Lethabo le Ditlhohlo tša Nywaga ya Mahlalagading

NYWAGA ya mahlalagading e ka ba nako e kgahlišago ya bophelo. Go ba bantši, e tloga e le nako e kgahlišago. Le gona batho ba bantši ba bagolo ba gopola ka lethabo nywaga ya bona ya mahlalagading.

Ka nako e swanago, re swanetše go lemoga gore re phela “[dinakong] tše hlobaetšago tšeo go lego thata go lebeletšana le tšona.” (2 Timotheo 3:1, NW) Se se beile kgateletšo e oketšegilego go bafsa, e lego kgateletšo ye e fapanago le yeo meloko e fetilego e ilego ya lebeletšana le yona. Mohlomongwe ke ka lebaka leo Sabrina Solin Weill, yo e lego mongwadi-mogolo wa makasine wa bafsa ba lego mahlalagading a hlalosago phihlelo ya nywaga ya mahlalagading e le nako e hlohlago kudu-kudu go swana le go sepela godimo ga thapo yeo e lego moyeng kua godimo gomme go se na selo kua tlase bakeng sa go go kaba ge o e-wa. Ka kgonthe nako ye ya pherekano ya bophelo e ka tlala ka maikwelo a go se tsepame, go tshwenyega le go gakanega. Weill o ngwala gore: “Nakong ya magareng ga ya bjaneng le ya go tsena bogolong bophelong bja bona, bafsa ba lego mahlalagading ba swanelwa ke go lebeletšana le ditla-morago tša bobedi go ba ngwana le go ba motho yo mogolo.”

Ge e ba o le nywageng ya mahlalagadi, o ka lebeletšana bjang le ditlhohlo tšeo o lebanago le tšona? Ge e ba o le motswadi wa ngwana yo a lego mahlalagading, ke’ng seo se ka go thušago go gopola kamoo nywaga ye ya mathata e bego e le ka gona gomme ka tsela yeo wa kwešiša gakaone seo morwa goba morwedi wa gago a lebeletšanego le sona? Lelokelelong le, re laletša bobedi bafsa le batho ba bagolo go hlahloba ka mo go tseneletšego taba ya go ba nywageng ya mahlalagadi. Go dira bjalo go tla thuša bafsa e sego feela go kgotlelela eupša le go atlega.