Go Ngwadilwe Gore ke tla Mmona

Ka ge go Anega Rosalía Phillips

“O tlo atlega kudu! O na le bokgoni bja go dira bjalo! Molaodi wa rena o ile a mpotša mantšu ao a dutše pianong ya gagwe, metsotswana pele seširo sa sethala se ka bulega. Ditho tše dingwe tše nne tša sehlopha sa mmino di ile tša dira sešupo sa go nkamogela. Ke be ke le seopedi se sefsa sehlopheng, ke apere roko ya-ka e khwibidu yeo e kgabišitšwego ka dikgapetlana tše di phadimago. Ke ile ka tlelwa ke letšhogo. E be e le lekga la pele ke tšwelela phatlalatša bjalo ka seopedi, ke thoma mošomo kgwebong ya dipontšho tša boithabišo lefelong le la dipontšho leo e lego le lengwe la mafelo a bohlokwa kudu mo Mexico City! E be e le ka March 1976 gomme ke be ke šaletšwe ke kgwedi feela gore ke be le nywaga e 18.

TATE o be a e-na le nywaga e meraro a hwile gomme ke be ke sa dutše ke mo gopola. Batho le bona ba be ba mo gopola gabotse. O be a ratwa le go hlompšha ka baka la ge e be e le yo mongwe wa dibapadi tša maemo tša go segiša nageng, ka ge a ile a tšwelela difiliming tše 120 mehleng yeo gantši e bitšwago mehla ya katlego ya paesekopo ya Mexico. Leina la gagwe e lego Germán Valdés, “Tin-Tán” le ile la bewa mathuding a mafelo a dipontšho a Amerika Bogareng le Amerika Borwa le ditikologong ka moka tša United States le Yuropa tšeo go tšona go bolelwago Sepaniši. Le lehono difilimi tša gagwe di sa bontšhwa leboelela thelebišeneng, ka morago ga nywaga e fetago e 30 a hwile.

Go tloga ge ke be ke sa le ngwanenyana yo monyenyane, ntlo ya gešo e be e le lefelo la go bokana la batho ba go tuma. Mma le bana babo ba ile ba hlama sehlopha sa diopedi tše tharo se se bitšwago Las Hermanitas Julián (Bana ba ga Julián). Kgaetšedi ya gagwe e lego Julio Julián e be e le seopedi sa go tuma sa tinoro sa opera kua Yuropa, mola mosadi wa gagwe wa mo-Sepaniši e lego Conchita Domínguez a be a opela ka lentšu la pele (Soprano). Go feta moo, baratho ba tate e lego Manuel “Loco” (segafsi) Valdés le Ramón Valdés yo a tumilego ka leina la Don Ramón (Morena Ramón), e be e le dibapadi tša go segiša tša go tuma thelebišeneng.

Mafelo a go gatišetša difilimi, mafelo a dipontšho tše fapa-fapanego tša mmino le mafelo a go gatišetša mmino, e be e le mafelo a tlwaelegilego go nna le kgaetšedi ya-ka e lego Carlos ka baka la gore tate o be a tlwaetše go re tšea re sepele le yena ge a šoma le ge a e-ya maeto ka mošomo; ke kamoo a ilego a boloka lapa le kopane. A phapano e kaakang yeo e bego e le gona magareng ga tikologo ye yeo e bego e se na lerato la kgonthe le legaeng la rena moo kwano ya kgonthe le lerato di bego di buša! Ke gopola tate e le motho yo a nago le borutho, yo a tletšego ka mafolofolo le go rata bophelo. O be a e-na le seatla se se bulegilego kudu, e bile ka dinako tše dingwe a nea go feta tekanyo. O ile a nthuta gore lethabo le tlišwa ke go nea e sego go ba le dilo.

 Phetogo e Nyamišago Kudu

Go ya mafelelong a 1971, mma o ile botša nna le kgaetšedi ya-ka gore go hweditšwe gore tate o be a swerwe ke bolwetši bjo bo sa alafegego. Lebakeng la ngwaga le seripa ke ile ka mmogela a tlaišega, a katana ka baka la go diriša dihlare tše matla.

