Ke Rutilwe go Rata Modimo go Tloga Bjaneng

KA GE GO ANEGA ANATOLY MELNIK

Ba bantši ba mpitša ka borutho ka gore rakgolo. Leina le le tsoša maikwelo a borutho a tseneletšego pelong ya-ka, ka gobane le nkgopotša rakgolo’a-ka yo ke bego ke mo rata ka mo go tseneletšego le yo ke mo kolotago tebogo kudu. Anke ke le anegele ka yena le kamoo yena le makgolo ba ilego ba kgoma ka mo go tseneletšego maphelo a ditho tša lapa la bona gotee le a ba bangwe ba bantši.

KE BELEGWETŠWE motsaneng wa Hlina, ka leboa la naga yeo lehono e bitšwago Moldova. * Nywageng ya bo-1920, badiredi ba basepedi bao ba bego ba tsebja e le basepedi ba bodumedi, ba ile ba tla tikologong ya rena e botse ya meboto ba e-tšwa ka mošola wa mollwane wa Romania. Gatee-tee batswadi ba mma ba ile ba amogela ditaba tše dibotse tšeo ba di kwelego di bolelwa go tšwa Beibeleng. Ka 1927 e ile ya ba Barutwana ba Beibele, ka ge Dihlatse tša Jehofa di be di bitšwa bjalo. Nakong ya ge Ntwa ya II ya Lefase e thoma ka 1939, go be go šetše go e-na le phuthego ya Dihlatse tša Jehofa motsaneng wa rena o monyenyane.

Ka 1936, ngwageng wo ke belegwego ka wona, metswalo ya-ka ka moka e be e le Dihlatse tša Jehofa, ntle le tate yo a bego a sa dutše a tsena Kereke ya Orthodox. Nakong ya ntwa ya bobedi ya lefase, o ile a thoma go naganišiša ka morero wa bophelo gomme mafelelong a ineela go Mmopi wa rena e lego Jehofa Modimo, gomme a bontšha se ka go kolobetšwa meetseng. Rakgolo o ile a bapala karolo e bohlokwa kudu kgolong ya moya ya lapa lešo. O be a rata Beibele ka pelo ya gagwe yohle gomme a tseba ditemana tše makgolo ka hlogo. O be a kgona go lebiša poledišano e nngwe le e nngwe Beibeleng.

Gantši ke be ke dula seropeng sa rakgolo gomme ke mo theetše ge a anega ditaba tša Beibele. O ile a bjala ka go nna lerato la go rata Modimo. Ke mo leboga gakaakang ka seo! Ge ke be ke e-na le nywaga e seswai, ke ile ka yo dira boboledi la mathomo le rakgolo. Re diriša Beibele, re ile ra bontšha baagišani gore Jehofa ke mang le ka moo ba ka batamelago kgaufsi le yena ka gona.

Go Gatelelwa ke Makomanisi

Ka 1947, mmušo o ile wa thoma go tlaiša Dihlatse tša Jehofa kua Moldova o hlohleletšwa ke molao wa Makomanisi le ke Kereke ya Orthodox. Ditho tša  mokgatlo wo ka morago o ilego wa bitšwa KGB gotee le maphodisa a lefelong, ba be ba e-tla legaeng lešo gomme ba re botšiše gore ke bomang bao ba etelelago pele modirong wa rena wa boboledi, gore dikgatišo tša rena di tšwa kae le gore re bokanela kae bakeng sa borapedi. Ba ile ba bolela gore ba be ba tlo emiša modiro wa Dihlatse tša Jehofa, tšeo ba boletšego gore “di šitiša tšwelopele ya Bokomanisi nageng.”

Ka nako ye, tate yo e bego e le monna yo a rutegilego kudu, le yena o be a thomile go rata therešo ya Beibele ka mo go tseneletšego. Yena gotee le rakgolo ba be ba tseba go araba batho bao ba bego ba ba botšiša dipotšišo ka tsela yeo e bego e dira gore ba se eke bana babo rena ba Bakriste le dikgaetšedi. Bobedi bja bona e be e le banna ba lerato le ba sebete bao ba bego ba tshwenyegile ka boiketlo bja barapedi-gotee le bona. Ka go swana le bona, ka mehla mma o be a dula a thekgile ditho le go iketla.

