Pono ya Beibele

Na go Fošagetše go Rata Maemo?

“GE E le gabotse ke’ng se se fošagetšego ka botumo, lehumo le matla?” Potšišo ye e tšweletše ka pegong e tšwago go mokgatlo wa bodumedi ka tlase ga sehlogo se se rego, “Mathata Melaong ya Boitshwaro.” Pego e ile ya bolela ka mantšu ao Modimo a a boditšego Aborahama ge a be a re: “Xobane ke tlo Xo dira sethšaba se sexolo; ke tlo Xo šexofatša ka xodiša leina la xaxo.”—Genesi 12:2.

Le ge e be e bolela gore “go rata maemo ga se gwa swanela go phegelelwa ka go gobatša ba bangwe,” pego e ile ya tsopola moruti wa lekgolong la pele la nywaga yo a itšego: “Ge e ba ke sa ipolele, ke tla bolelwa ke mang?” gomme a phetha ka gore: “Ge e ba re sa ntšhe bokgoni bja rena, gona ga go na yo a tlago go bo ntšha.” Na go rata maemo go bea bao ba kganyogago go hlankela Modimo bothateng? Ke’ng seo se akaretšwago tabeng ya go dira seo re se kgonago? Na go fošagetše go rata maemo? Pono ya Beibele ke efe?

Na Aborahama o be a Rata Maemo?

Ka Beibeleng go bolelwa ka Aborahama e le motho wa moswana-noši wa tumelo. (Ba-Hebere 11:8, 17) Modimo o be a sa kgothaletše Aborahama gore a rate maemo ka go mo holofetša gore O be a tla mo dira setšhaba se segolo gomme a godiša leina la gagwe. Modimo o be a bolela morero wa gagwe wa go šegofatša batho ka Aborahama, e lego morero wo o bego o le bohlokwa kudu go feta go fo nyaka ga batho go atlega.—Ba-Galatia 3:14.

Ge a phegelela boineelo bja gagwe go Modimo, Aborahama o ile a tlogela mokgwa wa go phela wo go bego go bonagala e le wa manobonobo le wa tšwelopele kua Uri. (Genesi 11:31) Ka morago, Aborahama o ile a gafa matla le matla a taolo ge a be a nea motlogolo wa gagwe Loto karolo e botse kudu ya naga gore a dule go yona, e le bakeng sa go dira khutšo. (Genesi 13:8, 9) Ga go na selo pegong ya Beibele seo se bontšhago gore Aborahama e be e le monna yo a ratago maemo. Go e na le moo, tumelo ya gagwe, go kwa ga gagwe le boikokobetšo bja gagwe ke tšona di ilego tša mo dira gore a ratwe ke Modimo e le “mogwera” wa Gagwe.—Jesaya 41:8, NW.

Pono e Fapanego ka Maemo, Botumo le Matla

Go rata maemo go hlaloswa e le “kganyogo e feteletšego ya go nyaka maemo, botumo goba  matla.” Mehleng ya bogologolo Kgoši Salomo o be a e-na le maemo, botumo le matla gotee le lehumo le lentši. (Mmoledi 2:3-9) Lega go le bjalo, se se kgahlišago ke gore ga se a di tsoma ka kganyogo e feteletšego. Ge Salomo a be a tšea bogoši go tatagwe, Modimo o ile a mo laletša gore a kgopele selo le ge e le sefe seo a bego a nyaka go ba le sona. Salomo ka boikokobetšo o ile a kgopela pelo e kwago le tlhaloganyo goba temogo yeo e nyakegago bakeng sa go buša setšhaba sa Modimo se se kgethilwego. (1 Dikxoši 3:5-9) Ka morago ga ge a hlalositše ka botlalo lehumo le matla tšeo a bego a e-na le tšona, Salomo o ile a bolela gore ‘tšohle e be e le lefeela le go phuthela phefo ka kobo.’—Mmoledi 2:11.

Na go na le seo Salomo a ilego a se bolela mabapi le go dira ga batho dilo tšeo ba di kgonago? O kgomile seo ka tsela e itšego. Ka morago ga go hlahloba diphihlelo tša gagwe tše dintši bophelong, phetho ya gagwe e bile e rego: “Boifa Modimo wa therešo gomme o boloke ditaelo tša gagwe. Ka gobane se ke tlamo yohle ya motho.” (Mmoledi 12:13, NW) Batho ba fihlelela dilo tšeo ba di kgonago, e sego ka baka la go hwetša maemo, lehumo, botumo goba matla, eupša ka go dira thato ya Modimo.

