“Jehofa, O Nkhweditše!”

Ka ge go Anega Nelly Lenz

Ke ile ka botšiša banna ba bangwe ba babedi bao ba bego ba re etetše ka re: “Na le Dihlatse tša Jehofa?” Ba ile ba araba ka gore: “Ee.” Ke moka ka araba ka go akgofa ka re: “Le nna.” Ke be ke e-na le nywaga e 13 feela gomme ke sa ye dibokeng Holong ya Mmušo. Batswadi ba-ka e be e se Dihlatse tša Jehofa. Ke ka lebaka la’ng ke ile ka re ke yo mongwe wa tšona?

GE NKABE e se ka baka la Dihlatse tša Jehofa, mohlomongwe nkabe ke sa belegwa. Mma o ile a nkima ge a be a dula Montreal, kua Quebec, Canada. O be a e-na le nywaga e 17 feela. Lapa la gabo le ile la mo phegelela ka matla gore a ntšhe mpa. O ile a dumela.

Mma o ile a kgopela gore a fiwe letšatši mošomong bakeng sa go yo ntšha mpa. Go bonagala mothwadi wa gagwe yoo e bego e le yo mongwe wa Dihlatse tša Jehofa a ile a tseba lebaka leo ka lona mma a bego a nyaka go sepela mošomong. O ile a hlalosetša mma ka boripana kamoo mpho ya bophelo e lego bohlokwa ka gona. (Psalme 139:13-16) Ge a le tseleng e yago kliniking, mma o ile a naganišiša ka seo mothwadi wa gagwe a se boletšego. O ile a dira phetho ya go se sa ntšha mpa. Ka morago ga gore ke belegwe ka 1964, mma o ile a nkiša legaeng la ditšhiwana.

Go Kopana Ga-ka la Mathomo le Therešo ya Beibele

Ge ke be ke e-na le nywaga e ka bago e mebedi, mma le monna wa gagwe yoo a bego a sa tšwa go nyalana le yena ba ile ba nntšha legaeng la ditšhiwana. Ge re be re dula kua Sainte-Marguerite-du-Lac-Masson, ba ile ba thoma go ithuta Beibele le Dihlatse tša Jehofa gomme ba e-ya le dibokeng tša phuthego. Lega go le bjalo, go se go ye kae re ile ra hudugela Boisbriand gomme batswadi ba-ka ba ile ba se sa tšwela pele ba ithuta.

Ka morago ga nywaga e sego kae, ba ile ba thoma gape go ithuta Beibele. Ke be ke theetša e le gore ke kwe seo se bolelwago mabapi le kholofelo ya Beibele ya lefase la paradeise. (Luke 23:43) Ke ile ka thoma go rata Jehofa kudu.

Lega go le bjalo, ka letšatši le lengwe mma o ile a mpotša gore ga ba sa ithuta Beibele le Dihlatse le gore re ka se sa hlwa re e-ya Holong ya Mmušo. Mathomong ke be ke thabile. Ka ge ke be ke le ngwana wa nywaga e seswai, ka dinako tše dingwe ke be ke bona diboka di tšea nako e telele kudu. Lega go le bjalo, bošegong bjoo ke be ke nyaka go bolela le Jehofa ka thapelo, gomme ke tshwenyegile ka gore mohlomongwe a ka se ntheetše.

Thapameng ya Sontaga se se latelago, ke ile ka bona baagišani ba rena bao e bego e le Dihlatse tša Jehofa ba e-ya dibokeng Holong ya Mmušo. Ke ile ka thoma go lla gomme ka botšiša Modimo gore, “Ke ka baka la’ng bana ba bona ba e-ya dibokeng gomme nna ke sa ye?” Lega go le bjalo, mantšu a lego go Psalme 33:18 a be a tla itlhatsela e le a therešo: “Tsebang xore ’ihlô la Morêna le bôna ba ba mmoifaxo, ba ba letetšexo kxauxêlô ya xaxwe.”

Go ya Holong ya Mmušo Gape

Ka morago ga dibeke tše tharo, ke ile ka etela baagišani ba rena gomme ka botša mma wa gona e lego Lilianne gore ke nyaka go ya dibokeng. Lilianne o ile a ntlhalosetša gore seo se be se ka se kgonege ka ge mma a be a sa nyake go kwa selo ka Dihlatse tša Jehofa. Lega go le bjalo, ke ile ka gapeletša. Ka gona o ile a nkiša gae gomme a botšiša mma ge e ba nka sepela le bona. Seo se ilego sa mmakatša ke gore mma o ile a dumela. O ile a bolela gore diboka di tla nthuta mekgwa e mebotse. Ka gona, ke ile ka thoma go ya dibokeng Sontaga se sengwe le se sengwe.

 Ke ile ka kgona go ya dibokeng tša phuthego mo e ka bago ka nywaga e meraro. Eupša ge ke be ke e-ba le nywaga e 11, batswadi ba-ka ba ile ba hlalana gomme nna le mma ra huduga. Go ile gwa direga gape gore ke se sa kgona go ikgokaganya le Dihlatse tša Jehofa.

