Bafsa ba a Botšiša. . .

Nka Lebeletšana Bjang ka Katlego le go Palelwa?

“Ke sa tšwa go hwetša dipoelo tša-ka gomme ke paletšwe gape dithutong tšona tšela tše nne. Ke lekile fela ke paletšwe gape.”—Lauren wa nywaga e 15.

“Go lebeletšana le go palelwa ke bothata e le ruri. Go bonolo go thoma go ba le pono e fošagetšego.”—Jessica, wa nywaga e 19.

GO PALELWA. O ka no se rate go nagana ka lentšu leo. Eupša ka moka ga rena re lebeletšana le go palelwa nako le nako. Go sa šetšwe gore re palelwa tlhahlobong ya sekolong, re hlabja ke dihlong ka baka la ditiro goba dipolelo tša rena, go nyamiša motho yoo re mo ratago goba go dira phošo e kgolo ya boitshwaro, go palelwa go ka nyamiša.

Ke therešo gore batho ka moka ba dira diphošo. Beibele e re: “Ba dirile dibe bohle, ba hlaya letaxô la Modimo.” (Ba-Roma 3:23) Lega go le bjalo, ba bangwe ba rena re hwetša go le thata go itsoša ge re wele. Mofsa yo a bitšwago Jason o bea taba ka tsela ye: “Ke ipona diphošo kudu. Ge e ba ke dira phošo batho ba ka no sega—eupša gantši ba lebala ka seo. Nna ga ke lebale gomme ke dula ke nagana ka phošo yeo ke e dirilego.”

Go naganišiša ka diphošo tšeo re di dirilego ga se selo se sebe gakaalo—kudu-kudu ge e ba go dira bjalo go go tutueletša go kaonefatša. Lega go le bjalo, go inyatša o sa kgaotše le gona ka nako e telele go kotsi e bile go bušetša morago. Diema 12:25 (PK) e re: “Manyami a pelo a imeletša motho fase.”

Nagana ka monna wa ka Beibeleng yo a bitšwago Epaforodito. O ile a romelwa Roma go yo ba mothuši wa moapostola Paulo. Lega go le bjalo, Epaforodito o ile a babja gomme a palelwa ke go phethagatša kabelo yeo. Ge e le gabotse Paulo o ile a feleletša a mo hlokomela! Paulo o ile a rulaganyetša go romela Epaforodito gae, a botša phuthego gore monna yo wa go botega o be a bile a gateletšegile o šoro. Ke ka baka la’ng go le bjalo? Paulo o ile a hlalosa gore: “Le kwile xore ó a babya.” (Ba-Filipi 2:25, 26) Mohlomongwe Epaforodito o ile a bona a paletšwe ge a lemoga gore ba bangwe ba be ba tseba gore o a babja e bile ga se a kgona go dira mediro ya gagwe. Ga go makatše ge a ile a gateletšega o šoro!

Na go na le tsela le ge e ka ba efe yeo motho a ka phemago go kwa bohloko ka baka la ge a paletšwe?

Lemoga Mafokodi a Gago

Tsela e nngwe yeo ka yona o ka fokotšago dikgonagalo tša go palelwa ke ka go ipeela dipakane tše di fihlelegago, tše itekanetšego. Beibele e re: “Bohlale bo go ba ba ipoetšago.” (Diema 11:2, PK; 16:18) E bile motho yo a ipoeditšego o tseba mafokodi a gagwe. Ke therešo gore ka dinako tše dingwe go botse go iteka bakeng sa go kaonefatša bokgoni bja gago. Eupša o se ke wa ikimetša. O ka no ba o sa kgone dipalo ka tsela yeo goba wa se be le bokgoni bjalo ka ramabelo yo a tumilego. Lesogana le le bitšwago Michael le a dumela gore: “Ke a tseba gore ga ke kgone dipapading. Ka gona, ke a bapala eupša ga ke ipee boemong bjo go bjona ke  tlago go palelwa.” O a hlalosa: “O swanetše go ipeela dipakane tšeo o ka kgonago go di fihlelela.”

Nagana ka boemo bja kgopolo bja Yvonne wa nywaga e 14 yo a tlaišwago ke bolwetši bja spina bifida le bja go gobala ga bjoko. Yvonne o re: “Ga ke kgone go sepela goba go tantsha goba go kitima bjalo ka batho ba bangwe. Go tseba gore ga ke kgone go dira dilo tšeo batho ba bangwe ba di dirago go a nnyamiša. Ge e le gabotse batho ba bantši ga ba kwešiše. Eupša ke kgona go lebeletšana le boemo bjoo.” O eletša ka go re’ng? “O se langwe. Tšwela pele o leka. Ge e ba o palelwa goba o sa kgotsofale, o se ke wa ineela. E fo tšwela pele o dira seo o ka se kgonago.”

