Selo se Sekaone go Feta Botumo

KA GE GO ANEGA CHARLES SINUTKO

Ka 1957, ke ile ka newa konteraka ya dibeke tše 13 ya go yo opela kua Las Vegas, Nevada, U.S.A., yeo e bego e lefa ditolara tše sekete ka beke, ka kgonagalo ya gore nka opela ka dibeke tše 50 tše di oketšegilego ge e ba dilo di sepetše gabotse. E be e tla ba tšhelete e oketšegilego e lekanago $50 000—tšhelete e ntši ka nako yeo. E re ke hlalose mabapi le seo se ilego sa dira gore ke holofetšwe modiro wo o lefago tšhelete e ntši kudu le seo se ilego sa dira gore go kgetha go o amogela goba go se o amogele go be thata ka tsela ye.

TATE yo e lego mo-Ukraine, o belegetšwe ka bohlabela bja Yuropa ka 1910. Ka 1913 mmagwe o ile a mo tliša United States, moo a ilego a kopana gape le monna wa gagwe. Tate o nyetše ka 1935, gomme nna ke belegwe ngwageng o latetšego kua Ambridge, Pennsylvania. Mo e ka bago ka yona nako yeo barwarre ba tate ba babedi ba bagolo e ile ya ba Dihlatse tša Jehofa.

Ge nna le bana bešo ba bararo re be re sa le ba banyenyane e bile lapa lešo le dula kgaufsi le New Castle, Pennsylvania, mma o ile a ithuta Beibele ka nako e kopana le Dihlatse. Ga go le o tee wa batswadi ba-ka yo a ilego a ba Hlatse ka nako yeo, eupša tate o be a dumela gore barwarragwe ba be ba e-na le tshwanelo ya go dumela seo ba bego ba nyaka go se dumela. Gaešita le ge tate a be a re godišitše ka moya wa gore re be barata-naga, ka dinako ka moka o be a emelela tshwanelo ya ba bangwe ya go rapela ka tsela yeo ba e ratago.

Modiro wa go Opela

Batswadi ba-ka ba be ba dumela gore ke na le bokgoni bja tlhago bja go opela, ka gona ba ile ba dira sohle seo ba bego ba ka se kgona gore ke tšwele pele. Ge ke be ke e-na le nywaga e tshela goba e šupa, tate o be a nkemiša godimo ga khaonthara ya nightclub gore ke opele ke be ke letše katara ya-ka. Ke be ke opela koša yeo e bitšwago “Mother” goba Mma. Mantšu a yona a be a thoma ka ditlhaka tša lentšu “mother.” Lentšu le lengwe le le lengwe le be le gatelelwa ka ge le be le dirišetšwa go hlalosa seka sa mma yo lerato. Koša e hlalosa dika tša mma yo lerato gomme e feleletša ka mantšu a segalo sa godimo ao a kgomago pelo. Banna ba lego pareng, bao gantši ba bego ba e-nwa kudu, ba be ba lla gomme ba tsenya tšhelete ka kefeng ya tate.

Ke bile le lenaneo la-ka la pele la radio kua New Castle seteišeneng sa radio sa WKST ka 1945, ke opela mmino wa country. Ka morago ke ile ka katološa bokgoni bja-ka ka go akaretša le dikoša tše di ratwago tše di tšwago go Hit Parade, yeo e bego e le lenaneo la beke le beke la radio leo le bego le bapala dikoša tše lesome tšeo di ratwago kudu tša bekeng yeo. Ke tšweletše la pele thelebišeneng ka 1950 lenaneong la Paul Whiteman. Koša yeo a e hlamilego lefsa ya George Gershwin ye e rego “Rhapsody in Blue” e sa dutše e tumile. Kapejana ka morago ga moo tate o ile a rekiša ntlo ya gešo ya kua Pennsylvania, gomme ra hudugela tikologong ya Los Angeles ya California ka kholofelo ya go tšwetša pele modiro wa-ka.

