Pono ya Beibele

Na Modimo Ruri o na le Taba le Bana?

BANA ba dimilione tše makgolo ba swarwa gampe, ba a gobošwa e bile ba hlaselwa ka sehlogo ngwaga le ngwaga. Ba bantši ba šoma bjalo ka makgoba maemong a kotsi. Ba bangwe ba a thopša gomme ba gapeletšwa go ba mašole goba bagweba-ka-mmele bao e lego bana. Bana ba bantši ba feleleditše ba se sa bota ba bangwe ka ge ba ile ba lahletšwa ka gore ba be le dikopano tša botona le botshadi le wa leloko le ka ditiro tše dingwe tše di boifišago tša go gobošwa ga bana.

Ke mo go kwešišegago gore batho bao ba tshwenyegago e le ka kgonthe ba ferekanywa ke tlalelo ya bana. Gaešita le ge ba dumela gore megabaru ya batho le bokgopo bja bona ke tšona tšeo di kgathago tema e kgolo kudu go swarweng gampe mo go bjalo, ba bangwe ba ka ba ba sa dutše ba hwetša go le thata go amogela gore Modimo yo lerato o be a ka dumelela go hloka toka mo go bjalo. Ba ka ba ba nagana gore Modimo o lahlile bana ba le gore mohlomongwe o tloga a se na taba le bona. Na seo ke therešo? Na therešo e nyamišago ya gore bana ba swarwa gampe le gore gantši ba a gobošwa e bolela gore Modimo ga a na taba le bona? Beibele e re’ng?

Modimo o Sola Bagoboši

Jehofa Modimo le ka mohla ga se a ka a rerela gore bana ba swarwe gampe ke batho ba bagolo ba šoro. Go  swarwa gampe ga bana ke e nngwe ya ditla-morago tše di nyamišago kudu tša go rabela ga batho tšhemong ya Edene. Go gana bobuši bja Modimo go ile gwa lebiša tabeng ya gore batho ba swarwe gampe ka tsela e sehlogo ke magagabo bona.—Genesi 3:11-13, 16; Mmoledi 8:9.

Modimo o hlaswa bao ba gobošago ba ba fokolago le ba ba sa kgonego go iphemela. Ditšhaba tše dintši tša mehleng ya bogologolo tšeo di bego di sa hlankele Jehofa di be di dira dihlabelo ka bana, eupša Jehofa o boletše gore se e be e le ‘selo seo a sego a ba botša sona le gore se be se sa ka sa rotoga pelong ya gagwe.’ (Jeremia 7:31) Modimo o lemošitše batho ba gagwe ba mehleng ya bogologolo gore: “Xe O ka bá wa ba hlakiša [bana bao ba se nago bo-tatago bona], ’me ba ntelêla, ke tlo kwa sellô sa bôná; ’me boxale bya-ka bo tlo tuka.”—Ekisodo 22:21-23.

Jehofa o Rata Bana

Go tshwenyega ga Modimo ka bana go bonagatšwa ke ditaelo tše bohlale tšeo a di neago batswadi. Bana bao ba godišeditšwego legaeng le le šireletšegilego go bonagala e e-ba batho ba bagolo ba ba godilego ka tsebo le ba ba kgonago go swaragana le mathata. Ka go rialo, Mmopi wa rena o thomile lenyalo, tokišetšo ya bophelo ka moka yeo go yona ‘monna a tlogo tlogela tatagwe le mmagwe, a gomarela mosadi wa gagwe, gomme ba ba nama e tee.’ (Genesi 2:24) Ka Beibeleng, dikopano tša botona le botshadi di dumeletšwe feela lenyalong e le gore bana bao ba ka tšwelelago ba kgone go hlokomelwa boemong bjo bo tsepamego.—Ba-Hebere 13:4.