Ke sa gopola letšatši leo ke bonego koloi ya balwetši e bego e tlile lapeng lešo go tlo mo tšea bakeng sa go mo iša sepetlele. Ke be ke tseba gore a ka se hlwe a boa. Go thata go hlalosa bohloko bjo ke bego ke bo kwa. Ke ile ka phetha ka gore ka ge a be a tlaišega, le nna ke swanetše go tlaišega. Ke ile ka tima sekerete ka seatla sa-ka gomme ka lla ka mo go sa homotšegego. Tate o ile a hwa ka June 29, 1973. Ke ile ka thoma go ipotšiša gore: ‘Ke ka baka la’ng motho yo a lokilego ka tsela ye, yo a bego a tliša lethabo le lentši ka mokgwa wo a be a swanela ke go re tlogela? O kae ga bjale? Na o a nkwa ge ke bolela le yena? Bophelo bja-ka bo na le morero ofe ntle le yena?’

Mošomo o se Nago Morero

Ka morago ga go ikhutša ka nakwana bakeng sa go fola maikwelong, ke ile ka thoma go ithutela go kgabiša dintlo ka gare (Interior decorating). Lega go le bjalo, ka dinako tše dingwe ke be ke e-ba le moya wa borabele gomme ke ile ka tlogela sekolo. Nna le mma re ile ra phetha ka gore re ye meletlong kutšwanyana. Re be re e-ba gona meletlong ya maemo a godimo ya batho bao ba bego ba šoma kgwebong ya boithabišo. Gantši moamogela-baeng o be a tla phetha ka gore, “Rosalía, ga bjale re kgopela gore o re opelele e nngwe ya dikoša tša gago.” Ba be ba rata lentšu la-ka le tsela yeo ke bego ke kgona go bontšha maikwelo a-ka ka gona ge ke be ke opela gomme ba re ke abetše bokgoni bja batswadi ba-ka.

Go o mongwe wa meletlo yeo, morulaganyi le molaodi wa sehlopha sa Arturo Castro and His Castros 76 o ile a nkwa ke opela gomme a ntaletša gore ke be sehlopheng sa gagwe. Mathomong ke be ke sa rate kgopolo yeo. Gaešita le ge ke be ke rata mmino gomme ke bapetše katara le go ngwala mmino go tloga ge ke be ke e-na le nywaga e 14, ke be ke sa nyake go šoma ke le seopedi. Lega go le bjalo, mma o ile a nkgothaletša go dira bjalo, le gona lapa la gešo le be le e-na le mathata a tša ditšhelete, ka gona ke ile ka dumela. Se se ile sa lebiša go tšweleleng ga-ka phatlalatša ka lekga la pele bjalo ka seopedi mo ke boletšego ka gona mathomong.

Ke ile ka thabela go šoma mošomo o tsepamego ge ke be ke thoma go šoma. Sehlopha sa rena se ile sa ralala le Mexico, se diragatša dipontšho tše pedi ka bošego bjo tee. Re ile ra šoma Guatemala, Venezuela, New York le Las Vegas. Ke ile ka dula le sehlopha nywaga e mebedi. Ke moka ke ile ka newa sebaka sa go yo bapala difilimi. Ke ile ka newa dikarolo tše pedi tša go bapala ke se sebapadi sa thwadi difiliming le e tee ya go ba sebapadi sa thwadi, yeo ke ilego ka thopa difoka tše pedi tša bohlokwa ka baka la yona.

