Karolo e Hlomphegago e Kgathwago ke Mma
Karolo e Hlomphegago e Kgathwago ke Mma
KAROLO ya mma gantši e be e sa hlompšhe e bile e tšeelwa fase. Nywaga-some e mmalwa e fetilego, batho ba bangwe ba ile ba thoma go tšeela fase karolo ya go hlokomela bana. Lebaka la bona e be e le gore go be go se bohlokwa go swana le mošomo e bile e be e le sebopego se sengwe sa kgatelelo. Gaešita le ge batho ba bantši ba ka bona kgopolo yeo e le e feteletšego, bo-mma ka tlwaelo ba dirwa gore ba ikwe e ka go hlokomela lapa le bana ke mošomo wa tlasana. Ba bangwe ba nagana gore mosadi o swanetše go šoma mošomo wa boiphedišo e le gore a tle a lemoge bokgoni bja gagwe ka mo go feletšego.
Lega go le bjalo, banna ba bantši go akaretša le bana ba ile ba thoma go leboga karolo ya mma ka lapeng. Carlo yo a hlankelago ofising ya lekala ya Dihlatse tša Jehofa kua Philippines, o hlalosa gore: “Ke mo lehono ka baka la tlwaetšo yeo mma a nneilego yona. Tate o be a re laya ka thata gomme o be a akgofela go re otla, eupša mma o be a re thuša ka go re hlalosetša dilo le go re nea mabaka. Ke tloga ke tšeela godimo tsela ya gagwe ya go ruta.”
Peter mo Afrika Borwa, ke yo mongwe wa bana ba tshelelago bao ba ilego ba godišwa ke mma yo a sa rutegago. Tatagwe o ile a lahla lapa labo. Peter o a gopola: “Mma o be a sa hwetše tšhelete e ntši ka ge a be a šoma dikhitšhing le go hlwekiša diofisi. Go be go le thata go yena gore a re lefelele sekolong ka moka ga rena. Gantši re be re robala ka tlala. E be e le tlhohlo go yena gore a re hweletše madulo. Go sa šetšwe mathata a ka moka, mma ga a ka a lahlela toulo. O ile a re ruta gore re se ke ra ipapetša le batho ba bangwe. Ge nkabe e be e
se ka boikemišetšo bja gagwe bjo sebete, re be re ka se be mo re lego gona lehono.”Monna wa mo-Nigeria e lego Ahmed o hlalosa kamoo a ikwago ka gona ka thušo ya mosadi wa gagwe tabeng ya go godiša bana ba bona: “Ke tšeela godimo karolo yeo mosadi wa-ka a e kgathago. Ge ke se gona gae, ke ba le kgodišego ya gore bana ba-ka ba hlokometšwe gabotse. Go e na le go ikwa e ka mosadi wa-ka o phenkgišana le nna, ke a mo leboga gomme ke dira gore bana ba tsebe gore ba swanetše go mo hlompha go etša kamoo ba ntlhomphago ka gona.”
Monna yo mongwe wa mo-Palestina o reta ka bolokologi go atlega ga mosadi wa gagwe ka tsela ye: “Lina o fihleletše mo gontši kudu ge a be a tlwaetša morwedi wa rena gomme o tlaleletša kudu boemong bja moya bja lapa la rena. Kamoo ke bonago ka gona, o thušwa ke ditumelo tša bodumedi bja gagwe gore a atlege.” Lina ke yo mongwe wa Dihlatse tša Jehofa gomme o latela melao ya motheo ya Beibele ge a ruta morwedi wa gagwe.
E mengwe ya melao ye ya motheo ke efe? Go thwe’ng ka pono ya Beibele ka bo-mma? Bo-mma ba mehleng ya pele ba be ba newa bjang seriti le tlhompho bjalo ka barutiši ba bana ba bona?
Go ba le Pono e Leka-lekanego ka Bo-mma
Ge mosadi a be a bopša o ile a newa karolo e hlomphegago thulaganyong ya lapa. Puku ya mathomo ya Beibele e re: “Morêna Modimo a re: Xa xo botse xe motho a le nnoši; ke tlo mo dirêla modiriši e a mo lebanexo.” (Genesi 2:18) Ka gona mosadi wa mathomo e lego Efa, o ile a bopelwa go ba motlatši, goba modirišani wa Adama. O be a swanelega kudu gore e be mothuši wa gagwe. O be a tla fetoga karolo ya morero wa Modimo wa gore ba be le bana le go ba hlokomela, gotee le go hlokomela lefase le diphoofolo tša lona. O be a tla nea tlhohleletšo ya go nagana ka bohlale le go nea thekgo ya mogwera wa kgonthe. Adama o ile a thaba gakaakang go hwetša mpho ye e botse go tšwa go Mmopi!—Genesi 1:26-28; 2:23.
