Ke Thabetše go “Sepela Sekgala se se Oketšegilego”
Ke Thabetše go “Sepela Sekgala se se Oketšegilego”
KA GE GO ANEGA CLAIRE VAVY
SEHLAKAHLAKA sa Madagascar seo se lego dikhilomithara tše ka bago tše 400 go tloga nageng ya Mozambique yeo e lego ka Bohlabela bja Afrika, se na le dithaba tše dintši le dithokgwa tše di boifišago tša pula e ntši. Ke belegetšwe motsaneng wa Betoko II wo o lego ka bohlabela bja sehlakahlaka. Ka 1987, ge ke be ke e-na le nywaga e 15, ke ile ka hudugela toropong ya Mahanoro yeo e lego lebopong la lewatle bakeng sa go yo tsena sekolo gona.
Kua Mahanoro ke be ke dula le kgaetšedi ya-ka yo mogolo e lego Celestin, yoo a bego a šetše a thomile go ithuta Beibele le Dihlatse tša Jehofa. Ka morago ga nywaga e mebedi ke ile ka ba Hlatse. Ke be ke ikemišeditše go hlankela Jehofa Modimo ka botlalo kamoo ke bego nka kgona.
Maiteko a go Fihlelela Dipakane Tša-ka
E nngwe ya dipakane tša-ka tša mathomo e be e le go thuša lapa lešo kua gae Betoko II, gomme ke ile ka rapela Jehofa ka mehla mabapi le kganyogo ya-ka. Lega go le bjalo, ke be ke kgona go boela moo ge feela dikolo di tswaletšwe. Leeto la go ya gona e be e le le thata la monabo wa dikhilomithara tše 100. Monabo wa mathomo wa dikhilomithara tše 40 o be o ka sepelwa ka koloi, eupša dikhilomithara tše dingwe tše 60 di be di sepelwa tseleng e sesane ya thabeng yeo e bego e ka sepelwa ka maoto feela.
Ke be ke swanetše go namela merotoga e mentši, gomme dikarolo tše dingwe tša tsela ya lekgwara di be di lekana le bophara bja leoto la-ka ka bosesane. Ge e ba ke be nka thoma leeto la-ka e sa le mesong gomme ke sepele go fihlela ge letšatši le sobela, gantši ke be ke kgona go sepela sebaka sa dikhilomithara tše 40. Ke be ke rwala morwalo wa boima bja dikhilograma tše 15—o mongwe ke be ke o rwala hlogong mola o mongwe ke be ke o bepula gomme o mongwe wo o šetšego ke o swara ka diatla. Ke be ke swara dipuku tša Beibele kudu-kudu, tšeo ke bego ke di nea ba gešo le batho ba bangwe bao ba thabelago. Tseleng yeo ke bego ke e-hlwa ke sepela ka yona ke ile ka thoma go tsebja ka gore ke “motho yola wa merwalo e mentši.”
Mathomong, go sa šetšwe kamoo ke bego ke fišega ka gona, ba gešo ba be ba sa nyake go ntheetša ge ke ba botša ka bodumedi bja-ka bjo bofsa. Lega go le bjalo, go se go ye kae ba ile ba fetoga gomme ba thoma go mpotšiša dipotšišo tše dintši moo ka dinako
tše dingwe re bego re robala ka iri ya bobedi mesong.Leeto Leo Nka se le Lebalego
Ka December 24, 1990, ke ile ka fihla gae kua Betoko II ka dinako tša maikhutšo. Ba gešo ba be ba thabetše go mpona ka ge ba be ba nagana gore ke tletše go tlo ja Keresemose le bona. Ba ile ba nyama ge ke ba hlalosetša gore ke ka baka la eng ke be nka se kgone go kopanela le bona maipshinong a bona a Keresemose. Ba ile ba ikwa ba lewa ke dihlong ge ba nagana ka go tlo hlalosetša batho ba bangwe ba motseng ka taba ye, ka ge e be e le setšhaba seo se bego se ipopile ngatana e tee. Ka gona, ke ile ka bona go le bohlokwa gore e be nna ke ba botšago ka taba ye. Eupša ke be ke tla ba botša bjang?
Ke be ke sa tsebe gore ba tla arabela bjang, kudu-kudu ka ge ke be ke sa le yo monyenyane kudu. Ke be ke ipotšiša ge e ba go tla ba botse ge nka hlalosetša batho ba motseng ka bodumedi bja-ka ba le kua kerekeng letšatšing le le latelago. Ke ile ka rapela thapelo e telele go tšwa pelong ke kgopela Jehofa gore a ntlhahle. Ka morago ga moo ke ile ka botšiša kgaetšedi ya-ka yo mogolo Paul, yoo e bego e le moruti kerekeng ka re: “O nagana gore e ka ba gabotse ge gosasa nka hlalosetša batho kua kerekeng gore ke ka baka la’ng ke sa keteke Keresemose?” O ile a boledišana le ba bangwe go kwa maikwelo a bona, gomme ba ile ba amogela tšhišinyo yeo.
