Bafsa ba a Botšiša . . .

Ke ka Baka La’ng ke Swanetše go Dira Mošomo wa Diatla?

“Ke be ke sa nagane le gatee gore nka dira mošomo wa diatla. Ke be ke thabela kudu go bapala ka ‘computer’ ya-ka.”—Nathan.

“Bafsa ba bangwe ba be ba re tšeela fase rena bao re bego re dira mošomo wa diatla, go le bjalo ka ge eka ga re a hlalefa ka mo go lekanego go ka dira mešomo e mengwe.”—Sarah.

MOŠOMO WA DIATLA—ba bantši ba o lebelela e le o tšwafišago, wa ditšhila le wo o sa rategego. Moprofesara wa tša boiphedišo o bolela mabapi le mešomo ya diatla gore: “Mešomo yeo ga e na seriti gakaalo lefaseng le leo le ratago maemo.” Ka gona, ga go makatše ge bafsa ba bantši ba nyatša gaešita le kgopolo ka boyona ya go dira mošomo wa diatla.

Lega go le bjalo, Beibele e kgothaletša pono e fapanego kudu mabapi le go šoma ka thata. Kgoši Salomo o itše: “Ga go se se kaone go motho, ge e se go ja le go nwa, le go thabiša pelo ya gagwe ditapišegong tša gagwe.” (Mmoledi 2:24, PK) Mehleng ya Beibele, Isiraele e be e le setšhaba sa balemi. Go lema, go buna le go fola ka moka ga tšona di be di nyaka matla a mmele. Lega go le bjalo, Salomo o boletše gore mošomo o thata o ka tliša meputso e mentši.

Nywaga-kgolo ka morago, moapostola Paulo o ile a re: “E a utswitšexo a se kê a hlwa a utswa; a a kxothalê [“a šome ka thata,” NW] a dirê tše botse ka diatla tša xaxwe.” (Ba-Efeso 4:28) Paulo ka boyena o be a tlwaetše go dira mošomo wa diatla. Gaešita le ge a be a rutegile kudu, ka dinako tše dingwe o be a iphediša ka go dira ditente.—Ditiro 18:1-3.

O ikwa bjang ka go dira mošomo wa diatla? O ka ba o tseba goba o sa tsebe, fela mošomo wa diatla o ka go hola ka ditsela tše dintši.

Tlwaetšo Bakeng sa go Kgona go Iphediša

Go katana ka matla mošomong wa diatla—go sa šetšwe gore o diriša hamola goba o sega bjang—go ka kaonefatša bophelo bjo bobotse  bja mmele. Mehola e ka ba e fetago ya go fo ba le mmele o agegilego gabotse. Na o tseba go lokiša leotwana le tšwilego moya goba go ntšha oli ya kgale koloing le go tšhela e mpsha? Na o kgona go lokiša lefasetere le le thubegilego goba go lokiša phaephe e thibanego? Na o tseba go apea? Na o kgona go hlwekiša ntlwana ya ka thoko gore e šale e thupetše? Bjo ke bokgoni bjoo masogana le dikgarebe ba swanetšego go ba le bjona, bokgoni bjo bo kago go go thuša go phela ka go ikemela ka mo go atlegilego ka letšatši le lengwe.

Ka mo go kgahlišago, go bonala Jesu Kriste ka boyena a ile a ba le bokgoni bja go dira mošomo o itšego wa diatla ge a be a le mo lefaseng. O ile a ithuta modiro wa go betla—ntle le pelaelo a ithuta go tatagwe wa mogodiši, Josefa—ka ge a be a bitšwa mmetli. (Mateo 13:55; Mareka 6:3) Le wena o ka ithuta mešomo e fapa-fapanego ya bokgoni e nago le mohola ka go šoma ka diatla.

Go Hlagolela Semelo se Sebotse

Go dira mošomo o thata go ka kgoma gape le tsela yeo o itebelelago ka yona. Ge a ngwalela U.S. National Mental Health and Education Center, Dr Fred Provenzano o re go ithuta mešomo ya diatla go ka tlaleletša “bokgoning [bja gago] bja go itlhokomela le go ba le kgodišego ka kakaretšo” gomme “go ka ba gwa thuša go hlagolela boitayo le thulaganyo, e lego dika tša motheo tša go atlega mošomong.” Lesogana le le bitšwago John le re: “Mošomo wa diatla o go thuša gore o ithute go se fele pelo. O ithuta tsela ya go rarolla mathata.”

Sarah, yo a tsopotšwego pejana o hlalosa gore: “Go dira mošomo wa diatla go nthutile gore ke šome ka thata le go ba mafolofolo. Ke ithutile go ba le boitayo monaganong le mmeleng.” Na go šoma ka thata e swanetše go ba mo go tšwafišago? Nathan o re: “Ke ile ka ithuta go thabela go šoma mošomo wa diatla. Ge ke dutše ke gatela pele bokgoning bja-ka, ke ile ka bona boemo bja mošomo wa-ka bo kaonefala. Se se ile sa oketša boitlhompho bja-ka.”

Mošomo wa diatla o ka go ruta go fo thabišwa ke go fihlelela selo se itšego. Lesogana le bitšwago James le bea taba ka tsela ye: “Ke thabela go dira modiro wa go betla. Gaešita le ge ka dinako tše dingwe e ka ba o lapišago, ke kgona go bogela seo ke se dirilego gomme ke tlelwe ke maikwelo a go fihlelela selo se itšego. Go kgotsofatša e le ka kgonthe.” Brian le yena o ikwa ka tsela e swanago. “Ke thabela go šoma ka dikoloi. Go tseba gore ke na le bokgoni bja go lokiša selo se se robegilego gomme sa šala se bonala eka ke se sefsa, go nnea maikwelo a kgodišego le kgotsofalo.”