Boikokobetšo bo Lebiša go Godišweng

Ke therešo gore ga go na phošo ka go ithata ka tsela e lekanyeditšwego. Beibele e re laela gore re rate baagišani ba rena ka mokgwa wo re ithatago ka wona. (Mateo 22:39) Ke ga tlhago go kganyoga go ba le boiketlo le lethabo. Eupša Mangwalo gape a kgothaletša go šoma ka thata, boikokobetšo le boipoetšo. (Diema 15:33; Mmoledi 3:13; Mika 6:8) Batho ba botegago le bao ba ka botwago e bile e le ba šomago ka thata gantši ba a lemogwa, ba hwetša mešomo e mebotse gomme ba a hlompšha. Ga go pelaelo gore go latela tsela ye go phala go retologela tabeng ya go ikhola ka ba bangwe goba go phadišana le ba bangwe bakeng sa go hwetša boemo.

Jesu o lemošitše batheetši ba gagwe malebana le go ikgethela ditulo tša ka pele monyanyeng wa lenyalo. O ile a ba eletša gore ba dule ditulong tša morago gomme ba tlogelele yo a ba laleditšego gore e be yena a ba dudišago ditulong tša ka pele. Jesu ge a hlalosa gabotse molao wa motheo wo o akaretšwago, o itše: “Bohle ba ba ikxodišaxo ba tlo kokobetšwa; e a ikokobetšaxo ó tlo xodišwa.”—Luka 14:7-11.

Bakriste ba Therešo ba Phema go Rata Maemo

Beibele e bontšha gore go rata maemo ka tsela ya boikgogomošo go tswalanywa le go se phethagale ga batho. (Jakobo 4:5, 6) Moapostola Johane o kile a rata maemo. O be a tloga a nyaka maemo ka mo go feteletšego mo e lego gore yena gotee le ngwanabo, ba ile ba ba le sebete sa go kgopela Jesu gore a ba bolokele maemo a phagamego Mmušong. (Mareka 10:37) Ka morago Johane o ile a fetoša boemo bja gagwe bja kgopolo. Ge e le gabotse, lengwalong la gagwe la boraro, o ngwadile mantšu a matla a go sola Dioterefe, yoo a boletšego ka yena gore o ‘rata go ba mogolo wa bona.’ (3 Johane 9, 10) Bakriste lehono ba latela ka potego mantšu a Jesu gomme ba a ikokobetša, ba le gare ba latela mohlala wa moapostola Johane yo a tšofetšego, yoo a ilego a ithuta go phema ditshekamelo tša go rata maemo.

Lega go le bjalo, ge e le gabotse, go swanetše go bolelwa gore ditalente tša motho, bokgoni bja gagwe, ditiro tša gagwe tše dibotse le go šoma ga gagwe ka thata, e le tšona ga di kgonthišetše gore motho o tla tšeelwa godimo. Ka dinako tše dingwe di retwa ke magagabo rena gomme ka dinako tše dingwe ga go be bjalo. (Diema 22:29; Mmoledi 10:7) Ka dinako tše dingwe, batho bao ba sa swanelegego gakaalo ba ka bewa maemong a taolo, mola batho bao ba nago le bokgoni kudu ba ka no se elwe hloko. Lefaseng le leo le sa phethagalago, bao ba hwetšago maemo le matla e ka no se be batho bao ba swanelegago kudu.

Go Bakriste ba therešo taba ya go rata maemo ga e bake mathata melaong ya boitshwaro. Matswalo a bona ao a tlwaeditšwego ka Beibele a ba thuša gore ba pheme go rata maemo. Ba tloga ba leka ka thata go dira sohle seo ba ka se kgonago maemong ka moka, bakeng sa go nea Modimo letago, gomme ba tlogelela mafelelo a seo diatleng tša gagwe. (1 Ba-Korinthe 10:31) Bakriste ba katanela go dira seo ba se kgonago ka go boifa Modimo le go boloka ditaelo tša gagwe.

[Seswantšho go letlakala 12]

Na Modimo o ile a kgothaletša Aborahama go rata maemo?