Letšatšing le le latelago ge kereke e e-tšwa, go ile gwa romelwa motho gore a tlo mpitša. Ka morago ga gore ke batamele go Jehofa gape ka thapelo, ke ile ka sepela le sesola sa dikgatišo tša Beibele. Ka morago ga matseno, ke ile ka ba leboga bohle ka tema yeo ba e kgathilego go nthušeng gore ke hlomphe Beibele ka mo go tseneletšego. Ke ile ka ba hlalosetša gore ke ile ka tšwela pele ka go ithuta Beibele ka morago ga gore ke hudugele toropong. Ka ba botša gore ke ithutile ditherešo tše dintši tša Beibele tšeo re sa kago ra di rutwa peleng.
Ke ile ka diriša sebaka seo go ba hlalosetša ka kholofelo e lego ka Beibeleng ya go phela ka mo go sa felego paradeiseng mo lefaseng (Psalme 37:29; Kutollo 21:3, 4), gore ke ka baka la eng batho ba botegago ba palo e nyenyane ba tlago go tšeelwa legodimong (Johane 14:2, 3; Kutollo 5:9, 10; 14:1, 3) le seo Beibele e se rutago ka gore bahu ba swana le motho yo a ithobaletšego, ka go rialo ga go na gore ba a tlaišega (Mmoledi 9:5, 10; Johane 11:11-14, 38-44). Ke ile ka ba bontšha gape le gore Bakriste ba pele ba be ba sa keteke Keresemose le gore mokete woo o thomilwe ke baheitene.
Eitše ge ke feditše go bolela, batho ba bantši sehlopheng ba ile ba dumela gore seo ke se boletšego ke therešo. Ba bangwe ba ile ba ba ba botšiša dipotšišo tše dingwe. Ka morago ga moo ke ile ka ba bontšha dikgatišo tšeo ke bego ke tlile le tšona gomme ka ba hlalosetša gore ke dipuku tšeo di thušago batho go ithuta Beibele tšeo di tšweleditšwego ke Dihlatse tša Jehofa. Ke ile ka ba botša gore ke ikemišeditše go thuša motho le ge e le ofe yo a ka ratago go ithuta Beibele. Ba bantši ba ile ba amogela dikopi tša dikgatišo tša Beibele.
Tiragalo e Makatšago
Ke ile ka batamelwa ke mosadi yo mongwe yoo ke bego ke thoma go mmona gomme a re: “Ngwanešo yo a dulago motsaneng o mongwe, ke yo mongwe wa ba bodumedi bja lena.” Ke ile ka makala, gomme ka mmotšiša gore: “Kae?”
O ile a araba ka gore: “Kua Andranomafana.” Motse wo o bokgole bja dikhilomithara tše 30 go tloga Betoko II.
Ke ile ka botša mosadi yoo gore mohlomongwe ngwanabo o swanetše go ba e le wa bodumedi bjo bongwe ka ge Dihlatse tša tikologong ye di tsebana ka moka. Lega go le bjalo, mosadi yo o ile a phegelela ka go bolela gore ngwanabo o mo rutile tšona dilo tšeo ke di boletšego polelong ya-ka kua kerekeng. Ke ile ka mo kgopela gore a mphe leina le aterese tša ngwanabo ka ge ke be ke fagahlela go ya motseng woo gatee-tee. Lega go le bjalo, mma o ile a nkgopela gore ke
dule letšatši goba matšatšinyana ka ge leeto le be le lapiša, le gona re swanetše go le sepela ka maoto. Ka morago ga matšatši a mabedi, nna le kgaetšedi ya-ka Charles, re ile ra leba Andranomafana.Gatee-tee ge re fihla, re ile ra botšiša batho ba bangwe ba motseng gore: “Afa go na le Dihlatse tša Jehofa mo?” Ke ile ka nyama ge ba araba ka gore: “Motseng wo go na le Makatholika, Mapentekoste le dikereke tša Independent feela.”
Ke moka mosadi yo mongwe o ile a bolelela godimo a re: “Ge e ba e le gore le nyaka Dihlatse tša Jehofa, gona mohlomongwe le nyaka Marceline le lapa la gagwe.” Leo e be e le lona leina leo ke le neilwego!
Motho yo mongwe o ile a ya go yo bitša Marceline. Marceline o ile a fihla ka pela, eupša a bonala eka o tšhoga-tšhogile. Batho ka moka ba motseng ba ile ba re bokanela ka ge ba be ba nagana gore re bahlankedi ba itšego bao ba bego ba tlile go mmotšološiša. Ka morago ke ile ka kwa gore yena le lapa la gagwe ba ile ba tlaišwa motseng ka baka la ge ba be ba latela ‘bodumedi bjo e sego bja orthodox.’