Ka 1948, tate o ile a golegwa gomme a tlošwa go rena. Ga se ra ka ra hlwa re sa tsebišwa ka melato yeo a e dirilego. O ile a ahlolelwa nywaga e šupa kgolegong ya tlhapetšo e phagamego gotee le nywaga e mebedi e oketšegilego a le bothopša. Mafelelong o ile a romelwa tikologong ya Magadan yeo e lego ka leboa-bohlabela la kgole la Russia, e lego dikhilomithara tše fetago 7 000 go tloga legaeng lešo. Re ile ra tšea nywaga e senyane re sa bonane. Go be go le boima go phela ntle le tate, eupša rakgolo e be e le thekgo ya kgonthe go nna.

Go Romelwa Bothopša

Bošegong bja June 6, 1949, mašole a mabedi le molaodi ba ile ba šwahlela legaeng lešo. Ba ile ba re botša gore re šaletšwe ke diiri tše pedi gore re tloge ngwakong gomme re tsene ka koloing ya bona. Ga ba ka ba re nea tlhaloso e oketšegilego. Ba ile ba fo re botša gore re ya bothopša gomme re ka se sa boa le ka mohla. Ka gona, ke ile ka romelwa Siberia gotee le mma, rakgolo, makgolo le badumedi-gotee le rena. Ke be ke e-na le nywaga e 13 feela. Ka morago ga dibeke tše mmalwa, re ile ra ikhwetša re le tikologong ya mohlaka wo o tshotshomago meetse, ka gare ga dithokgwa tšeo di sa tsenegego. Se se be se fapane gakaakang le tikologo yeo ke belegetšwego go yona, yeo ke bego ke e rata ka pelo ka moka! Ka dinako tše dingwe re be re lla. Lega go le bjalo, re be re kgodišegile gore Jehofa a ka se re lahle le ka mohla.

Motsana wo re bego re išitšwe go wona o be o e-na le mekutwana e lesome yeo e agilwego ka dikota. Dihlatse tše dingwe di ile tša išwa bothopša metsaneng e mengwe tikologong ye ya dithokgwa tša mohlaka o tshotshomago meetse. Bakeng sa go tšhoša badudi ba lefelong leo le go ba dira gore ba re kgetholle, babuši ba ile ba ba botša gore Dihlatse di be di e-ja batho. Lega go le bjalo, go se go ye kae, batho ba ile ba lemoga gore se e be e le maaka le gore go be go se na lebaka la go re boifa.

Dikgweding tše pedi tša mathomo ka morago ga ge re fihlile, re ile ra dula ka mokutwaneng wa kgale. Lega go le bjalo, re be re nyaka go aga lefelo le le swanetšego la bodulo pele ga ge go ka fihla marega a šoro. Rakgolo le makgolo ba ile ba thuša nna le mma go dira moago wa bodulo wa maemo a tlasana, wo seripa-gare se sengwe sa wona se bego se le ka godimo ga mobu gomme se sengwe se le ka tlase ga wona. Re ile ra dula moo lebaka la nywaga e fetago e meraro. Re be re sa dumelelwa go tloga motsaneng ntle le tumelelo gomme re be re sa ke re newa tumelelo.

Ge nako e dutše e e-ya, ke ile ka dumelelwa go tsena sekolo. Ka ge dipono tša-ka tša bodumedi di be di fapana le tša ba bangwe moo, gantši barutiši le barutwana-gotee le nna ba be ba mpotšiša dipotšišo. Mahlo a rakgolo a be a phadima ka lethabo ge ke be ke boa gae gomme ke mmotša kamoo ke ilego ka kgona go hlalosa ditumelo tša rena ka gona.

Tokologo e Lekanyeditšwego

Bophelo bja rena bo ile bja kaonefala go se nene ka morago ga lehu la Stalin wa mmuša-noši ka 1953. Re ile ra dumelelwa go tloga motsaneng. Se se ile sa dira gore re kgone go gwerana le badumedi-gotee le rena le go ba gona dibokeng metsaneng yeo go bego go e-na le Dihlatse tšeo e bego e le mathopša. Re be re bokana ka dihlopha tše nyenyane e le gore re pheme go ipiletša mahlo a batho. Re be re sepela dikhilomithara tše 30 gore re fihle moo, gomme ka dinako tše dingwe re be sepela lehlweng la go re fihla matolong dithempheretšheng tšeo di lego ka tlase ga tekanyo ya go tonya ka digrata tše 40. Letšatšing le le latelago, re be tšea leeto le letelele la go boela gae. Ge re le tseleng, re be re e-ja diphare tše nyenyane tšeo di bego di innwe ka gare ga  binika le makwate a mmalwa a swikiri. Lega go le bjalo, re be re thabile gakaakang, go swana le Dafida wa bogologolo!—Psalme 122:1.