Tšatši le lengwe ke ile ka amogela mogala go tšwa khampaning e di phalago tšohle ya thelebišene nageng ya gešo. Ba ile ba nkholofetša konteraka ya maemo a godimo ka tlase ga “lenaneo la dinaletšana” la bona le karolo ya sebapadi sa thwadi go tshwantšhetšo-dikgao (soap opera) yeo e bego e tla bitšwa ka nna. Ke be ke tla feleletša ke le maemong a godimo kgwebong ya boithabišo. Ke be ke tlo hwetša mogolo o mobotse, gaešita le ge ke be ke sa šome ka mehla. Ka baka la go ikwa ke sa swanelwe ke tšeo ka moka le go boifa go lahlegelwa ke tokologo, ke ile ka gana konteraka yeo. Ke ile ka amogela go šoma go tshwantšhetšo-dikgao, eupša e le feela gore nka tšwela pele ke ithuta go diragatša difilimi yunibesithing. Lega go le bjalo, ke be ke sa thaba. Ke be ke tshwenywa ke taba ya go bona dibapadi di katanela go hwetša karolo ya go ba sebapadi sa thwadi ka nywaga e mentši, mola nna ke be ke filwe karolo yeo—e le feela ka gobane ke be ke le morwedi wa Tin-Tán.

Ke moka ke ile ka thoma go gatiša mmino. Kgatišo ya mathomo e be e akaretša koša yeo e bego e tšwelela dikarolong tše dingwe tša tshwantšhetšo-dikgao, koša yeo mantšu le moretheto wa yona di bego di hlamilwe ke nna. Ka morago ke ile ka gatiša lefelong la go gatiša la go tuma kua London. Ke ile ka gatiša dikoša tše oketšegilego, ka bapala dikarolo tše oketšegilego difiliming le go ditshwantšhetšo-dikgao. Matlakala a ka ntle a dikarolong tša dikuranta tšeo di bolelago ka boithabišo a ile a thoma go tšweletša dihlogo tšeo di bolelago ka nna, ka gona o ka bolela gore ke be ke atlegile kudu. Lega go le bjalo, go be go e-na le selo se sengwe seo se hlaelago. Ke ile ka šetša kamoo dibapadi di bego di e-na le boithati le moya wa phadišano ka gona, le gona di be di e na le boitshwaro bjo bo gobogilego le boikaketši. Ke ile ka se hlwe ke holofela batho.

Ke moka seruthwaneng sa 1980, ke ile ka bona malome Julio pokanong ya lapa. O be a phethile ka go tlogela opera gomme ke ile ka mo theetša ge a be  a bolela ka paradeise yeo Modimo a e holofeditšego. Malome Julio o ile a re go hloka toka le manyami di tla fela lefaseng gomme lerato le tla buša. O ile a bolela le gore leina la Modimo wa therešo ke Jehofa. Seo se ilego sa ipiletša kudu go nna e be e le go kwa gore kua paradeiseng baratiwa ba rena ba ba hwilego ba tla tsošwa. Kgonagalo ya go bona tate gape e ile ya nthabiša. Ke be ke dula ke mo gopola ka mehla le go hlologela thekgo le lerato la gagwe. E tla ba mo go kgahlišago gakaakang go ba le yena gape! Lega go le bjalo, ka gare-gare ga-ka se se be se bonagala se sa kgonege. Malome Julio o ile a mpha Beibele gomme a laletša nna le mma go ba gona kopanong ya Dihlatse tša Jehofa yeo e bego e tla ba gona dibekeng tše mmalwa tše tlago. Re ile ra mmotša gore mohlomongwe re ka ya.

Ke Kgetha go Fetola Bophelo Bja-ka

Bošegong bjo bongwe ke be ke kgoga ge ke dutše ke bala Beibele yeo malome a mphilego yona. Seo ke se badilego ka pukung ya Diema se ile sa ntira gore ke phethe ka gore seetša, kwešišo le bophelo di tšwa go Modimo, mola lefsifsi, kgakanego le lehu di e-tšwa mothopong o mongwe o fapanego. Bjona bošegong bjoo, ke ile ka tima sekerete seo e bego e tla ba sa mafelelo bophelong bja-ka gomme ka emela mma gore a boe. Ke ile ka mo kgopela ke lla gore a nthekge diphethong tše dikgolo tšeo ke bego ke swanelwa ke go di dira. Se se latelago, ke ile ka ya lefelong la dipontšho moo ke bego ke itlwaeletša go bapala karolo ya Cordelia papading ya Shakespeare ya King Lear. Ke ile ka kgaotša go bapala papading gomme ka kgaogana le lesogana la-ka leo e bego e le yo mongwe wa dibapadi tša thwadi.

