“Tše ka Moka o tlo di Bala Neng?”

Ka July 2001 monna yo mongwe kua Khabarovsk motseng wa ka Bohlabela bja Kgole bja Russia o ile a hwetša mokgobo wa ditokollo tše 34 tša Phafoga! bokgobapukung bja motseng. O ile a di tšea le go di saenela bokgobapukung gomme ge nako ya gore a di bušetše e be e fihla ka August, o be a sa nyake go kgaogana le tšona. Ka gona o ile a di saenela gape gomme a oketša nako go fihla ka September. O ile a rata dimakasine kudu mo e lego gore o ile a di saenela gape ka November, gotee le ditokollo tše dingwe tše tshelelago tše difsa.

Pele ga moo, ka mehla monna yo o be a phema dipuku tša bodumedi. Ke ka baka la’ng a ile a thoma go bala Phafoga!? O ngwadile gore: “Ke ka gobane ditaba tše dintši tšeo di lego ka makasineng wo di bolela ka mathata a tša leago ao a kgahlišago le ao a kgomago motho yo mongwe le yo mongwe.”

Monna yo o ile a tšwela pele ka gore: “Gantši go na le ditaba tše di rulagantšwego gabotse tšeo di bolelago ka ditoropo le dinaga tša mehleng yeno, gotee le go nea tsebišo ka ditšo tša batho ba bangwe.” Le gona, o ile a gogelwa ke dihlogo tšeo di bego di bolela ka batho bao ba ilego ba atlega bophelong, bao ba ilego ba kgomarela ditekanyetšo tša bona tša moya le go thuša ba bangwe go kgotlelela maemo a thata le dikotsi. Ke’ng seo a se naganago ka makasine? “Go ka bolelwa ka kgodišego gore Phafoga! ke dimakasine tša Time, Popular Science, le National Geographic di kopantšwe!”

Monna yo o ile a kgopela ditokollo tša kgale tša Phafoga! ka se-Russia go tloga ka tša 1995 go fihlela ka tša morago-rago bjale. Go okeletša go Phafoga! o ile a kgopela dipuku tše fapa-fapanego le diporoutšha tše di gatišitšwego ke Dihlatse tša Jehofa. O ngwadile gore: “O ka no botšiša gore, ‘Tše ka moka o tlo di bala neng?’” O ile a araba potšišo ya gagwe ka go bolela gore o na le nako ya go bala dilo tše di nago le tsebišo ya bohlokwa ka ge a sa fetše nako e ntši a bogetše thelebišene le go fetleka Internet.

Phafoga! e na le tsebišo e ntši mabapi le ditiragalo tša nakong ye re phelago go yona gomme e nea kwešišo e tseneletšego ya kamoo mathata a lehono a tlago go rarollwa ka gona. Ke ka baka la’ng o sa kgopele Dihlatse tša Jehofa go go tlišetša ditokollo tša morago-rago bjale tša Phafoga! kgwedi e nngwe le e nngwe?

[Seswantšho go letlakala 31]

Go Kwešiša Malwetši a go Feto-fetoga ga Maikwelo

[Seswantšho go letlakala 31]

Na o Tseba Modimo ka Leina

[Seswantšho go letlakala 31]

Tšhošetšo ya Nuclear—Ke ya Kgonthe Gakaaka’ng?

[Mothopo wa Seswantšho go letlakala 31]

Nuclear explosion: U.S. Department of Energy photograph