“Yo Mongwe le yo Mongwe o Swanetše go Bala Puku ye”

BAPALA

“Yo Mongwe le yo Mongwe o Swanetše go Bala Puku ye”

KA MONGWADI WA PHAFOGA! KUA POLAND

Go thoma ka selemo sa 2003, puku ya Ithute go Morutiši yo Mogolo e ile ya lokollwa ka maleme a mantši dikopanong go dikologa lefase. Go etša dinageng tše dingwe, karabelo ka morago ga go amogela puku ye e nago le diswantšho tše dibotse e bile e makatšago kua Poland. Gaešita le ge e hlametšwe bana ka mo go kgethegilego, mangwalo a tšwago go bafsa le batho ba bagolo a bontšha gore puku ye e ipiletša ka tekanyo e kgolo. Tše dingwe tša ditsopolo ke tše.

“Leina la-ka ke Agata, gomme ke na le nywaga e seswai. Ge ke be ke amogela puku ye, ke ile ka lemoga gatee-tee kamoo Jehofa a nago le taba le nna ka gona. Kgaolo yeo ke e ratago kudu ke ya bo-7 e rego ‘Gokwa go a go Šireletša.’ Ga se ka mehla ke bego ke –e-kwa batswadi ba-ka, eupša bjale ke tseba gore ke swanetše go fetoga ka gobane Jehofa o rata bana ba ba kwago.”

Marlena, ngwanenyana wa nywaga e 13, o ngwala ka kgahlego: “Ke a tseba gore puku ye e reretšwe bana ba banyenyane, eupša ke dumela gore e ipiletša go batho ka moka. Go e bala go matlafatša tumelo ya-ka go Jehofa le go Jesu. E hlalosa gaešita le dilo tše raraganego ka tsela e bonolo. Ga ke kgone go e bea fase. Diswantšho tša yona ke tše botse kudu! Dipotšišo tše sepedišanago le tšona di tla tsoša kgahlego ya bafsa! Puku ye e a kgahliša, ka gona ke e bala ka kelohloko. Ke le leboga kudu.”

Justyna, ngwanenyana wa nywaga e 15, o bolela kamoo a hweditšego puku ye e tanya kgahlego ka gona: “Dikgaolo tšeo ke di badilego di nkgahla kudu mo e lego gore ke rata go le leboga go tšwa pelong ka mpho ye e botse le e rutago. Ke nagana gore yo mongwe le yo mongwe o swanetše go bala puku ye gaešita le batho ba bagolo. Go nna go bonagala mehlala eo e neilwego ka go yona e le e bonolo le e kwešišegago ka mo go lekanego mo e lego gore gaešita le ngwana yo monyenyane kudu a ka e kwešiša. Diswantšho tša yona di a itlhalosa, ge e le gabotse, ga go kgonege go hlalosa ka mantšu tsela yeo ke ikwago ka yona ge ke bala puku ye.”

Eunika le yena o hlalosa tebogo ya gagwe bakeng sa kgatišo ye. Gaešita le ge a e-na le nywaga e 19, o badile puku ye ka mafolofolo gomme o re o hweditše e le “e šomago bakeng sa bafsa.” O bile o ngwala gore: “E hupere keletšo ya bohlokwa bakeng sa bophelo bja letšatši le letšatši ka gae, sekolong le ka phuthegong. Ke a le leboga ka mpho ye.”

Maria, mma yo a thabilego wa ngwana wa ngwaga o tee e lego Oliwia, ka morago ga go šetša karabelo ya morwedi wa gagwe diswantšhong tša mebala-bala, o re: “Ke rata go le leboga go tšwa pelong ka thušo ye e kgethegilego ya go ruta bana. Oliwia wa rena ga a kgone go tloša mahlo a gagwe go yona. O dula diropeng tša rena gomme o nyaka gore re mmotše se se lego ka kgaolong ye goba yela. O rata seswantšho se lego letlakaleng la 83 ka mo go kgethegilego, seo se bontšhago banenyana ba babedi ba mmala o sa swanego wa letlalo ba gokarelana. Diswantšho tše dingwe di bonagala e le tša kgonthe mo e lego gore o a di kgoma, a di gokarele le go di myemyelela.”

Maria gape o gatelela mohola wa thuto ya puku ye ka gore: “E ahla-ahla ditaba tše tseneletšego tše di lego mabapi le dikopano tša botona le botshadi (matlakala 58-60) le kgobošo ya bana (matlakala 170-1). Ke thušo ya bohlokwa go batswadi bao ba nyakago go godiša bana ba bona ka bohlale lefaseng la lehono le kgopo leo dikotsi tše dintši di iphihlilego go lona.”

Bagatiši ba Ithute go Morutiši yo Mogolo ba holofela gore puku ye e tla thuša le wena le bana ba gago gore le holwe ke dithuto tše di neilwego tše di neilwego mo e nyakilego go ba nywaga e 2000 e fetilego ke Morutiši yo Mogolo Jesu Kriste.