Lega go le bjalo, ke be ke sa hlwa ke ithuta go hlankela Modimo, ka gona ke be ke se na selo seo ke ithekgilego ka sona. Ke ile ka swarwa ke kgateletšego e kgolo. Ke ile ka rapela Modimo go nthuša gore ke ikwe ke amogelega ka baka la seo ke lego sona, ntle le go nagana ka bokgoni bjo ke bo abetšego goba botumo. Ke ile ka kgaogana le bagwera ba-ka ka moka le mediro yeo ke bego ke e dira.

Tsela e Lebišago Katlegong ya Kgonthe

Nakong ya ge ke gakanegile, ke ile ka gopola taletšo ya malome ya go ba gona kopanong. Ka gona ke ile ka mo leletša mogala gomme a nkiša mabaleng a dipapadi moo kopano e bego e le gona. Seo ke se bonego moo se ile sa nkgoma. Ke ile ka bona batho bao ba nago le thulaganyo bao ba bego ba sa diriše polelo ya ditšhila goba go kgoga gomme ba be ba sa leke go kgahliša motho. Seo ke se kwelego ka Beibeleng se ile sa nkgopotša seo ke bego ke se badile ka pukung e nyenyane e nago le sehlogo se se rego Is the Bible Really the Word of God? * yeo ke e hweditšego ka gae ka moragonyana ga lehu la tate.

Mo e ka bago ka yona nako ye, ke ile ka newa karolo e nngwe gape ya go ba sebapadi sa thwadi go tshwantšhetšo-dikgao. Ke be ke rata karolo ye ka ge e be e bonagala e thekga ditekanyetšo tša Modimo tšeo ke bego ke ithutile ka tšona kopanong. Ka baka la seo ke ile ka amogela karolo yeo. Ka lehlakoreng le lengwe, ke be ke dula ke nagana ka kgopolo e lego ka Beibeleng e rego: “Le se kê la ba ba xo ikxokêla jokong e šele ya ba ba sa dumelexo. . . . Seetša se ka amana bya’ng le lefsifsi?”—2 Ba-Korinthe 6:14

Kganyogo ya go nyaka go kgahliša Modimo e be e gola ka go nna. Ke be ke nyaka go ya dibokeng Holong ya Mmušo le malome le mogatša-malome. Go be go ntšea iri go ya phuthegong ya bona, eupša ke ile ka ya Disontaga tše tharo di latelana. Malome o ile a phetha ka go nkiša phuthegong ya lefelong la gešo. Re ile ra fihla ge seboka se be se felela gomme moo ke ile ka kopana le Isabel, kgarebe yeo e lekanago le nna. O be a ikokobeditše le go ba botho. Ge malome a be a ntsebiša go yena ke le Rosalía Valdés, ga a ka a lebiša tlhokomelo le gatee leineng la-ka. Seo se ile sa nthabiša kudu. O ile a ithapela go ithuta Beibele le nna legaeng la-ka.

Re ile ra thoma go ithuta re diriša puku ya Therešo ye Išago Bophelong bjo bo sa Felego. * Ka go rata, Isabel o ile a itumelelanya le thulaganyo ya-ka ya nako. Ka dinako tše dingwe o be a swanelwa ke go leta go fihla bošego kudu, ge ke feleletša go gatiša tshwantšhetšo-dikgao. Ke be ke leboga gakaakang gore e be e le motho yo a bego a nkgahlegela ka baka feela la gore ke be ke nyaka go ithuta ditherešo  tša Beibele! O be a sa ute seo a lego sona, a botega le go ba le boitshwaro bjo bobotse, e lego dika tšeo ke bego ke nagana gore di ka hwetšwa ka go ithuta filosofi le bokgabo. Re ile ra rulaganya go ithuta diiri tše dintši, ka nako e nngwe re dira bjalo ka makga a mmalwa mo bekeng.