Ka morago, Modimo o ile a hloma ditaelo tša kamoo basadi ba bego ba swanetše go swarwa ka gona. Ka mohlala, bo-mma ba ba-Isiraele ba be ba swanetše go bontšhwa tlhompho gomme ba be ba sa swanela go swarwa ka lenyatšo. Ge e ba morwa a be a ka ‘roga tatagwe goba mmagwe,’ o be a swanelwa ke kotlo ya lehu. Bafsa ba Bakriste ba be ba kgothaletšwa go ‘kwa batswadi ba bona.’—Lefitiko 19:3; 20:9; Ba-Efeso 6:1; Doiteronomio 5:16; 27:16; Diema 30:17.
Ka tlase ga tlhahlo ya monna wa gagwe mosadi o be a swanetše go ba morutiši wa barwa le barwedi ba gagwe. Morwa o be a laetšwe gore ‘a se lahle thuto tša mmagwe.’ (Diema 6:20) Le gona, Diema kgaolo 31 e-na le “molaetša o matla wo mmago [Kgoši Lemuele] a mo neilego wona bakeng sa go mo phošolla.” (NW) Ka bohlale o ile a hlahla morwa wa gagwe gore a pheme go diriša dino-tagi ka tsela e sa swanelago ka gore: “Di rônana le boxoši, xe kxoši e e-nwa sebelá, xe baxolo ba re: Byalwa bo kae? Ba se tlo re xo nwa, ba xakwa molaô, ba kxopamiša taba ya mang le mang mohlaki.”—Diema 31:1, 4, 5.
Go oketša moo, lesogana le lengwe le le lengwe leo le nyakago go nyala le tla be le dira gabotse ge le ela hloko tlhaloso ya “mosadi wa sethakxa” yeo e ilego ya newa ke mmago Kgoši Lemuele, yo a itšego: “Ké yêna lehumô le le fetaxo dipheta.” Ke moka, ka morago ga go hlalosa karolo e bohlokwa yeo mosadi yo bjalo a e kgathago ka lapeng, mmago kgoši o ile a re: “Botsôrô bo a fora, le botse ké lefêla; mosadi xo rêtwa mo-šia-Morêna.” (Diema 31:10-31) Go molaleng gore Mmopi wa rena o ile a dira mosadi bakeng sa gore a be le maemo a hlomphegago le a boikarabelo ka lapeng.
Ka mo go swanago, ka phuthegong ya Bokriste basadi le bo-mma ba a hlompšha le go lebogwa. Ba-Efeso 5:25 e re: “Lena Banna, ratang basadi ba lena.” Timotheo yo mofsa yo mmagwe le makgolo wa gagwe ba ilego ba mo godišetša go hlompha “Mangwalô a makxêthwa,” o ile a newa keletšo ye: “Bakxekolo O ba eletšê byalo ka e ke ké bô-mm’axo.” (2 Timotheo 3:15; 1 Timotheo 5:1, 2) Ka gona, monna o swanetše go hlompha mokgekolo bjalo ka ge e ka ke mmagwe. Ka kgonthe, Modimo o tšeela basadi godimo gomme o ba nea sebaka se se hlomphegago.
Bontšha Tebogo
Monna yo a godišeditšwego setšong seo go sona basadi ba bego ba lebelelwa e le batho ba tlasana o bolela gore: “Ke ile ka amogela thuto yeo e bego e lebišitše tlhokomelo e kgolo kudu go monna, gomme ke ile ka bona basadi ba swarwa gampe le go hlomphollwa. Ka gona ke ile ka swanela go šoma ka thata bakeng sa go lebelela basadi ka tsela yeo Mmopi a ba lebelelago ka yona—bjalo ka badirišani goba bathuši ka lapeng, le gona e le batšea karolo go ruteng bana. Gaešita le ge go le thata go nna go botša mosadi wa-ka mantšu a theto, ke a lemoga gore bobotse bjo bo lego gona baneng ba-ka ke ka baka la mošomo wa gagwe o thata.”
Ka kgonthe, bo-mma bao ba phethago boikarabelo bja bona bjalo ka barutiši, ba swanetše go ikgantšha ka karolo yeo ba e kgathago. Ke mošomo wa bohlokwa kudu. Ka mo go swanetšego, ba swanelwa ke theto le tebogo e tšwago pelong. Re ithuta mo gontši go bo-mma—mekgwa yeo e re thušago maphelong a rena ka moka, mekgwa e mebotse e lego bohlokwa bakeng sa ditswalano tše botse, gomme gantši re ithuta le tsela yeo ka yona bafsa ba godišwago gabotse ka yona boitshwarong le moyeng bakeng sa go ba thuša go sepela tseleng e nepagetšego. Na morago bjale o ile wa bontšha tebogo go mmago ka baka la dilo tšeo a go diretšego tšona?
[Seswantšho go letlakala 9]
Mmago Peter o ile a mo ruta gore a se ke a lahlela toulo
[Seswantšho go letlakala 10]
Ahmed o leboga kudu mosadi wa gagwe bakeng sa go godiša bana ba bona
[Seswantšho go letlakala 10]
Monna wa Lina o lebiša theto ditumelong tša bodumedi tša mosadi wa gagwe bakeng sa boitshwaro bjo bobotse bja morwedi wa bona