Pono ya Beibele

Na go ba Botho ke Leswao la Bofokodi?

“Mohlanka wa Morêna xa a swanêlwa ke dintwa. Se se mo swanetšexo ké xe bohle a ba dira ka botho.”—2 TIMOTHEO 2:24

NAKO e telele pele re ka belegwa, letlalo la rena leo le hlamegago le ba le bokgoni bja go arabela ge le kgongwa. Go tloga ge re belegwa, re kganyoga go kgongwa ka borutho ke mma. Tshekamelo ya rena ya go myemyela, bokgoni bja rena bja go gola maikwelong gotee le kganyogo ya rena ya go ba le bokgoni bja go bolela di tutuetšwa ke tekanyo ya maikwelo a borutho ao re a hwetšago go batswadi ba rena nakong ya ge re sa le bana.

Lega go le bjalo, Beibele e boletše e sa le pele gore mehleng ya bofelo batho e tlo ba “ba xo se kwe batswadi, ba xo se leboxe, ba xo se ile selô. E tlo ba ba-hlala-leratô.” Dika tše botho tše swanago le bopelo-tlhomogi le maikwelo a borutho di ka se be gona ka tekanyo e kgolo, ka ge batho e tlo ba “ba xo ithata” le “ba sehlogo, le ba ba hloyago tše botse (PK).”—2 Timotheo 3:1-3.

Batho ba bantši lehono ba kwa go nyakega gore ba be bogale le go se be le kwelobohloko. Ba bolela gore go ba botho ke leswao la bofokodi. Eupša na go bjalo?

Ke ba Botho, Eupša ba na le Matla

Jehofa Modimo o hlaloswa e le “Moxale dintweng.” (Ekisodo 15:3) Ke  Mothopo o mogolo wa matla ka moka. (Psalme 62:11; Ba-Roma 1:20) Lega go le bjalo, matla a Jehofa ga se a ka a mo thibela go ba ‘le kgaugelo le pelo-tlhomogi’ ge a be a putsa monna wa go botega e lego Jobo. (Jakobo 5:11) Ditirišanong tša gagwe le ba-Isiraele, Jehofa o ile a hlalosa tswalano e bonolo yeo a bilego le yona le bona ka go swantšha maikwelo a gagwe le a mma yo a amušago yo a šokelago “ngwana yo a mmelexexo.”—Jesaya 49:15.

Jesu le yena o be a e-na le matla le botho. O ile a kgalemela baetapele ba bodumedi ba mehleng ya gagwe ka matla. (Mateo 23:1-33) Le gona o ile a ntšha baananyi ba tšhelete ka tempeleng ka matla. (Mateo 21:12, 13) Lega go le bjalo, na go hloya ga Jesu kgobogo le megabaru go ile gwa modira gore a se bontšhe kwelobohloko? Le gatee! Jesu o be a tsebja ka go ba yo botho bathong ba bangwe. Ge e le gabotse, o ile a itshwantšha le sethole seo se “phuthelago matswianyana a sona ka fase ga maphego a sona.”—Luka 13:34, NW.

Na re Swanetše go ba le Ponagalo e Boifišago Goba Matla a ka Gare?

Bakriste ba therešo ba kgothaletšwa go ekiša Kriste ka go ‘apara motho e mofsa, e a bopetšwego go etša Modimo.’ (Ba-Efeso 4:20-24) Re botšwa gore re ‘apole motho e motala le ditiro tša gagwe’ go swana le tlapakgerere yeo e ebolago kgapetla ya yona ya kgale bakeng sa gore yona e gole. (Ba-Kolose 3:9) Lega go le bjalo, ka go se swane le tlapakgerere yeo mmele wa yona o thatafalago ka pela ka morago ga ge e ebotše kgapetla ya kgale, re laelwa go apara “kxauxêlô le botho . . . le xo se fêle pelo” ka mo go sa felego. (Ba-Kolose 3:12) Ka gona, botho e swanetše go ba se sengwe sa dika tša rena tše dikgolo.