Mathomong go be go le thata go lahla dikgopolo tša-ka tše fošagetšego eupša ganyenyane-ganyenyane di ile tša tšeelwa sebaka ke ditherešo tša Beibele. Ke gopola kamoo ke ilego ka kgothatšwa ke kholofetšo ya Modimo e rego: “Xo se xokae e mobe ó tlo ba a ile; O tlo bôxa lešope, yêna à se xôna. Ba bolêta e tlo ba bôná beng ba naxa; ba tlo thaba ka botlalô bya moláô.” (Psalme 37:10, 11) Ka yona nako yeo, kholofelo ya go bona tate gape Paradeiseng e be e thoma go ba ya kgonthe go nna. Gantši ke be ke nagana ka mantšu a Jesu a rego: “Di se kê tša Le tlaba; xobane xo tla lebaka leo bohle ba lexo mabitleng ba tl’o xo kwa Lentšu la Morwa Modimo ka lôna. Xomme ba tlo tšwa; ba ba dirilexo tše botse ba tlo tsoxa ba phela.”—Johane 5:28, 29.

Ke ile ka fetša mošomo wa-ka tshwantšhetšong-dikgao gomme gatee-tee go ile gwa tšwelela mešomo e mengwe. Gaešita le ge mešomo ye e be e ka ntira gore ke tume, go tšea karolo go yona go be go tla bolela gore ke amogela boitshwaro bjo bo gobogilego, borapedi ba diswantšho le dikgopolo tše dingwe tša maaka. Ke be ke ithutile gore Sathane ke wa kgonthe le gore ga a nyake re hlankela Jehofa. Ka gona ke ile ka gana mešomo yeo gomme ka thoma go ba gona dibokeng ka moka. Go etša ge go be go ka letetwa, mma le kgaetšedi ya-ka ba be ba sa kwešiše gore ke ka baka la eng ke tlogela dibaka tše dintši gakaakaa le tšhelete e ntši ka tsela ye. Ka nako e swanago ba be ba bona phetogo go nna. Ke be ke fetoga go tloga go beng motho yo a sa thabago, yo a gateletšegilego go ya go beng motho yo a nago le bophelo le lethabo. Mafelelong ke ile ka ba le morero bophelong!

Ke ile ka thoma go kganyoga go boledišana le ba bangwe ka seo ke bego ke ithuta sona gomme ka ba mogoeledi wa molaetša o mobotse wa Mmušo wa Modimo. Ge ke be ke dira boboledi, ka dinako tše dingwe go be go le thata go tanya tlhokomelo ya mong wa lapa, ba bantši ba be ba ntseba ke le sebapadi sa difilimi. Mabakeng a mmalwa nna le motho yo ke bego ke sepela le yena re ile ra fihla malapeng a batho ba bogetše tshwantšhetšo-dikgao yeo ke bego ke tšwelela go yona thelebišeneng. Beng ba malapa ba be ba sa dumele gore ke nna ke emego mojakong wa bona!

Ka September 11, 1982, ke ile ka kolobetšwa e le sešupo sa boineelo bja-ka go Jehofa. Ga bjale bophelo bja-ka bo be bo e-na le morero wa kgonthe gomme modiro o fapanego o be o letše ka pele ga-ka. Go fišegela bodiredi ga Isabel go ile gwa ntutuetša. O be a hlankela e le mmulamadibogo wa ka mehla, bjalo ka ge badiredi ba nako e tletšego ba Dihlatse tša Jehofa ba bitšwa bjalo. Ka morago ga nakwana ke ile ka thoma go sepela le yena ge a be a ithuta Beibele le ba bangwe. Isabel o ile a ba mogwera wa-ka wa paale.