Tiragalo Yeo ke Bego ke sa e Letela

Ka letšatši le lengwe ge ke be ke dutše manamelong a ka pele a ntlo ya gešo, Dihlatse tše pedi—Eddie Besson le Don Fisher—di ile tša mpatamela gomme tša mpotšiša ge e ba batswadi ba-ka ba le gona. Ge ke ba botša gore ga ba gona, banna ba ile ba retologa gomme ba wela tsela. Eupša ke ile ka ba kitimela, gomme ra ba le poledišano yela ke boletšego ka yona matsenong.

Ga ke makale ge banna bao ba ile ba makala go nkwa ke ba botša gore le nna ke yo mongwe wa Dihlatse tša Jehofa. Ke ile ka ba hlalosetša boemo bja-ka gomme ka ba lopa gore ba boe gape mantšiboeng ao. Ge ke be ke botša mma gore Dihlatse di tlo boa di re etela, o ile a befelwa o šoro gomme a re a ka se di dumelele go tsena ka gae. Ge e le gabotse, o be a ikemišeditše go sepela pele di ka fihla. Ke ile ka lopa mma ke sekiša megokgo, ke mo rapela gore a se sepele. Ge a be a itokišeletša go tloga, go ile gwa kokotwa monyako gomme e be e le Eddie Besson. Anke o nagane kamoo ke ilego ka thaba ka gona ge mma a be a dumela thuto ya Beibele!

Ka gona ke be ke tla kgona go ya gape dibokeng tša phuthego! Lega go le bjalo, pele ngwaga o fela mma o ile a tlogela gape go ithuta Beibele. Mo nakong ye o ile a gana nnang gore ke kopane le Dihlatse ka tsela le ge e le efe, gomme o ile a lahla dipuku ka moka tša Dihlatse tša Jehofa tšeo a bego a ka di hwetša. Eupša ke ile ka kgona go uta Beibele, kopelo, dibolumo tše di tlemilwego tše pedi tša The Watchtower, dipuku tše pedi tša Yearbook of Jehovah’s Witnesses le puku e bitšwago Therešo e Išago Bophelong bjo bo sa Felego. * Thutong ya-ka ya mafelelo le Eddie Besson, ke ile ka mmotšiša gore nka dira eng, ka ge ke be ke rata Jehofa kudu. O ile a nkgothaletša go ithuta ke nnoši le gore ke rapele ka mehla. O ile a nkgonthišetša gore Jehofa o be a tla ntlhokomela. Ke be ke e-na le nywaga e ka bago e 14.

Go Itshwarela Seo ke se Bitšago Diboka

Go tloga nakong yeo go ya pele, Sontaga se sengwe le se sengwe ke be ke e-ya ka phapošing ya-ka gomme ke itšea o ka re ke dibokeng. Ke be ke opela kopelo e rego “Lebelelang Moputsong!” ge ke thoma diboka le ge ke di phetha ka gobane e be e le yona feela kopelo ya Mmušo yeo ke bego ke e gopola. Le lehono, ge ke opela kopelo ye ke a lla. Ke be ke ithuta gape sehlogo sa Morokami dibolumong tše di tlemilwego tšeo ke bego ke e-na le tšona. Ke be ke tswalela seo ke se bitšago seboka ka thapelo. Ka gona, gaešita le ge ke be ke se sa kopanela le Dihlatse, ke be ke e-kwa gore Jehofa o kgaufsi le nna.

Ka gona ge ke be ke e-ba le nywaga e 17, nna le mma re ile ra hudugela Montreal. Nywaga yeo e be e le thata kudu, ka ge gagešo go be go se na lerato.

O Ile a Nkhwetša!

Ka letšatši le lengwe mma o ile a amogela puku ya O ka Phela ka mo go sa Felego Paradeiseng mo Lefaseng go Dihlatse tša Jehofa. Ka gona ge ke fihla gae, ka e bona mo tafoleng gomme ka thoma go e lebelela. Ge ke lemoga gore e be e diriša leina la Modimo, Jehofa, ke ile ka thoma go lla gomme ka rapelela ka pelong ka re, “Jehofa, o nkhweditše!”

Ke be ke nyaka go ikgokaganya le bana bešo ba Bakriste gotee le dikgaetšedi. Eupša bjang? Mma o ile a mpotša gore mohlomongwe moagišani wa rena ke yo mongwe wa Dihlatse tša Jehofa. Ka gona, ge ke e-ya mošomong ke ile ka fapogela ntlong ya moagišani wa rena gomme ka kokota. Ke ile ka bulelwa monyako ke monna yo a bego a otsela. O ile a makala kudu ge ke mmotša gore ke yo mongwe wa Dihlatse tša Jehofa le gore ke be ke nyaka go kolobetšwa! O ile a bolela le kgaetšedi yo mongwe wa Mokriste yoo leina la gagwe e lego Josée Miron gore a ithute Beibele le nna. Eupša mma o ile a thoma gape go nthibela gore ke ithute Beibele. O ile a mpotša gore ke tla swanelwa ke go leta go ba go fihla ke e-ba le nywaga e 18 pele nka ba Hlatse.

