Ka Moka ga Rena re Nyaka Bagwera

“Mogwera ke motho yo o ka boledišanago le yena ka bolokologi ka selo le ge e le sefe, yo o ka mo leletšago mogala nako e nngwe le e nngwe.”—Yaël, kua Fora.

“Mogwera o a kwešiša ge o kwele bohloko gomme o ikwa ka tsela yeo o ikwago ka yona ka gare.”—Gaëlle, kua Fora.

“X O NA le moratwa-mmotexi [mogwera, NW.] mo-phala-ngwana weno.” (Diema 18:24) Ga e sa le mantšu ao a ngwalwa ka Beibeleng mo e ka bago nywaga e 3 000 e fetilego, batho ga se ba ka ba fetoga. Bogwera e sa le bja bohlokwa kudu go motho go fo swana le ge dijo le meetse di le bohlokwa mmeleng wa motho. Lega go le bjalo, go kgotsofatša senyakwa se sa motheo bakeng sa bogwera ke selo se thata go ba bantši. Bodutu bo tlwaelegile. Ka pukung ya bona ya In Search of Intimacy, Carin Rubenstein le Phillip Shaver ba bolela gore: “Ga go nyakege gore re lebelele kgole bakeng sa go bona tše dingwe tša dibaki.” Ba tsopola mabaka a bjalo ka “go ata ga go huduga”—batho bao ba fetolago mafelo a bodulo kgafetša-kgafetša—“metse yeo e dirago gore go be thata go kopana le batho, yeo e tletšego kudu ka bokebekwa” le “go tšeela bophelo bja setšhaba bja go bonana le batho legato ka go bogela thelebišene le dibidio.”

Le gona, bophelo bja sebjale-bjale bo re jela nako e bile bo fetša matla. Ka pukung ya gagwe e bitšwago Among Friends, Letty Pogrebin o ngwala gore: “Modudi wa toropong lehono o kopana le batho ba bantši kudu ka beke go feta bao modudi wa magaeng wa lekgolong la bo-17 la nywaga a bego a kopana le bona ka ngwaga goba a kopanego le bona bophelong bja gagwe ka moka. Ka ge go e-na le batho ba makgolo bao go nago le kgonagalo ya gore re ka tlwaelana le bona, go ka ba thata go lebiša tlhokomelo bathong ka o tee ka o tee ka mo go lekanego bakeng sa go ka godiša le go kgomarela bogwera bja kgaufsi kudu le bona.

Boemo bja tša leago bo fetoga ka lebelo kudu ešita le mafelong ao peleng bophelo bo bego bo sa kitime kudu. Ulla yo a dulago ka Bohlabela bja Yuropa o re: “Re be re batamelane kudu-kudu le bagwera ba rena. Lega go le bjalo, ba bantši ga bjale ba nwelela kudu mešomong ya bona goba dilong tša motho ka noši. Ka mehla yo mongwe le yo mongwe o swaregile gomme re kwa eka segwera sa rena sa kgale se fela ganyenyane-ganyenyane.” Mehleng ye ya bophelo bja go ya godimo le fase, bogwera bo ka bewa maemong a tlasana kudu.

Lega go le bjalo, go nyaka ga rena bagwera go dula go le matla. Bafsa ka mo go kgethegilego ba na le senyakwa se. Go etša ge Yaël yo a tsopotšwego mathomong a sehlogo se a hlalosa: “Ge o sa le mofsa, o nyaka go ikwa o amogelwa le go wela legorong le itšego, o nyaka go ikwa o le kgaufsi le motho yo mongwe.” Go sa šetšwe gore re bafsa goba batho ba bagolo, ka moka re nyaka bogwera bjo bo thabišago le bjo bo nago le morero. Le gona, go sa šetšwe ditlhohlo, go na le mo gontši mo re ka go dirago bakeng sa go ba le bagwera ba kgonthe le go ba kgomarela. Dihlogo tše di latelago di tla ahla-ahla gore re ka dira se bjang.