Thušo le Tšhireletšo Bakeng sa Bafsa

GO KWEŠA bohloko ge ngwanenyana—yo e sa lego ngwana ka boyena—a ima eupša a sa nyalwa. Lega go le bjalo, go ima ga bafsa bao ba lego mahlalagading go apareditše gomme go kgoma motho yo mongwe le yo mongwe ka tsela e itšego. Masetlapelo a go ima ga bafsa bao ba lego mahlalagading ke feela bjo bongwe bja bohlatse bja go rereša ga taelo ya Modimo e rego: “Bootswa bo thšabeng-xê.”—1 Ba-Korinthe 6:18.

Gaešita le ge go le bjalo, nako le nako ngwanenyana yo monyenyane yo a rutilwego ditsela tša Modimo o kgetha go hlokomologa goba go gana seo a se tsebago. O ba le boitshwaro bjo bo gobogilego bja dikopano tša botona le botshadi gomme o ikhwetša a imile. Bakriste ba therešo ba arabela bjang? Ge mofsa yo bjalo yo a arogilego a bontšha bohlatse bja gore o a itshola, batswadi ba gagwe le ditho tše dingwe tša phuthego ya Bokriste ba swanetše go mo nea thušo le thekgo ka lerato.

Nagana gape ka Nicole. Batswadi ba gagwe ba be  ba mo godišetša gore e tle e be yo mongwe wa Dihlatse tša Jehofa. Ka gona go ile gwa ba bohloko kudu ge a be a ima a sa nyalwa. Lega go le bjalo, Nicole o gopola gore: “Bakriste-gotee le nna ba be ba e-tla ga gešo gomme ba leka go nkgothatša gore ke ithute Beibele le go dula ke le kgaufsi e Jehofa.”

Ga se gore Dihlatse tša Jehofa di amogela boitshwaro bjo bo gobogilego bja dikopano tša botona le botshadi. Eupša di a lemoga gore bafoši ba ka “mphsafala” ge ba diriša melao ya motheo ya Beibele. (Ba-Roma 12:2) Di na le tumelo e sa šišinyegego ya gore Modimo o lebalela bafoši. (Ba-Efeso 1:7) Le gona, di a lemoga gore gaešita le ge ngwana a ile a ingwa ka ntle ga lenyalo, ga se ngwana yo a dirilego phošo. Ka gona, go e na le go šišingwa ngwana yo bjalo, ditho tša phuthego ya Bokriste di mmontšha maikwelo a borutho, kwelobohloko le botho ka tsela e swanago le yeo ba bego ba tla dira ngwaneng yo mongwe le yo mongwe yo a lego gare ga bona.—Ba-Kolose 3:12.

Mma yo mongwe yo a se nago molekane o ile a thoma go ithuta Beibele le Dihlatse tša Jehofa. O ile a arabela kapejana molaetšeng wa Beibele gomme a dira diphetogo tše dikgolo bophelong bja gagwe. O boletše ka Dihlatse gore: “Ka moka di ile tša bontšha kgahlego ya kgonthe go nna le baneng ba-ka. Di ile tša mpha dijo le diaparo ge go be go nyakega gotee le go nthuša ka tša ditšhelete. Ge ke be ke swanelegela go tšea karolo bodireding bja tšhemo le Dihlatse tša Jehofa, di ile tša ntšhalela le bana. Di ile tša dira sohle seo di ka se kgonago go nthuša gore ke hlagolele lerato la kgonthe go Jehofa.”

Thibelo

Lega go le bjalo, go kaone kudu go thuša bafsa go phema mathata a bjalo di sa tloga fase. Ka baka leo, Dihlatse tša Jehofa di leka go dira gore tikologo ya lapa e be e borutho le e lerato bakeng sa bana ba tšona. Go e na le go fo ithekga ka ditšhošetšo—go godiša poifo ya AIDS goba gaešita le ya go ima—Dihlatse di leka go tsenya ganyenyane-ganyenyane ka go bafsa lerato la kgonthe la go rata Jehofa Modimo le melao ya gagwe. (Psalme 119:97) Di dumela gore bana ba swanetše go newa tsebišo e nepagetšego mabapi le dikopano tša botona le botshadi. Sa bohlokwa le go feta, di dumela gore go tloga boseeng bana ba swanetše go rutwa melao ya motheo ya boitshwaro yeo e neilwego ka Beibeleng. (2 Timotheo 3:15) Tlhahlo yeo e rulagantšwego gabotse e newa Diholong tša Mmušo tša Dihlatse tša Jehofa mafelong a fapa-fapanego. Lega go le bjalo, batswadi bao e lego Dihlatse ba bile ba kgothaletšwa go ithuta Beibele le bana ba bona ba lebišitše tlhokomelo go yo mongwe le yo mongwe wa bona. Dikgatišo tše bjalo ka puku ya Dipotšišo tša Bafsa le Dikarabo tše Šomago, di gatišeditšwe go thuša batswadi go nea bana ba bona tlhahlo ya boitshwaro. *

Go latela ditekanyetšo tšeo di tsepamego tša boitshwaro tša Beibele go thulana le lefula la boitshwaro bjo bo gobogilego leo le gogotšego lefase. Eupša ke tsela ya bophelo yeo e ka šireletšago banenyana ba banyenyane ba dimilione masetla-pelong ao a bakwago ke go ima ga bafsa bao ba lego mahlalagading.

[Mongwalo wa ka tlase]

[Seswantšho go letlakala 12]

Bakriste ba therešo ba swara bo-mma bao ba sa nyalwago ka botho le ka go bontšha go ba naganela