Go ba le dika tše bonolo ga se leswao la bofokodi. Go fapana le seo, go nyaka gore “[re be] matla mothong wa teng ka Môya wa xaxwe [Jehofa].” (Ba-Efeso 3:16) Ka mohlala, monna yo a bitšwago Lee o re: “E sego kgale kudu ke be ke le motho yo sehlogo, yo kgopo. Gaešita le ponagalo ya-ka e be e boifiša ka ge ke be ke e-na le mabenyabje ao a bego a phuleletšwe mmeleng wa-ka. Ke be ke ikemišeditše go dira tšhelete e ntši le gona ke be ke sa dika-dike go diriša polelo ya ditšhila le bošoro bakeng sa gore ke hwetše seo ke se nyakago. Ke be ke se na kwelobohloko.” Lega go le bjalo, Lee o ile a thoma go ithuta Beibele le mošomi-gotee le yena gomme o ile a tseba Jehofa Modimo le go mo rata. O ile a hlobola motho wa gagwe e motala gomme o ile a ithuta go bontšha boitshwaro. Ga bjale o bontšha lerato la gagwe go batho ka go ithapela go diriša nako ya gagwe bakeng sa go ba thuša go ithuta Beibele.

Ka nako e nngwe moapostola Paulo le yena e be e le “mohlokofatši” yo a bego a diriša bošoro bakeng sa gore a fihlelele dipakane tša gagwe. (1 Timotheo 1:13; Ditiro 9:1, 2) Lega go le bjalo, ge Paulo a be a thoma go leboga kgaugelo le lerato tšeo Jehofa Modimo le Jesu Kriste ba mmontšhitšego tšona, o ile a arabela ka go ekiša dika tšeo. (1 Ba-Korinthe 11:1) Gaešita le ge Paulo a ile ema a tiile bakeng sa melao ya motheo ya Bokriste, o ile a ithuta go ba yo botho ditirišanong tša gagwe le ba bangwe. Ka kgonthe, Paulo o ile a bontšha bana babo lerato le bonolo ka bolokologi.—Ditiro 20:31, 36-38; Filemone 12.

Go Hwetša Matla a go ba yo Botho

Go etša ge diphihlelo tša Lee le moapostola Paulo di bontšha, go ithuta go dirišana le ba bangwe ka botho ga go nyake gore motho a fokole. Ge e le gabotse, go nyakega se se fapanego le seo. Go nyaka matla a kgonthe bakeng sa go fetola monagano wa motho le ditiro tša gagwe le go lwa le tshekamelo ya go “lefetša . . . bobe ka bobe.”—Ba-Roma 12:2, 17.

Le rena ka mo go swanago re ka ithuta go ba ba botho ka go bala Lentšu la Modimo ka mehla le ka go naganišiša ka lerato le kgaugelo tšeo Jehofa Modimo le Morwa wa gagwe Jesu Kriste ba šetšego ba re bontšhitše tšona. Ka go dira bjalo re tla dumelela matla a Lentšu la Modimo go thapiša dipelo tša rena. (2 Koronika 34:26, 27; Ba-Hebere 4:12) Go sa šetšwe kamoo re godišitšwego ka gona goba gore bophelo bja rena bo bile thata gakaakang, re ka ithuta go ‘dira bohle ka botho.’—2 Timotheo 2:24.

Ge e ba o tla rata go amogela tsebišo e oketšegilego goba o tla rata gore motho yo mongwe a go etele legaeng la gago bakeng sa go tla go swara thuto e sa lefelelwego ya Beibele le wena, hle ngwala gomme o romele leina la gago le aterese ya mo o dulago gona go Jehovah’s Witnesses, Private Bag X2067, Krugersdorp, 1740, South Africa, goba o ngwalele atereseng e swanetšego ye e lokeleditšwego go letlakala 5.

[Seswantšho go letlakala 31]

Tate yo a nago le dika tše botse o bontšha botho go bana ba gagwe