Bafsa ba a Botšiša . . .

Go Thwe’ng ge e ba a Gana?

O BE o mo tšea bjalo ka mogwera. Eupša a thoma go go kgahla ka tsela itšego. Mohlomongwe o ile a go kgahla ka baka la boitshwaro bja gagwe bjo bobotse goba tsela yeo a bego a go myemyelela ka yona ge le bolela. Lega go le bjalo, nako e ile ya feta gomme a se bontšhe tlhasenyana ya gore o a go rata. Ka gona o ile wa phetha ka go mmotšiša ge e ba a be a ka rata gore le tsenele lefereyo. O ile wa nyamišwa kudu ke ge a re aowa ka tsela e botho, feela e tiilego. *

Ka tlhago o kwa bohloko. Eupša o se ke wa tšeega maikwelo kudu; leka go lebelela dilo ka tsela e swanetšego. Ke therešo, lesogana le boletše gore ga le na kgahlego ya go ratana le wena. Gopola gore phetho ya gagwe ga e fetoše tsela yeo o lego bohlokwa ka gona bjalo ka motho, e bile ga e dire gore batho ba bangwe ba tlogele go go rata le go go hlompha. Ge e le gabotse, phetho yeo lesogana le e dirilego e ka no ba e sa tutueletšwa ke seo le se ganago ka wena, eupša e le ka baka la gore dipakane tša lona gotee le dilo tše di tlago pele bophelong bja lona di fapane le tša gago.

Ge e ba o le Mokriste, o tla gopola gape gore “Modimo xa a bebe motho, xa a lebale medirô ya lena, le leratô le Le itapišitšexo ka lôna ’ineng la xaxwe.” (Ba-Hebere 6:10) Sonja * o bea taba ka tsela ye: “O sa le bohlokwa. O bohlokwa go Jehofa bjalo ka ge o le motho yo a sego a nyalwa.” Ka ge Yo-godimo-dimo gotee le batho ba bangwe ba go tšeela godimo, ke ka baka la’ng o swanetše go ikwa o se selo?

O ka no ikwa o paletšwe goba wa tšhoga gore mohlomongwe ga o swanelwe ke go nyalwa. Eupša ka baka la ge o sa ‘kgahle’ lesogana le mo nakong ye, se ga se bolele gore o ka se ‘kgahle’ motho yo mongwe. (Baahlodi 14:3) Ka gona, go e na le go nagana gore o paletšwe lesolong la gago la go nyaka molekane wa lenyalo, lemoga gore maiteko a gago a utollotše selo setee: O ithutile gore lesogana le ga se monna yo a go swanetšego. Ke ka lebaka la’ng re bolela bjalo?

 Na Lesogana le le be le go Swanetše?

Beibele e laela banna gore ‘ba rate basadi ba bona ka mokgwa wo ba ratago mebele ya bona ka gona.’ (Ba-Efeso 5:28) E laela gape banna gore ba ‘godiše’ basadi ba bona. (1 Petro 3:7) Bjale tabeng ye, go na le kgonagalo ya gore lesogana le ka no ba le go tšea bjalo ka mogwera. Eupša ka go go gana, ge e le gabotse le bontšhitše gore mo nakong ye ga se la ikemišetša go go rata le go go nea kgodišo bjalo ka mosadi wa lona. Le be le e-na le tshwanelo ya go dira kgetho yeo. Nagana ka taba ye: Ge e ba ke ka tsela yeo lesogana le ikwago ka yona, na ruri le be le tla swanelega go ba monna wa gago? Anke o nagane fela kamoo o bego o tla nyama ka gona ge o be o ka nyalana le motho yoo a sa go ratego e bile a sa go nee kgodišo go etša ge Mangwalo a laela!

Ka ge bjale kholofelo yeo o bego o na le yona ya go ratana le lesogana le e sa phethagala, go naganišiša ka ditiro tša lona go ka go thuša gore o ikwe gakaone. Ka dinako tše dingwe go tšeega maikwelong go ka šira motho gore a se bone mafokodi a motho yoo goba a boemo bja gagwe bja moya ao mohlomongwe go batho ba bangwe a lego pepeneneng. Ka mohlala, na lesogana ga se la lemoga gore o thoma go le rata goba le ile la fehla maikwelo a gago ka boomo gore a gole ka go dula le e na le wena? Ge e ba le ile la fehla maikwelo a gago ka boomo, na se ga se bontšhe gore mohlomongwe ga se la ikemišetša go ba monna wa Mokriste yo a nago le kwelobohloko? Ge e ba go le bjalo, e bile selo se sebotse gore o tsebe, gaešita le ge go ile gwa go kweša bohloko.