Ka 1955, ke ile ka kolobetšwa e le pontšho ya boineelo bja-ka go Jehofa. Pejana ga moo, ge ke be ke le sebokeng sa phuthego motsaneng wa kgaufsi, ke ile ka gahlana le Lidiya, mosetsana wa meriri e meso yo a nago le boipoetšo. Ka go swana le rena, yena gotee le lapa labo e be e le Dihlatse tšeo di bego di tlile bothopša di e-tšwa Moldova. O be a e-na le lentšu le lebosana la go opela gomme a tseba mo e nyakilego e e-ba dikopelo tše 337 ka moka ka hlogo tšeo di bego di le ka pukung ya dikopelo yeo re bego re e diriša ka nako yeo. Se se ile sa nkgahla ka gobane le nna ke be ke tšeela godimo mmino wa rena le dikopelo. Re ile ra dira phetho ya go nyalana ka 1956.

Ke ile ka ngwalela tate—re be re kwele gore o be a išitšwe bothopša Magadan—gomme ra šuthišetša nako ya lenyalo la rena pele go fihlela re hwetša tšhegofatšo ya gagwe. Ka moragonyana ga moo, tate o ile a lokollwa gomme a kgona go tlo dula le rena mo re bego re dula gona re le mathopša. O ile a re botša kamoo Modimo a ilego a thuša yena le Bakriste-gotee le yena go phologa maemo a šoro dikampeng tša mošomo. Dipego tše bjalo di ile tša matlafatša tumelo ya rena.

Nakwana ka morago ga ge tate a boile, go ile gwa ba le kotsi e šoro ge mma a be a lokiša oli e nngwe yeo re bego re e tswaka le dipente le diphadimiši. Pitša e kgolo yeo e bego e-na le oli e belago e ile ya thenoga ka tsela e itšego gomme oli yeo e bego e le ka gare ya tšhela mma. O ile a hwela sepetlele. Re ile ra aparelwa ke manyami. Ka morago, manyami a tate a ile a fokotšega gomme ge nako e dutše e e-ya o ile a nyala Tatyana, Hlatse e tšwago motsaneng wa kgaufsi.

Go Katološa Bodiredi bja Rena

Ka 1958, nna le Lidiya re ile ra tloga motsaneng wo re bego re dula go wona wa Kizak, ra ya motsaneng o mogolwanyane wa Lebyaie, wo o lego bokgole bja dikhilomithara tše ka bago 100. Re be re badile gore Bakriste dinageng tše dingwe ba be ba bolela ka ntlo le ntlo. Ka gona, re ile ra leka go dira se lefelong la rena le lefsa. Ke therešo gore Morokami le Phafoga! di be di thibetšwe, eupša re be re amogela dikopi tšeo di bego di šwahlišitšwe go tšwa mafelong a mangwe. Re be tsebišitšwe gore bjale re tlo hwetša dimakasine ka leleme la se-Russia feela. Go ba go fihla ka nako yeo, re be re hwetša gape dikopi ka se-Moldovia. Ka gona re ile ra ithuta ka thata e le gore re ka kwešiša se-Russia gakaone. Le lehono ke sa dutše ke gopola dintlha tše dingwe tšeo di bego di le ka dikgatišong tšeo, e sego dihlogo feela.

Bakeng sa go itlhokomela, Lidiya o ile a šoma tšhilong ya mabele gomme nna ke be ke laolla dikota dikarikaneng. Mošomo o be o lapiša gomme meputso e le e menyenyane. Gaešita le ge Dihlatse di be di lebelelwa e le bašomi bao ba hlahlwago ke letswalo, re be re sa hwetše tšhelete ya thušo (di-benefit) goba diponase. Balaodi ba be ba bolela phatlalatša gore: “Dihlatse tša Jehofa ga di amogelege lekokong la Bokomanisi.” Lega go le bjalo, re ile ra thabišwa ke gore mantšu a Jesu mabapi le balatedi ba gagwe a be a phethagala boemong bja rena: “Bôná xa se ba lefase, byalo ka Nna kè se wa lefase.”—Johane 17:16.

