Mohuta wa Tate yoo Bana ba mo Nyakago

BANA ba nyaka tate yo a ba ratago, yoo a tla dulago a le gona ge ba mo nyaka e bile e le yoo a dirago sohle seo se lego matleng a gagwe bakeng sa go ba thuša gore ba gole e tle e be batho ba bagolo bao ba kgonago go rwala boikarabelo le bao ba ka botwago. Eupša taba yeo ya gore bana ba nyaka tate yo bjalo ga e tšeelwe hlogong.

Ke therešo gore bo-mma ke bona bao ba belegago bana, gomme ke therešo gore mma yo lerato o bapala karolo e bohlokwa. Eupša tabeng ya go bontšha gore tate le yena o bapala karolo e bohlokwa go fo swana le mma, The Wilson Quarterly e itše: “Go fokola ga dika tša go ba tate ke lebaka le legolo leo le dirago gore go be le mathata a mantši ao a hlaselago badudi ba Amerika”—e bile re ka oketša gape ka gore ke bothata bjo bo apareditšego lefaseng ka moka.

Kuranta ya Brazil ya Jornal da Tarde, e bega ka nyakišišo yeo e bontšhitšego gore mathata a mantši a boitshwaro bja bafsa—a bjalo ka go ba bogale, go se laolege, go se dire gabotse sekolong le go se kgahlwe ke selo—a “bakwa ke go se be gona ga tate.” Puku ya Italy ya Gli imperfetti genitori (Batswadi ba sa Phethagalago), yeo e ngwadilwego ke Marcello Bernardi, e gatelela gore bana ba swanetše go ba le batswadi ba babedi e le gore ba gole gabotse.

Bophelo bja Lapa bo ka Kaonefatšwa

Gaešita le ge tate yo a sa išego felo ka lapa la gagwe a bile le karolo mathateng a lego gona ka gae goba e le yena mothopo wa mathata, se ga se bolele gore ditaba di ka se lokišwe ke moka bophelo bja lapa bja kaonefatšwa. Ka tsela efe? Tate o swanetše go dira’ng?

Go molaleng gore bana ba nyaka thulaganyo yeo e rulagantšwego gabotse ya lapa, ba nyaka go ikwa gore motho yo a tshwenyegilego ka katlego ya bona o laola dilo. Ge senyakwa seo se sa phethagatšwe, go etša ge go direga gantši matšatšing a lehono, maphelo a bana a kgomega ka tsela e šoro kudu. Lega go le bjalo, boemo bo ka kaonefala go sa šetšwe gore tate o tšea karolo goba go se bjalo. Beibele go Psalme 68:5 e re: “Ké Yêna tata-xo-dišuana . . . Ké Yêna Modimo; ó moaxong o mokxêthwa w’axwe.” *

Kamoo Thušo e ka Hwetšwago ka Gona

Taba ya gore thušo ya Modimo e bohlokwa bakeng sa go atlega le gore e ka hwetšwa, e hlatselwa ke boemo bjo bo hlalositšwego ke Lidia, mosetsana wa kua Poland yoo go boletšwego ka yena sehlogong se se fetilego. Bophelo bja lapa bo be bo le bjang lapeng la gabo? Lapa leo le ile la hwetša thušo ya Modimo bjang?

Tatago Lidia e lego Franciszek o dumela gore ge bana ba gagwe e be e sa le ba banyenyane, o be a se na taba le lapa la gagwe go etša ge morwedi’agwe a boletše. O re: “Ke be ke se na taba le gore bana ba rena ba be ba dira eng. Ke be ke sa ba bontšhe gore ke a ba rata, e bile go be go se na tlemagano magareng ga rena.” Ka gona o be a sa tsebe gore ge Lidia a be a e-na le nywaga e 14, yena le moratho wa gagwe wa mošemane le wa mosetsana ba be ba setše ba e-ya menyanyeng e sa laolegego, ba kgoga, ba e-nwa e bile ba nkgišetšana mahwafa le ba bangwe.