Maikwelo a Marcia a ile a gola ge lesogana le be le thoma go mo nea tlhokomelo e kgethegilego. Eitše ge a le botšiša gore le ikemišeditše eng, le ile la mmotša gore ga le na kgahlego ya go ratana le yena. Ke’ng seo se ilego sa mo thuša go kgotlelela manyami ao a ilego a a kwa? O re: “Go nagana ka tlhaloganyo ya-ka e sego ka pelo ya-ka, go ile gwa nthuša go laola maikwelo a-ka.” Go gopola dinyakwa tša ka Beibeleng bakeng sa banna ba nyetšego go ile gwa mo thuša go lemoga gore lesogana leo le be le sa swanelege. Se se ile sa mo thuša go lebeletšana ka katlego le manyami ao a a kwelego.

Andrea le yena o ile a ba le phihlelo ya go swana le yeo ka lesogana le lengwe. Ka morago o ile a lemoga gore tsela yeo le ilego la mo swara ka yona e ile ya mmontšha gore ga se la gola. O ile a lemoga gore le be le se la lokela go tsena lenyalong gomme o leboga gore Jehofa o ile a mo utollela taba yeo. O re: “Ke dumela gore Jehofa a ka go šireletša maemong ao a ka go kwešago bohloko, eupša o swanetše go Mmota.” Ke therešo gore maemong a mantši lesogana le itshwara gabotse gomme le gana ka mabaka a kwagalago. Lega go le bjalo, o ka lebeletšana bjang le maikwelo ao a ka tšwelelago?

Seo o ka se Dirago ka Maikwelo a Gago

Go ka no go nyaka nako gore o amogele ka pelong ya gago gore o ganne. Maikwelo a gago a ile a gola ganyenyane-ganyenyane ka lesogana le gomme gore a ye fase, le gona go nyaka nako. Ke ka sewelo maikwelo a go rata motho a ka timago go etša ge go tingwa lebone la mohlagase. Ka dinako tše dingwe a ka bonagala a imela! Iphe nako. Ge nako e dutše e feta, maikwelo ao le ona a tla fela. Eupša ge e ba o nyaka gore maikwelo ao a fele ka pela-pela, phema dilo tšeo di a godišago.

Ka mohlala, tlogela go hlwa o inyatša ka go nagana ka lentšu le lengwe le le lengwe leo o le boletšego le kamoo o bego o itšhišinya mmele ka gona ge o be o botša lesogana kamoo o ikwago ka lona. Ge e ba o sa pheme dikgopolo tše bjalo, o ka feleletša o dumela gore ge e le gabotse lesogana ga se la gana e le ka kgonthe goba wa nagana gore o ka atlega ge o ka leka ka tsela e nngwe. Amogela ntlha ya gore o ka se fetoše kamoo lesogana le ikwago ka gona. Go na le kgonagalo e kgolo ya gore go sa šetšwe gore o le batametše ka tsela efe, karabo ya lona e be e tla no swana.

Go iphora e ka ba molaba o mongwe. O bona bobedi bja lena le phela gabotse go ya go ile. Ditoro tšeo di ka bonagala di kgothatša, eupša ga se dilo tša kgonthe. Ge ditoro di fela, bohloko bjola bo boa gape gomme masetlapelo le ona a thoma. Modikologo wo wa lethabo leo le latelwago ke bohloko bjo bo sa kgotlelegego o ka tšwela pele ka nako e telele, ntle le ge e ba o leka ka matla go o emiša.

Dira boiteko bja go phumola ditoro ka kgopolong ya gago. Ge di thoma, emelela gomme o fo sepela-sepela. Dira modiro wa diatla—selo se itšego seo se ka go thušago go nagana ka dilo tše dingwe. Tsepamiša kgopolo dilong tšeo di go agago, e sego dilong tše di go gateletšago. (Ba-Filipi 4:8) Mathomong go ka ba thata go dira bjalo, eupša ge nako e dutše e tšwela pele o tla fenya gomme wa ba le khutšo ya monagano.

Thekgo ya bagwera ba kgaufsi e ka go thuša. (Diema 17:17) Lega go le bjalo, Sonja o nea temošo ye:  “Ga go botse ge bagwera ba gago ka moka e le batho ba sa nyalwago, e le dithaka tša gago e bile ba kganyoga go nyalwa. O boetše o nyaka bagwera ba bagolo go wena, bao ba ka go thušago gore o lebelele dilo ka tsela e swanetšego.” Le gona, gopola gore go na le motho yo a ka go thušago kudu go lebeletšana ka katlego le bohloko bjoo o bo kwago.

