o swanetše go latela melao ya tsela gomme o ele hloko maswao a taolo ya dikoloi, lebelo le le lekanyeditšwego le maswao a temošo. Na boikarabelo bjo bo go šitiša go otlela o thabile? Ga go bjalo le gatee! Ge e le gabotse, bo šoma bjalo ka tšhireletšo. Ruri ga go thabiše go hlagelwa ke kotsi, na ga go bjalo?

Se se swana le tokologo yeo Mmopi wa gago, Jehofa Modimo, a go filego yona. Ge o dutše o gola, o go nea tokologo ya go kgetha kamoo o tlago go diriša bophelo bja gago ka gona. (Doiteronomio 30:19; Diema 27:11) A tokelo e kgahlišago gakaakang! Eupša tokologo yeo e akaretša boikarabelo bjo bogolo. Ka Lentšung la gagwe, Jehofa o hlomile ‘melao ya tsela’—ditekanyetšo tšeo a nyakago gore o phele ka tšona. Na ditekanyetšo tše di thibela lethabo la gago? Ga go bjalo le gatee! Go e na le moo, di go šireletša manyaming le bohlokong bjo bo tlaišago bafsa ba bantši kudu lehono.

 Federico, yo ga bjale a lego nywageng ya gagwe ya mathomong ya bo-30, o tseba therešo ya seo. Ge e be e sa le lesogana, o bone bao a bego a tsena sekolo le bona ba tšea karolo medirong ya mehuta ka moka yeo a bego a tseba gore o swanetše go e phema. O re: “Go be go bonagala eka ba be ba ipshina, eupša le ka mohla ke be ke sa nagane gore ba be ba thabile e le ka kgonthe.” Ge a lebelela morago, Federico o thabela gore o be a e-na le ditekanyetšo tša Beibele bakeng sa go mo hlahla nywageng ya gagwe ka moka ya mahlalagading. O re: “Ke dumela gore ke be ke e-na le mathata ao ke bego ke swanetše go a lwantšha go swana le mofsa yo mongwe le yo mongwe. Eupša Beibele e ntšhireleditše e le ka kgonthe. E bile ka mehla ke be ke dula ke e-na le Mokriste-gotee le nna yo a bego a nthuša. Go latela melao ya motheo ya Beibele go mphile lethabo le legolo kudu go feta leo nkabego ke ile ka le nagana!”

Jehofa Modimo o nyaka gore o thabe—o thabe e le ka kgonthe. Seo se akaretša se se fetago ponagalo ya go ithabiša feela yeo e lego seširo feela seo se širilego manyami. Beibele e re: “Ithabêlê Ò sa le bofseng bya xaxo, O tsefêlwa ke matšatši a bofseng bya xaxo.” Eupša yona temana yeo ya Beibele e oketša ka temošo. E re: “O tsebê xobane Modimo O tlo Xo sekiša tšeo tšohle.”—Mmoledi 11:9.

Gopola Mmopi wa gago ka go diriša ka bohlale tokologo yeo a go filego yona. Ge e ba o dira bjalo, o ka kgodišega gore Mmopi wa gago o tla go gopola le gore o tla go nea lethabo le legolo kudu ka mo go ka kgonegago. Beibele e bolela gore: “Khumišô ké dithšexofatšô tša Morêna; xa e tlale ka xo itapiša.”—Diema 10:22.

Go thuša bafsa gore ba lebeletšane le diteko tša nywaga ya mahlalagading, Dihlatse tša Jehofa di gatišitše kgatišo ya matlakala a 320 yeo e nago le sehlogo se se rego, Dipotšišo tša Bafsa le Dikarabo tše Šomago. Go fihla ga bjale, go šetše go gatišitšwe dikopi tše ka bago dimilione tše 34 tša puku ye ka maleme a 77. O ka ikhweletša kopi ka go ikopanya le Dihlatse tša Jehofa tšeo di lego kgaufsi le wena.

[Diswantšho go letlakala 8, 9]

Bakeng sa go go Thuša Gore o Atlege Bjalo ka Mofsa yo a Lego Mahlalagading

Iphe nako ya go bala Lentšu la Modimo

Šoma ka thata bodireding

Phema ditlwaelano tše mpe

Dula o boledišana le batswadi ba gago

[Mothopo]

Brochure cover: Pictorial Archive (Near Eastern History) Est.