AIDS e tla Fela Neng?

Bafsa ba hwetša melaetša ya dikopano tša botona le botshadi e sa le ba banyenyane, melaetša yeo e kgothaletšago go robala le batho ba go fapa-fapana. Go dirišwa ga dihlare-tagi tšeo di hlabelwago ka tšhwaana, e lego tsela e nngwe yeo ka yona HIV e fetetšwago, le gona go šetše go atile. Ge o ela hloko taba ya gore batho ba bantši lehono ba itshwara ka tsela yeo nkego ditiro tša bona di ka se be le ditla-morago, o ka ipotšiša ge e ba AIDS e tla ka ya fela.

DINGAKA di bontšha gabotse gore go fetola tsela ya boitshwaro ke mokgwa o bohlokwa bakeng sa go lwantšha AIDS. Pego yeo e gatišitšwego ke Centers for Disease Control and Prevention e re: “Moloko o mongwe le o mongwe wa bafsa o swanetše go dula o hwetša tsebo e tletšego ka tša maphelo, tsebo e ba thušago go ba le bokgoni bja go phela nako e telele ka go phema boitshwaro bjo bo ka dirago gore ba tsenwe ke HIV. Batswadi le barutiši ba swanetše go kgatha tema mananeong a bjalo a neago tsebo e tletšego.”

Go molaleng gore batswadi ba swanetše go ruta bana ba bona ka dikotsi tše pele ba ka forwa ke dithaka tša bona goba ke batho ba bangwe. Ga se ka mehla go lego bonolo go dira bjalo. Eupša go ka phološa bophelo bja ngwana wa gago. Go ruta bana ka dikopano tša botona le botshadi gotee le ka dihlare-tagi ga se gwa swanela go ba šilafatša boitshwarong. Ge e le gabotse go ka ba šireletša gore ba dule ba hlwekile boitshwarong.

Tlwaetšo ya Batswadi e Bohlokwa Kudu

Gare ga batho ba Modimo ba bogologolo, go be go letetšwe gore batswadi ba rute bana ba bona ka ga dikopano tša botona le botshadi le kamoo ba ka itšhireletšago ka gona malwetšing. Ka mo go kgahlišago, melao ya ba-Isiraele ba bogologolo e be e akaretša ditaelo tša boitshwaro tše di kwagalago gabotse gotee le mekgwa yeo e bego e ba šireletša malwetšing. (Lefitiko 18:22, 23; 19:29; Doiteronomio 23:12, 13) Batho ba be ba swanetše go rutwa melao ye bjang? Jehofa Modimo o ile a botša ba-Isiraele gore: “Mantšu a ke Xo laetšaxo lehono a a dulê a le pelong ya xaxo.” Batswadi ba be ba swanetše gore pele ba kwešiše mehola ya go kgomarela  melao ye le ditla-morago tša go palelwa ke go dira bjalo. Ka morago ga fao ba ile ba laelwa gore: “O a tiišetšê bana ba xaxo; O bolêle ôna Ò dutše ngwakong wa xaxo, le xe O le tseleng, xe O y’o rôbala le xe Ò tsoxa.”—Doiteronomio 6:6, 7.

Puku-ntšu e nngwe e hlalosa go ‘tiišetša’ e le “go ruta le go gatelela ka go boa-boeletša goba go lemoša.” Go molaleng gore nako e a akaretšwa. Batswadi bao ba iphago nako ya go ruta barwa le barwedi ba bona ka dikotsi tša go diriša dihlare-tagi gampe le tša dikopano tša botona le botshadi tše di gobogilego, ba na le kgonagalo e kgolo ya go bona bana ba bona ba phema mekgwa ya boitshwaro yeo e ka lebišago go fetelweng ke HIV le malwetši a mangwe. *

Khomotšo Bakeng sa Bao ba Tlaišwago ke HIV/AIDS

Maiteko a go thibela HIV/AIDS a ka no se homotše gakaalo batho ba dimilione bao e ba tlaišago. Ka ntle le go tlaišwa ke ditla-morago tšeo di bakwago ke bolwetši bjo ka bo bjona, batho ba bjalo gantši ba a nyefolwa gomme ba a kgethollwa ka baka la bolwetši bja bona. Ke ka baka la’ng go le bjalo? Taba e tlwaetšwego kudu e bile e le e fošagetšego ke ya gore go itswakanya le batho ba nago le bolwetši bjo go ka fetetša batho ba bangwe ka HIV. Ke taba e kwagalago ge batho ba boifa go tsenwa ke HIV/AIDS ka ge yona e fetelana e bile e bolaya. Batho ba bangwe ba dumeletše gore go boifa ga bona bolwetši bjo go ba dire gore ba tšhabe batho bao ba nago le bjona. Batho bao ba tlaišwago ke yona ba ile ba tingwa kalafo, ba rakwa kerekeng e bile ba hlaselwa o šoro.

