Nkgokolo ya Letswai

KA MONGWADI WA PHAFOGA! KUA ZAMBIA

Ke eng seo se tlago mogopolong wa gago ge o nagana ka letswai? Mohlomongwe o nagana ka letswai leo le sa šilwago, letswai la ka lewatleng goba letswai le le šitšwego. Eupša na o kile wa kwa ka letswai la Cibwa, leo le tšwago tikologong ya Mpika, Profenseng ya ka Leboa ya Zambia? Selo seo se dirago gore letswai la Cibwa e be la moswananoši ke gore le hwetšwa bjanyeng!

Batho bao ba dulago kgaufsi le mohlaka wa Cibwa ba diriša mokgwa wa moswananoši wa go ntšha letswai bjanyeng bjo botelele bjo bo melago kgaufsi le Noka ya Lwitikila. Ba buna bjang go tloga ka August go fihla ka October, pele ga ge sehla sa dipula se thoma. Ge dipula di thoma go tšhologa, bjang ga bo sa tšweletša letswai le gatee.

Ka morago ga ge bjang bo segilwe le go omišwa, bo a fišwa e le gore go tlošwe dilo tše di sa nyakegego. Lega go le bjalo, letswai ga le fse. Le šala moloreng. Molora o tsenywa ka gare ga sebjana se bjalo ka kgapa, gomme meetse a sefša ka go nanya moloreng. Meetse a tološa letswai ke moka a tšwa le lona mašobeng a manyenyane botlaseng bja kgapa. Meetse ao a letswai a a kgoboketšwa bakeng sa mogato o latelago—go a pšheša ka letšatši.

Phišo e tšwago letšatšing ka go lebanya e dirišetšwa go pšheša meetse, e lego mogato woo o ka tšeago diiri tša go fihla go tše tshela. E le gore se se dirwe, sa mathomo meetse a letswai a tšhelwa ka gare ga pitša ya letsopa gomme a bedišwa mollong wa fase. Ge meetse a dutše a e-pšha go okeletšwa ka a mangwe a letswai. Mogato wo o tšweletša motswako o mokoto wa letswai wo mafelelong o tlatšago pitša. Ke moka pitša e fetoga sedirišwa sa go bopa. Ka morago ga ge e tlošitšwe mollong le go thubja, go šala nkgokolo ya letswai.

Badudi ba tikologong ye ba be ba dutše ba dira letswai la Cibwa ka nywaga e mentši. Ga go na yo a tsebago gore ke mang yo a thomilego mokgwa wo. Lega go le bjalo, go a makatša gore gaešita le ge karolo ye ya magaeng yeo e lego kgole ya naga ya Zambia e e-na le tsebo e nyenyane ka dilo tša sebjale-bjale, mokgwa o swanago wa tša thutamahlale wa go dira letswai ka tsela ya sebjale-bjale o a tsebja le moo.

[Seswantšho go letlakala 26]

Kgapa e sefa meetse

[Seswantšho go letlakala 26]

Letswai

[Seswantšho go letlakala 26]

Pitša ya letsopa