“Na Bagolegwa ba ka Fetošwa?”

Yeo ke potšišo ye e ilego ya rotošwa letlakaleng la ka ntle la tokollo ya “Phafoga!” ya May 8, 2001. Babadi ba bantši ba ile ba bontšha tebogo bakeng sa lelokelelo le la dihlogo, leo le bego le akaretša pego ya mabapi le lenaneo la thuto e theilwego Beibeleng leo Dihlatse tša Jehofa di le dirišago kgolegong ya mmušo kua Atlanta, Georgia, U.S.A. Mantšu a latelago a tsopotšwe mangwalong a mantši ao re a amogetšego.

▪ “Go tloga mola ke bago mogolegwa nywageng e seswai e fetilego, ke hlokomela gore modiro wa go ruta ka Beibele woo Dihlatse tša Jehofa di o dirago dikgolegong o tloga o atlega. Ge ke be ke le kgolegong kua Atlanta, ke ile ka ba le tokelo ya go šoma le ba bahlano ba bao ba bontšhitšwego sehlogong sa lena. Ke ile ka leboga kudu lerato la bona le thekgo ya bona. Ke leboga bana babo rena bao ba nago le dika tše, bao ba bontšhago lerato go rena bao re dirilego phošo eupša re leka go e phošolla e le gore re be batho ba kaone.”—R. J.

▪ “Ga bjale ke lefelong la go kgopamolla mekgwa, gomme bana babo rena bao ba tšwago Holong ya Mmušo ya lefelong le ba ile ba kgona go hloma lenaneo le lebotse la go ruta mo kgolegong. Ka baka leo, mogolegwa-gotee le nna o kolobeditšwe gomme nna, gaešita le ge ke be ke kgaotšwe phuthegong ya Bokriste, ga bjale ke bušeditšwe. Bagolegwa ba bangwe ba bantši ba ithuta Beibele. Ke mo go kgothatšago go tseba gore re karolo ya modiro wa lefase ka bophara wa go ruta. Ke mo gobotse gakaakang go hlankela Jehofa go sa šetšwe moo re lego gona!”—J. M.

▪ “Ka 1970, ke ile ka golegwa bakeng sa bosenyi bjoo ke sa kago ka bo dira. Ke ile ka dula kgolegong nywaga e 14. Ge ke be ke le kgolegong ke ile ka thoma go ithuta Beibele le Dihlatse tša Jehofa. Ke ile ka kgahlwa kudu ke potego ya tšona le go kgomega ga tšona ka batho. Ka morago ga ge ke lokolotšwe, ke ile ka tšwela pele ke ithuta gomme ka kolobetšwa kapejana ka morago ga moo. Ka dinako tše dingwe ke sa dutše ke tlelwa ke kgalefo le tlalelo ka baka la go hloka toka moo ke go kgotleletšego. Eupša ke ikgopotša gore kgaufsinyane Jehofa o tla fediša go hloka toka le tlalelo ka moka. Bagolegwa ba ka fetošwa ge e ba ba latela ditaelo tšeo di lego ka Beibeleng. Le gona ba ka leboga maiteko a bana babo rena bao ba šomago ka thata le bao ba gafago nako ya bona bakeng sa go ba thuša. Nna ke ba leboga e le ka kgonthe!”—R. S.

▪ “Ke tlile kgolegong ke kgoga disekerete, ke diriša dihlare-tagi, ke rogana e bile ke sa hlomphe babuši. Ke be ke bile ke le setho sa sehlopha sa disenyi. Go tlaleletša go tšeo ka moka, ke be ke kgaotšwe phuthegong ya Bokriste. Ga bjale ke bušeditšwe gomme ke dira tšwelopele e botse. Ke ikwa ke šetše ke lokologile ka baka la therešo!”—I. G.