Batho ba bangwe ba bile ba bolela gore AIDS ke tsela ya Modimo ya go otla batho ba kgopo. Ke therešo gore go kgomarela ditekanyetšo tša Beibele tabeng ya boitshwaro bjo bo hlwekilego bja dikopano tša botona le botshadi, go dirišwa ga dihlare-tagi le madi go ka be go thušitše balwetši ba bantši gore ba se tsenwe ke bolwetši bjo. (Ditiro 15:28, 29; 2 Ba-Korinthe 7:1) Lega go le bjalo, Mangwalo a laetša gore bolwetši ga se sešupo sa kotlo ya Modimo bakeng sa sebe se itšego. Go e na le moo, Beibele e re: “Modimo xa a lekwe ke bobe; ’me le Yêna xa a leke motho.” (Jakobo 1:13; Johane 9:1-3) Motho yo a swerwego ke HIV goba AIDS ka baka la ge a sa ka a kgomarela ditekanyetšo tša Mangwalo eupša a fetotše boitshwaro bja gagwe, a ka kgodišega gore Modimo ga se a mo furalela.

Kwelobohloko ya Modimo le lerato la gagwe bakeng sa batho ba babjago o šoro di ile tša bonagala ge Morwa wa gagwe Jesu a be a le lefaseng. Ge Jesu a gahlana le molephera leetong la gagwe, o ile “a mo kwêla bohloko, a iša seatla a mo swara.” Jesu o ile a diriša matla a gagwe a makatšago gomme a fodiša molephera. (Mareka 1:40-42) Jesu o be a sa nyatše batho ba bego ba babja. Lerato leo a bego a ba rata ka lona le be le bontšha ka botlalo lerato la Tatagwe wa legodimong.—Luka 10:22.

Kgaufsinyane AIDS e tla Alafša!

Diphodišo tša Jesu tša mohlolo ga di fo re tiišetša feela ka lerato la Modimo. Beibele e re botša gore ga bjale Jesu Kriste o buša e le Kgoši ya legodimong. (Kutollo 11:15) Bodiredi bja gagwe nakong ya ge a be a le mo lefaseng, bo ile bja bontšha gore o na le matla a go fodiša malwetši ka moka ao a swerego batho le gore o ikemišeditše go dira bjalo. Ke sona seo a tlago go se dira.

Boporofeta bja Beibele bo re tiišetša gore kgaufsinyana “xo ba ba axilexo fá xo ka se bê le e a rexo: Ke a babya!” (Jesaya 33:24) Go sa šetšwe go palelwa ga batho ke go fediša go ata ga AIDS goba go nea batho bohle bao e ba swerego kalafo e šomago, re ka kgodišega gore AIDS e tla fedišwa. Kgoši Dafida o itše: “Môya wa-ka, rêta Morêna! O se lebalê tše di botse tše a Xo diretšexo tšohle, A Xo lebalêla melato ya xaxo yohle; a Xo fodiša malwetši a xaxo ka moka.” (Mongwalo o sekamego ke wa rena.)—Psalme 103:2, 3.9.

Se se tla direga neng? Modimo o nyaka gore bao ba holofetšego go thabela ditšhegofatšo tše bjalo ba dire eng? Re go kgothaletša gore o ikgokaganye le Dihlatse tša Jehofa bakeng sa go ithuta mo go oketšegile ka dikholofetšo tše dibotse tša ka Beibeleng.

[Mongwalo wa ka tlase]

[Ntlhakgolo go letlakala 11]

Boporofeta bja Beibele bo re tiišetša gore kgaufsinyana “xo ba ba axilexo fá xo ka se bê le e a rexo: Ke a babya!”

[Seswantšho go letlakala 10]

Go ruta bana ba gago ka ga dikopano tša botona le botshadi gotee le ka go diriša dihlare-tagi gampe go ka ba šireletša

[Seswantšho go letlakala 10]

Bokgoni bja Jesu bja go fodiša gotee le go rata ga gagwe go dira bjalo di bontšhitše seo a tlago go se dira nakong e tlago