Pono ya Beibele

Re Swanetše go Swara Batšofadi Bjang?

KGWEDING yeo e ilego ya fiša ka go fetišiša ngwageng wa 2003, go ile gwa hwa batho ba dikete-kete Yuropa yohle ka baka la e nngwe ya diphišo tša go fiša tšhiri-tšhiri tšeo di kilego tša hlasela Kontinente yeo nywageng e 60 e fetilego. Bontši bja batho bao ba bego ba hwile e be e le batšofadi. Ba bangwe ba bona ba be ba tlogetšwe ke ba leloko bao ba bego ba ile maikhutšong. Go sa le bjalo, ba bangwe go thwe ba be ba hlokomologilwe goba ba sa elwe hloko ke bašomi ba dipetlele gotee le bašomi ba magaeng a batšofadi bao ba šomago ka thata kudu. Kuranta ya Le Parisien e begile gore kua Paris feela, ditopo tše 450 di ile tša se latwe ke ba leloko. Kuranta e ile ya botšiša mabapi le boemo bja bao ba ilego ba hwa ba le noši e bile ba sa tsebje ka gore: “Re phela maemong a mohuta mang moo re lebalago ka bo-tatago rena, bo-mmago rena, bo-rakgolo le bo-makgolo’a rena?”

Lefaseng leo palo ya batho ba nywaga ya ka godimo ga 65 e golago ka tsela e sa kago ya bonwa ka batho ba 795 000 kgwedi le kgwedi, go hlokomela dinyakwa tša batšofadi e šetše e le e nngwe ya dilo tše dikgolo kudu tšeo go kgomegilwego ka tšona. Nancy Gordon yo a šomago e le motlatši wa molaodi wa mananeo a tša koketšego ya batho Lekgotleng la go Bala Batho la United States o itše: “Palo ya batho ba tšofalago lefaseng ka bophara e oketšega ka tsela yeo e sa kago ya bonwa le ka mohla gomme ka moka ga rena re swanetše go ela hloko kamoo dinaga di arabelago ka gona mathateng a botšofadi.”

Mmopi wa rena le yena o kgahlegela batho ba godilego. Ge e le gabotse Lentšu la gagwe e lego Beibele, le re eletša kamoo re swanetšego go ba swara ka gona.

Go Hlompha Batšofadi

Molao wa Modimo wo o neilwego Moše, o be o kgothaletša gore go hlompšhe batšofadi. Molao o be o re: “Xe O lebana le hlôxô e pududu O êmê; sefahloxô sa mokxalabyê O se hlomphê.” (Lefitiko 19:32) Barapedi ba Modimo bao ba mo theetšago ba be ba letetšwe gore ba “êmê” ge ba e-na le batšofadi (1) e le pontšho ya gore ba hlompha motšofadi gomme (2) e le bohlatse bja gore barapedi ba boifa Modimo. Ka gona, batšofadi ba be ba swanetše go hlompšha gomme ba be ba swanetše go tšewa e le batho ba bohlokwa le ba nago le mohola.—Diema 16:31; 23:22.

Gaešita le ge Bakriste lehono ba se Molaong wa Moše, melao ya wona ya motheo e utolla dikgopolo tša Jehofa le seo se tlago pele go yena, gomme e bontšha gabotse gore o tšeela batšofadi godimo le gore o kgomegile ka bona. Melao ye ya motheo e be e kwešišwa ke ditho tša phuthego ya Bokriste ya lekgolong la pele la nywaga. Bohlatse bja pele bja seo bo ile bja begwa ka pukung ya Beibele ya Ditiro. Go Bakriste ba bego ba le Jerusalema nakong yeo, go be go e-na le ba bangwe bao e bego e le bahlologadi ba diilago. Ga go pelaelo gore ba mmalwa ba bona e be e le batšofadi. Baapostola ba ile ba kgetha banna ba šupago ba ba “tsebyaxo xore ba lokile” bakeng sa go kgonthišetša gore basadi ba ba be ba hwetša kabo ya dijo ka tsela e rulagantšwego gomme baapostola ba be ba lebelela tlhokomelo e bjalo e kgethegilego e le “modirô” wa phuthego.—Ditiro 6:1-7.