Mangwalo a bile a gatelela bohlokwa bja tlwaetšo e newago ke batswadi. Beibele e re: “Bana ba motho ké neô ya Morêna; kenyô ya mmele ké mphô. Ba etša mesêbê ’atleng tša moxale; ba byalo bana ba ba tswáletšwexo motho à sa le e mofsa.” (Psalme 127:3, 4) Bana ke mpho e bohlokwa e tšwago go Modimo, gomme o nyaka gore ba atlege. Go etša ge mmetši wa mesebe a lebanya ka kelohloko pele a betša mesebe ya gagwe, Modimo o kgothaletša batswadi gore ba nee bana ba bona tlhahlo e botse bophelong. Lentšu la Modimo le laela gore: “Lena Bô-tata-xo-bana! Le se kê la befediša bana ba lena; sa lena a e bê xo ba etetša ka xo ba ruta le xo ba eletša tša Morêna.”—Ba-Efeso 6:4.

Tsela e nngwe yeo ka yona Jehofa a bontšhitšego lerato la gagwe go bana ke ka go ruta batswadi go šireletša bana ba bona go batho ba šoro. Kua Isiraeleng ya mehleng ya bogologolo, gaešita le “bana” ba be ba laetšwe go theetša Molao, woo o bego o akaretša go tseba boitshwaro bjo bo swanetšego le bjo bo sa swanelago bja botona le botshadi. (Doiteronomio 31:12; Lefitiko 18:6-24) Modimo o nyaka gore batswadi ba dire sohle seo ba ka se kgonago go šireletša bana ba bona go motho le ge e le ofe yo a ka ba swarago gampe goba go ba goboša.

Kholofelo Bakeng sa Bana

Lerato la Jehofa leo le sa felego la go rata bana le ile la bontšhwa gabotse kudu ke Jesu Kriste, yo a bonagatšago semelo sa Tatagwe ka tsela e phethagetšego. (Johane 5:19) Ge baapostola ba Jesu, ka go leka go mo šireletša ka tsela e fošagetšego, ba be ba ganetša batswadi gore ba tliše bana ba bona ba banyenyane go yena, Jesu o ile a ba phošolla a befetšwe. A re: “Lesang bana ba tlê xo Nna.” Ke moka, “a ba xokara, a ba bea diatla a ba šexofatša.” (Mareka 10:13-16) Bana ke ba bohlokwa mahlong a Jehofa Modimo goba a Morwa wa gagwe.

Ge e le gabotse, ka Kgoši ya gagwe e kgethilwego, e lego Jesu Kriste, Modimo go se go ye kae o tla gata mogato wa go imolla bana bao ba swerwego gampe. Batho ba megabaru bao ba swarago ba bangwe gampe le bagoboši ba šoro ba lefase le ba tla fedišetšwa sa ruri. (Psalme 37:10, 11) Ge e le mabapi le ba boleta bao ba nyakago Jehofa, Beibele e re: “Ó tlo phomola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna; xobane tša pele di fetile.”—Kutollo 21:3, 4.

Mo nakong ye, Modimo o bontšha lerato la gagwe ga bjale ka go nea thušo ya moya le ya maikwelo go bohle bao ba swerwego gampe le bao ba gobošwago. O holofetša gore: “Tše di timetšexo ke tlo di nyaka; tše di tšitlanexo ke tlo di buša; tše di xobetšexo ke tlo di fapa; tše di babiwaxo ke tlo alafa.” (Hesekiele 34:16) Ka Lentšu la gagwe, ka moya wa gagwe o mokgethwa le ka phuthego ya gagwe ya Bokriste, Jehofa o homotša bana ba ba gateletšegilego le ba ba diilago. E tloga e le mo go thabišago go tseba gore mo nakong ye, ‘Radikgaugelo, Modimo wa khomotšo yohle, o re homotša mahlokong a rena ohle,’ go etša ge a tla dira nakong e tlago.—2 Ba-Korinthe 1:3, 4.

[Mothopo wa Seswantšho go letlakala 16]

© Mikkel Ostergaard /Panos Pictures