Pono ya Beibele

Na Tlhalo Ke Tharollo?

KUA Brithania moruti o amogela bao ba lego gona pokanong. Ka pele ga gagwe go eme banyalani, ba e-na le sehlopha sa bagwera ba bona ba kgaufsi kudu gotee le bana. Na ke monyanya o mongwe o thabišago wa lenyalo? Ga go bjalo le gatee! Pokano yeo ke ya go hlatsela go fedišwa ga lenyalo la bona. Ee, tlhalo e atile kudu moo e lego gore dikereke tše dingwe di thomile ditirelo tša tlhalo.

Na o nagana ka tlhalo? Ge e ba go le bjalo, na ruri go fedišwa ga lenyalo la lena go tla lebiša bophelong bjo bo thabišago? Na go na le megato e šomago yeo o ka e gatago bakeng sa go hwetša lethabo o e-na le molekane wa gago?

“Ba tlo ba Nama e tee”

Nakong ya ge batho ba babedi ba pele ba be ba nyadišwa, Modimo o ile a bolela gore monna ‘o swanetše go gomarela mosadi wa gagwe gomme ba swanetše go ba nama e tee.’ (Genesi 2:24) Ka gona, lenyalo e be e swanetše go ba tlemagano ya sa ruri. Ke ka baka leo Jesu ka morago a ilego a bolela gore ‘lebaka la bootswa’ ke lona motheo o nnoši wa tlhalo ya Mangwalo ka kgonagalo ya go tsena lenyalong gape.—Matthew 19:3-9. *

Se se gatelela go nyakega ga go itlama lenyalong. Eupša go thwe’ng ge e ba mathata lenyalong la lena e le a magolo kudu?

 Na Tlhalo ke Mogato o Bohlale?

Jesu o neile molao wa motheo woo ka wona re ka hlahlobišišago megato ya rena ge a be a re: “Bohlale bo hlatselwa go loka ke mediro ya bjona.” (Mateo 11:19, NW) Ke eng seo se bontšhwago ke mafelelo a ditlhalo tše dintši kudu tša mehleng yeno tšeo di se nago motheo o kwagalago?

Setsebi sa tša leago sa Yunibesithing ya Chicago e lego Moprofesara Linda Waite yo a ilego a etelela pele sehlopha sa baithuti bao ba nyakišišago ka manyalo ao a se nago lethabo, o re: “Mehola ya tlhalo e boleletšwe ka tsela e feteletšego.” Ka mo go swanago, ka morago ga go fetša nywaga e 11 a lekola dikarabelo tša batho ba dikete, Moprofesara Michael Argyle wa Oxford o hweditše gore “batho bao ba bego ba sa thaba setšhabeng e be e le bao ba hlalanego goba bao ba aroganego.” Ke ka baka la’ng go ka ba go le bjalo?

Le ge tlhalo e ka tloša mathata a itšego, gape e ka lokolla lelokelelo la ditiragalo tše di gateletšago tšeo o ka no se kgonego go di laola. Ka kgonthe, nyakišišo e bontšha gore tlhalo gantši ga e fokotše dika tša kgateletšego e kgolo goba go kaonefatša boitlhompho bja motho.

Gaešita le ge o se na “lenyalo le lekaone,” go kgomarela molekane wa gago go ka go tlišetša mehola. Ba bantši bao ba ikemišeditšego go dira bjalo ba hwetša lethabo. Moprofesara Waite o re: “Mathata a mantši a rarologa ge nako e dutše e e-ya gomme batho bao ba lego lenyalong ba bonagala e le ba thabilego kudu.” Ge e le gabotse, nyakišišo e nngwe e bontšha gore mo e nyakilego go ba batho ba 8 go ba 10 bao ba bego ba “tloga ba sa thaba” lenyalong la bona eupša ba ile ba phema tlhalo ba ikhweditše ba “le lenyalong le le thabilego” ka morago ga nywaga e mehlano. Gaešita le ge go e-na le mathata a magolo ka nako yeo, banyalani ba dira gabotse gore ba se ke ba akgofela go hlalana.

Megato e Šomago

Bao ba naganago ka tlhalo ba swanetše go ipotšiša ge e ba ditebelelo tša bona mabapi le lenyalo e le tša kgonthe. Mekero ya ditaba e godišitše taba ya go ba le tswalano ya lerato yeo e feleletšago ka lenyalo la mabonwa leo le feleletšago ka lethabo la ka mo go sa felego. Ka morago ga lenyalo, ge ditebelelo tše di phagamego di sa phethagale, manyami ao a bakwago ke seo a ka fehla kgohlano. Ge dikgohlano di dutše di gola, seo se feleletša ka boemo bjoo go bjona go kgopišega go laolago maikwelo. Lerato le a fela gomme ge nako e dutše e e-ya, le tšeelwa sebaka ke kgalefo le lehloyo. Ka tlase ga maemo a bjalo, ba bangwe ba ka nagana gore kgetho e nnoši e lego gona ke tlhalo.—Diema 13:12.

Go e na le go dumelela maikwelo a sa kgahlišego gore a kgome pono ya lena, gweranang le banyalani bao ba nago le boitlamo bja kgonthe lenyalong la bona. Bakriste ba kgothaletšwa gore ba ‘eletšane le go agišana.’ (1 Ba-Thesalonika 5:11) Ka kgonthe, bao manyalo a bona a nago le mathata ba nyaka kgothatšo e tšwago go badumedi-gotee le bona.

Bohlokwa bja Dika tša go Boifa Modimo

Moapostola Paulo o eleditše gore: “Aparang kxauxêlô le botho le boikokobetšô le bolêta le xo se fêle pelo.” (Ba-Kolose 3:12) Dika tša go boifa Modimo di ka šireletša botee bja lenyalo dinakong tša mathata.

Ka mohlala, Paulo o ngwadile gore: “Le fêlê Lè rwalana; Le lebalêlanê xe xo na le e a naxo le taba le e mongwê.” (Ba-Kolose 3:13) Setsebi sa tša monagano sa Yunibesithing ya Michigan e lego Christopher Peterson o re: “Tebalelo ke seka seo se tswalanywago kudu le lethabo.”

Botho, bonolo le tebalelo di lebiša leratong, e lego “tlêmô ya botlalô.” (Ba-Kolose 3:14) Ka ntle le pelaelo, ka nako e nngwe le kile la dula le thabile le ratana. Na le ka tsošološa lerato leo le kilego la ratana ka lona? Go sa šetšwe gore maemo a lena a ka ba a le thata gakaakang, tiang matla. Kholofelo e gona. Ruri, go kgomarelana le go diriša melao ya motheo ya Beibele go ka feleletša ka lethabo le legolo go feta kamoo le bego le nagana gore go ka kgonega. Ga go na pelaelo gore maiteko ao le a dirago tabeng ye a tla dira gore Jehofa Modimo—yena Mothomi wa lenyalo—a thabe.—Diema 15:20.

[Mongwalo wa ka tlase]