Marceline o ile a re gogela kgojana le lešaba, moo re bego re tla kgona go bolela. Eitše ge ke mmotšiša gore na ke yo mongwe wa Dihlatse tša Jehofa, a araba ka gore ke yena. Ka gona, o ile a ya go yo tšea kopi ya puku ya Therešo e Išago Bophelong bjo bo sa Felego, e lego puku yeo Dihlatse tša Jehofa di bego di e diriša nakong e fetilego bjalo ka puku ya go thuša go ithuta Beibele, a tla le yona gotee le ditokollo tša kgale kudu tša Morokami. Ka moka ga tšona di be di tšofetše e bile di kgeigile. Ke ile ka mmotšiša ka re: “Le ithutile makasine ofe Sontaga e fetilego?”
O ile a araba ka gore: “Tše ke tšona feela ditokollo tšeo re nago le tšona gomme re di bala leboelela.” Ebile ka morago ga fao moo ke ilego ka botša Marceline gore le nna ke yo mongwe wa Dihlatse. O be a thabile kudu! Eitše ge ke mmotša gore ke nyaka go kopana le monna yo a bego a ba swarela diboka, a mpotša gore o tikologong e nngwe yeo le yona e lego kgojana.
Tiragalo e Nngwe Gape e Kgahlišago
Letšatšing le le latelago nna le Marceline re ile ra sepela gotee go yo etela monna yoo. Ge re fihla o be a maketše kudu a bile a thabetše le go re bona. Ge e le gabotse, e be e le Hlatse yeo e tšwago toropong ya Toamasina yeo e lego kgaufsi le lebopo la lewatle, ya bokgole bja go feta dikhilomithara tše 200 go ya thokong ya ka leboa-bohlabela. Yena le lapa la gagwe ba ile ba gapeletšega gore ba boele tikologong yeo nywageng e mmalwa e fetilego ka morago ga gore a lahlegelwe ke mošomo wa gagwe a sa letela. Ka morago ga gore a boe, o ile a thoma go dira boboledi gomme a swara dithuto tša Beibele le diboka.
Hlatse ye le ba lapa la yona ba be ba thabetše go bona makasine o mofsa wa Morokami woo ke bego ke o swere. Ke ile ka ba bontšha gape le
puku ya O ka Phela ka mo go sa Felego Paradeising mo Lefaseng, yeo re bego re e diriša ka nako yeo bjalo ka puku ya motheo ya go thuša go ithuta Beibele. E be e le la mathomo ba e bona. Sontaga se se latelago ke ile ka boela Andranomafana bakeng sa go ba le bona dibokeng. Ke ile ka ba kgothaletša gore ba ikgokaganye le ofisi ya lekala ya Dihlatse yeo e lego motseng-mošate kua Antananarivo ka ge ofisi e be e sa tsebe selo ka sehlopha se se senyenyane.Go thoma ka January 1991, ke be ke e-ya Andranomafana mo e nyakilego e e ba kgwedi e nngwe le e nngwe ke e-tšwa Mahanoro ke ba išetša dikopi tše difsa tša Morokami le dikgatišo tše dingwe. E be e le leeto le le tšeago dikhilomithara tše 130 go ya gona le tše 130 gape go gomela morago, gomme ke be ke sepela dikhilomithara tše ka godimo ga tše 85 ka maoto—ke namelela le go fologa merotoga, meboto e tletšego mafsika, ke putla gare ga dithokgwa tše di boifišago gomme ge pula e be e e-na, ke be ke putla ka thata lerageng le lekoto leo le thelelago.
Morwalo wa-ka o ile wa thoma go imela kutšwanyana ka ge palo ya batho bao ba bego ba nyaka dipuku le dimakasine e be e oketšega. Lega go le bjalo, mafelelong a leeto le lengwe le le lengwe, go lapa ga-ka le go babelwa ke mešifa go be go phohlišwa ke go ikwa ke kgotsofetše kudu e bile ke thabile. Ruri ke be ke thaba go bona kamoo sehlopha se se bego se thaba ka gona ge se amogela kgatišo e nngwe le e nngwe e mpsha le go iponela ka mahlo a-ka ge ba arabela ditherešong tša Beibele!
Go Tsenela Bodiredi bja Nako e Tletšego
Ka September 1, 1992, ke ile kgethwa bjalo ka mmulamadibogo, e lego kamoo Dihlatse di bitšago badiredi ba tšona ba nako e tletšego ka gona. Ke be ke bulamadibogo kua Mahanoro eupša ke ile ka dula ke ikgokaganya le ba gešo kua Betoko II ka lengwalo. Ge nako e dutše e tšwela pele, ba ile ba thoma go ithuta le nna Beibele ka go ngwalelana mangwalo, gomme ba ile ba mpotšiša ge e ba nka kgona go boela motseng woo go tlo ba thuša. Ke be ke ikemišeditše go dira seo, eupša ke be ke nyaka go kgodišega pele gore ba be ba tloga ba ikemišeditše ka phetho yeo ba e dirilego ya go ithuta Beibele le go dira tšwelopele moyeng. Ka gona-ge, ke ile ka tšwela pele ke bulamadibogo ka nako e itšego kua Mahanoro.
