Go Tshwenyega Kudu Ka Bobotse

MARIA * ke kgarebe e atlegilego gomme o tšwa lapeng le nago le lerato. Lega go le bjalo, ga a thaba. Ka baka la’ng? Ga a kgotsofatšwe ke ponagalo ya gagwe. Le ge lapa la gabo le leka go mo kgothatša, Maria o nagana gore ga a botse gomme seo se mo gateletša kudu.

José o tšwa lapeng le le hlomphegago gomme go bonagala a na le mabaka ohle a go ka thaba. Eupša o nagana gore a ka se tsoge a hweditše molekane. Ke ka baka la’ng? José o nagana gore e fo ba motho feela e bile ke sekobo. O kgodišegile gore a ka se ke a ratwa ke mosadi le ge e le ofe yo mobotse.

Luis yo a nago le nywaga e seswai, o rata sekolo e bile ke motho wa batho. O rata go raloka le bana bao a tsenago sekolo le bona, eupša gantši o a lla ka gobane ba mo kwera ka ponagalo ya gagwe. Ba re o nonne.

Maemo a mohuta wo a tlwaelegile kudu. Go bolela gore Maria, José le Luis ba fo ba ba na le bothata bja go ikholofela e ka ba go tšea dilo gabonolo. Therešo ke gore ga go motho yo a thabelago go ikwa a sa amogelege ka baka la ponagalo ya gagwe.

Lega go le bjalo, batho ba bantši ba gatelela bohlokwa bja ponagalo ka tsela e feteletšego. Ge e le gabotse, go bonagala eka gantši katlego e ithekgile ka ponagalo. Ka mohlala, go bonagala bontši bja batho ba babotse e le bona ba nago le dibaka tše dintši tša go hwetša mošomo. Pilar Muriedas yo e lego o mongwe wa balaodi ba khampani ya Latin-American and Caribbean Women’s Health Network, o re bakeng sa basadi “bobotse ke se sengwe sa dinyakwa tše bohlokwa tšeo di nyakegago bakeng sa go atlega.” E bile go ya ka Dr. Laura Martínez, basadi ba tseba gabotse gore mafelelong “ponagalo e bolela mo gontši ge go tliwa tabeng ya go hirwa.”

Go ba gona, banna ba bantši le bona ba thomile go tshwenyega kudu ka go nyaka go ba le mmele woo go tšewago gore o phethagetše. Therešo ke gore bontši bja banna le basadi ba dira mo go ntši kudu ge ba phegelela bobotse, ba bile ba ipolaiša tlala goba go ikemišetša go tsena mananeong a bohloko a tša kalafo bakeng sa go ba le difahlego tše dibotse goba mebele e mebotse ka go fetišiša. Na go phegelela mo go na le mohola? Na go na le dikotsi tše di lego gona?

[Mongwalo wa ka tlase]

[Seswantšho go letlakala 19]

Ponagalo ya motho e ka kgoma dibaka tšeo a di hwetšago