Ke be ke tlogetše mo e nyakilego e ka ba ka mo go feletšego mošomo wa-ka bjalo ka sebapadi, ka gona nna le mma re ile ra swanelwa ke go kgotsofalela boemo bja tlasana bja go phela. Ka yona nako yeo, ke ile ka hlama mmino bakeng sa rekhoto ya-ka ya bone, yeo e bego e akaretša dikoša tše dingwe tšeo di lego mabapi le ditekanyetšo le ditumelo tša-ka tše difsa. Ke ile ka ngwala koša yeo e bego e bolela ka kholofelo e tiilego yeo ke bego ke e-na le yona ya go bona tate gape. Ke ile ka bitša koša ye “It is Written—I Will See Him” (Go Ngwadilwe—Ke tla Mmona). Ge ke be ke e opelela mma ka lekga la pele, e ile ya mo kgoma kudu. O ile a lemoga kgodišego ya-ka. Ke ile ka thaba kudu ge a be a bontšha kganyogo ya go ithuta Beibele. Nywaga e mebedi ka morago, o ile a ba mohlanka wa Jehofa yo a kolobeditšwego. Le lehono o sa dutše a le mafolofolo bodireding.

Ge nako e be e dutše e sepela, go be go e ba bonolo go nna go gana ditaletšo tša mošomo. Le gona, ge ke be ke lebeletšane le teko goba boemo bjo bo goketšago, go bona ka leihlo la kgopolo seswantšho se se kgahlišago sa tate a e na le rena paradeiseng e botse go be go mmatlafatša le go ntira gore ke be le boikemišetšo bja go hlankela Jehofa.

Ka letšatši le lengwe ke ile ka kgopelwa go ba motšea-karolo go Sesame Street ya phetolelo ya Sepaniši, e lego lenaneo la bana. Ke be ke nagana gore nka se kgone go tšea karolo go lona gomme ka botša motšweletši gore melao ya-ka ya motheo ya Beibele e be e ka se ntumelele go thekga dilo tše bjalo ka matšatši a maikhutšo le a matswalo. Motšweletši o ile a bolela gore ge e ba nka amogela mošomo, o be a tlo hlompha ditumelo tša-ka le gore re ka saena konteraka yeo e hlalosago boemo bja-ka. Ka gona ke ile ka tšea karolo gomme ka gatiša dikgaolo tše 200. Wo e be e le mošomo wa mafelelo wo ke ilego ka o tšea bjalo ka sebapadi sa difilimi.

 Go be go sa dutše go e-na le konteraka e tee yeo e bego e šetše le khampani ya go gatiša mmino, ka gona ke ile ka gatiša dikoša tša-ka tše lesome le khampani ye, go akaretša le koša yeo ke bego ke e ngwadile ka tate le ka tsogo. Ke ile ka ba le sebaka sa go opela koša yeo thelebišeneng le mafelong a mangwe, moo ke ilego ka bolela ka ditumelo tša-ka. Lega go le bjalo, khampani ya go gatiša mmino e ile ya thoma go nkgatelela ka gore ke ikgabiše ka mokgwa wo o tlago go tsoša dikganyogo tša dikopano tša botona le botshadi. Ke ile ka ba fa lengwalo la-ka la go rola modiro.

Ditšhegofatšo Tirelong ya Modimo

Ka December 1983, nna le Isabel re ile ra tšea leeto la go ya kua Brooklyn, New York go yo bona meago ya Dihlatse tša Jehofa. Moo ke ile ka gahlana le monna yo ka morago e bego e tla ba monna wa-ka e lego Russell Phillips. Re ile ra ngwalelana lebaka la mo e ka bago nywaga e mebedi. Ke sa dutše ke gopola gabotse letšatši leo ke thomilego tirelo ya-ka ya bobulamadibogo bja ka mehla—Russell o ile a nthomela matšoba a dirosa go tšwa New York!

Ke ile ka bula madibogo le Isabel ngwaga o tee. Ke moka o ile a laletšwa go yo hlankela ofising ya lekala ya Dihlatse tša Jehofa kua Mexico. Mantšu a gagwe mabapi le kabelo ya gagwe e mpsha a ile a tsoša ka go nna kganyogo ya go oketša bodiredi bja-ka, gomme ge e ba Jehofa a rata, gore le nna ke hlankele Bethele.

