Pono ya Beibele

Na o Swanetše go Boifa Haramagedone?

“HARAMAGEDONE” ke’ng? Ge le hlaloswa ka tsela e bonolo, lentšu le le šupa boemo bjoo go bjona babuši ba lefase ba bokanego bakeng sa go ganetša Modimo le Mmušo wa gagwe woo kgoši ya wona e lego Jesu Kriste. Pukung ya Beibele ya Kutullo, moapostola Johane o ile a bona pono yeo go yona babuši ba bokanego bakeng sa go ganetša Modimo lefelong la seswantšhetšo leo le bitšwago Haramagedone.

Lentšu “Haramagedone” le tšwelela gatee feela ka Mangwalong, eupša ka ge e le lentšu la seswantšhetšo leo le dirišwago lehono, le dirišwa ka tsela e nabilego. Lentšu le le be le dirišetšwa go bolela dikotsi tše dikgolo le tše dinyenyane tše bjalo ka go fedišwa ga ditšhaba ka ntwa ya nuclear goba tshenyo yeo e bakwago ke virus ya computer. Dipuku tše mmalwa tšeo di rekwago kudu di be di bolela ka seo go thwego ke mehla ya bofelo, goba mehla ya pele ga Haramagedone. Nywageng e lesome e fetilego go ile gwa rekwa dikopi tše di fetago dimilione tše 60 tša lelokelelo la dipuku tša dipadi tšeo le tšona di bolelago ka taba ye.

Batho ba bangwe ba boifa Haramagedone. Ba nagana gore batšhošetši, ditšhaba tšeo di bakago ntwa goba dikotsi tšeo batho ba sa kgonego go di laola di tla baka khuduego ya lefase ka moka gomme tša dira gore lefase le se hlwe le kgona go thekga bophelo. Ba bangwe ba dumela gore Modimo ka boyena ka baka la kgalefo o tla fediša polanete ya rena le dilo ka moka tšeo di lego go yona ka nako e swanetšego. Ditebelelo tše di a tšhoša e le ka kgonthe! Eupša ge e le gabotse re swanetše go kwešiša bjang ‘ntwa ya mohla-mogolo wa Modimo Ra-matla-ohle’ ya Haramagedone?—Kutollo 16:14, 16.

Na Lefase le tla Fedišwa?

Batho ba ka se ke ba fedišwa ka moka ka Haramagedone. Re tseba bjang seo? Beibele e re kgonthišetša gore “ké mo xo bônalaxo xore Modimo, ba ba mmoifaxo ó ba hlakodiša melekong; bakxôpô ó ba bolokêla kôtlô ya ’tšatši la kahlolô.” (2 Petro 2:9) Ka gona, re ka kgodišega gore Modimo o tla laola matla a gagwe a sa lekanywego ka tsela e swanetšego. Ke feela bao ba ganago bobuši bja Modimo bao ba tlago go lebeletšana le kgalefo ya gagwe ka Haramagedone. Go ka se be le bao ba tlago go phologa ka lešobana la nalete.—Psalme 2:2, 9; Genesi 18:23, 25.

Beibele e re botša gore Modimo o tla “senya basenya-lefase.” (Kutullo 11:18) Ka gona go molaleng gore morero wa Jehofa Modimo ga se go fediša lefase leo e lego polanete ya rena. Go e na le moo, o tla fediša lekoko la batho ba kgopo bao ba ganetšago bobuši bja gagwe.  Se se swana le seo a se dirilego nakong ya Meetse-fula a mehleng ya Noage.—Genesi 6:11-14; 7:1; Mateo 24:37-39.

