O ka bo Hwetša Kae Boitshwaro bjo Bobotse?

RE PHELA lefaseng leo go lona mekgwa ya setho e fetogago. Ditiro tša go se botege tšeo nakong e fetilego di bego di iletšwa gantši di tshedišwa mahlo lehono. Mahodu le bahlalefetši ba dula ba retwa le go tumišwa e le bagale mekerong ya ditaba. Ka baka leo, batho ba bantši ba swana le bao  go bolelwago ka bona ka Beibeleng ge e re: “X’O bôna lehodu, O kôpana nalô’.”—Psalme 50:18.

Lega go le bjalo, bahlalefetši ga se ba swanela go dungwa le gatee. Mongwadi yo mongwe o itše: “Bokgoni bja tlhago bja go radia batho bao ba phelago le bona ke bjona [bo dirago] gore ditsebi tša go radia e be tše fapanego, e lego bokgoni bjoo gantši bo lemogwago e sa le ba banyenyane kudu. Se se tlaleletšago go se ke taba ya gore go hlalefetša mo go bjalo ga go ba dire gore ba ikwe ba e-na le molato goba ba itiwa ke letswalo. Go e na le moo, go ba dira gore ba ikwe ba kgotsofetše kudu—e lego lethabo leo le ba kgothaletšago gore ba tšwele pele ba radia bakeng sa go hwetša selo le ge e le sefe seo ba se nyakago, go sa šetšwe gore mohlaselwa o lahlegelwa gakaakang.”

Ee, batho ba kwela bohloko mohlologadi yo a radiilwego tšhelete yeo a feditšego bophelo bja gagwe ka moka a e boloka, eupša ke batho ba sego kae feela bao ba kwago bohloko ge motho-tsoko a utswa tšhelete kgwebong e kgolo goba a radia khamphani ya inšuranse. Batho ba bantši ba nea lebaka la gore go ba gona dikgwebo di humile. Eupša boradia bjo bo bjalo ga e fo ba bothata bja dikgwebo ka botšona; di lefiša bareki kudu bakeng sa go bušetša tšhelete e lobilwego ka boradia. Ka mohlala, kua United States, lapa le le tlwaelegilego le lefa tšhelete ya ka godimo ga R6 500 ka ngwaga godimo ga tšhelete ya inšuranse yeo e lefšago ka mehla bakeng sa go bušetša tšhelete yeo e radiilwego.

Le gona, batho ba bantši ba ikhola ka dibaka tša go reka ditšweletšwa tšeo e sego tša kgonthe tše di sa bitšego kudu tša maina, tše bjalo ka diaparo, dišupanako, dinkgiša-bose, ditlolo le mekotlana ya go athwa. Mo gongwe ba ka lemoga gore ditšweletšwa tša bofora di lobiša dikgwebo diranta tše dibilione tše makgolo ngwaga le ngwaga, eupša ba nagana gore seo ga se ba kgome. Lega go le bjalo, mafelelong bareki ba swanelwa ke go lefa tšhelete e ntši bakeng sa dilo tša kgonthe tše di rekišwago gotee le ditirelo. Go oketša moo, go reka ditšweletšwa tša bofora go humiša disenyi.

Mongwadi yoo a šomago go lwantšha boradia o ngwadile gore: “Ke kgodišegile gore lebaka le legolo leo ka lona re nago le boradia bjo bogolo gakaakaa lehono ke ka gobane re phela lefaseng leo le tlogago le se na mekgwa ya setho. Mekgwa ya setho e phuhlame o šoro moo e bilego e bakile mekgwa ya boradia. . . . Re phela lekokong la batho leo le sa rutego mekgwa ya setho ka gae. Re phela lekokong la batho leo le sa rutego mekgwa ya setho sekolong, ka gobane barutiši ba ka latofatšwa ka go ruta boitshwaro bjo bobotse.”

Ka mo go fapanego, Dihlatse tša Jehofa di ruta le go phegelela go phela ka ditekanyetšo tša boitshwaro tša Lentšu la Modimo. Di hlahlwa ke melao ya motheo yeo e swanago le e latelago:

● “Wa xeno O mo ratê ka mokxwa wo O ithataxo ka wôna.”—Mateo 22:39.

● “O se kê wa fora.”—Mareka 10:19.

● “E a utswitšexo a se kê a hlwa a utswa; a a kxothalê a dirê tše botse ka diatla tša xaxwe, a tlê a bê le tše a kaxo abêla mohloki.” —Ba-Efeso 4:28.

● “Re rata go itshwara ka go botega dilong ka moka.”—Ba-Hebere 13:18, NW.

Gaešita le ge Dihlatse di sa ikgantšhe goba go ipona bokaone, di dumela gore ge e ba motho yo mongwe le yo mongwe a be a diriša melao ye ya motheo, gona lefase e be e tla ba lefelo le lekaone kudu leo go ka phelwago go lona. Gape di dumela kholofetšo ya Modimo ya gore ka letšatši le lengwe lefase le tla ba bjalo.—2 Petro 3:13.

[Ntlhakgolo go letlakala 11]

Ge nkabe motho yo mongwe le yo mongwe a be a phela ka ditekanyetšo tša boitshwaro tša lentšu la Modimo, gona lefase e be e tla ba lefelo le lekaone leo go ka phelwago go lona

[Seswantšho go letlakala 10]

Bakriste ba therešo ba latela melao ya motheo ya Beibele e swanago le o rego, “Wa xeno O mo ratê ka mokxwa wo O ithataxo ka wôna”