Ka baka la go phegelela ga tate, kapejana ke ile ka hwetša lenaneo la-ka ka noši la beke le beke la radio kua Pasadena gotee le lenaneo la thelebišene la metsotso e 30 kua Hollywood. Ke ile ka gatiša mmino khamphaning ya go gatiša ya Capitol Records le ditho tše 100 tša sehlopha sa mmino wa orchestra sa Ted Dale gomme ka ba ka ba seopedi seteišeneng sa radio sa CBS. Ka 1955, ke ile ka ba le pontšho ya mmino Letsheng la Tahoe ka leboa la California. Ge ke le moo, dilo tšeo di tlago pele bophelong bja-ka di ile tša fetoga kudu.

 Go Hlagolela Dilo tše Difsa Tšeo di Tlago Pele Bophelong

Mo e ka bago ka yona nako yeo, Ramogolo John—e lego mogolo’a tate yo a bego a bile a tlogile Pennsylvania a hudugetše California—o ile a nnea puku ye e bitšwago “Let God Be True.” * * Ke ile ka ya le yona Letsheng la Tahoe. Ka morago ga pontšho ya rena ya mafelelo yeo e fedilego ka matla-go-sa, ke ile ka thoma go bala puku ye gore ke fodiše hlogo pele nka ya malaong. Ke ile ka thabišwa ke go hwetša dikarabo tša Beibele dipotšišong tšeo ke bego ke dutše ke ipotšiša tšona ka nako e telele.

Kapejana ka morago ga moo ke be ke itulela lefelong la nightclub ka morago ga mošomo ke boledišana le batloša-bodutu-gotee le nna, gantši go ba go fihla diiring tša matla-go-sa. Re ile ra boledišana ka ditaba tše bjalo ka bophelo ka morago ga lehu, lebaka leo ka lona Modimo a dumelelago bokgopo le ge e ba batho mafelelong ba tla iphediša ka noši ba ba ba fediša le lefase le. Dikgweding tše sego kae ka morago, ka July 9, 1955, ke ile ka kolobetšwa kopanong ya selete ya Dihlatse tša Jehofa yeo e bego e swaretšwe Wrigley Field yeo e lego kua Los Angeles, e le go bontšha go ineela ga-ka go hlankeleng Jehofa Modimo.

Dikgweding tša ka tlase ga tše tshela ka morago, mesong ya Keresemose ya 1955, ke ile ka laletšwa ke Hlatse-gotee le nna e lego Henry Russell, gore ke ye le yena go yo etela Jack McCoy yo a bego a le kgwebong ya boithabišo. Henry ka boyena e be e le molaodi wa mmino wa khamphani ya NBC. Ge re fihla, Jack o ile a botša bana ba gagwe ba bararo le mosadi wa gagwe gore ba dule fase gomme ba re theetše, gaešita le ge ba be ba sa bula dimpho tša bona tša Keresemose. Go se go ye kae yena le ba lapa la gagwe ba ile ba ba Dihlatse.

Mo e ka bago ka yona nako ye ke ile ka ithuta le mma, gomme o be a tloga a kwešiša therešo ya Beibele. Mafelelong o ile a ba yo mongwe wa Dihlatse tša Jehofa a ba a ba mmulamadibogo, e lego moebangedi wa nako e tletšego. Ge nako e dutše e e-ya, barwarre ba-ka ba bararo le bona ba ile ba kolobetšwa gomme ba ba tirelong ya bobulamadibogo ka lebakanyana. Ka September 1956, ge ke be ke e-na le nywaga e 20, ke ile ka ba mmulamadibogo.

