Boradia—Bothata bja Lefase ka Moka

KA GE e be e le motho yo a gogelago le yo a bolelago ka boleta, Wayne o be a bonagala e tloga e le mohuta wa monna yoo Karen a bego a mo nyaka. Karen o itše: “E be e le yena mohuta wa monna yoo ke bego ke mo rapelela e bile ke holofela go ba le yena. Motho yo mongwe le yo mongwe yo a bego a re bona o be a nagana gore re tloga re swanelana. O ile a ntira gore ke dumele gore o be a e-hwa a ikepela ka nna.”

Lega go le bjalo, go be go e-na le bothata. Wayne o ile a botša Karen gore o be a le maemong a boraro a bao ba laolago Mokgatlong wa Dinyakišišo tša ka Sephiring wa Australia. A mmotša gore o nyaka go rola modiro, eupša ba be ba ka se mo dumelele go dira bjalo. O be a tsebela mokgatlo woo kudu. Ka gona, o be a tla bolawa! Baratani ba ba ile ba logišana leano. Ba ile ba rulaganya gore ba be ba tla nyalana, ba kopanye dithoto tša bona, ba tloge Australia gomme ba tšhabele Canada. Karen o ile a rekiša ntlo ya gagwe le tšohle tšeo a bego a e-na le tšona gomme a gafela Wayne tšhelete ya gagwe.

Lenyalo le ile la sepela go ya kamoo le bego le rulagantšwe ka gona. Wayne o ile a tšhaba nageng, eupša Karen o be a tlogetšwe, a lahlilwe gomme a šetše feela ka diranta tša ka tlase ga tše 30 pankeng. Go se go ye kae o ile a utolla gore o be a tantšwe mologong wa maaka a hlamilwego gabotse woo o logilwego ka morero feela wa go mo radia. Ka go swana le sebapadi sa difilimi, Wayne o ile a itira mohuta o itšego wa motho—a swana tlwaa le motho yo a bego a ka gogela mosadi yo. Setlogo sa monna yo, dikgahlego, semelo le lerato leo a bego a bolela gore o mo rata ka lona e be e le maano-mabe a go gapa kholofelo ya mosadi yo—kholofelo yeo e ilego ya mo lobiša diranta tše dimilione tše 1,32. Lephodisa le boletše gore: “Mosadi yo o gobaditšwe maikwelong. Go sa bolelwe ka taba ya tšhelete—go a makatša kamoo motho a ka kwešwago bohloko kudu ka gona.”

Karen o itše: “Ke ferekane kudu. Monna yo o ile a ikgakanya go ba motho yo e bego e se yena.”

Karen e fo ba yo mongwe wa bahlaselwa bao ba sa balegego ba boradia lefaseng ka bophara. Ga go tsebje gore ba bangwe ba radiiwa bokae, le ge tekanyo e akanyetšwa go ba diranta tše dibilione gomme e gola ngwageng o mongwe le o mongwe. Ka ntle le go lahlegelwa ke ditšhelete, bahlaselwa ba swanago le Karen ba kwa bohloko  kudu maikwelong ka go tseba gore motho yo mongwe—gantši motho yo ba bego ba mmota—o ile a ikhola ka bona.

Thibela-malwetši e Phala Kalafo

Boradia bo hlaloswa e le “maano-mabe goba bofora bjo bo rerilwego bja go hwetša tšhelete ka go ikgakanya, ka dipolelo goba dikholofetšo tša maaka.” Ka manyami, batho ba bantši bao ba dirago boradia ga ba otlwe ka gobane gantši go thata go hlatsela gore bofora bjoo bo dirilwego ka kelohloko bo diregile e le ka kgonthe. Go feta moo, bahlalefetši ba bantši ba tseba ditsela tša go kgona go efoga molao e bile ba ikhola ka tšona—ba tseba kamoo ba ka radiago batho ka ditsela tšeo go lego thata goba go sa kgonegego go di iša tshekong. Go oketša moo, go bula molato wa bosenyi malebana le mohlalefetši kgorong ya tsheko go nyaka nako e ntši le tšhelete e ntši. Gantši bao ba ahlolelwago melato ya bona ya bosenyi ke bao ba utswitšego diranta tše dimilione goba bao ba dirilego selo seo se tšhošago kudu mo e lego gore se feleletša se lemogwa ke ba bantši. Gaešita le ge mohlalefetši a ka swarwa le go otlwa, mohlomongwe o tla be a šetše a dirišitše goba a utile tšhelete yeo a e hlalefeditšego. Ka baka leo, ke ka sewelo bahlaselwa ba lefšago tšhelete yeo ba e lobilego.

Ka boripana, ge e ba o hlalefeditšwe, go ka direga gore o hwetše thušo e nyenyane goba o se e hwetše. Selo se sekaone kudu ke gore o pheme go ba mohlaselwa go e na le go leka go hwetša tsela ya kamoo o ka hwetšago tšhelete ya gago gape ka gona ka morago ga go radiiwa. Monna yo bohlale o ile a ngwala kgale gore: “Mohlale ó bôna dikotsi di s’e-tla, a khuta; ba mašilô ba a feta, ba y’o hlaka.” (Diema 22:3) Sehlogo se se latelago se tla hlalosa ditsela tšeo ka tšona o ka itšhireletšago boradieng.