Ditlhohlo tše Difsa

Ka 1959, morwedi wa rena Valentina o ile a belegwa. Ka moragonyana ga moo, go ile gwa thoma lefula le lefsa la tlaišo. The Encyclopædia Britannica e bolela gore: “Tona-kgolo Nikita Khrushchev o ile thoma lesolo la go lwantšha bodumedi ka 1959-64.” Ditho tša Madira a Tšhireletšo ya Naga di ile tša re botša gore pakane ya mmušo wa Soviet e be e le go fediša bodumedi ka moka, kudu-kudu Dihlatse tša Jehofa.

Ge Valentina a le kgaufsi le go fetša ngwaga, ke ile ka biletšwa go tša bohlabani. Ge ke be ke gana go ya, ke ile ka ahlolelwa go ya kgolegong nywaga e mehlano ka baka la go se tšee lehlakore. Nakong e nngwe ge Lidiya a be a nketetše, molaodi wa KGB o ile a mmotša gore: “Re amogetše tsebišo e tšwago Kremlin [Mmušo wa Russia] gore lebakeng la nywaga e mebedi ga go le o tee wa Dihlatse tša Jehofa yo a tla bego a šetše Soviet Union.” Ka morago o ile a lemoša ka gore: “O swanetše go latola tumelo ya gago, go sego bjalo o tla lahlelwa kgolegong.” Molaodi o be a nagana gore ditšhošetšo tše bjalo di be di tla homotša basadi ge a be a bolela gore: “Ke sehlopha se se fokolago.”

Ka nako e nyenyane feela, ke ge banna ba bantši ba  Dihlatse ba le kgolegong le dikampeng tša mošomo. Lega go le bjalo, basadi ba Bakriste ba nago le sebete ba ile ba tšwela pele ka modiro wa boboledi. Ba ile ba ipea kotsing e kgolo ge ba be ba šwahlišetša dikgatišo go bao ba bego ba le kgolegong le dikampeng tša mošomo. Lidiya o ile a lebeletšana le diteko tšeo gomme gape o be a fela a ferewa ke banna bao ba bego ba nyaka go ikhola ka go se be gona ga-ka gae. Go oketša moo, o ile a botšwa gore nka se tsoge ke lokolotšwe. Eupša ke ile ka lokollwa!

Go Lokollwa le go ya Kazakhstan

Molato wa-ka o ile wa bulwa gape ka 1963 gomme ka morago ka lokollwa—ka morago ga nywaga e meraro ke le kgolegong. Eupša go be go se na mo re ka kgonago go hwetša lengwalo la tumelelo ya madulo, ka gona ke ile ka palelwa ke go hwetša mošomo. Molao wa Naga o be o laela gore: “Ge e ba o se na lengwalo la tumelelo ya madulo o ka se hwetše mošomo.” Ka go rapela go tšwa pelong, re ile ra kgopela Jehofa gore a re thuše. Ke moka re ile ra phetha ka go hudugela Petropavl yeo e lego ka leboa la Kazakhstan. Lega go le bjalo, bahlankedi ba mmušo ba lefelong leo ba be ba šetše ba lemošitšwe ka rena gomme ba gana go re dumelela go dula goba go šoma moo. Dihlatse tše ka bago 50 motseng wo di ile tša lebeletšana le tlaišo e swanago.

Re ile ra hudugela go sobelela ka borwa torotswaneng ya Shchuchinsk, re e-na le banyalani ba bangwe ba Dihlatse. Go be go se na Dihlatse tše dingwe tšeo di bego di dula moo gomme bahlankedi ba mmušo ba be ba sa tsebe selo ka modiro wa rena wa boboledi. Nna le Ivan—banna ba babedi ba nyetšego—re ile ra nyakana le mošomo lebaka la beke mola basadi ba rena ba be ba dula boema-ditimela, mo re bego re robala gona bošego. Mafelelong re ile ra hwetša mošomo feketoring ya go dira digalase. Re ile ra hirela malapa a rena phapoši e nyenyane yeo e bego e lekana malao a mabedi le dilo tše dingwe tše dinyenyane, lega go le bjalo re be re kgotsofetše.