Phetho Mabapi le Mošomo

Mo e ka bago ka yona nako ye mogwera wa kgaufsi wa moemedi wa-ka e lego George Murphy, o ile a ba le kgahlego ya go ntšhušumeletša gore ke tšwele pele. George o be a ile a tšwelela difiliming tše dintši ka bo-1930 le bo-1940. Ka December 1956, ke ile ka tšwelela lenaneong la Jackie Gleason kua New York City go CBS-TV ka baka la batho bao Murphy a tlwaelanego le bona. Ye e be e le tlhohleletšo e kgolo modirong wa-ka, ka ge lenaneo le le be le e-na le babogedi ba bantši bao ba akanyetšwago go 20 000 000. Ge ke le New York, ke ile ka etela ntlong-kgolo ya lefase ya Dihlatse tša Jehofa kua Brooklyn ka lekga la pele.

Ka morago ga go tšwelela lenaneong la Gleason, ke ile ka saena konteraka ya nywaga e šupago bakeng sa go dira difilimi le khamphani ya go gatiša ya MGM. Ke ile ka newa karolo ya go ba mmapadi wa ka mehla lenaneong la TV leo le bontšhago bophelo bja ka bodikela. Lega go le bjalo, ka morago ga nakwana, letswalo la-ka le ile la thoma go ntshwenya, ka ge ke be ke tla bapala karolo ya mopetšhi le ya sekgwari sa go thunya—e lego dikarolo tšeo di bego di kgabiša boitshwaro bjo bo gobogilego le mekgwa e mengwe yeo e sego ya Bokriste. Ka gona ke ile ka tlogela. Bao ba lego kgwebong ya boithabišo ba ile ba nagana gore ke gapa tše tšhweu.

Se se re tliša tabeng ya modiro o lefago tšhelete e ntši wa go opela kua Las Vegas, woo ke boletšego ka wona mathomong. Ke be ke swanetše go thoma mošomo bekeng ya ketelo ya molebeledi wa rena wa mosepedi. Ge ke be nka se thome mošomo ka nako yeo, ke be ke tla lahlegelwa ke sebaka se ka mo go feletšego. Ke be ke hlakahlakane kudu maikwelong, ka ge tate a be a lebeletše pele gore ke dire tšhelete e ntši! Ke be ke nagana gore ke swanetše go mmušetša se itšego bakeng sa tšohle tšeo a di dirilego e le go tšwetša pele modiro wa-ka.

Ka gona ke ile ka ya go molebeledi wa rena yo a okamelago, e lego Carl Park, yo ka boyena e bego e le rammino e bile a kile a ba moletši wa violin seteišeneng sa radio sa New York sa WBBR ka bo-1920. Ke ile ka hlalosa gore ge ke be nka saena konteraka ye, ke be ke tla kgona go ba mmulamadibogo bophelo bja-ka ka moka ka ntle le go tshwenyega ka tša ditšhelete. Molebeledi o itše: “Nka se go botše seo o swanetšego go se dira, eupša nka go thuša go fihlelela phetho.” O ile a mpotšiša gore: “Na o be o tla sepela ge e ba moapostola Paulo a be a etetše phuthego ya gabo rena bekeng ye?” O ile a oketša ka gore: “O nagana gore Jesu o be a tla rata gore o dire’ng?”

Ke ile ka nagana gore seo se be se kwagala kudu. Ge ke be ke botša tate gore ke phethile ka go se yo šoma kua Las Vegas, o ile a bolela gore ke senya bophelo bja gagwe. Bošegong bjoo o ile a nkemela a swere sethunya se senyenyane. O be a ikemišeditše go mpolaya,  eupša o ile a swarwa ke boroko—mohlomongwe ka baka la ge a be a nwele kudu. Ka morago o ile a leka go ipolaya ka karatšheng ka sentšha-muši sa koloi. Ke ile ka bitša sehlopha sa bahlakodiši gomme se ile sa kgona go mo phafoša.

