Go Lema Serapana go go Loketše

NA O thabela go lema serapana? Ga o fo hwetša lethabo feela modirong wa gago wa go itloša bodutu. Kuranta ya Independent ya London e bega gore banyakišiši ba hweditše bohlatse bja gore “go lema serapana go lokile bakeng sa gore o phele gabotse mmeleng, go fokotša kgateletšego, go theoša tekanyo ya kgatelelo ya madi gaešita le go go thuša go phela nako e teletšana.”

Mongwadi Gay Search o re: “Ka morago ga letšatši la leema-ema le leo le gateletšago, go imolla gakaakaang go tla gae ke moka wa fetša nakwana serapaneng sa gago.” Go lema serapana ga e fo ba selo se se putsago le se se kgahlišago eupša go ka ba gwa dira gore o itšhidulle ka tsela e phalago ya ge o e-ya lefelong la boitšhidullo. Go bjalo bjang? Go ya ka Search, “mešongwana e swanago le go epa le go haraka ditlakala ke boitšhidullo bjo bobotse bja go iketla, bjoo bo fišago di-calorie tše dintši go feta tšeo di fišwago ke go ragela paesekela.”

Go hlokomela serapana go thuša batšofadi ka mo go kgethegilego. Go emela gore semelana goba letšoba le tšwelele go ba thuša gore ba lete ka kholofelo. Go oketša moo, Dr. Brigid Boardman wa Royal Horticultural Society o bolela gore “serapana se alafa bohloko le kgakanego” tša botšofadi. Batšofadi gantši ba ikwa ba nyamile ka baka la go ithekga kutšwanyana ka ba bangwe. Lega go le bjalo, bjalo ka ge Dr. Boardman a bolela, “go nyaka ga batho go laola boemo go kgotsofatšwa ke go laola ga rena seo re se bjalago, kamoo re rulaganyago serapana ka gona le kamoo se lengwago ka gona. Go nyakega ga go nea tlhokomelo le gona go a kgotsofatšwa.”

Bao ba tlaišwago ke mathata a go se phele gabotse monaganong gantši ba ikwa ba iketlile ge ba šoma tikologong e botse le yeo e nago le khutšo. Go oketša moo, go bjala matšoba goba dijo bakeng sa ba bangwe go ka thuša batho bao go boelwa ke boikholofelo le boitlhompho bja bona.

Lega go le bjalo, ga se balemi ba dirapana feela bao ba holwago ke ditikologo tše ditala. Moprofesara Roger Ulrich wa Yunibesithi ya Texas o dirile boitekelo ka sehlopha sa batho bao ba neilwego tlhahlobo yeo e bakago kgateletšego. O ile a hwetša gore bao ba ilego ba išwa tikologong e tala yeo e dikologilwego ke dihlare ba ile ba boela sekeng kapejana—ka ge se se ile sa elwa ka go pompa ga pelo le kgatelelo ya madi—go feta bao ba sa išwago tikologong e tala. Nyakišišo e swanago e hweditše gore balwetši bao ba boelago sekeng sepetlele ka morago ga go buiwa ba ile ba holwa ke go dula diphapošing tšeo di okametšego dihlare. Ge ba bapišwa le balwetši ba bangwe, ba “ile ba boela sekeng kapejana, ba ya gae kapejana gomme ba nyaka kalafo e nyenyane bakeng sa bohloko e bile ba sa belaele kudu.”

Ge e ba o tla rata go amogela tsebišo e oketšegilego goba o tla rata gore motho yo mongwe a go etele legaeng la gago bakeng sa go tla go swara thuto e sa lefelelwego ya Beibele le wena, hle ngwala gomme o romele leina la gago le aterese ya mo o dulago gona go Jehovah’s Witnesses, Private Bag X2067, Krugersdorp, 1740, South Africa, goba o ngwalele atereseng e swanetšego ye e lokeleditšwego go letlakala 5.