Na ke be nka Tlogela Jehofa Bakeng sa go ba le Lapa le Lekaone?

Mothwadi wa-ka o ile a lemoga gore boemo kua gae bo be bo befela pele le go feta. Gantši o be a ntaletša go etela yena le mosadi wa gagwe mafelo-bekeng. Ka ge ke rata dipere, gantši re be re e-ya go di namela re le ka moka. Ke be ke ikwa eka ke batswadi ba-ka.

Ka letšatši le lengwe mothwadi wa-ka o ile a mpotša gore yena le mosadi wa gagwe ba nthata kudu le gore ba be ba nyaka gore ke tlo dula le bona. O be a mpha selo seo ke bego ke dutše ke se nyaka—lapa leo le  nago le lerato. Eupša go be go e-na le selo se sengwe seo ke bego ke swanetše go se dira—ke be ke swanetše go tlogela go sepela le Dihlatse tša Jehofa. Ba ile ba mpha beke gore ke naganišiše ka taba yeo ya go dula le bona, eupša ke be ke sa nyake le letšatši le letee gore ke nagane ka yona. Ke ile ka ba nea karabo ya-ka ka yona nako yeo. Jehofa o be a se a ka a ntahla le ka mohla gomme le nna ke be nka se mo lahle.

Go Hlankela Modimo

Ka baka la mathata ao ke bego ke thulana le ona kua gae, ke ile ka yo dula le tate wa-ka yo e sego wa madi. O ile a nkgothaletša gore ke tšwele pele ka go ithuta Beibele, gomme ke ile ka kolobetšwa ka December 17, 1983 ke e-na le nywaga e 19. Ke be ke thabile kudu go bona Eddie Besson letšatšing leo ke bego ke kolobetšwa ka lona. Bjale gona o be a sa belaele gore ke yo mongwe wa Dihlatse tša Jehofa!

Lega go le bjalo, tate o ile a fetoga ka morago ga gore ke kolobetšwe. Ka mehla ge a be a mpona ke rapela, o be a bolelela godimo kudu le go mphoša ka dilo! O ile a ba a gapeletša gore ke oketše thuto ya-ka ya sekolong ka tsela yeo e lego gore e be e tlo šitišana le pakane ya-ka ya go ba mmulamadibogo, moebangedi wa nako e tletšego. Mafelelong o ile a nthaka. O ile a mpha tšheke ya ditolara tše lekgolo tša Canada gomme a mpotša gore nakong yeo ke bego ke tla e tšhentšha, ke be ke tla tseba gore Jehofa e be e se yena yoo a ntlhokomelago.

Ke ile ka thoma go bula madibogo ka September 1, 1986, gomme ke na le yona tšheke yeo—e sa dutše e le bjalo go fihlela le lehono! Ka dinako tše dingwe go be go le thata go bula madibogo magaeng ke se na koloi. Eupša ditho tša phuthego ya gešo di be di nthekga kudu e bile di nthuša.

Ge nako e dutše e e-ya, ke ile ka kopana le monna yo botho wa Mokriste yoo leina la gagwe e lego Ruben Lenz. Re ile ra nyalana ka 1989. Ga bjale Ruben o hlankela e le mogolo wa phuthego ya Milton, kua Ontario, Canada moo re dutšego gona go tloga ka 2002. Lenyalo la rena ke e nngwe ya ditšhegofatšo tše dikgolo ka go fetišiša tšeo Jehofa a ntšhegofaditšego ka tšona. Ke ile ka tšwela pele ka tirelo ya nako e tletšego go fihlela re e-ba le ngwana wa rena wa leitšibolo ka 1993, e lego Erika. Ka moragonyana ga nywaga e fetago e meraro, re ile ra ba le morwa yoo leina la gagwe e lego Mika. Ka morago ga nywaga e mentši ke le tee, Jehofa Modimo o nkhumišitše ka go ntšhegofatša ka lapa leo le mo ratago go etša ge le nna ke mo rata.

Gaešita le ge nako le nako ke be ke aroganywa le batho ba Jehofa ge ke be ke sa gola, le ka mohla ga se ka tlogela go holofela Modimo le go dula ke holofela go phela ka mo go sa felego Paradeiseng. (Johane 3:36) Ke thabile kudu gakaakang gore Jehofa o “nkhweditše”!

[Mongwalo wa ka tlase]

[Seswantšho go letlakala 15]

Ke nametše pere ya mothwadi wa-ka

[Seswantšho go letlakala 15]

Nelly Lenz a e-na le monna wa gagwe Ruben, gotee le bana ba gagwe, Erika le Mika