Ka ge ba bantši ka phuthegong ya gabo rena ba be ba tseba gore tate o bogale, ba be ba mmoifa, eupša molebeledi wa rena wa tikologo e lego Roy Dowell o be a sa mmoife. Ge Roy a be a e-ya go yo mmona, go ile gwa direga gore tate a mmotše gore ge ke be ke belegwa, go be go e-na le kgonagalo e kgolo ya gore ke be nka se phele. Tate o be a holofeditše Modimo gore ge nka phela, o be a tla nneela tirelong ya Gagwe. Roy o ile a mmotšiša ge e ba a be a kile a nagana gore Modimo a ka ba a letetše gore a phethe kholofetšo yeo ya gagwe. Seo se ile sa makatša tate. Ke moka Roy o ile a botšiša gore: “Ge e ba tirelo ya nako e tletšego e be e swanetše Morwa wa Modimo, ke ka baka la’ng e sa swanela morwa wa gago?” Ka morago ga moo tate o ile a bonagala a amogela kgetho ya-ka.

Go sa dutše go le bjalo, ka January 1957, Shirley Large o ile a tla a e-tšwa Canada a e-na le mmulamadibogo-gotee le yena ba tlilo etela bagwera ba bona. Nna le Shirley re ile ra tlwaelana ge ke be ke sepela le yena le mmulamadibogo-gotee le yena bodireding bja ntlo le ntlo. Kapejana ka morago ga moo, Shirley o ile a ya le nna Hollywood Bowl, moo ke ilego ka opela le Pearl Bailey.

Go Kgomarela Phetho

Ka September 1957, ke ile ka kgethwa go yo hlankela ke le mmulamadibogo yo a kgethegilego kua nageng ya Iowa. Ge ke be ke botša tate gore ke phethile ka go tšea kabelo ye, o ile a fo tsetsela. O be a sa kgone go kwešiša tsela ya-ka e mpsha ya go lebelela seo e bego e tloga e le sa bohlokwa. Ke ile ka ya Hollywood ka koloi gomme ka saenolla dikonteraka tša-ka ka moka. Moetapele yo a tumilego wa sehlopha sa orchestra le wa sehlopha sa mmino e lego Fred Waring o be a le gare ga bao ke bego ke saenne konteraka le bona. O ile a mpotša gore ke be nka se sa šoma gape ke le seopedi ge e ba ke be ke sa phethagatše tumelelano ya-ka. Ka gona ke ile ka hlalosa gore ke be ke tlogela mošomo wa-ka wa go opela bakeng sa go yo katološa bodiredi bja-ka tirelong ya Jehofa Modimo.

Mna. Waring o ile a theetša ka tlhompho ge ke be ke bolela ditaba ka botlalo, gomme ka morago o ile a mmakatša ka karabo ya gagwe e bonolo ya gore: “Morwa, ke nyamišwa ke go tlogela ga gago modiro wo o mobotse, eupša ke bile kgwebong ya mmino bophelo bja-ka ka moka gomme ke ithutile gore go na le dilo tša bohlokwa kudu bophelong go feta mmino. Eka Modimo a ka šegofatša seo o se dirago.” Ke sa dutše ke gopola ke boela gae ka koloi ke sekišitše megokgo ya lethabo, ke lemoga gore bjale ke lokologile go ka diriša bophelo bja-ka tirelong ya Jehofa.

“Tumelo ya Gago e Kae?”

Ke ile ka thoma go hlankela kua Strawberry Point, Iowa, toropo ya baagi ba 1 200, ke e-na le mmulamadibogo-gotee le nna e lego Joe Triff. Shirley o ile a nketela, gomme ra boledišana ka taba ya go nyalana. Ke be ke se na tšhelete pankeng, gomme le yena o be a se na yona. Tšhelete ka moka yeo ke bego ke e-na le yona e be e laolwa ke tate. Ka gona ke ile ka hlalosa gore: “Ke rata go nyalana le wena, eupša re tla iphediša bjang? Tšhelete feela yeo ke nago le yona ke ya bobulamadibogo bjo bo kgethegilego e lego $40 ka kgwedi.” Ka tsela ya gagwe e tlwaelegilego ya go bolela a iketlile, ka go lebanya le ka go tia, o itše: “Eupša, Charles, tumelo ya gago e kae? Jesu o boletše gore ge e ba re tsoma Mmušo pele le go loka ga gagwe, o tla re okeletša tšohle tšeo re di nyakago.” (Mateo 6:33) Seo se ile sa re thuša go dira phetho. Re ile ra nyalana ka November 16, 1957.

