Kgoro ya Tsheko ya Yuropa e Thekga Ditshwanelo tša Mma

Ka mongwadi wa Phafoga! kua Fora

KA December 16, 2003, Kgoro ya tsheko ya Yuropa ya Ditshwanelo tša Batho yeo e lego Strasbourg kua Fora e ile ya bona dikgoro tša tsheko tša kua Fora molato ka go bontšha kgethollo ya bodumedi ge di be di ahlola taba ya Séraphine Palau-Martínez yoo e lego yo mongwe wa Dihlatse tša Jehofa.

Ka 1996, Séraphine o ile a hlalana le monna wa gagwe yoo a bego a e na le nywaga e mebedi a sa dule le yena. Séraphine o ile a newa tshwanelo ya go hlokomela bana ba bona ba babedi. Lega go le bjalo, ka 1997 nakong yeo bana ba bego ba e na le nywaga e ka bago e meraro le seripa ba dula le mmago bona, tatago bona o ile a gana go ba bušetša go mmago bona ge matšatši a bona a go mo etela a fedile. Séraphine o bolela gore: “Ge ke be ke tšea bana sekolong ke ba iša gae, hlogo ya sekolo e ile ya bitša maphodisa. Ke ile ka swanelwa ke go bona bana ba-ka maphodisa a le gona e le go kgonthišetša gore ga ke bolele le bona ka tumelo ya-ka. Go be go le bjalo ka ge e ka ke sekebekwa. Ke ile ka botšwa gore nka tšea bana ge feela nka saena lengwalo leo go lona ke tiišetšago gore nka se boledišane le bona ka Modimo goba ka Beibele goba ka ya le bona dibokeng tša Bokriste.”

Séraphine o ile a tsoma thušo ya dikgoro tša tsheko. Lega go le bjalo, ka 1998 Kgoro ya tsheko ya Boipiletšo ya Nîmes e ile ya nea tatago bana tshwanelo ya go ba hlokomela. E ile ya thekga phetho ya yona yeo e e dirilego ka go nyefola o šoro dithuto tša motheo tšeo e bego e dumela gore Dihlatse tša Jehofa di di ruta bana ba tšona. Séraphine o gopola gore: “Go be go kweša bohloko e le ruri go pharwa molato wa gore ke senya bana ba-ka, mola nna ke be ke leka go ba nea sohle seo ke bego ke nagana gore se tla ba hola kudu—go ba godiša ka tsela ya Bokriste.”

Ge Cour de Cassation, e lego kgoro-kgolo ya tsheko ya Fora ya boipiletšo e dumelelana le kgoro ya tsheko ya boipiletšo, Séraphine o ile a phetha ka go iša taba ye Kgorong ya tsheko ya Yuropa ya Ditshwanelo tša Batho. Gare ga diphetho tše tshela tšeo di thulanago le phetho e tee, kgoro ya tsheko e ile ya ahlola ka gore “Kgoro ya tsheko e kgodišegile gore kgoro ya tsheko ya boipiletšo ya Fora e tšere lehlakore magareng ga batswadi ya dira phetho e ithekgile ka bodumedi bja motho yo a tlišitšego molato. . . . Go dira dilo ka tsela e bjalo ke go kgetholla.” E ile ya phetha ka gore phetho e dirilwego ke kgoro ya tsheko ya Fora e be e sa thewa tabeng ya ge e ba Séraphine a be a e-na le bokgoni bja go hlokomela bana ba gagwe—e lego selo seo go sa kago gwa botšišwa ka sona le gatee—e bile phetho yeo e be e sa thewa bohlatseng bjo bo tiilego eupša e be e theilwe “ponong yeo batho ba nago le yona ka Dihlatse tša Jehofa.” Ka baka la kgethollo ye ya bodumedi le go se hlompšhe ga ditshwanelo tša Séraphine, Kgoro ya tsheko e ile ya laela Fora gore e mo lefe ditshenyagalelo e be e lefe le ditshenyagalelo tša kgoro ya tsheko.

Phetho ye e dumelelana le kahlolo yeo e ilego ya dirwa ke Kgoro ya Tsheko ya Yuropa ya Ditshwanelo tša batho ka June 1993 molatong o swanago le wo, moo Kgoro ya tsheko e ilego ya phetha ka gore Austria e kgethollotše Ingrid Hoffmann, e lego yo mongwe wa Dihlatse tša Jehofa ka baka la bodumedi bja gagwe. * Tsheka-tsheko ya semolao ya Fora e lego La Semaine juridique e begile gore: “Go swana le kahlolo ya Hoffmann, kahlolo ye e tiiša taba ya gore phetho yeo e dirwago tabeng ya taolo ya botswadi ga se ya swanela go dirwa go ithekgilwe ka bodumedi.” Ramolao wa Séraphine o boletše gore: “Phetho ye e bohlokwa kudu ka ge diphetho tša molao tšeo di hlomilwego ke kgoro ya tsheko di sa feto-fetoge ge go emelwa ditshwanelo tša batswadi bao e lego Dihlatse tša Jehofa kahlolong e se nago kgethollo.”

Ge Séraphine yoo bjale a dulago kua Sepania a botšišwa gore o ikwa bjang ka phetho e dirilwego, o ile a re: “Ke thabile kudu e bile ke imologile. Go bile bohloko kudu go tšeelwa bana ka baka la bodumedi bja-ka gomme ke sa kgone go ba bona ka nywaga e mehlano, eupša Jehofa o ile a dula a nthekga. Ke holofela gore kahlolo ye e tla thuša batho ba bangwe ba lego boemong bjo bo swanago le bja-ka.”

[Mongwalo wa ka tlase]

[Seswantšho go letlakala 18]

Séraphine