Mafelelong Franciszek o ile a thoma go lemoga mathata ao bana ba gagwe ba bego ba itsenya go ona, gomme o ile a nyama kudu moo a ilego a phetha ka gore a dire se sengwe ka taba yeo. O re: “Ke ile ka rapela Modimo gore a nthuše.” Se se makatšago ke gore kapejana ka morago ga moo Dihlatse tša Jehofa di ile tša mo etela legaeng la gagwe, gomme yena le mosadi wa gagwe ba ile ba dumela go ithuta Beibele. Mafelelong batswadi ba ile ba thoma go diriša seo ba ithutago sona maphelong a bona. Se se ile sa kgoma bana ba bona bjang?

Franciszek o a hlalosa: “Ba ile ba thoma go lemoga gore ke be ke kgaoditše go nwa bjala gomme ke thomile go ba tate yo kaone. Ba ile ba nyaka go tseba Dihlatse tša Jehofa gakaone. Le gona, ba ile ba  thoma go ithuta Beibele gomme ba tlogela go šika le bagwera ba babe.” Morwa’gwe e lego Rafal, ge a bolela ka tata’gwe o re: “Ke ile ka thoma go mo rata bjalo ka mogwera.” O oketša ka gore: “Gatee-tee sehlopha sa disenyi tša seterateng se ile sa thoma go se sa ba bohlokwa. Re be re swaregile ka dilo tša moya.”

Bjale Franciszek ke mogolo wa Mokriste phuthegong ya Dihlatse tša Jehofa, gomme o sa dutše a hlokometše lapa la gagwe le go gola moyeng ga yo mongwe le yo mongwe wa bona. Mosadi wa gagwe le Lidia ke babulamadibogo, baebangedi ba nako e tletšego. Rafal le kgaetšedi ya gagwe e nyenyane e lego Sylwia, ba tšea karolo ka pelo ka moka thutong ya Beibele, go neeng ditlhaloso dibokeng tša Bokriste le go boledišaneng le ba bangwe ka tumelo ya bona.

O Ile a Diriša Seo a Bego a se Ruta

Nagana gape ka seo se ilego sa diragalela Luis, tatago Macarena. Gopola gore Macarena ke mosetsana yola wa nywaga e 21 wa kua Sepania yoo a ilego a tsopolwa sehlogong sa mathomo. Tsela ya Luis ya bophelo e be e swana le ya tatagwe yo a bego a lemaletše bjala. Bjalo ka ge Macarena a boletše, tatagwe o be a timelela matšatši a mmalwa a sepetše le bagwera ba gagwe. Ka godimo ga moo, o be a swara mosadi wa gagwe bjalo ka mohlanka go e na le go mo swara bjalo ka molekane wa lenyalo yoo a tšeelwago godimo. Go be go šetše ganyenyane feela gore lenyalo la bona le senyege, gomme Macarena gotee le baratho ba gagwe ba banyenyane ba be ba gateletšegile o šoro.

Lega go le bjalo, ge nako e dutše e tšwela pele Luis o ile a dumela go ithuta Beibele le Dihlatse tša Jehofa. O a hlalosa: “Ke ile ka thoma go ipha nako ya go ba gotee le mosadi wa-ka le bana ba-ka. Re be re boledišana, re e-ja gotee e bile re ithuta Beibele gotee. Le gona, re be re thušana le ka mediro ya ka gae gomme re itapološa re le gotee.” Macarena o re: “Ke ile ka thoma go ikwa ke e-na le tate yo botho yoo a bego a bontšha kgahlego ya kgonthe lapeng la gagwe.”