Ke be ke swara thuto ya Beibele le molemi yo mongwe ka ntle ga Strawberry Point yo a bego a e-na le mokutwana wa moelo wa dimithara tše 3,7 mahlakoreng ka moka, wo o agilwego ka dikota sethokgwaneng seo se lego lefelong la gagwe. O be o se na mohlagase goba tshepedišo ya meetse e bile o se na ntlwana ya boithomelo. Eupša ge e ba re be re nyaka, re be re ka dula moo ka ntle le tefo. E be e le mokutwana wa kgale, eupša re ile ra phetha ka gore re hlwa bodireding letšatši ka moka gomme re be re fo nyaka lefelo la go robala.

Ke be ke e-ga meetse sedibeng sa kgaufsi. Re be re ruthetša mokutwana ka setofo sa dikgong e bile re bala ka lebone la parafene gomme Shirley a apeela setofong sa parafene. Re be re hlapela ka pafong ya kgale. Re be re theetša diphiri ge di lla bošego gomme re ikwa re le mahlatse go dula gotee e bile re hlankela Jehofa  re le gotee moo go bego go nyakega badiredi ba Bakriste ba oketšegilego. Bill Malenfant le mosadi wa gagwe e lego Sandra, bao mo nakong ye ba hlankelago ntlong-kgolo ya lefase kua Brooklyn, e be e le babulamadibogo ba kgethegilego kua Decorah, Iowa yeo e lego bokgoleng bja dikhilomithara tše ka bago 100. Ba be ba fela ba e-tla gomme ba e-hlwa le rena tirelong ya tšhemo. Mafelelong, go ile gwa ba le phuthego e nyenyane ya ba ka bago 25 kua Strawberry Point.

Go Tsena Modirong wa Bosepedi

Ka May 1960 re ile ra laletšwa go tsenela modiro wa tikologo e lego bodiredi bja bosepedi. Tikologo ya rena ya pele e be e le ka Carolina Leboa, gomme e be e akaretša metse e megolo ya Raleigh, Greensboro le Durham, gotee le ditorotswana tše dintši tša magaeng. Maemo a rena a bophelo a ile a kaonefala, ka ge re be re dula le malapa a mantši ao a bego a e-na le mohlagase gaešita le dintlwana tša boithomelo tša ka ngwakong. Lega go le bjalo, seo se bego se sa leše di welago e be e le ditemošo tša bao ba bego ba e-na le dintlwana tša boithomelo tša ka ntle. Ba be ba re lemoša gore re hlokomele dipeetla le di-rattlesnake tšeo di lego tsejaneng ya go ya ntlwaneng!

Mathomong a 1963 re ile ra romelwa tikologong ya Florida, moo ke ilego ka swarwa ke bolwetši bjo šoro bja pericarditis gomme ka nyaka ke e-hwa. Mohlomongwe nkabe ke ile ka hwa ge nkabe e be e se ka Bob le Ginny Mackey ba kua Tampa. * Ba ile ba nkiša ngakeng ya bona gomme ba ba ba lefela ditshenyagalelo tša rena ka moka.

Kamoo ke Ilego ka Diriša Tlhahlo Yeo ke e Hweditšego Pejana Bophelong

Selemong sa 1963, ke ile ka laletšwa go yo šoma kua New York bakeng sa go thuša go rulaganyetša kopano e kgolo ya Dihlatse tša Jehofa yeo e bego e tla swarelwa moo. Ke ile ka sepela le Milton Henschel, yo e bego e le mmoleledi wa Dihlatse tša Jehofa, go ya lenaneong la poledišano la radiong leo le bego le swarwa ke Larry King. Mna. King e sa dutše e le motho yo a tumilego yo a swarago lenaneo la poledišano la thelebišeneng. O be a bontšha tlhompho kudu gomme ka nako e ka lekanago iri ka morago ga ge lenaneo le fedile o ile a botšiša dipotšišo tše dintši mabapi le modiro wa rena.