Nna le Ivan re ile ra šoma ka matla gomme bathwadi ba rena ba ile ba kgahlwa ke se kudu. Nakong ya ge ke be ke biletšwa tirelo ya tša bohlabani gape, molaodi wa feketori o be a šetše a lemogile gore letswalo la-ka leo le tlwaeditšwego ka Beibele le ka se ntumelele go yo tsenela tlwaetšo ya tša bohlabani. Ka mo go makatšago, o ile a ikgokaganya le molaodi wa madira gomme a mmotša gore nna le Ivan re be re e-na le bokgoni kudu mošomong le gore feketori e be e ka se kgone go tšwela pele e šoma ka ntle le rena. Ka gona re ile ra dumelelwa gore re dule.

Go Godiša Bana le go Hlankela ba Bangwe

Morwedi wa rena wa bobedi e lego Lilya o ile a belegwa ka 1966. Ka morago ga ngwaga re ile ra hudugela Belyye Vody, ka borwa bja Kazakhstan kgaufsi le mollwane wa Uzbekistan, moo go bego go e-na le sehlopha se senyenyane sa Dihlatse. Go se go ye kae go ile gwa hlangwa phuthego, gomme ke ile ka kgethwa go ba molebeledi yo a okamelago. Ka 1969, re ile ra ba le morwa e lego Oleg, gomme nywaga e mebedi ka morago ngwana wa rena yo monyenyane e lego Natasha o ile a belegwa. Nna le Lidiya le ka mohla ga se ra ka ra lebala gore bana ke bohwa bjo bo tšwago go Jehofa. (Psalme 127:3) Re ile ra boledišana ka seo re swanetšego go se dira e le gore re ba godiše gore ba rate Jehofa.

Gaešita le ka bo-1970, Dihlatse tše dintši tša banna di be di sa le dikampeng tša mošomo. Diphuthego tše dintši di be di nyaka go etelelwa pele le go hlahlwa ke banna ba gotšego ka tsebo. Ka gona, ge Lidiya a be a amogela boikarabelo bjo bo oketšegilego bja go godiša bana, ka dinako tše dingwe a šoma bjalo ka mma gotee le tate, ke ile ka hlankela ke le molebeledi wa mosepedi. Ke ile ka etela diphuthego kua Kazakhstan gotee le direpabliking tšeo di agišanego le yona tša Soviet e lego Tajikistan, Turkmenistan le Uzbekistan. Ka nako e swanago, gape ke be ke šoma bakeng sa gore ke hlokomele lapa, gomme Lidiya le bana ba ile ba ikemišetša go dirišana le nna.

Gaešita le ge ka dinako tše dingwe ke be ke sepela dibeke tše mmalwa, ke be ke leka go bontšha bana lerato la tate gomme ke ba thuša go gola moyeng. Nna le Lidiya re be re rapela gotee ka go tšwa pelong gore Jehofa a thuše bana ba rena, gomme re be re boledišana le bona mabapi le kamoo ba ka fenyago taba ya go boifa batho gomme ba hlagolele tswalano ya kgaufsi le Modimo. Ke be nka se kgone go phethagatša boikarabelo bja-ka ke le molebeledi wa mosepedi ge nkabe e be e se ka thekgo e se nago boithati ya mosadi wa-ka yo a rategago. Lidiya gotee le dikgaetšedi tše dingwe tša rena le ganyenyane e be e se “sehlopha se se fokolago” seo molaodi wa madira a bego a bolela gore ke sona. Ba be ba le matla—dinatla tša moya e le ka kgonthe!—Ba-Filipi 4:13.

Ge bana ka moka ba gotše, ke ile ka kgethwa go ba molebeledi wa mosepedi wa nako e tletšego ka 1988. Tikologo ya-ka e be e akaretša dinaga tše dintši tša Bogareng bja Asia. Ka morago ga ge modiro wa boboledi wa Dihlatse tša Jehofa o ngwadišitšwe ka molao dinageng tša yeo pele e bego e le Soviet Union ka 1991, banna ba bangwe bao ba gotšego moyeng bao ba nago le bokgoni ba ile ba thoma go hlankela direpabliki  tša Asia tša yeo pele e bego e le Soviet Union. Lehono go na le balebeledi ba basepedi ba 14 bao ba hlankelago dinageng tše, moo ngwagola batho ba ka godimo ga 50 000 ba bilego gona Segopotšong sa lehu la Kriste!

