Ke Sona Seo Bafsa ba Tlogago ba se Nyaka

Ka nywaga e mentši, babadi bao e lego bafsa gotee le batho ba bagolo ba be ba dutše ba bolela gore puku ya Dipotšišo tša Bafsa le Dikarabo tše Šomago e nea sona seo bafsa ba tlogago ba nyaka go se tseba. Ngwanenyana yo a lego nywageng ya gagwe ya magareng ya mahlalagadi yo a tšwago Sinaloa, Mexico, o ile a kgopelela bagwera ba gagwe dikopi tše lesome tša puku ye. O boletše gore gaešita le ge e se yo mongwe wa Dihlatse tša Jehofa, o tloga a ratile puku ye, a hlalosa gore: “Ke le hlompha kudu.”

O itše: “Ke na le bagwera ba bantši bao ba nago le dipotšišo tše dintši mabapi le maphelo a bona lehono. Ke ile ka ba bontšha puku ye gomme ba e ratile kudu. Puku ye ke e botse kudu gomme e na le selo se sengwe le se sengwe seo mofsa a ka ratago go se tseba.” O ile a kgopela gore ge go be go ka kgonega a romelwe dipuku pele ga ge dikolo di ka tswalelwa nakong ya maikhutšo a selemo.

Puku ya Dipotšišo tša Bafsa e na le dikgaolo tše 39. Tšona di akaretša tše rego: “Nka Dira Bjang Gore Batswadi Ba-ka ba Nnee Tokologo e Oketšegilego?” “Nka ba le Bagwera ba Kgonthe Bjang?” “Go Thwe’ng ka Kopano ya Botona le Botshadi Pele ga Lenyalo?” le “Ke tla Tseba Bjang ge e le Lerato la Kgonthe?” O ka kgopela kopi ya puku ye ya matlakala a 320 ka go tlatša setlankana seo se sepedišanago le sehlogo le go se romela atereseng yeo e bontšhitšwego mo setlankaneng goba atereseng e swanetšego e lokeleditšwego go letlakala 5 la makasine wo.

□ Hle ntlišetšeng kopi ya puku ya Dipotšišo tša Bafsa le Dikarabo tše Šomago.

Bontšha gore ka leleme lefe.

□ Hle ikopanyeng le nna mabapi le thuto e sa lefelelwego ya legae ya Beibele.