Selemong sona seo Harold King, e lego moromiwa yo a bego a sa tšwa go lokollwa kgolegong kua China ya Bokomanisi, e be e le moeng kua ntlong-kgolo ya lefase ya Dihlatse. Mantšiboeng a mangwe o ile a bolela le batheetši ba ka bago 700, a laodiša tše dingwe tša diphihlelo tša gagwe le go hlalosa kamoo go ba ga gagwe kgolegong ya bodula-noši ka nywaga e ka godimo ga e mene go ilego gwa matlafatša tumelo ya gagwe ka gona. Ge a le kgolegong o ile a ngwala dikopelo tšeo dihlogo tša tšona di tswalanago le Beibele le bodiredi bja Bokriste.

Mantšiboeng ao a sa lebalegego ke ile ka tlatša Audrey Knorr, Karl Klein le Fred Franz—yo e bilego Hlatse ka nako e telele yo a nago le lentšu le lebose la tenoro—go opeleng kopelo e rego “Ka Ntlo le Ntlo,” e lego kopelo yeo ka morago e ilego ya tsenywa ka pukung ya dikopelo yeo e dirišwago ke Dihlatse tša Jehofa. Nathan Knorr, yoo ka nako yeo a bego a etelela pele modiro wa Dihlatse, o ile a nkgopela gore ke e opele bekeng e latelago yeo Kopanong ya “Ditaba tše Dibotse tša Neng le Neng” kua Yankee Stadium, e lego seo ke ilego ka se dira.

Diphihlelo Modirong wa Bosepedi

Ge re be re hlankela kua Chicago, Illinois, go ile gwa direga dilo tše pedi tšeo di sa lebalegego. Sa pele ke gore kopanong ya tikologo Shirley o ile a bona Vera Stewart, yo a ilego a nea yena le mmagwe bohlatse kua Canada bogareng bja bo-1940. Shirley, yo a bego a e-na le nywaga e 11 ka nako yeo, o ile a thabišwa ke go kwa ka dikholofetšo tša Modimo tšeo di lego ka Beibeleng. O ile a botšiša Vera gore: “Na o nagana gore nka phela lefaseng leo le lefsa?” Vera o ile a araba ka gore: “Shirley, ga ke bone lebaka leo ka lona o ka palelwago.” Ga go le o tee wa bona yo a ilego a lebala mantšu ao go ya kamoo a bego a boletšwe ka gona. Go tloga ka lekga leo la pele le a gahlanego le Vera ka lona, Shirley o ile a tseba gore go hlankela Jehofa e be e le seo a nyakago go se dira.

 Sa bobedi, Hlatse e ile ya botšiša ge e ba ke gopola ke hwetša mokotla wa ditapola wa boima bja dikhilograma tše 22 mathuding a rena maregeng a 1958. Ka kgonthe ke ile ka o hwetša. Re o hweditše ka morago ga go katanela go fihla gae ledimong la lehlwa mantšiboeng a mangwe! Gaešita le ge re be re sa tsebe moo o tšwago gona, ka kgonthe re ile ra leboga Jehofa bakeng sa tokišetšo ye. Re ile ra dula ka mokutwaneng ka matšatši a mahlano ao lehlwa le bego le e-wa ka ona eupša ra thabela go ja di-pancake tša ditapola, ditapola tše di pakilwego, ditapola tše di gadikilwego, ditapola tše di kgotla-kgotlilwego le sopo ya ditapola! Re be re se na dijo tše dingwe. Hlatse e be e sa re tsebe goba go tseba moo re dulago gona, eupša e be e kwele gore go na le babulamadibogo ba bangwe kgaufsi bao ba bego ba phela ka thata. E boletše gore selo se sengwe se ile sa e tutueletša gore e thome go botšiša mabapi le moo banyalani ba bafsa ba bego ba dula gona. Balemi ba tseba dilo ka moka ka baagišani ba bona, ka gona kapejana o ile a bontšhwa tsela ya go ya mokutwaneng wa rena gomme a rwala ditapola a sepela lehlweng.

