Pono ya Beibele

Na Modimo o Gohle?

MODIMO o bitšwa ka nepo gore ke yo matla-ohle le yo a tsebago tšohle. Eupša, boitekong bja bona bja go hlalosa bogolo bja Modimo, batho ba bangwe ba oketša ka polelwana ya boraro—yo a lego gohle. Ba dumela gore Modimo ke yo a lego gohle ka nako e tee.

Dipolelwana tša pele tše pedi ke tšeo ka ntle le pelaelo di thekgwago ke dithuto tša Mangwalo. (Genesi 17:1; Ba-Hebere 4:13; Kutollo 11:17) Ka kgonthe Modimo ke yo matla-ohle, e bile o tseba tšohle ka kwešišo ya gore ga go selo le ge e le sefe seo se kago go mo širela. Eupša na Modimo o gohle goba na ke motho yo a dulago lefelong le itšego?

Modimo o Gokae?

Ditemaneng tše mmalwa tša Beibele, ‘magodimo’ a hlaloswa e le ‘bodulo bja Modimo bjo bo tiilego.’ (1 Dikxoši 8:39, 43, 49; 2 Koronika 6:33, 39) Lega go le bjalo, pego e nngwe ya Beibele e hlalosa bogolo bja Jehofa Modimo ka mantšu a latelago: “Afa ruri Modimo a ka dula le batho mono lefaseng? Hleng maxodimo, le maxodimo a xodimo-dimo à sa kxone xo Xo lekana!”—2 Koronika 6:18.

Beibele e re: “Modimo ké Môya.” (Johane 4:24) Ka baka leo, o dula lefelong la moya leo le arogilego legohleng la kgonthe. Ge Beibele e bolela ka “maxodimo” e le bodulo bja Modimo, e bolela ka bophagamo bja lefelo leo a dulago go lona ge le bapetšwa le lefelo la kgonthe leo re dulago go lona. Sa bohlokwa le go feta, Beibele e ruta gore bodulo bja Modimo ke bjo bo fapanego ka mo go feletšego le legohle la kgonthe eupša ka nako e swanago ke lefelo le itšego le kgethegilego.—Jobo 2:1, 2.

Modimo ke Motho

Jesu o ile a bolela ka lefelo leo Jehofa a dulago go lona ge a be a botša barutiwa ba gagwe gore: “Ngwakong wa Tate xo na le madulô a mantši. . . . Ke ya xo Le lokišetša sebaka.” (Johane 14:2) Jesu o ile a ya kae? Mafelelong, “ó tsene xôna-kwa maxodimong, ’me byale ó bônala pele xa sefahloxô sa Modimo ka ’baka la rena.” (Ba-Hebere 9:24) Pego ye e re ruta dintlha tše pedi tša bohlokwa ka Jehofa Modimo. Ya pele ke gore o na le lefelo la kgonthe leo a dulago go lona, gomme ya bobedi ke gore ke motho, e sego matla a sa hlalosegego a dulago gohle.

 Ke ka baka leo Jesu a ilego a ruta barutiwa ba gagwe go rapela ka tsela ye: “Tata-wešo wa maxodimong!,” ba lebiša dithapelo tša bona go motho, Jehofa, yo a lego lefelong le itšego, e lego magodimong a moya. (Mateo 6:9; 12:50) Thuto ye e be e dumelelana le tsela yeo batho ba Modimo ba bego ba rutilwe go rapela ka yona ka nywaga e fetago e 1 500. Mangwalo a kgale kudu go a feta ka moka ao a buduletšwego ke Modimo a na le thapelo e latelago: “A k’O mponê hlê, Ò le bodulong byo bokxêthwa bya xaxo lexodimong, xomme O šexofatšê sethšaba sa xaxo.”—Doiteronomio 26:15.

Moya o Mokgethwa wa Modimo wo o Fihlelelago Tšohle

Gaešita le ge ka mehla Beibele e bolela ka Modimo e le yo a nago le lefelo le itšego la bodulo, gantši e bolela ka moya o mokgethwa e le o lego gohle. Mopsalme o ile a botšiša gore: “Môya wa xaxo nka o efoxa kae? ’Fahloxô sa xaxo nka se thšaba ka ya kae?” (Psalme 139:7) Ba bangwe ba ile ba gakantšhwa ke dipolelo tša go swana le ye, gomme ba ka phetha ka gore Modimo o gohle. Lega go le bjalo, ge re naganišiša ka taba e dikologilego temana ye le ditemana tše dingwe, go ba molaleng gore moya wa Jehofa o mokgethwa—goba matla a šomago—o ka fetišetšwa go tloga lefelong la gagwe le kgethegilego la bodulo gomme wa ya lefelong le ge e le lefe legohleng la kgonthe.

Go swana le letsogo la tate leo le otlolotšwego bakeng sa go homotša le go thekga bana ba gagwe, letsogo la Jehofa—goba moya o mokgethwa—le ka fihla karolong le ge e le efe ya lefelo la moya goba ya legohle la kgonthe e le gore le phethagatše morero wa Jehofa. Ka baka leo, mopsalme o be a ka re: “Xe nka phurolla diphêxô tša mahuba, ka y’o dula kwa maxómong a lewatlê, Le xôna-kua ke tlo hlahlwa ke seatla s’axo; letsôxô l’axo le letona le tlo nthswara.”—Psalme 139:9, 10.

O ka ba Mogwera wa Modimo

Jehofa Modimo ka boikokobetšo le ka lerato o dumelela gore yena gotee le lefelo leo a dulago go lona ba hlaloswe ka dipolelwana tše di kwešišegago go batho tšeo di hlalosago boemo bja gagwe gakaone. Ka tsela ye gotee le tše dingwe, go bjalo ka ge eka o “inamela tlase gore a lebelele magodimo le lefase.” (Psalme 113:6, New International Version) Lega go le bjalo, batho ba ka se ke ba kwešiša ka mo go feletšego tsela yeo Modimo a lego ka yona.

Jehofa e tloga e le wa letago, yo mogolo le yo a kgahlišago kudu gore a ka hlaloswa ka mo go feletšego ka dika tša batho. Ka gona, gaešita le ge Mangwalo a bolela ka bodulo bja gagwe bja legodimong e le bjo bo lego lefelong le itšego, ga go kgonege gore batho ba kwešiše lefelo leo la moya ka mo go feletšego.—Psalme 139:6.

Lega go le bjalo, ke mo go homotšago go ba le kwešišo e itšego ya seo Jehofa a lego sona e le ka kgonthe, re lemoga gore ga se matla a itšego a sa hlalosegego le a se nago maikwelo a lego selong se sengwe le se sengwe legohleng. Go e na le moo, ke motho yo a nago le lefelo le kgethegilego la bodulo le yo a nago le semelo sa kgonthe se se hlaolwago ka dika tše bjalo ka lerato le botho. Tsebo e bjalo e nea batho sebaka se sebotse kudu ka mo go kgonegago—sebaka sa go ba le segwera sa bophelo ka moka le Mmuši Yo Matla-ohle wa legohle.—Jakobo 4:8.