Moapostola Paulo ge a be a ngwalela phuthego ya Bokriste, o ile a diriša molao wa motheo wa gore go ‘emelelwe ge go kopanwa le hlogo pududu.’ O ile a botša molebeledi wa Mokriste yo mofsa, Timotheo gore: “Mokxalabyê O se kê wa mo kxalema ka thata. O mo eletšê byalo ka e ke ké tat’axo. . . . Bakxekolo O ba eletšê byalo ka e ke ké bô-mm’axo.” (1 Timotheo 5:1, 2) Le ge Timotheo o mofsa a be a na le tekanyo e itšego ya matla a taolo godimo ga batšofadi ba Bakriste, o be a boditšwe gore a se nyatše mokgalabje.  Go e na le moo, o be a swanetše go bolela le yena ka tlhompho bjalo ka tatagwe. Le gona, o be a swanetše go bontšha tlhompho e swanago go bakgekolo ka phuthegong. Ge e le gabotse, moapostola Paulo o be a kgothaletša Timotheo—go akaretša le ditho ka moka tša phuthego ya Bokriste—gore di ‘emelele ge di kopana le hlogo-pududu.’

Ke therešo gore batho bao ba boifago Modimo ga ba hloke melao ya gore ba swanetše go swara batšofadi ka seriti le gore ba ba hlomphe. Tšea mohlala wa ka Beibeleng wa Josefa, yoo a ilego a se tšhabe go diriša tšhelete bakeng sa go tliša tatagwe wa motšofadi Egipita, ka go dira bjalo a šireletša Jakobo wa nywaga e 130 tlaleng yeo e bego e apareditše. Eitše ge a bona tatagwe la mathomo ka morago ga nywaga e fetago e masome-pedi, Josefa a napa “a mo xokarêla a lla, a fetša lebaka à lla.” (Genesi 46:29) Josefa o ile a bontšha pono ya Modimo tabeng ya go swara batšofadi ka kwelobohloko le ka go ba hlompha ka mo go tseneletšego, gomme seo o se dirile kgale pele mokgwa wo o ka fetoga molao go ba-Isiraele.

Jesu le yena o be a tshwenyega ka batšofadi nakong ya bodiredi bja gagwe. O ile a sola baetapele ba bodumedi ka thata, bao ba bego ba nagana gore ga se phošo go hlokomologa batswadi ba bona ba tšofetšego e le gore ba kgotsofatše ditšo tša bona tša bodumedi. (Mateo 15:3-9) Jesu le yena o ile a hlokomela mmagwe ka lerato. Ge a dutše a ekwa bohloko bjo bo sa kgotlelegego koteng ya tlhokofatšo, o ile a kgonthišetša gore mmagwe wa motšofadi o be a tla hlokomelwa ke moapostola wa gagwe yo a bego a mo rata, Johane.—Johane 19:26, 27.

Modimo ga a Lahle Batho ba Gagwe ba Botegago

Mopsalme o ile a rapela a re: “Se ntahlê byale xe ke tšofala; O se ntloxêlê byale xe matla a-ka a fêlêla.” (Psalme 71:9) Modimo ga a ‘lahle’ bahlanka ba gagwe ba botegago gaešita le ge bona ka noši ba ka ipona ba se sa na mohola. Mopsalme ga se a ka a ikwa o ka re Jehofa o mo lahlile, go e na le moo o ile a lemoga kamoo go lego bohlokwa ka gona gore a ithekge ka Mmopi wa gagwe kudu ge a dutše a tšofala. Jehofa o arabela potegong e bjalo ya go se kwanantšhe ka go thekga motho bophelong bja gagwe ka moka. (Psalme 18:25) Gantši thekgo e bjalo e tla ka Bakriste-gotee le rena.

Ka baka la seo se boletšwego ka mo godimo, go kwagala gabotse gore bohle bao ba nyakago go hlompha Modimo ba swanetše go hlompha le batšofadi. Batšofadi e tloga e le batho ba bohlokwa mahlong a Mmopi wa rena. Ka ge re le dibopiwa tšeo di bopilwego ka seswantšho sa gagwe, eka ka mehla re ka itshwara ka tsela yeo e bontšhago go dumelelana le tsela yeo Modimo a lebelelago bo “hlôxô-pududu” ka yona.—Psalme 71:18.

[Seswantšho go letlakala 17]

Bakriste ba swara batšofadi ka kgodišo le tlhompho