“Ge Feela Batho ba ka be ba Tseba!”

KA MORAGO ga go fetša sekolong se se phagamego, ge bafsa ba bantši ba be ba ikemišeditše go fihlelela dipakane tša dilo tšeo di bonagalago, David o be a naganne ka tsela e nngwe. Ka September 2003, yena gotee le mogwera wa gagwe ba ile ba huduga Illinois United States, ba ya Dominican Republic. * Davey, go etša ge bagwera le ba lapa ba be ba mmitša bjalo, o ile a dira phetho ya gore a ithute Sepaniši le go kopanela le Phuthego ya Navas ya Dihlatse tša Jehofa modirong wa yona wa go ruta ka Beibele. Phuthego e ile ya mo amogela ka borutho. Juan, yoo e lego mogolo a nnoši phuthegong yeo o re: “Davey o be a dira le ge e le eng yeo re bego re mo kgopela yona. Ka mehla o be a ikgafela go thuša ba bangwe gomme bana babo rena ba be ba mo rata.”

Davey o be a rata kabelo ya gagwe. O ile a ngwalela mogwera wa gagwe kua United States gore: “Ke tloga ke ipshina ka bophelo bja-ka ka mo go feletšego mo. Bodiredi bo tloga bo lapološa! Re bolela metsotso e ka bago e 20 mojakong o mongwe le o mongwe ka gobane batho ba nyaka go kwa sohle seo o ka ba botšago sona. Ke šetše ke swara dithuto tša Beibele tše tshela, eupša re sa dutše re nyaka thušo. Sebokeng se sengwe, phuthego ya rena ya bagoeledi ba 30 e bile le ba 103 ba bilego gona!”

Ka manyami, ka April 24, 2004, kotsi e ile ya tšea bophelo bja Davey yo monyenyane gotee le bja lesogana le lengwe phuthegong yeo. Go ba go fihla lehung la gagwe, Davey o be a le mafolofolo kudu mošomong woo a bego a o dira gomme o kgothaleditše bafsa ba bangwe ba moo a tšwago gona gore ba mo latele. O ile a botša Hlatse e nngwe ya mofsa gore: “Se se tla fetola tsela yeo o lebelelago dilo ka yona.”

Phetogo e nngwe yeo Davey a bilego le yona tseleng ya gagwe ya go lebelela dilo e be e le mabapi le dilo tše di bonagalago. Tatagwe o a gopola: “Nakong ya ge a be a etetše gae, Davey o ile a laletšwa leetong la go ya papading ya go thelela lehlweng. O ile a botšiša gore e tla ba bokae. Ge a botšwa ka gore ke bokae, Davey o ile a re ga go ka tsela yeo a bego a ka diriša tšhelete e kaalo papading ya go thelela lehlweng mola a be a ka phela dikgwedi tše ntši Dominican Republic ka tšhelete e lekanago le yeo!”

Phišego ya Davey e ile ya kgoma ba bangwe. Mofsa yo mongwe kua Illinois o boletše gore: “Ge ke be ke e-kwa ka dilo ka moka tšeo Davey a bego a di dira le kamoo a bego a thabile ka gona, seo se ile sa ntira gore ke lemoge gore le nna nkabe ke fihlelela dilo tše di swanago le tšeo. Lehu la Davey le dirile gore ke naganišiše ka seo batho ba bego ba tla se bolela ka nna ge ke be nka hwa le ge e ba ke be ke tla ba le tutuetšo e botse gakaakaa maphelong a bona.”

Bjalo ka Dihlatse tša Jehofa, batswadi ba Davey le bana babo ba na le kholofelo yohle ya gore Modimo o tla tsoša Davey lefaseng le lefsa leo le tlago la go loka. (Johane 5:28, 29; Kutollo 21:1-4) Mo lebakeng la bjale, ba hwetša khomotšo ka go tseba gore Davey o dirišitše bophelo bja gagwe ka tsela e kaone kudu kamoo a bego a ka kgona—e lego ya go hlankela Mmopi wa gagwe. (Mmoledi 12:1) Ge a be a bolela ka phetho ya gagwe ya go hlankela moo go nyakegago thušo e kgolo, Davey o kile a re: “Ke duma eka mofsa yo mongwe le yo mongwe a ka dira selo sa go swana le se gomme a kwe seo ke se kwago. Ga go selo se se kaone kudu go feta go hlankela Jehofa ka sohle seo re nago le sona. Ge feela batho ba ka be ba tseba!”

[Mongwalo wa ka tlase]