Se se kgahlišago ke gore ga se feela gore Luis o ile a kgothaletša ba lapa la gagwe gore ba hlankele Modimo, eupša o ile a diriša seo a bego a se ruta. Macarena o hlalosa gore tatagwe o ile a tlogela “kgwebo e atlegago ka gobane e be e mo jela nako e ntši gomme o be a nyaka go ba le nako e oketšegilego bakeng sa merero ya lapa la gagwe.” Mafelelo a se e bile a mabotse kudu. Macarena o re: “Mohlala wa gagwe o ile wa nthuta kamoo nka bolokago leihlo le lokilego ka gona le go etiša dilo tša moya pele.” Bjale o hlankela e le mmulamadibogo gomme mmagwe le baratho ba gagwe ke ditho tše mafolofolo tša phuthego ya Bokriste.

Phetho ya Molaodi-mogolo wa Ditimeleng

Go molaleng gore bana ba nyaka tate yo a naganago ka katlego ya bana ba gagwe ge a dira diphetho. Morwa yo a lego mahlalagading wa Takeshi Tamura, e lego molaodi-mogolo wa Mojapane yoo go boletšwego ka yena sehlogong se se fetilego, o be a šika le bagwera ba boitshwaro bjo bobe gomme go be go bonagala gore o tlo tsena mathateng. Seo se diragetše ka 1986, e lego ngwaga woo ka ona Takeshi a ilego a dira phetho ya go tlogela maemo a boikarabelo bjo bogolo go Japanese National Railways. Bjale Takeshi o ikwa bjang ka phetho yeo a e dirilego nywageng e fetago e 18 ya go feta?

O sa tšwa go bolela gore: “Mohlomongwe ye ke phetho e phalago tšohle yeo nkilego ka e dira. Go fetša nako e ntši ke e-na le morwa’ka le go dira dilo re le gotee go akaretša le go ithuta Beibele le yena, go bile le mafelelo a kgahlišago. Re ile ra ba bagwera gomme o ile a tlogela bagwera ba babe le boitshwaro bjo bo sa kgahlišego.”

E be e šetše e le nywaga e mmalwa mosadi wa Takeshi e le Hlatse ya Jehofa, gomme boitshwaro bja gagwe bjo bo beago mohlala ke bjona bjo bo ilego bja tutuetša monna wa gagwe gore a hlahlobe Beibele le gore a thome go ipha nako e oketšegilego a dira dilo gotee le lapa la gagwe. Mafelelong yena, morwa’gwe le morwedi’agwe, ka moka ga bona e ile ya ba Dihlatse. Bjale Takeshi le morwa’gwe ba hlankela e le bagolo diphuthegong tša gabo bona tše sa swanego gomme mosadi wa gagwe le morwedi’agwe ke babulamadibogo.

 Bo-tate ba Nyaka Thušo

Le ge bo-tate ba bantši ba lemoga gore ba hlokomologile bana ba bona, ga ba tsebe gore ba ba direle eng. Kuranta ya Sepaniše e lego La Vanguardia e be e e-na le sehlogo se se rego “42 Lekgolong ya Batswadi ba [ma-Sepaniše] ba a Dumela Gore ga ba Tsebe go Godiša Bana ba Bona ba lego Mahlalagading.” Eupša go ka bolelwa se se swanago le tabeng ya bo-tate ba bana bao ba sa hlwago ba tsena mahlalagading gotee le ka bo-tatago bana ba banyenyane. Go fapana le tsela yeo batho ba bantši ba naganago ka yona, bana ba le bona ba nyaka gore bo-tatago bona e be batho ba ineetšego bakeng sa bona gomme ba iphe nako ya bona.

Re ka ithuta eng se sengwe mabapi le kamoo motho e ka bago tate yo botse? Ke bomang bao ba beago mehlala e mebotse kudu bakeng sa bo-tate gomme ke’ng seo se ka ithutwago go bona? Sehlogo sa rena sa mafelelo se tla ahla-ahla dipotšišo tše.

[Mongwalo wa ka tlase]

[Diswantšho go letlakala 23]

Bo-tate bao ba neilego bana ba bona seo ba bego ba se nyaka

Franciszek le lapa la gagwe

Luis le lapa la gagwe

Takeshi le lapa la gagwe