Taletšo e sa Letelwago

Mathomong a 1998, ke ile ka amogela mogala wo ke bego ke sa o letela go tšwa ofising ya lekala ya Dihlatse tša Jehofa kua Russia. Ke ile ka botšišwa gore: “Anatoly, na wena le Lidiya le ile la naganišiša ka tirelo ya nako e tletšego?” Go ba gona, re kile ra naganišiša ka tokelo e bjalo bakeng sa bana ba rena. Ge e le gabotse, morwa wa rena Oleg, o be a e-na le nywaga e mehlano a hlankela ofising ya lekala ya Russia.

Ge ke be ke botša Lidiya ka taletšo yeo re e hweditšego, o ile a botšiša gore: “Eupša go thwe’ng ka legae la rena, serapana sa rena le dilo tša rena?” Ka morago ga go rapela le go boledišana, re ile ra phetha ka go amogela kabelo. Mafelelong re ile ra laletšwa go yo hlankela lefelong la bodumedi la Dihlatse tša Jehofa kua Issyk, Kazakhstan, kgaufsi le motse o mogolo wa Alma-Ata. Mošomo wo o dirwago mo ke go fetolela dikgatišo tša rena tšeo di theilwego Beibeleng ka maleme a lefelong le ao a bolelwago tikologong ye ka moka.

Lapa la Rena Lehono

Re leboga Modimo gakaakang ka thušo yeo a re filego yona ya go ruta bana ba rena therešo ya Beibele! Morwedi wa rena yo mogolo e lego Valentina, o ile a nyalwa gomme a hudugela kua Ingelheim, Jeremane le monna wa gagwe ka 1993. Ba na le bana ba bararo, bao ka moka ga bona e lego Dihlatse tša Jehofa tše kolobeditšwego.

Morwedi wa rena wa bobedi e lego Lilya, le yena o na le lapa. Yena le monna wa gagwe yo e lego mogolo phuthegong ya Belyye Vody, ba godiša bana ba bona ba babedi gore ba rate Modimo. Oleg o ile a nyala Natasha, kgaetšedi wa Mokriste yo a tšwago Moscow, gomme ba hlankela gotee ofising ya lekala kua Russia kgaufsi le St. Petersburg. Morwedi wa rena yo monyenyane e lego Natasha o ile a nyalwa ka 1995, gomme yena le monna wa gagwe ba hlankela phuthegong ya se-Russia kua Jeremane.

Nako le nako re bokana gotee bakeng sa moletlo o mogolo wa go kopana gape re le lapa. Bana ba rena ba anegela bana ba bona kamoo “Mama” le “Papa” ba ilego ba theeletša Jehofa ka gona le go godiša bana ba bona gore ba rate Modimo wa therešo, Jehofa le go mo hlankela. Ke kgona go lemoga gore dipoledišano tše di thuša ditlogolo tša rena go gola moyeng. Setlogolo sa rena se senyenyane se na le dika tša go swana le tša-ka nakong ya ge ke be ke lekana le sona. Ka dinako tše dingwe se dula seropeng sa-ka gomme sa nkgopela gore ke se anegele taba ya Beibele. Mahlo a-ka a tlala megokgo ge ke gopola ka borutho dinako tšeo ke bego ke dula seropeng sa rakgolo le kamoo a ilego a nthuša ka gona gore ke rate Mmopi wa rena yo Mogolo le go mo hlankela.

[Mongwalo wa ka tlase]

[Seswantšho go letlakala 21]

Ke e-na le batswadi ba-ka ka ntle ga ngwako wa gešo kua Moldova pejana ga ge tate a ka golegwa

[Seswantšho go letlakala 22, 23]

Ke e-na le Lidiya ka 1959, re sa le bothopša

[Seswantšho go letlakala 23]

Lidiya le morwedi wa rena Valentina nakong ya ge ke be ke le kgolegong

[Seswantšho go letlakala 25]

Ke e-na le Lidiya lehono

[Seswantšho go letlakala 25]

Re e-na le bana ba rena le ditlogolo, ka moka re hlankela Jehofa!