Mafelelong a 1993, ke ile ka ba le tokelo ya go ya sekolong sa dibeke tše pedi sa thuto ya babulamadibogo kua Antananarivo. Ka morago ga moo, ke ile ka laletšwe go tsenya kgopelo ya go ba mmulamadibogo yo a kgethegilego, e lego seo se ka bolelago gore nka abelwa go ya le ge e ka ba kae nageng. Lega go le bjalo, ke ile ka dika-dika go amogela kgopelo yeo ka ge ke be ke nyaka go thuša ba gešo kua Betoko II, bao ba bego ba le kgole le phuthego ya kgaufsi. Ka gona-ge, ke ile ka boela kabelong ya-ka ya bobulamadibogo kua Mahanoro.
Mafelelong, ge molebeledi wa tikologo wa Dihlatse tša Jehofa a be a re etetše, ke ile ka mmotšiša ka taba ya go boela gae go yo thuša ba gešo. Ka nako yeo go be go šetše go e-na le phuthego kua Andranomafana, ka gona o ile a šišinya gore ke ye gona e le gore nka ba le phuthego ya moo gomme ke dire boboledi tšhemong ya Betoko II. Ke ile ka thoma kabelo yeo ka September 1, 1994. Gona kgweding yeo, kgaetšedi ya-ka yo mogolo, Paul, yoo e bego e le moruti, o ile a ya le nna kopanong ya selete. Go se go ye kae, ke ge batho ba 30 ba šetše ba dira modiro wa boboledi kua Andranomafana, gomme ka Sontaga palo-kakaretšo ya bao ba bego ba e ba gona dibokeng tša rena e be e le 65.
Ke Ile ka Tšwela Pele ka Mosepelo
Ka moragonyana ga ge ke boetše kua Betoko II, bana bešo ba bane, ba bašemane le ba banenyana, ba ile ba swanelegela go tšea karolo bodireding e le Dihlatse tša Jehofa gomme ka moragonyana ga moo ke ge ba kolobetšwa. Ka morago ga gore ke boele Betoko II, ke be ke dula ke e-ya Anosibe An’ala ka mehla go yo tšea dipuku le dimakasine, leeto leo le bego le tšea dikhilomithara tše 50 go ya gona le tše 50 go gomela morago. Le ge e be e le leeto le le lapišago, lethabo leo ke bilego le lona ka go bona batho ba tikologong yeo ba gola moyeng, le ile la dira gore boitapišo bjoo e se be bja lefeela.
Lehono go na le phuthego e golago kua Betoko II yeo palo-kakaretšo ya batho ba bago gona dibokeng tša gona e ka bago 45 ka Sontaga. Ba gešo ka moka lefelong leo e šetše e le Dihlatse, gomme bontši bja bona ke babulamadibogo ba ka mehla. Kgaetšedi ya-ka yo monyenyane go nna ke mmulamadibogo yo a kgethegilego. Ka November 1, 2001, le nna ke ile ka kgethelwa go ba mmulamadibogo yo a kgethegilego, gomme ke ile ka abelwa go ya motsaneng wa Antanambao-Manampotsy. Eupša ke tlogile kua Betoko II ka pelo e tšhweu.
Ge ke be ke thoma go ithuta ditherešo tša Beibele ka 1987, go be go e-na le Dihlatse tše ka tlase ga 3 000 Madagascar. Bjale go šetše go e-na le tše ka godimo ga 14 000. Go etša bontši bja Dihlatse tše, le nna ke thabetše tokelo yeo ke bilego le yona ya go kgona go diriša matla a-ka bakeng sa go “sepela sekgala se se oketšegilego” e le gore ke thuše batho ba bangwe. Ka gona, ke leboga Jehofa ge a šegofaditše maiteko a-ka go se.
[Diswantšho go letlakala 16, 17]
Gantši ke be ke rwala morwalo wa boima bja dikhilograma tše 15 ke sepela dikhilomithara tše 60 go ya motsaneng wa gešo
[Seswantšho go letlakala 17]
Kgaetšedi ya-ka yo mogolo Paul
[Seswantšho go letlakala 18]
Kgaetšedi ya-ka Charles
[Seswantšho go letlakala 18]
Nna le ditho tše dingwe tša lapa lešo. Ba ka moka ga bona e šetše e le Dihlatse tša Jehofa