E bile o se ke wa itlaiša ka go ipapetša le batho ba bangwe. Andrew wa nywaga e 15 o re: “Ke leka go se ipapetše le motho yo mongwe ka gobane ka moka ga rena re na le bokgoni bja go se swane.” Seo Andrew a se bolelago se dumelelana le mantšu a Beibele a lego go Ba-Galatia 6:4 a rego: “Motho a a šetšê modirô wa xaxwe; ké mo a tl’o xo rêtwa ka tša xaxwe, e sexo ka tša e mongwê.”

Ge Batho ba Letetše mo go Ntši go Wena

Lega go le bjalo, ka dinako tše dingwe batho ba letetše mo go ntši go wena—batswadi, barutiši le batho ba bangwe. Ka gona o lemoga gore go sa šetšwe gore o leka gakaakang, ga o kgone go ba kgahliša. Selo se sengwe seo se nyamišago le go feta ke gore batho bao ba ka go botša kamoo o ba nyamišitšego ka gona ka mantšu a kwešago bohloko goba a nyamišago. (Jobo 19:2) Mohlomongwe o lemoga gore batswadi ba gago le batho ba bangwe ga ba go kweše bohloko ka boomo. Go etša ge Jessica a lemoga, “gantši ga ba lemoge le gatee kamoo ba go kgomago ka gona. Ka dinako tše dingwe e fo ba go se kwešišane.”

Ka lehlakoreng le lengwe, na mohlomongwe ba bona selo seo wena o sa se bonego? Ka mohlala, mohlomongwe ga o iteke gakaalo e bile o a inyatša. Go e na le gore o furalele dikeletšo tša bona, o tla ba o dira gabotse ge o ‘amogela tayo.’ (Diema 8:33, bapiša le PK.) Michael o a hlalosa: “E hola wena. Ba nyaka gore o kaonefatše. Tšea seo e le tlhohlo.”

Lega go le bjalo, go thwe’ng ge e ba o nagana gore seo batswadi ba gago le batho ba bangwe ba se letetšego go wena se ka godimo ga matla a gago—o nagana gore ba go bea boemong bjo go bjona o tlago go palelwa? Ka gona-ge e tla ba bohlale gore o boledišane le bona ka tlhompho eupša o sa dika-dike gomme o ba tsebiše kamoo o ikwago ka gona. Ka moka ga lena le ka kgona go bea dipakane tše di ka fihlelegago.

Ge o Nagana Gore o Palelwa Dilong tša Moya

Gare ga Dihlatse tša Jehofa, bafsa ba na le modiro o thata wa go phethagatša dikabelo tša bona bjalo ka badiredi ba Modimo. (2 Timotheo 4:5) Ge e ba o mofsa wa Mokriste, go ka direga gore ka dinako tše dingwe o ikwe o sa dire gabotse. Mohlomongwe o nagana gore ga o dire gabotse tabeng ya go nea ditlhaloso dibokeng. Goba mohlomongwe o thatafalelwa ke go hlalosetša batho ba bangwe molaetša wa Beibele. Ka mohlala, Jessica o be a ithuta Beibele le mosetsana yo mongwe yo a lego mahlalagading. Morutwana yo wa gagwe wa Beibele o ile a tšwela pele gabotse ka nakwana. Lega go le bjalo, se se nyamišago ke gore gatee-tee mosetsana yo o ile a phetha ka gore ga a nyake go hlankela Modimo. Jessica o gopola gore: “Ke ile ka kwa ke paletšwe.”

Jessica o ile a lebeletšana bjang le maikwelo ao? Sa pele o ile a swanelwa ke gore a lemoge gore morutwana wa gagwe o be a ganne Modimo e sego  yena. O ile a thušwa gape le ka gore a naganišiše ka mohlala wa ka Beibeleng wa Petro, monna yo a boifago Modimo yoo a bego a e-na le mafokodi a mantši. O hlalosa gore: “Beibele e bontšha gore Petro o ile a fenya mafokodi a gagwe gomme o ile a dirišwa ke Jehofa ka ditsela tše dintši go tšwetšeng pele dikgahlego tša Mmušo.” (Luka 22:31-34, 60-62) Go ba gona, ge e ba bokgoni bja gago bjalo ka morutiši bo nyaka go kaonefatšwa, ke ka baka la’ng o sa katane ka matla gore o kaonefatše? (1 Timotheo 4:13) Nyaka thušo ya batho ba ba gotšego tsebong ka phuthegong bao ba ka go thušago gomme ba go tlwaetša.