Tirelo e Kgethwa

Go bafsa ba Bakriste, go kgona go šoma ka thata e ka ba thušo tirelong ya bona go Modimo. Ge Kgoši Salomo a be a newa modiro wa go agela Jehofa tempele e kgolo, o ile a lemoga gore wo e be e le mošomo o nyakago matla a magolo le bokgoni. Beibele e re: “Kxoši Salomo a roma motseta a y’o bitša Hirama kwa motseng wa Tiro. E be e le ngwana wa mosadi wa mohlôlôxadi wa leloko la Nafutali; tat’axwe e be e le monna wa Tirô. E be e le morudi wa mphiri, monna yo bohlale le tsebô, maitse medirong ya mehuta-huta ya mphiri. Ó tlile xo Salomo a mo dirêla medirô ya xaxwe.”—1 Dikxoši 7:13, 14.

A tokelo e kaakang yeo Hirama a bilego le yona ya go diriša bokgoni bja gagwe bakeng sa go tšwetša pele borapedi bja Jehofa! Phihlelo ya Hirama e gatelela therešo ya mantšu a Beibele a lego go Diema 22:29 a rego: “Monna-makxônê O mmôna è le mohlanka wa dikxoši; xa a hlankêle batho fêla.”

Lehono, gaešita le bafsa bao ba nago le tsebo e nyenyane goba ba se na le yona go tša go aga, ba bile le tokelo ya go tšea karolo go agweng ga Diholo tša Mmušo. Ka baka la go ba ga bona le karolo medirong e bjalo, ba bangwe ba ithutile mešomo e nago le mohola e bjalo ka go šoma ka mohlagase, go tsentšha diphaephe, go aga ka mafsika le go betla. Mohlomongwe o ka boledišana le bagolo ba phuthegong ya geno ka kgonagalo ya gore le wena o tšee karolo go agweng ga Diholo tša Mmušo.

James, yoo a tsentšego letsogo go agweng ga  Diholo tša Mmušo tše mmalwa o re: “Ba bantši diphuthegong mo gongwe ba ka ba ba se na nako goba bokgoni bja go thuša. Ka gona ge o ithapa, o thuša phuthego ka moka.” Nathan, yo a ithutilego go šoma ka khonkhoriti, o ile a hlokomela gore bokgoni bjo bo bula sebaka se sengwe gape sa go hlankela Modimo. O a gopola: “Ke ile ka kgona go ya Zimbabwe gomme ka diriša bokgoni bja-ka go thušeng go aga ofisi ya lekala ya Dihlatse tša Jehofa. Ke ile ka šoma moo ka dikgwedi tše tharo, gomme yeo e bile e nngwe ya diphihlelo tše thabišago kudu bophelong bja-ka.” Go bafsa ba bangwe, kganyogo ya go šoma ka thata e ba tutueleditše go dira kgopelo ya go hlankela bjalo ka baithapi ofising ya lekala ya Dihlatse tša Jehofa nageng ya gabo bona.

Go ba le bokgoni bja go dira mošomo wa diatla go ka go dumelela gore o kgone go ikemela ka tša ditšhelete. Bafsa ba bantši gare ga Dihlatse tša Jehofa ba hlankela bjalo ka babulamadibogo goba baebangedi ba nako e tletšego. Go ithuta mošomo wa diatla go thušitše ba bangwe gore ba kgone go itlhokomela ka tša ditšhelete ntle le go fetša nako e ntši le tšhelete sekolong.

Kamoo o ka Ithutago ka Gona

Go molaleng gore o ka holwa ke go ithuta mošomo wa diatla, go sa šetšwe gore o nyaka go šoma mošomo wa boiphedišo o le setsebi sa mošomo wa diatla goba gore o nyaka go kgona go lokiša dilo ka gae. Mohlomongwe sekolo sa lefelong la geno se na le dithuto tša go ithutela mešomo ya diatla. Mo gongwe, o ka ba wa hwetša tlwaetšo gona ka gae. Bjang? Ka go ithuta go dira mešomo ya ka gae. Dr. Provenzano, yo a tsopotšwego pejana, o ngwala gore: “Mešomo ya ka gae ke ya bohlokwa kudu go bafsa ba mahlalagading ka gobane e ba ruta ‘bokgoni bja motheo bja go atlega’ mešomong ya ka gae bjoo bo tlago go ba thuša go phela ka katlego le ka bokgoni ka go ikemela ntle le batswadi ba bona ge nako yeo e fihla.” Ka gona phafogela go dira dilo tše di nyakegago ka gae. Na go na le bjang bjo bo nyakago go segwa goba raka yeo e nyakago go lokišwa?

Go e na le go ba wo o theolago seriti, mošomo wa diatla o ka go hola ka ditsela tše dintši. O se ke wa tšhaba mošomo wa diatla! Go e na le moo, katanela go “bôna tše di botse” go tšwa mošomong wa gago o thata, gobane bjalo ka ge Mmoledi 3:13 e bolela, “ké neô ya Modimo.”

[Ntlhakgolo go letlakala 21]

Go ithuta mošomo wa diatla go thušitše bafsa ba bantši go oketša tirelo ya bona go Modimo

[Diswantšho go letlakala 22]

Gantši batswadi ba gago ba ka go ruta bokgoni bja motheo