Bobotse bjo e Lego bja Bohlokwa Kudu

BATHO ba rata batho bao ba naganago gore ba a kgahliša. Eupša ke’ng yeo e go dirago gore o kgahliše e le ka kgonthe? Ge e le gabotse, go na le meedi tabeng ya seo o ka se dirago gore o kgone go lokiša ka tsela e šireletšegilego dika tšeo o belegwego ka tšona. Go feta moo, bobotse bja mmele ke bja nakwana, ka ge go se na yo a ka tšhabelago go senyega ganyenyane-ganyenyane ga letlalo mo go bakwago ke botšofadi le bolwetši. Na go na le bobotse bjo bongwe bjo bo lego bohlokwa kudu, bja sa ruri bjo bo ka fihlelelwago?

Bohlokwa bja Bobotse bja ka Gare

Beibele e re kgonthišetša gore Mmopi, Jehofa Modimo, o tšea bobotse bja ka gare e le bja bohlokwa kudu. Nagana ka mehlala e mengwe.

Ge Jehofa a be a botša moporofeta Samuele gore a kgethele ba-Isiraele kgoši gare ga barwa ba Isai, moporofeta o ile a kgahlwa ke Eliaba yo mobotse. Samuele o ile a re: “E a kaxo ba motlotšwa wa Morêna šó.” Eupša Jehofa o ile a re go Samuele: “O se bônê sebopêxô sa xaxwe le botelele bya xaxwe; Nna ke mo nyaditše. Ka xobane yo batho ba mmôxêlaxo, xa se yêna. Motho ó bôna se se lebanaxo le mahlô a xaxwe; Morêna Yêna ó bôna pelo.”—1 Samuele 16:6, 7.

Motho yo a bego a kgethetšwe bogoši e be e le morwa yo monyenyane, Dafida. Le ge go thwe o be a e-na le “mahlô a mabotse” a bile a e-na le “sebopêxô sa senatla,” mohlomongwe Dafida o be a se botse go feta bo mogolwagwe. Eupša ‘moya wa Modimo o ile wa tla go Dafida wa dula mo go yena.’ Le ge a be a sa phethagala e bile a ile a dira dibe tše dikgolo, o ile a tsebja e le motho yo a nago le pelo e botse e bile gape e le mohlanka wa Modimo wa go botega go fihla lehung. (1 Samuele 16:12, 13) Ga go pelaelo gore o be a kgahliša go Modimo ka baka la bobotse bja gagwe bja ka gare.

Ka mo go fapanego, nagana ka mohlala wa Abesalomo e lego yo mongwe wa barwa ba Dafida. O ile a ba motho yo a sa kgahlišego go sa šetšwe kamoo a bego a le botse ka gona. Beibele ge e bolela ka yena e re: “Sethšabeng ka moka sa Isiraele xo be xo se na monna wa xo ka swana le Abesalomo ka botse bya sebopêxô. Ó be a rêtwa xa-xolo. Xo tloxa lwaong xo fihla phoxong xo be xo se bosodi mo xo yêna.” (2 Samuele 14:25) Lega go le bjalo, phišego ya Abesalomo e ile ya mo tutueletša gore a rabele malebana le tatagwe le gore a itšeele sedulo sa bogoši. O ile a ba a kata basadi ba tatagwe ba direthe. Ka baka leo, Abesalomo o ile a ipiletša bogale bja Modimo gomme a hwa ga bohloko.—2 Samuele 15:10-14; 16:13-22; 17:14; 18:9, 15.

 Na o kwa o kgahlwa ke Abesalomo? Ke therešo gore ga go bjalo. Dilo ka moka tšeo a di dirilego, di mo dira gore a šišimiše. Bobotse bja gagwe bja ka ntle ga se bja ka bja šira boikgantšho bja gagwe le go se botege ga gagwe goba gona go mo šireletša gore a se hwe. Ka lehlakoreng le lengwe, Beibele e na le mehlala e mentši ya batho ba bohlale, ba kgahlišago bao go sa bolelwego selo ka ponagalo ya bona. Go molaleng gore seo se bego se le bohlokwa kudu e be e le bobotse bja bona bja ka gare.

Bobotse Bja ka Gare bo a Kgahliša

Na bobotse bja ka gare bo ka kgahla batho ba bangwe? Georgina yo a nago le nywaga e ka bago e lesome a nyetšwe o re: “Nywageng ye ka moka, ke ile ka rata monna wa-ka kudu ka baka la potego ya gagwe le go ba seo a lego sona ge a dirišana le nna. Selo sa bohlokwa kudu bophelong bja gagwe ke go kgahliša Modimo. Se se mo dirile gore e be motho yo a naganelago le yo lerato. O nagana ka nna ge a dira diphetho gomme o ntira gore ke ikwe ke le bohlokwa. Ke a tseba gore o nthata rati-rati.”

Daniel yo a nyetšego ka 1987 o re: “Go nna mosadi a’ka ke yo mobotse. Ga ke mo rate feela ka baka la ponagalo ya gagwe eupša semelo sa gagwe se ntira gore ke mo rate le go feta. O dula a nagana ka batho ba bangwe e bile o rata go ba thabiša. O na le dika tše bohlokwa tša Bokriste. Se se ntirile gore ke thabele go phela le yena.”

Lefaseng le leo batho ba gona ba kgahlegelago seo ba se bonago, re swanetše go lebelela ka kua ga seo se lego mahlong a rena. Re swanetše go lemoga gore go thata go ba le ponagalo yeo go thwego e botse—mohlomongwe ga go kgonege go ba le yona—e bile ga e bohlokwa gakaalo. Lega go le bjalo, re ka kgona go ba le dika tše di kgahlišago tšeo di re dirago gore re be ba babotse ka gare. Beibele e re: “Botsôrô bo a fora, le botse ké lefêla; mosadi xo rêtwa mo-šia-Morêna.” Mangwalo a dira phapano ka go lemoša gore: “Ó etša moruka nkong ya kolobê, mosadi yo botse mo-ila-bothakxa.”—Diema 11:22, 31:30.

Lentšu la Modimo le re thuša go tšeela godimo “motho wa xo ikuta wa pelong, bothšepi byo bo sa ônalexo bya môya wa bolêta le leaxô. Ké tšôna tše Modimo a bônaxo è le tše bohlôkwa.” (1 Petro 3:4) Ke therešo gore bobotse bjo bjalo bja ka gare bo bohlokwa kudu go feta bobotse bja mmele. E bile bo ka hwetšwa ke batho bohle.

[Diswantšho go letlakala 24, 25]

Dika tše dibotse di ka dira mo gontši bakeng sa go go botsefatša go feta mekgwa le ge e le efe ya go botsefatša