Russell e bile tšhegofatšo e nngwe bophelong bja-ka. Ka baka la lerato la gagwe go Jehofa le go mokgatlo wa Gagwe, ke ile ka ithuta go rata tirelo ya nako e tletšego. O be a rata Bethele, ka ge a be a hlanketše Bethele ya Brooklyn ka nywaga e meraro. Ka morago ga ge re nyalane re ile ra šoma gotee re le babulamadibogo ba nako e tletšego kua Colorado, U.S.A. Ka morago re ile ra laletšwa go ba bašomi ba ditšhaba-tšhaba ba go aga meago e mefsa ya makala dinageng tše dingwe. Re ile ra makala kudu gakaakang ge re be re lemoga gore re be re abetšwe Mexico! Ka April 1990, re ile ra amogela tokelo e kgotsofatšago ya go ba ditho tša lapa la Bethele, Mexico. Mohlala wa Russell o ile wa nkgothatša kudu. Ke ile ka hlompha moya wa gagwe wa boikgafo wo o ilego wa mo tutueletša go tlogela naga ya gabo le lapa go tlo tšwetša pele dikgahlego tša Mmušo mo Mexico.

Nna le Russell re ile ra thabela kudu tokelo ya rena ya tirelo lekaleng la Mexico. Lega go le bjalo, dilo di ile tša fetoga gatee-tee ge ke be ke ima. Se se ile sa re tlela re sa se letela. Lega go le bjalo, ka mehla re be re hlompha batswadi bao ba godišago bana ba bona tseleng ya therešo gomme re ile ra amogela se e le kabelo e mpsha. Ka October 1993, Evan o ile a belegwa gomme Gianna a belegwa nywaga e mebedi le seripa ka morago. Gaešita le ge go godiša bana go nyaka boiteko bjo bo tšwelago pele, re ikwa re putswa ka ge nako le nako ngwana wa rena wa nywaga e 11 le wa nywaga e 8 ba bolela ka tumelo ya bona ge ba le bodireding.

Russell ga bjale o hlankela Komiting ya Tikologo ya go Agwa ga Diholo tša Mmušo gomme nna ke sa tšwa go thoma gape tirelo ya nako e tletšego bjalo ka mmulamadibogo. Nywageng e 20 e fetilego, ke ile ka kgona go thuša ditho tše 12 tša lapa gotee le batho ba bangwe ba 8 go ithuta ditherešo tša Beibele le go hlankela Jehofa.

Ge bana ba-ka ba mpotšiša gore, “Mma, na go be go le thata go wena go tlogela bophelo bja gago kgwebong ya dipontšho tša boithabišo?” Ke tsopola mantšu a moapostola Paulo a rego: “Ke sa tiiša ke re . . . ké thsenyêxêlô, xe ke di bapetša le boxolo bya tsebô ya xo tseba Jesu Kriste Mong wa-ka; ka ’baka la xaxwe ka re: Tšeo ka moka ké thsenyêxêlô; ka re: Ké maudi fêla, xore ke tlê ke humê ka Kriste.” (Ba-Filipi 3:8) Ke leboga gakaakang gore Jehofa o ile a mphološa bophelong bja lefeela le bjo bo se nago morero le go ntumelela go ba karolo ya batho ba gagwe ba ba kgahlišago! Le ka mohla ga ke lapišwe ke go mo leboga ka baka la ditšhegofatšo tše dintši kudu tšeo a mphilego tšona ka Morwa wa gagwe, Jesu Kriste. Gantši ke opela koša yeo ke e ngwadilego ka tate. Ke kgodišegile gore ke tla mmona gape.

[Mengwalo ya ka tlase]

[Seswantšho go letlakala 26]

Ke e-na le batswadi ba-ka le kgaetšedi ya-ka ge ke be ke e-na le ngwaga o tee

[Seswantšho go letlakala 28]

Ke opela le Arturo Castro and His Castros 76

[Mothopo]

Angel Otero

[Seswantšho go letlakala 30]

Ke e-na le lapa la-ka lehono

[Mothopo wa Seswantšho go letlakala 26]

Activa, 1979