Go Thabela Dikgetho tše ke di Dirilego

Ka 1993, ka morago ga nywaga e 33 ke le modirong wa bosepedi, boemo bja-ka bja tša maphelo bo ile bja fokola go fihla bokgoleng bjoo ke ilego ka swanelwa ke go tlogela tokelo yeo ya tirelo. Nna le Shirley re ile ra ba babulamadibogo ba kgethegilego bao ba babjago, e lego seo re sa dutšego re se dira go fihla le lehono. Le ge ke nyamišwa ke gore ga ke sa na matla a go dira modiro wa bosepedi, ke thabela gore ke ile ka diriša matla a-ka ka tsela yeo ke a dirišitšego ka yona.

Barwarre ba-ka ba bararo ba ile ba dira dikgetho tše di fapanego. Mafelelong yo mongwe le yo mongwe wa bona o ile a ikemišetša go phegelela mahumo a dilo tše di bonagalago, gomme ga go le o tee wa bona yo a hlankelago Jehofa mo nakong ye. Ka 1958, tate o ile a kolobetšwa. Yena le mma ba ile ba thuša batho ba bantši gore ba tsebe Jehofa, ba neele maphelo a bona go Yena gomme ba kolobetšwe. Bobedi bja bona ba hwile ka 1999. Ka go rialo, phetho ya-ka ya go gana botumo bja lefase le mahumo a lona go bonagala e ile ya bolela bophelo go tate gotee le go ba bantši bao yena le mma ba ilego ba boledišana le bona ka therešo ya Beibele. Gantši ke ipotšiša gore, ‘Na nkabe ke ile ka tšwela pele ke hlankela Jehofa ge nkabe ke sa kgetha dilo tšeo ke di kgethilego?’

Nywageng e ka bago e mehlano ka morago ga go tlogela modiro wa tikologo, boemo bja-ka bja tša maphelo bo ile bja kaonefala, gomme ke ile ka kgona go katološa bodiredi bja-ka. Ga bjale ke hlankela ke le molebeledi yo a okamelago phuthegong ya Desert Hot Springs, California. Le gona, ke na le tokelo ya go emela ba bangwe legato modirong wa tikologo, go hlankela dikomiting tše di kgethegilego, gomme ka dinako tše dingwe le go ruta Sekolong sa Tirelo ya Bobulamadibogo.

Go fihla ga bjale Shirley e sa dutše e le mogwera wa-ka wa hlogo ya kgomo. Ga go na yo mongwe yo ke thabelago segwera sa gagwe go mo feta. Ka mehla re ba le dipoledišano tša moya tše di tutuetšago, gomme bobedi bja rena re thabišwa ke ditherešo tša Beibele tšeo re boledišanago ka tšona. Ke sa dutše ke gopola ka tebogo potšišo ya gagwe yeo a ilego a e botšiša a iketlile nywageng e 47 e fetilego ya gore, “Eupša, Charles, tumelo ya gago e kae?” Ge e ba banyalani ba bafsa ba Bakriste ba be ba ka botšišana potšišo e bjalo, ke ipotšiša gore ke ba bakae ba bona bao ba ka bago le lethabo le ditšhegofatšo tšeo re bilego le tšona bodireding bja nako e tletšego.

[Mengwalo ya ka tlase]

[Seswantšho go letlakala 16]

Ramogolo John ka 1935, ngwageng wo a kolobeditšwego ka wona

[Seswantšho go letlakala 17]

Mokutwana wa rena wo o agilwego ka dikota

[Seswantšho go letlakala 18]

Seswantšho sa 1975 sa batswadi ba-ka, bao ba ilego ba dula ba botega go fihlela lehung

[Seswantšho go letlakala 18]

Ke e-na le Shirley lehono