‘Letšatši le le Boifišago’

Ke therešo gore bontši bja diporofeto tša Beibele tšeo di bolelago ka phedišo e tlago ke tše tšhošago. Ka mohlala, moporofeta Joele o boletše ka “’tšatši le lexolo le le siišaxo la Morêna.” (Joele 2:31, mongwalo o sekamego ke wa rena.) Dibetša tša Modimo di akaretša lehlwa, sefako, tšhišinyego ya lefase, bolwetši bjo bo fetelago, pula ya meetse-fula, pula ya mollo le tshebela, kgakanego e boifišago, legadima le kotlo ya go bola ga mmele. * (Jobo 38:22, 23; Hesekiele 38:14-23; Habakuku 3:10, 11; Sakaria 14:12, 13) Le gona Beibele e bolela ka mo go kwagalago ka nako yeo ka yona ditopo di tlago go tlala lefase, di tlogetšwe bjalo e le mmutedi goba e le dijo tšeo di tlago go lewa ke dinonyana le diphoofolo tše dingwe. (Jeremia 25:33, 34; Hesekiele 39:17-20) Poifo e tla aparela manaba a Modimo nakong ya ntwa ye.—Kutollo 6:16, 17.

Na se se bolela gore barapedi ba kwago ba Modimo wa therešo ba swanetše go boifa ditiragalo tše di makatšago tšeo di tlago go direga nakong ya Haramagedone? Ga se ba swanela go boifa ka gore bahlanka ba Modimo ba lego lefaseng ba ka se tšee karolo ntweng ye. Go feta moo, ba tla šireletšwa ke Jehofa. Go dutše go le bjalo, barapedi ba therešo ba tla makala ka lethabo ge ba bona go bonagatšwa ga matla a Modimo ka tsela e boifišago.—Psalme 37:34; Diema 3:25, 26.

Lega go le bjalo, moapostola Johane o ile a budulelwa ka mo go lemogegago gore a re kgonthišetše ka mantšu a rego: “Wa lehlôxônôlô ké eo a xomarêlaxo ditaba tša porofetô ya puku yê,” go akaretša le temošo ya go lemoša ka Haramagedone. (Kutollo 1:3; 22:7) Na go naganišiša ka Haramagedone go ka dira gore motho a thabe? Ge e ba go le bjalo, se se ka kgonega bjang?

Modimo o Nea Temošo

Ge ledimo le legolo le batamela, batho ba lego maemong a bolaodi lefelong leo ba nea ditemošo bakeng sa gore maphelo a batho a šireletšege. E le go kgonthišetša gore motho yo mongwe le yo mongwe o kwa ditemošo tšeo, maphodisa a ka rongwa gore a tsene ka ntlo le ntlo goba a diriše mekgwa ya go lemoša bakeng sa go lemoša ka kotsi e tlago. Morero wa dilo tše ka moka ga se go tšhoša batho eupša ke go ba thuša gore ba gate mogato wa gore ba kgone go phološa maphelo a bona. Batho ba nago le temogo ba amogela temošo ka lethabo gomme bao ba gatago mogato ka bjako ka morago ba thabela gore ba ile ba dira bjalo.

Go bjalo le ka molaetša wa Modimo wa temošo woo o re lemošago ka “ledimo” le le tlago ka lebelo la Haramagedone. (Diema 10:25) Jehofa o re neile ditaba ka botlalo mabapi le ntwa ya gagwe a diriša Lentšu la gagwe le le ngwadilwego. Kganyogo ya gagwe ga se go re tšhoša eupša ke go re nea temošo e kwagalago le go thuša batho gore ba sokologe gomme ba iteke ka matla gore ba mo hlankele. (Tsefanya 2:2, 3; 2 Petro 3:9) Bao ba gatago mogato o bjalo ba tla šegofatšwa ka gore ba phološwe. Ka gona, ga se ra swanela go boifa ntwa e batamelago ya Modimo. Go e na le moo, re ka lebelela pele re e-na le kgodišego ya gore “ba tl’o xo phološwa ke ba rapêlaxo ’ina la Morêna.”—Joele 2:32.

[Mongwalo wa ka tlase]

[Seswantšho go letlakala 30]

Ge ledimo le legolo le batamela, batho ba lego maemong a bolaodi ba lefelong leo ba nea ditemošo e le gore maphelo a batho a šireletšege

[Seswantšho go letlakala 31]

Molaetša wa Modimo wa temošo mabapi le Haramagedone ke temošo ya gore go gatwe mogato wa go phološa maphelo