Lega go le bjalo, mohlomongwe o bona go le thata go dira modiro wa ntlo le ntlo. Jason o dumela gore: “Nako le nako ge ke rakwa ke bona eka ke paletšwe.” O lebeletšana bjang le bothata bjo? “Ke swanelwa ke go gopola gore ge e le gabotse ga se ka palelwa.” Ee, o kgonne go dira seo Modimo a mo laetšego go se dira—go bolela ditaba tše dibotse! Gaešita le ge go rakwa go babiša pelo, ga se batho ka moka bao ba tla ganago go kwa molaetša wa Beibele. Jason o re: “Ge ke hwetša motho yo a theetšago, gona ke a tseba gore se se swanelwa ke maiteko.”

Diphošo tše Kgolo

Go thweng ge e ba o dira phošo e kgolo goba gona go dira sebe se segolo? Ana wa nywaga e 19 o ile a dira phošo e bjalo. * O dumela gore: “Ke ile ka nyamiša phuthego, lapa lešo, le gona kudu-kudu Jehofa Modimo.” Bakeng sa gore o boele sekeng, o swanetše go itshola gomme o tsome thušo ya banna ba phuthego ba gotšego moyeng. (Jakobo 5:14-16) Ana ge a gopola mantšu a mogolo yo mongwe ao a mo thušitšego o re: “O ile a bolela gore go sa šetšwe diphošo tšeo Kgoši Dafida a di dirilego, Jehofa o be a ikemišeditše go mo swarela gomme Dafida o ile a boela sekeng. Seo se ile sa nthuša.” (2 Samuele 12:9, 13; Psalme 32:5) Le wena o swanetše go dira sohle seo o ka se kgonago go ikaga moyeng. Ana o re: “Ke badile puku ya Dipsalme leboelela gomme ke na le pukwana moo ke ngwalelago gona Mangwalo a kgothatšago.” Ge nako e dutše e tšwela pele, motho a ka ba a fola sebeng se segolo seo a se dirilego. Diema 24:16 e re: “Xobane moloki, le xe a ka wa xa-šupa, ó tlo fêla a tsoxa.”

Go Fenya go Palelwa

Go ba gona, le diphošonyana tša go se re selo di ka go kweša bohloko. Ke’ng seo se ka go thušago gore o di fenye? Sa pele, lebeletšana le diphošo tša gago ka tsela ya kgonthe. Michael o eletša ka gore: “Go e na le go itšea o le motho wa go dula a palelwa, lemoga gore ke dilo dife tšeo di go paletšego le gore di bakwa ke eng. Ka tsela ye o ka kaonefatša nakong e tlago.”

Le gona, phema go kgomega kudu ka wena. ‘Go na le nako ya go sega’ gomme seo se ka akaretša le gore o itshege! (Mmoledi 3:4) Ge e ba o nyamile, dira selo seo o se dirago gakaone, se bjalo ka selo seo o se ratago goba dipapadi. Go ‘huma medirong e mebotse,’ bjalo ka go boledišana le ba bangwe ka tumelo ya gago, go ka go thuša gore o ikholofele.—1 Timotheo 6:18.

Sa mafelelo, gopola gore “Morêna ké Moxauxedi, ké wa mabobo. . . . A ka se lwe ka mehla [a ka se dule a swaya diphošo, NW].” (Psalme 103:8, 9) Jessica o re: “Ke ikwa gore ge ke dutše ke batamela kgaufsi le Jehofa Modimo, ke moo ke bago le kholofelo ya gore o a nthekga le gore o a nthuša dilong tšohle tšeo ke lebeletšanago le tšona bophelong.” Ee, go a kgothatša go tseba gore go sa šetšwe gore o palelwa gakaakang, Tatago wa legodimong o go lebelela o le wa bohlokwa.

[Mongwalo wa ka tlase]

[Seswantšho go letlakala 30]

Ge e ba o ikwa o imelwa ke dilo tšeo batho ba di letetšego go wena, boledišana le bona ka tlhompho

[Seswantšho go letlakala 31]

Go dira dilo tšeo o di dirago gabotse go ka go thuša go tloša maikwelo a go palelwa