Jehofa—Ke Mogwera Gomme o a Thekgana

Ge monna yo mongwe yo a botegago wa nakong ya bogologolo a be a lebeletšana le manyami, o ile a rapela Jehofa gore a mo thuše. Go ile gwa direga eng? O ile a ngwala gore: “Mohla kè xoletšwe ke dipelaêlô ka teng xa-ka, ka bewa pelo ke dikhomotšô tša xaxo.” (Psalme 94:19) Le wena Jehofa o tla go homotša a go thekge ge o mo rapela ka tumelo. Andrea o ile a dira bjalo. O re: “Thapelo e bohlokwa bakeng sa go go thuša go lebeletšana ka katlego le bohloko le gore o tšwele pele ka bophelo.” Sonja le yena ge a bolela ka thapelo o re: “E go thuša gore o ikwe o le bohlokwa ka tsela yeo e sa ithekgago ka gore batho ba bangwe ba go rata goba ba go gana.”

Ga go na motho yo a ka kwešišago maikwelo a gago ka botlalo, eupša Jehofa yena o a kwešiša. O bopile batho ba e-na le kganyogo ya go nyaka go ratana le balekane ba bona. O tseba kamoo go rata motho yo mongwe go lego matla ka gona gomme o tseba go laola seo. A ka go thuša go lebeletšana ka katlego le bohloko bjo o bo kwago ka pelong, gobane 1 Johane 3:20 e re: “Modimo, ó feta dipelo tša rena, ’me ó tseba tšohle.”

Dula o E-na le Teka-tekano

Lenyalo e ka ba mothopo wa lethabo le legolo, eupša ga se mothopo o nnoši wa lethabo. Batho bohle ba ba hlankelago Jehofa ba a thaba gomme ga go thabe feela batho ba lego lenyalong. Go na le ditsela tše itšego tšeo ka tšona batho ba sego lenyalong ba nago le ditokelo tše dingwe tšeo batho ba nyetšego ba se nago tšona. Ga ba tlaišwe ke “tlaišego nameng” yeo go boletšwego ka yona go 1 Ba-Korinthe 7:28, PK. Tlaišego ye ke dikgateletšego le mathata ao batho bohle ba nyetšego ba lebeletšanago le wona. Batho ba sego lenyalong le bona ba na le tokologo e kgolwanyane gomme ba ka diriša maphelo a bona ka mo go oketšegilego tirelong ya Jehofa. Ka gona, Beibele e ruta gore: “E a nyalago goba e a nyalwago o dira gabotse, fela yo a sa nyalego goba yo a sa nyalwego o dira kaone kudu.” (1 Ba-Korinthe 7:38, NW) Gaešita le ge o na le kganyogo e matla ya go nyalwa, go naganišiša ka dithuto tše tša Beibele go ka go thuša go boloka teka-tekano ya gago gomme wa thabela boemo bjoo o lego go bjona ga bjale.

Bagwera ba bangwe ba gago bao ba nago le maikemišetšo a mabotse ba ka no go botša gore, “O se tshwenyege, ka letšatši le lengwe o tla hwetša motho wa go loka.” Le gona, ke therešo gore go ganwa ke motho o tee ga go bolele gore o tla dula o le tee ka mehla. Lega go le bjalo, kgarebe ya Mokriste e lego Candace e bea mabaka ka tsela ye: “Ke bota Jehofa. Ga se gore ke letetše gore a nnee monna bakeng sa gore ke thabe. Eupša ke a tseba gore o tla nnea seo ke se nyakago bakeng sa go tswalela sekgoba seo.” Go nagana ka tsela ye e nepagetšego go mo thušitše go lebeletšana ka katlego le manyami ao a bakilwego ke go ganwa.

Maiteko a go thoma lefereyo gantši a a folotša lefaseng le, go bjalo le ka manyalo a mantši. Ge e ba o bota Jehofa gomme o e-kwa keletšo ya gagwe, a ka go thuša gore lethabo le tšeele manyami legato. O ka ba le phihlelo e swanago le ya Kgoši Dafida yo a ilego a ngwala gore: “Mong’a-ka! Thloloxêlô ya-ka ka moka O a e tseba; le phêxêlô tša-ka xa tša utaxala pel’a xaxo. Xobane ke letetše Wêna Morêna; ke Wêna O tl’o xo nkwa, Wene Mong’aka, Modimo wa-ka.”—Psalme 38:9, 15.

[Mengwalo ya ka tlase]

[Diswantšho go letlakala 14]

Diriša thušo yeo Modimo a e neago